Iu Savve Win Nomata Wanem Training Iu Kasem Taem Iu Pikinini

NICHOLAS garem wei for bighed start kam from taem hem smol boy yet.a Gogo, wei wea hem no feelim eni peace leadim hem for iusim olketa drug and drinkim tumas alcohol. Nicholas talem reason: “Dadi bilong mi hem depend long alcohol and hem mekem mi and sista bilong mi safa tumas.”

Pipol savve tingim mami and dadi bilong Malinda, olsem olketa wea pipol respectim and wea evritaem attendim church. Bat pipol no savve hao tufala barava insaed long wanfala cult. “Malinda wea distaem hem winim 30 year hem sei witim sorre feeling: “Samfala samting olketa duim saed long datfala cult barava spoelem mi, and finisim evribit spirit bilong mi.” Hem sei moa: “Mi no savve rememberim eni taem long laef bilong mi wea feeling for no garem hope and wei for feel olsem mi iusles hem no part bilong mi.”

Hu nao savve denyim hao raf fasin, fasin for spoelem narawan, and wei wea mami and dadi no lukaftarem gud pikinini, spoelem finis living bilong planti pipol taem olketa pikinini yet? Olketa kill wea pipol garem saed long feeling from taem olketa pikinini, savve deep. Bat waswe, kaen pain olsem saed long feeling mas spoelem for olowe chance bilong man for acceptim truth from Word bilong God and faendem hapi? Nomata long samting wea happen taem tufala pikinini yet, waswe, Nicholas and Malinda savve win olsem pipol wea faithful? Tingim firstaem example bilong King bilong Judah, Josiah.

Wanfala Example from Bible

Josiah rulim Judah for 31 year long mek-seven century B.C.E. (659-629 B.C.E.) Taem Josiah kamap king bihaen olketa killim dae dadi bilong hem, living long Judah hem barava nogud tumas. Judah and Jerusalem fulap witim olketa worshiper bilong Baal and olketa wea mekem olketa promis long nem bilong main god bilong olketa Ammonite, Malcam. Zephaniah, wanfala profet bilong God long datfala taem, talem hao olketa prince bilong Judah olsem “olketa lion wea singaot,” and olketa judge olsem “olketa wolf bilong evening.” From diswan, datfala ples hem fulap witim raf fasin and giaman fasin. Long heart bilong olketa, planti sei: “Jehovah bae no duim gud samting, and hem bae no duim nogud samting.”—Zephaniah 1:3–2:3; 3:1-5.

Josiah hem kamap wanem kaen ruler? Man wea raetem history, Ezra, hem raet: “[Josiah] go ahed for duim wanem hem stret long eye bilong Jehovah and for wakabaot followim olketa wei bilong laen dadi bilong hem David, and hem no tan go long raet saed or long left saed.” (2 Chronicles 34:1, 2) Luk olsem Josiah hem win for duim wanem hem stret long eye bilong God. Bat waswe long dadi and grandadi bilong hem?

Lukaftarem or Spoelem Young Laef?

Taem Josiah hem born long 667 B.C.E., dadi bilong hem 16 year nomoa, and grandadi bilong hem Manasseh rul ovarem Judah. Manasseh hem wanfala king wea wicked winim klosap evri narafala king wea rulim Judah. Long wei for putim olketa altar for Baal, “hem duim long barava bigfala wei wanem hem nogud long eye bilong Jehovah.” Hem mekem olketa son bilong hem go thru long fire, duim magic, iusim divination, apim wei for duim spiritism, and kapsaetem blood bilong staka man wea no guilty. Manasseh putim long haos bilong Jehovah tu, olketa image bilong datfala holy post wea hem mekem. Hem switim Judah and Jerusalem “for duim samting wea worse winim olketa nation wea Jehovah finisim evribit front long olketa son bilong Israel.”—2 Chronicles 33:1-9.

Wei wea Manasseh hem barava nogud hem showaot taem Jehovah mekem olketa taemapem hem witim chain and tekem hem go long Babylon, wanfala long olketa royal taon bilong king bilong Assyria. Taem hem stap olsem prisoner hem repent, kamap hambol, and begim Jehovah for forgivim hem. God hem lisin taem Manasseh askem hem for forgivim hem and mekem hem king moa long Jerusalem. Manasseh startim olketa wei for stretem olketa nogud samting and hem win lelebet long datwan.—2 Chronicles 33:10-17.

Hao nao wei wea firstaem Manasseh hem nogud and then hem repent affectim son bilong hem Amon? Hem kamap barava wicked. Taem Manasseh hem repent and trae hard for aotem from datfala nation dirty samting wea hemseleva nao startim, Amon no interest. Amon hem 22 year taem hem changem dadi bilong hem for rul, and hem “go ahed for duim samting wea nogud long eye bilong Jehovah olsem dadi bilong hem Manasseh duim firstaem.” Winim wei for mekem hemseleva hambol front long Jehovah, “Amon hem wanfala wea mekem wei for guilty kamap moa big.” (2 Chronicles 33:21-23) Josiah hem six year nomoa taem Amon kamap king bilong Judah. Living bilong Josiah taem hem pikinini mas barava nogud nao!

