Hu Nao Bae Separatem Iumi From Love Bilong God?
“Saed long iumi, iumi love, bikos hem lovem iumi firstaem.”—1 JOHN 4:19.
1, 2. (a) Why nao wei wea iumi savve samwan lovem iumi hem important long iumi? (b) Love bilong hu nao iumi needim winim eni narawan?
WEI for savve samwan lovem iu hem hao important long iu? From taem man baby go kasem full-grown, hem grow gud tumas from love. Waswe, iu lukim taem wanfala mami holem klos baby bilong hem? Planti taem, nomata wanem samting happen raonem datfala baby, taem hem luk go long eye bilong mami wea smile long hem, hem feel gud, stap long peace witim mami wea lovem hem. Or waswe, iu remember hao nao iu feel long olketa hard taem wea iu teenager? (1 Thessalonians 2:7) Long datfala taem iu maet no savve wanem nao iu laekem or no minim feeling bilong iuseleva, hem barava important for savve dadi and mami lovem iu! Waswe, iu feel gud taem iu savve go storyim eni problem or kwestin long tufala? Tru nao, long full laef bilong man, wanfala main need hem for kasem love. Kaen love olsem mekem iumi barava sure iumi no iusles.
2 Love from parents hem duim important waka long wei for grow gud and balance. Nomata olsem, wei for sure hao Father long heven, Jehovah, hem lovem iumi hem barava moa important for helpem iumi stap gud long spiritual wei and saed long feeling. Samfala wea readim disfala magasin maet no bin garem parents wea barava kea for olketa. Sapos iu olsem, help hem stap. Nomata sapos love from parents hem no stap or hem fail, iu savve kasem loyal love bilong God.
3. Long wanem wei nao Jehovah talemaot love wea hem garem for pipol bilong hem?
3 Thru long profet bilong hem Isaiah, Jehovah sei wanfala mami savve “forgetim” baby bilong hem wea susu yet, bat hem bae nating forgetim pipol bilong hem. (Isaiah 49:15) Olsem tu, David sei: “Sapos dadi bilong mi and mami bilong mi lusim mi, Jehovah nao bae keepim mi.” (Psalm 27:10) Datwan barava comfortim man! Nomata wanem kaen living iu garem, sapos iu dedicate and fren witim Jehovah God, iu shud evritaem remember hao love wea hem garem for iu hem winim love bilong eni man!
Keepim Iuseleva Insaed Love Bilong God
4. Hao nao olketa Christian long first century savve God lovem olketa?
4 Wanem taem nao iu firstaem savve long love bilong Jehovah? Maet samting wea kasem iu hem semsem witim olketa Christian long first century. Mek-5 chapter long leta bilong Paul for olketa long Rome hem storyim gud hao pipol wea sin bifor, wea stap farawe from God, kasem love bilong Jehovah. Long verse 5 hem sei: “Thru long holy spirit, love bilong God hem kapsaet insaed long heart bilong iumi.” Long verse 8, Paul sei moa: “God showim love bilong hem long iumi long wei wea, taem iumi sinner yet, Christ hem dae for iumi.”
5. Hao nao iu kasem wei for luksavve long haomas love God hem garem?
5 Olsem tu, taem iu start for lanem truth from Word bilong God and showimaot faith, holy spirit bilong Jehovah start for waka insaed heart bilong iu. Long wei olsem iu start for tinghae long bigfala samting wea Jehovah duim taem hem sendem Son wea hem lovem for dae for iu. Jehovah helpem iu for luksavve haomas nao hem lovem olketa man. Taem iu luksavve finis hao nomata iu born olsem sinner wea stap farawe from hem, Jehovah openem wei for olketa man kamap raeteous witim hope for laef olowe, waswe, diswan muvim heart bilong iu? Waswe, diswan mekem iu lovem Jehovah?—Romans 5:10.
6. Why nao samfala taem maet iumi feel olsem iumi lelebet farawe from Jehovah?
6 From love bilong Father bilong iu long heven pullim iu and from iu changem laef bilong iu for hem acceptim iu, iu dedicatem laef bilong iu long God. Distaem iu garem peace witim God. Nomata olsem, waswe, samfala taem iu feel olsem iu lelebet stap farawe from Jehovah? Datwan savve happen long eniwan long iumi. Bat evritaem remember hao God hem no change. Love bilong hem no savve finis and hem stedy olsem sun, wea no savve finis for givim kam laet long earth. (Malachi 3:6; James 1:17) Long narasaed, iumi savve change—nomata sapos for lelebet taem nomoa. Taem earth tan raon, haf long hem kamap dark. Olsem tu, sapos iumi tanawe from God, nomata for lelebet taem nomoa, iumi maet feelim wei wea iumi fren witim hem kamap cold lelebet. Wanem nao iumi savve duim for stretem datwan?
