Go Ahed for Showimaot Gudfala Fasin
“Frut bilong laet hem evrikaen gudfala samting and raeteous fasin and truth.”—EPHESIANS 5:9.
1. Hao nao planti million distaem showaot olketa agree witim Psalm 31:19?
Barava gudfala samting wea eni man savve duim hem for givim glory long Jehovah. Distaem, planti million duim diswan taem olketa praisem God for gudfala fasin bilong hem. Olsem olketa loyal Witness bilong Jehovah, iumi agree witim full heart witim man wea raetem psalm wea sing olsem: “Gudfala fasin bilong iu hem staka tumas, wea iu keepim for olketa wea fraet long iu!”—Psalm 31:19.
2, 3. Wanem nao savve happen sapos iumi no showimaot gudfala fasin for saportim waka bilong iumi for mek-disaepol?
2 Wei for fraet long Jehovah muvim iumi for praisem hem for gudfala fasin bilong hem. Hem muvim iumi tu for ‘praisem Jehovah, blessim hem, and talemaot glory bilong wei wea hem king.’ (Psalm 145:10-13) Dastawe iumi strong for share long waka for preach abaotem Kingdom and mek-disaepol. (Matthew 24:14; 28:19, 20) Hem tru, gudfala fasin wea iumi showimaot mas saportim preaching waka bilong iumi. Sapos nomoa, bae pipol tokdaonem holy nem bilong Jehovah.
3 Planti pipol sei olketa worshipim God, bat fasin bilong olketa no fitim olketa mark wea hem talem insaed Word bilong hem. Aposol Paul hem raet olsem abaotem samfala wea garem living wea no followim gudfala fasin bat olketa sei olketa showimaot: “Iu wea teachim narafala man, waswe, iu no teachim iuseleva? Iu wea talemaot ‘No steal,’ waswe, iu savve steal? Iu wea sei ‘No duim adultery,’ waswe, iu duim adultery? . . . From ‘iufala, pipol spoelem nem bilong God midolwan olketa nation’; barava olsem hao olketa raetem.”—Romans 2:21, 22, 24.
4. Hao nao gudfala fasin bilong iumi affectim pipol?
4 Iumi no laek for pipol tokdaonem nem bilong Jehovah, bat iumi trae hard for givim glory long hem from gudfala fasin bilong iumi. Diswan hem affectim pipol aotsaed long Christian kongregeson long gudfala wei. Wanfala samting, hem mekem olketa wea againstim iumi stap kwaet. (1 Peter 2:15) Samting wea moa important, gudfala fasin bilong iumi pullim pipol kam long organization bilong Jehovah, wea openem wei for olketa givim glory long hem and for kasem laef olowe.—Acts 13:48.
5. Wanem nao olketa kwestin wea iumi bae lukluk long hem distaem?
5 From iumi no perfect, hao nao iumi savve stap klia long fasin wea no givim honor long Jehovah and mekem olketa wea lukaotem truth for stambol? Tru nao, hao nao iumi savve win for showimaot gudfala fasin?
Wanfala Frut Bilong Laet
6. Wanem nao samfala “nogud waka bilong darkness,” bat olketa wanem frut nao shud showaot klia midol long olketa Christian?
6 Olsem olketa Christian wea dedicate, iumi hapi long samting wea helpem iumi for stap klia long olketa “nogud waka bilong darkness.” Insaed diswan hem olketa waka wea no honorim God olsem fasin for laea, steal, raf toktok, nogud toktok abaotem sex, fasin wea mekem man kasem shame, dirty mekfani, and wei for drunk. (Ephesians 4:25, 28, 31; 5:3, 4, 11, 12, 18) Iumi no duim kaen fasin olsem, bat “go ahed for wakabaot olsem olketa pikinini bilong laet.” Aposol Paul hem sei “frut bilong laet hem evrikaen gudfala samting and raeteous fasin and truth.” (Ephesians 5:8, 9) So wei for wakabaot insaed laet hem mekem iumi fit for showimaot gudfala fasin. Bat wanem kaen laet nao diswan?
7. Wanem nao iumi mas duim for go ahed showimaot frut bilong gudfala fasin?
7 Nomata iumi no perfect, iumi savve showimaot gudfala fasin sapos iumi wakabaot insaed spiritual laet. Man wea raetem psalm hem sei: “Word bilong iu hem wanfala lamp for leg bilong mi, and laet for road bilong mi.” (Psalm 119:105) Sapos iumi want for showimaot “frut bilong laet” thru long “evrikaen gudfala samting,” iumi mas evritaem mekius long spiritual laet wea stap insaed Word bilong God, and wea olketa Christian pablikeson storyim, and wea kamap long olketa meeting bilong iumi for worship. (Luke 12:42; Romans 15:4; Hebrews 10:24, 25) Iumi need tu for studyim gud example and olketa teaching bilong Jesus Christ, datfala “laet bilong world” and wan wea “showimaot glory bilong [Jehovah].”—John 8:12; Hebrews 1:1-3.