Wicked rul bilong Amon hem finis bihaen tufala year taem olketa servant bilong hem mekem plan for againstim hem and killim hem dae. Bat olketa pipol killim dae olketa hia wea againstim Amon and mekem son bilong hem, Josiah, king.—2 Chronicles 33:24, 25.

Nomata long olketa nogud samting wea happen taem hem pikinini yet, Josiah go ahed for duim gud samting long eye bilong Jehovah. Rul bilong hem barava win evribit, dastawe Bible hem sei: “No eni king bifor long hem olsem hem long wei for kam bak long Jehovah witim full heart bilong hem and witim full soul and witim full strong bilong hem, long wei for followim evribit law bilong Moses; and no eniwan wea kamap bihaen long hem olsem hem.”—2 Kings 23:19-25.

Example bilong Josiah savve barava encouragem olketa wea mas deal finis witim barava nogud samting taem olketa pikinini yet! Wanem nao iumi savve lanem from example bilong hem? Wanem nao helpem Josiah for chusim stretfala wei and go ahed for followim?

Trae for Savve Long Jehovah

Samwan wea helpem Josiah taem hem young yet hem grandadi bilong hem Manasseh wea repent. Bible no talem haomas taem tufala stap tugeta, and age bilong Josiah taem Manasseh stretem olketa wei bilong hemseleva. From olketa member bilong Jew famili klos, maet Manasseh hem trae for sevem granson bilong hem from olketa nogud samting wea stap raonem hem long wei for putim wei for respectim trufala God, Jehovah, and word bilong hem insaed long heart bilong hem. Olketa seed bilong truth wea Manasseh hem plantim insaed long heart bilong Josiah, witim maet eni nara gud samting, gogo olketa garem frut. Bihaen hem rul for eit year, Josiah wea hem 15 year long datfala taem, laek for savve long Jehovah and duim will bilong hem.—2 Chronicles 34:1-3.

Only spiritual help wea samfala garem taem olketa pikinini hem from wanfala relative wea stap farawe, fren, or wanfala neiba. Nomata olsem, sapos samwan lukaftarem olketa seed hia, olketa savve garem frut bihaen. Malinda, wea iumi storyim finis, garem wanfala neiba wea olsem wanfala grani long hem wea evritaem tekem kam long haos bilong hem olketa Wastaoa and Wekap! magasin. Taem hem ting go bak hem sei: “Samting wea mi barava tinghae long hem nao hem wei wea neiba bilong mi no celebratem olketa holiday. Diswan hem important long mi bikos Halloween and samfala nara holiday hem taem wea olketa insaed long cult bilong parents bilong mi duim olketa kastom samting.” Tenfala year bihaen, taem wanfala fren invaetem Malinda for attendim wanfala Christian meeting long Kingdom Hall bilong Olketa Jehovah’s Witness, hem rememberim disfala neiba and stretawe acceptim datfala invitation. Datwan helpem hem for lukaotem truth.

Stap Hambol Front Long God

Main samting wea showaot abaotem rul bilong Josiah hem olketa change wea kamap long Judah saed long religion. Bihaen sixfala year wea hem waka hard for stopem wei for worshipim idol long Judah, Josiah start for repairim haos bilong Jehovah. Taem datfala waka go ahed, Hae Priest Hilkiah faendem barava spesol samting! Hem faendem firstfala copy bilong “buk bilong olketa law bilong Jehovah.” Hilkiah givim disfala buk long secretary bilong hem Shaphan, and sendem hem go for talem king samting wea happen. Waswe, olketa samting wea Josiah wea 25 year duim mekem hem garem praodfala fasin?—2 Chronicles 34:3-18.

Olsem Ezra raetem: “Stretawe bihaen king herem olketa word bilong law hem brekem kaleko bilong hem.” Diswan hem wei for showimaot sorre from heart bikos hem luksavve hao olketa laen dadi bilong hem no obeyim evri komand bilong God. Tru nao, diswan showimaot hambol fasin! Stretawe king appointim faevfala man for askem Jehovah abaotem diswan thru long datfala woman profet Huldah. Olketa kam bak and talem samting olsem: ‘Bigfala trabol bae kam bikos long wei for no obeyim Law bilong Jehovah. Bat from iu, King Josiah, mekem iuseleva hambol, iu bae go long grev bilong iu long peace and bae no lukim disfala bigfala trabol.’ (2 Chronicles 34:19-28) Jehovah hem hapi witim wei wea Josiah ting long diswan.