7. Hao nao wei for lukluk gud long iumiseleva helpem iumi for stap insaed love bilong God?
7 Sapos iumi feel olsem iumi farawe lelebet from love bilong God, iumi shud askem iumiseleva: ‘Waswe, mi ting smol nomoa long love bilong God? Waswe, mi isisi tanawe from living God wea garem love, and showim long samfala wei hao faith bilong mi kamap wik? Waswe, mi tingting nomoa long olketa “samting bilong body,” and no long olketa “samting bilong spirit”?’ (Romans 8:5-8; Hebrews 3:12) Sapos iumi separatem iumiseleva from Jehovah, iumi savve duim samting for stretem, kasem bak klos wei for fren witim hem. James encouragem iumi: “Kam klosap long God, and hem bae kam klosap long iufala.” (James 4:8) Tingim disfala toktok bilong Jude: “Olketa wea mi lovem, taem iufala buildimap iufala seleva long barava holy faith bilong iufala, and prea witim holy spirit, stap insaed long love bilong God.”—Jude 20, 21.
Living wea Change No Affectim Love Bilong God
8. Wanem nao olketa change wea savve seknomoa kamap long living bilong iumi?
8 Living bilong iumi long disfala system savve change planti taem. King Solomon sei hao “taem and samting wea iumi no expectim hem kasem [iumi] evriwan.” (Ecclesiastes 9:11) Maet living bilong iumi kwiktaem nomoa change long bigfala wei. Wanday iumi healthy, next day iumi garem big sik. Wanday iumi garem waka for selen, next day iumi no garem waka. Maet seknomoa wanfala wea iumi lovem hem dae. Olketa Christian long wanfala kantri maet stap long peace for lelebet taem, and then, seknomoa raf samting kamap. Maet pipol accusim iumi long giaman wei, and from diswan, iumi safa long samting wea no fitim justice. Tru nao, living hem no sef or stedy olowe.—James 4:13-15.
9. Why nao hem gud for lukluk long samfala sekson bilong Romans chapter 8?
9 Taem sorre samting kasem iumi, maet iumi start for feel olsem iumi stap seleva, and tingse love wea God garem for iumi hem go daon. From iumi evriwan savve kasem olketa samting olsem, hem gud tumas for tingting gud long olketa toktok bilong aposol Paul wea stap long Romans chapter 8. Hem raetem olketa toktok hia long olketa Christian wea spirit anointim. Nomata olsem, olketa fitim tu sekson bilong nara sheep, wea kamap raeteous olsem fren bilong God, olsem Abraham bifor.—Romans 4:20-22; James 2:21-23.
10, 11. (a) Wanem nao olketa enemy accusim samfala taem againstim pipol bilong God? (b) Why nao olketa Christian no warim wei for accusim olketa olsem?
10 Readim Romans 8:31-34. Paul hem ask olsem: “Sapos God stap witim iumi, hu nao bae againstim iumi?” Hem tru, Satan and wicked world bilong hem againstim iumi. Olketa enemy maet accusim iumi long giaman samting, nomata insaed kot tu. Samfala accusim olketa Christian parents for heitim pikinini bilong olketa bikos olketa no letem olketa for acceptim samfala medical treatment wea againstim law bilong God, or letem olketa for join insaed olketa heathen celebration. (Acts 15:28, 29; 2 Corinthians 6:14-16) Pipol accusim giaman samting againstim samfala faithful Christian taem olketa sei olketa go againstim gavman bikos olketa no joinim war for killim dae nara man or join insaed politik. (John 17:16) Samfala wea againstim iumi talem laea story long nius, and sei Olketa Jehovah’s Witness wanfala danger cult.
11 Bat no forgetim hao long taem bilong olketa aposol, pipol sei: “From mifala savve hao long evri ples pipol tok againstim disfala sekson.” (Acts 28:22) Waswe, iumi warim wei for accusim iumi long giaman samting olsem? God nao disaedem wei wea olketa tru Christian raeteous, from faondeson long faith bilong olketa long sakrifaes bilong Christ. Why nao Jehovah bae stop for lovem olketa wea worshipim hem bihaen hem givim olketa barava spesol present—Son wea hem lovem? (1 John 4:10) From Christ hem resurrect finis from dae and stap long raet saed bilong God, hem strong for askem samting for olketa Christian. Hu nao fit for denyim wei wea Christ stand for olketa follower bilong hem or challengem gudfala tingting wea God garem for olketa faithful wan bilong hem? No eniwan!—Isaiah 50:8, 9; Hebrews 4:15, 16.