Wanfala Frut Bilong Spirit
8. Why nao iumi savve showimaot gudfala fasin?
8 Spiritual laet barava helpem iumi for showimaot gudfala fasin. And tu, iumi savve showimaot disfala fasin bikos holy spirit, or active force bilong God leadim iumi. Gudfala fasin hem part bilong “frut bilong spirit.” (Galatians 5:22, 23) Sapos iumi followim lead bilong holy spirit, hem bae mekem iumi savve showimaot datfala nambawan frut bilong gudfala fasin.
9. Hao nao iumi savve duim samting followim toktok bilong Jesus long Luke 11:9-13?
9 Wei wea iumi laekem tumas for mekem Jehovah hapi long wei for showimaot frut bilong gudfala fasin shud muvim iumi for duim samting followim disfala toktok bilong Jesus: “Go ahed for ask, and iufala bae kasem; go ahed for lukaotem, and iufala bae faendem; go ahed for noknok, and hem bae open for iufala. From evriwan wea ask bae kasem, and evriwan wea lukaotem bae faendem, and long evriwan wea noknok hem bae open. Tru nao, wanem kaen dadi midolwan long iufala bae givim snek long son bilong hem sapos hem askem fish? Or sapos hem ask for wanfala egg, bae givim hem wanfala scorpion? So, sapos iufala, nomata iufala [no perfect dastawe long samfala wei olsem] wicked pipol, savve hao for givim gudfala present long olketa pikinini bilong iufala, Father bilong iufala long heven bae barava givim holy spirit long olketa wea askem hem!” (Luke 11:9-13) Iumi followim kaonsel bilong Jesus for prea for spirit bilong Jehovah mekem iumi savve go ahed for showimaot frut bilong gudfala fasin.
“Go Ahed for Duim Gudfala Samting”
10. Wanem nao olketa difren saed bilong gudfala fasin bilong Jehovah wea stap long Exodus 34:6, 7?
10 Witim spiritual laet from Word bilong God and help bilong holy spirit bilong God, iumi savve “go ahed for duim gudfala samting.” (Romans 13:3) Thru long wei for studyim Bible evritaem, iumi lanem planti moa samting evritaem abaotem hao iumi savve followim gudfala fasin bilong Jehovah. Firstfala study article storyim olketa difren saed bilong gudfala fasin bilong God insaed toktok wea Moses herem long Exodus 34:6, 7, wea sei: “Jehovah, Jehovah, God wea showimaot mercy and kaenfala fasin, slow for kros and wea fulap witim loving-kaeness and truth, keepim loving-kaeness for olketa thousand, forgivim mistek and rong and sin, bat hem bae no letem man wea duim rong for missim panis.” Wei for lukluk moa klos long olketa difren saed bilong gudfala fasin bilong Jehovah hia bae helpem iumi for “go ahed for duim gudfala samting.”
11. From iumi savve Jehovah showimaot mercy and hem kaenfala, hao nao diswan shud affectim iumi?
11 Disfala toktok bilong God mekem iumi luksavve long need for followim Jehovah taem iumi showimaot mercy and kaenfala fasin. Jesus sei: “Hapi nao olketa wea showimaot mercy, from olketa bae kasem mercy tu.” (Matthew 5:7; Luke 6:36) From iumi luksavve Jehovah hem kaenfala, diswan muvim iumi for showimaot kaen and gudfala fasin taem iumi deal witim nara pipol, insaed diswan hem olketa wea iumi preach long olketa. Diswan fitim kaonsel bilong Paul wea sei: “Letem toktok bilong iufala hem evritaem kaenfala, garem salt, mekem iufala savve hao for givim ansa long each wan.”—Colossians 4:6.
12. (a) From God hem slow for kros, hao nao iumi shud deal witim nara pipol? (b) Loving-kaeness bilong Jehovah muvim iumi for duim wanem?
12 From God hem slow for kros, wei wea iumi want for “go ahed for duim gud samting” hem muvim iumi for no tingim olketa smol wik point bilong olketa brata bilong iumi and for tingting strong long olketa gudfala fasin bilong olketa. (Matthew 7:5; James 1:19) Loving-kaeness bilong Jehovah muvim iumi for showimaot loyal love, nomata long barava hard taem. Diswan hem barava gud samting.—Proverbs 19:22.