Nomata wanem hem happen long iumi taem iumi pikinini, iumi tu savve mekem iumiseleva hambol front long trufala God, Jehovah, and showimaot respect long hem and Word bilong hem, Bible. Nicholas wea disfala article storyim finis hem duim diswan. Hem sei: “Nomata laef bilong mi fulap witim olketa problem from mi iusim olketa drug and drink tumas, mi interest long Bible and barava want for garem wanfala purpose long laef. Gogo, mi meetim Olketa Jehovah’s Witness, changem living bilong mi, and barava followim truth.” Tru nao, iumi savve garem wei for respectim God and Word bilong hem nomata long living bilong iumi.

Kasem Gud Samting From Arrangement Bilong Jehovah

Josiah garem deep respect tu for olketa profet bilong Jehovah. Hem no ask long datfala woman profet Huldah nomoa, bat olketa nara profet long datfala taem barava affectim hem tu. Olsem example, Jeremiah and Zephaniah busy for tok againstim wei for worshipim olketa idol long Judah. Iumi sure hao wei wea hem lisin gud long message bilong olketa mekem Josiah fulap witim strong taem hem go ahed for againstim giaman worship!—Jeremiah 1:1, 2; 3:6-10; Zephaniah 1:1-6.

Datfala “masta” Jesus Christ, appointim datfala grup bilong olketa anointed follower bilong hem—“faithful and wise slave”—for provaedem spiritual kaikai long barava taem. (Matthew 24:45-47) Thru long olketa Bible pablikeson and arrangement bilong kongregeson, slave class hem mekhae long olketa gudfala samting wea kamaot from wei for followim kaonsel insaed long Bible and givim olketa gudfala idea abaotem hao for followim kaonsel hia long evriday living bilong iumi. Hem barava fitim for iumi iusim arrangement bilong Jehovah for winim olketa nogud wei for ting long samting wea iumi garem for longtaem finis! From taem hem pikinini, Nicholas garem strongfala feeling for no laekem olketa wea garem paoa. Nomata taem hem lanem truth from Word bilong God, diswan stopem hem for servem Jehovah long wei wea moa big. Hem barava hard tumas for hem changem tingting bilong hem. Bat, gogo, hem win. Hao nao olsem? “Witim help bilong tufala elder wea minim diswan,” Nicholas hem explainim, “mi talemaot problem bilong mi and start for followim loving kaonsel wea olketa givim from Bible.” Hem sei moa: “Nomata samfala taem mi garem nogud feeling, distaem mi savve kontrolem bighed fasin wea mi garem.”

Malinda tu hem lukaotem advaes bilong olketa elder taem hem disaedem olketa important samting long laef bilong hem. For deal witim wei wea hem feel iusles and no garem hope wea kamaot from nogud samting wea happen taem hem pikinini, hem faendem hao olketa article insaed long olketa Wastaoa and Wekap! magasin barava helpem hem. Hem sei: “Samfala taem wanfala paragraf or sentence insaed long wanfala article—smol samting nomoa—hem savve helpem mi. Samting olsem naenfala year bifor, mi start for keepim olketa article olsem long wanfala notebuk mekem mi isi for faendem taem mi needim.” Distaem, thrifala notebuk bilong hem garem samting olsem 400 article!

Pipol no need for deal olowe witim nogud samting wea kasem olketa taem olketa pikinini yet. Witim help bilong Jehovah olketa savve win long spiritual wei. Olsem wei wea man wea kasem gud samting from mami and dadi no evritaem minim hem bae faithful long Jehovah, wei wea man kasem nogud samting taem hem pikinini no stopem hem for kamap man wea respectim God.

Bihaen olketa faendem datfala buk bilong Law taem olketa repairim temple, Josiah ‘mekem wanfala covenant front long Jehovah for followim Jehovah and for go ahed for obeyim hem witim full heart bilong hem and witim full soul bilong hem.’ (2 Chronicles 34:31) And hem nating go difren from promis bilong hem go kasem taem hem dae. Long sem wei, Malinda and Nicholas barava disaed strong for loyal long Jehovah God and for win olsem pipol wea keepim faithful fasin. Iumi kasem encouragement tu for stap klosap long Jehovah and servem hem long faithful wei. Iu savve sure hao iu bae win, bikos Jehovah hem promis: “Iu no fraet, bikos mi stap witim iu. Iu no lukluk olabaot, bikos mi God bilong iu. Mi bae strongim iu. Mi bae barava helpem iu. Mi bae barava hol strong long iu witim raet hand bilong raeteous wei bilong mi.”—Isaiah 41:10, 11.

[Footnote]

[Piksa long page 26]

Nomata olketa nogud samting happen taem hem pikinini, Josiah want for savve long Jehovah and hem mekem laef bilong hem win

[Piksa long page 28]

Olketa elder savve helpem iu for stretem wanfala fasin wea iu hard for aotem

[Piksa long page 28]

“Wastaoa” and “Wekap!” savve helpem iu for keepim faithful fasin