12, 13. (a) Wanem living or problem nao hard for separatem iumi from love bilong God? (b) Wanem nao goal bilong Devil for mekem hard samting happen long iumi? (c) Why nao olketa Christian win evribit?
12 Readim Romans 8:35-37. Nomata iumi wanwan savve duim, waswe, eni narawan or eni samting savve separatem iumi from love bilong Jehovah and Son bilong hem, Christ Jesus? Satan maet iusim sekson bilong hem long earth for mek-trabol for olketa Christian. Insaed wan handred year wea go pas finis, planti Christian brata and sista bilong iumi kasem raf persecution long planti kantri. Long samfala ples distaem, evriday olketa brata bilong iumi feisim hard taem saed long selen. Samfala kasem pain bilong hangre or short long kaleko. Wanem nao goal bilong Devil for mekem olketa hard samting olsem kamap? Wanfala goal bilong hem nao for mekem tru worship bilong Jehovah wikdaon. Satan laekem iumi for bilivim wei wea love bilong God hem kamap cold. Bat waswe, datwan hem tru?
13 Olsem Paul, wea talem toktok from Psalm 44:22, iumi studyim finis Word bilong God. Iumi luksavve hao olketa samting hia happen long iumi, olketa “sheep” bilong hem, for saed long nem bilong God. Insaed diswan hem wei for mekhae long nem bilong God and vindicatem olmaeti rul bilong hem. From olketa important samting olsem nao God letem test for go ahed, no from hem no lovem iumi moa. Nomata wanem samting nao happen, iumi sure love bilong God for pipol bilong hem, and iumi wanwan tu, hem nating change. Wei wea maet luk olsem iumi lus bae kamap wei for win sapos iumi keepim faithful fasin bilong iumi. Iumi kasem strong from promis hao love bilong God no savve finis.
14. Why nao Paul barava sure long love bilong God nomata olketa Christian maet safa long planti hard samting?
14 Readim Romans 8:38, 39. Wanem nao mekem Paul barava sure no eni samting savve separatem olketa Christian from love bilong God? Olketa experience bilong Paul taem hem duim ministry strongim biliv bilong hem hao olketa hard samting no savve affectim love bilong God for iumi. (2 Corinthians 11:23-27; Philippians 4:13) And tu, Paul garem savve abaotem purpose bilong Jehovah and wei wea Hem deal witim pipol bilong hem bifor. Waswe, dae savve winim love bilong God for olketa wea servem hem long loyal wei? Nomoa nao! Olketa faithful wan olsem bae stap laef insaed perfect memory bilong God, and hem bae resurrectim olketa long taem wea hem markem.—Luke 20:37, 38; 1 Corinthians 15:22-26.
15, 16. Storyim samfala samting wea no savve muvim God for stopem wei for lovem olketa faithful servant bilong hem.
15 Nomata wanem nogud samting iumi maet kasem long living distaem—maet wanfala nogud accident, wanfala big sik, or hard taem saed long selen—no eni samting savve distroem love bilong God for pipol bilong hem. Olketa strongfala angel, olsem datfala angel wea disobey wea kamap Satan, no savve muvim Jehovah for stopem wei for lovem olketa loyal servant bilong hem. (Job 2:3) Olketa gavman maet tambuim, putim long prison, and spoelem olketa servant bilong God and maet kolem olketa “pipol wea no eniwan acceptim” tu. (1 Corinthians 4:13) Wei for heit olsem wea no fitim justice wea olketa nation garem maet forcem olketa man for tan againstim iumi, bat hem no mekem Barava Hae Ruler bilong universe for lusim iumi.
16 Olsem olketa Christian, iumi no need for fraet hao eni samting wea Paul kolem “samting wea stap distaem”—olketa samting wea happen, living long disfala system—or “olketa samting wea bae happen” long future bae savve brekem klos feeling wea God garem for pipol bilong hem. Nomata olketa paoa bilong earth and heven faetem war againstim iumi, loyal love bilong God stap for strongim iumi. Paul strongim hao no “eni hae or eni deep samting” savve blokem love bilong God. No eni samting wea maet mekem iumi wikdaon, or eni samting wea garem strong paoa ovarem iumi, savve separatem iumi from love bilong God; and no eni nara creation savve spoelem wei wea Creator fren witim olketa faithful servant bilong hem. Love bilong God nating savve fail; hem for olowe.—1 Corinthians 13:8.