13. Wanem nao iumi mas duim for showimaot wei wea Jehovah hem ‘fulap witim truth’?
13 From Father bilong iumi long heven hem ‘fulap witim truth,’ iumi trae for ‘showimaot iumi olketa minister bilong hem thru long trufala toktok.’ (2 Corinthians 6:3-7) Insaed sevenfala samting wea Jehovah barava heitim nao hem “tongue wea tok laea” and “giaman witness wea talemaot olketa laea.” (Proverbs 6:16-19) So wei wea iumi laek for mekem God hapi muvim iumi for ‘lusim laea fasin and talem trufala toktok.’ (Ephesians 4:25) Iumi mas nating fail for showimaot gudfala fasin long disfala important wei.
14. Why nao iumi shud forgive?
14 Toktok bilong God for Moses shud muvim iumi tu for forgive, bikos Jehovah hem redy for forgive. (Matthew 6:14, 15) Tru, Jehovah bae panisim olketa sinner wea no repent. So iumi mas saportim olketa hae mark bilong gudfala fasin bilong hem saed long wei for keepim kongregeson klin long spiritual wei.—Leviticus 5:1; 1 Corinthians 5:11, 12; 1 Timothy 5:22.
“Go Ahed for Lukaot Gud”
15, 16. Hao nao kaonsel bilong Paul long Ephesians 5:15-19 helpem iumi for go ahed showimaot gudfala fasin?
15 For iumi go ahed for showimaot gudfala fasin nomata wicked fasin stap raonem iumi, iumi need for fulap witim spirit bilong God and lukaot gud long wakabaot bilong iumi. Aposol Paul encouragem olketa Christian long Ephesus: “Go ahed for lukaot gud mekem wei wea iufala wakabaot hem no olsem man wea no wise bat olsem man wea wise, baem taem wea fitim for iufala, bikos olketa day hem wicked. From diswan, finis from fasin wea no balance, bat go ahed for luksavve wanem nao will bilong Jehovah. And tu, no kamap drunk witim wine, wea savve spoelem man, bat go ahed for fulap witim spirit, tok witim each other witim olketa psalm and praise long God and olketa spiritual song, singsing and mekem music insaed long heart bilong iufala for Jehovah.” (Ephesians 5:15-19) Disfala kaonsel hem barava fitim iumi long olketa last day wea hard for deal witim distaem.—2 Timothy 3:1.
16 For go ahed for showimaot gudfala fasin, iumi mas lukaot gud for wakabaot olsem olketa wea showimaot wisdom bilong God. (James 3:17) Iumi mas stap klia long bigfala sin and mas fulap witim holy spirit and letem datwan for leadim iumi. (Galatians 5:19-25) Taem iumi followim spiritual instruction wea kamaot long olketa Christian meeting, assembly, and convention, iumi savve go ahed for duim gud samting. Toktok bilong Paul for olketa long Ephesus maet mekem iumi tingim tu hao long klosap evritaem wea iumi hipap for worship, iumi kasem gudfala samting from wei for singim witim full heart olketa “spiritual song”—wea planti deal witim olketa spiritual fasin olsem gudfala fasin.
17. Sapos living bilong olketa mekem hem hard for olketa evritaem attendim olketa meeting, wanem nao olketa Christian wea garem bigfala sik savve sure long hem?
17 Waswe long olketa nara brata wea no fit for evritaem attendim olketa Christian meeting bikos olketa garem bigfala sik? Maet olketa feel wiki bikos olketa no savve evritaem worshipim Jehovah witim olketa spiritual brata and sista. Bat olketa savve sure hao Jehovah minim living bilong olketa, bae keepim olketa insaed laet, bae givim olketa holy spirit bilong hem, and bae helpem olketa for go ahed duim gud samting.—Isaiah 57:15.
18. Wanem nao bae helpem iumi for aftarem gogo bilong gudfala fasin?
18 Wei for aftarem gogo bilong gudfala fasin hem minim iumi mas lukaot long hu nao iumi kaban witim and tanawe from olketa wea “no lovem gudfala fasin.” (2 Timothy 3:2-5; 1 Corinthians 15:33) Wei for followim kaonsel olsem bae helpem iumi for no “mekem holy spirit bilong God feel sorre” taem iumi duim samting wea difren from wei wea hem leadim iumi. (Ephesians 4:30) And tu, iumi kasem help for duim gudfala samting sapos iumi fren klos witim olketa wea showimaot olketa lovem gudfala fasin and wea holy spirit bilong Jehovah leadim olketa.—Amos 5:15; Romans 8:14; Galatians 5:18.
Gudfala Fasin Givim Gudfala Samting
19-21. Talem samfala experience wea showimaot gud samting wea kamaot from gudfala fasin.