Barava Tinghae Long Loving-Kaeness Bilong God for Olowe
17. (a) Why nao wei for God lovem iumi hem “moabeta winim laef”? (b) Hao nao iumi showimaot iumi barava tinghae long loving-kaeness bilong God?
17 Hao important nao love bilong God long iu? Waswe, iu feel olsem David, wea raet olsem: “Bikos loving-kaeness bilong iu hem moabeta winim laef, mouth bilong miseleva bae praisem iu. Dastawe mi bae blessim iu long full laef bilong mi; long nem bilong iu mi bae apim hand bilong mi”? (Psalm 63:3, 4) Waswe, eni samting disfala world savve givim hem moabeta winim wei for kasem love bilong God and loyal wei for fren witim hem? Olsem example, waswe, wei for aftarem big waka for selen hem moabeta winim wei for garem peace long mind and hapi wea kamaot from wei for fren klos witim God? (Luke 12:15) Samfala Christian feisim wei for chus for rejectim Jehovah or dae. Datwan nao happen long planti Jehovah’s Witness long concentration camp bilong olketa Nazi long World War II. Klosap evri Christian brata bilong iumi chus for stap insaed love bilong God, and willing for feisim dae sapos no wei nao. Olketa wea loyal for stap insaed love bilong hem savve sure olketa bae kasem future for olowe from God, wanfala samting wea world no savve givim iumi. (Mark 8:34-36) Bat moa samting hem insaed diswan winim laef olowe.
18. Why nao laef olowe hem samting wea gud tumas?
18 Nomata iumi kanduit laef olowe sapos Jehovah no givim, trae for tingim wei for garem longfala laef and Creator no insaed diswan. Laef bae emti, and no garem trufala purpose. Jehovah givim pipol bilong hem waka for duim wea mekem olketa satisfae long olketa last day distaem. So iumi savve trustim hao taem Jehovah, Nambawan Man Bilong Purpose hem givim laef olowe, living bae fulap witim olketa interesting, gudfala samting for iumi lanem and duim. (Ecclesiastes 3:11) Nomata haomas samting iumi lanem long planti thousand year long future, iumi bae no minim evribit “hao deep nao riches and wisdom and savve bilong God.”—Romans 11:33.
Father Hem Lovem Iu
19. Wanem toktok for givim comfort nao Jesus Christ givim long olketa disaepol bifor hem lusim olketa?
19 Long Nisan 14, 33 C.E., long lastfala evening witim 11-fala faithful aposol, Jesus talem planti samting for strongim olketa long samting wea bae happen. Evriwan hia stap witim Jesus taem hem kasem test, and olketa wanwan feelim love wea hem garem for olketa. (Luke 22:28, 30; John 1:16; 13:1) Then Jesus comfortim olketa olsem: “Father seleva hem lovem iufala.” (John 16:27) Olketa toktok hia mas barava helpem olketa disaepol for luksavve long love wea Father bilong olketa long heven garem for olketa!
20. Wanem nao bae iu disaed strong for duim, and iu savve barava sure long wanem samting?
20 Planti wea stap distaem faithful for servem Jehovah for planti year. Iumi sure bifor end bilong disfala wicked system hem kam, bae iumi feisim planti moa test. No letem olketa test and wari mekem iu daotem loyal love bilong God for iu. Iumi kanduit for ova tumas for strongim disfala truth: Jehovah hem lovem iu. (James 5:11) Iumi each wan mas go ahed for duim part bilong iumi, loyal for keepim olketa komand bilong God. (John 15:8-10) Iumi mas iusim evri chance for praisem nem bilong hem. Iumi shud strongim disison bilong iumi for kamap moa klos long Jehovah long prea and wei for studyim Word bilong hem. Nomata wanem samting happen, sapos iumi duim best bilong iumi for mekem Jehovah hapi, bae iumi garem peace, sure evribit long love bilong hem wea no savve fail.—2 Peter 3:14.
Hao Nao Bae Iu Ansa?
• For stap balance long spiritual saed and saed long feeling, iumi barava needim love bilong hu?
• Wanem nao olketa samting wea nating savve stopem Jehovah for lovem olketa servant bilong hem?
• Why nao wei wea Jehovah lovem iumi hem “moabeta winim laef”?
[Olketa Piksa long page 13]
Sapos iumi feel olsem iumi stap separate from love bilong God, iumi savve duim samting for stretem datwan
[Piksa long page 15]
Paul minim why nao hem kasem persecution