19 Wei for wakabaot insaed spiritual laet, followim lead bilong spirit bilong God, and lukaot gud long hao iumi wakabaot bae helpem iumi for stap klia long nogud samting and for “go ahed for duim gud samting.” Olketa gud samting nao savve kamaot from diswan. Tingim experience bilong Zongezile, wanfala Jehovah’s Witness long South Africa. Taem hem gogo for skul wan morning, hem chekim haomas selen nao hem garem long bank account bilong hem. Pepa from automatic teller machine showimaot hem garem extra R42,000 ($6,000, U.S.). Wanfala security gard long bank and samfala moa encouragem hem for aotem datfala selen and putim insaed narafala bank. Witness hasband and waef wea hem stap witim nomoa praisem hem from hem no aotem eni selen hia.
20 Long next day, Zongezile reportim datfala mistek long bank. Olketa faendaot hao account namba bilong hem klosap semsem witim wanfala rich bisnisman wea mistek and putim selen insaed rong account. From hem sapraes tumas hao Zongezile no iusim eni selen hia, datfala bisnisman askem hem: “Wanem nao religion bilong iu?” Zongezile sei hem wanfala long Olketa Jehovah’s Witness. Olketa bigman long bank barava praisem hem and sei: “Mifala bae hapi tumas sapos evriwan honest olsem Olketa Jehovah’s Witness.” Tru nao, honest and gudfala fasin savve mekem nara pipol givim glory long Jehovah.—Hebrews 13:18.
21 For kasem gud samting no minim man mas duim big samting for showimaot gudfala fasin. Olsem example: Wanfala young Witness wea serve olsem man for preach full-taem long wanfala island bilong Samoa need for go long hospital. Pipol weit for lukim doctor, and datfala Witness lukim wanfala olo woman wea sidaon saed long hem barava sik. Hem arrange for datfala woman for change witim hem mekem woman hia savve lukim doctor kwiktaem. Bihaen, datfala Witness meetim olo woman hia long market. Hem rememberim datfala brata and gud samting wea hem duim long hospital. Hem sei: “Distaem mi savve Olketa Jehovah’s Witness barava lovem neiba bilong olketa.” Nomata hem no willing for lisin long Kingdom message bifor, gud samting kamaot from gudfala fasin wea datfala Witness showim long hem. Hem acceptim wanfala hom Bible study and start for kasem savve abaotem Word bilong God.
22. Wanem nao wanfala barava important wei for “go ahed for duim gud samting”?
22 Maet iu tu savve talem olketa experience wea showimaot gud samting wea kamaot from wei for garem gudfala fasin. Wanfala barava important wei for “go ahed for duim gud samting” hem for share evritaem for talemaot gud nius bilong Kingdom bilong God. (Matthew 24:14) Iumi go ahed strong for duim disfala spesol waka from iumi luksavve diswan hem wanfala wei for duim gud samting, especially long olketa wea willing for lisin. Samting wea barava important, ministry and gudfala fasin bilong iumi hem givim glory long Jehovah, start bilong gudfala fasin.—Matthew 19:16, 17.
Go Ahed for “Duim Samting wea Gud”
23. Why nao Christian ministry hem gudfala waka?
23 Ministry bilong iumi hem wanfala barava gudfala waka. Hem savve givim salvation long iumi and long olketa wea lisin long message bilong Bible and start for followim road wea lead go long laef olowe. (Matthew 7:13, 14; 1 Timothy 4:16) So, taem iumi mas disaedem samting, wei for want for duim gud samting savve mekem iumi askem iumiseleva: ‘Hao nao samting wea mi disaedem bae affectim waka bilong mi for preachim Kingdom? Waswe, samting wea mi ting for duim hem barava wise? Waswe, bae hem helpem mi for helpem nara pipol for acceptim “gud nius for olowe” and fren long klos wei witim Jehovah God? (Revelation 14:6) Iumi savve kasem bigfala hapi sapos samting wea iumi disaedem hem helpem iumi for duim moa samting for Kingdom.—Matthew 6:33; Acts 20:35.
24, 25. Wanem nao samfala wei for duim gud samting insaed kongregeson, and wanem nao iumi savve sure long hem sapos iumi go ahed for showimaot gudfala fasin?
24 Iumi mas nating ting smol long gudfala samting wea kamaot from gudfala fasin. Iumi savve go ahed for showimaot disfala fasin taem iumi duim best bilong iumi for saportim Christian kongregeson. Tru nao, iumi duim gud samting taem iumi evritaem attendim and tekpart long olketa Christian meeting. Wei wea iumi attend hem encouragem olketa nara brata and sista, and olketa koment wea iumi redyim gud hem buildimap olketa long spiritual wei. Iumi duim gud samting tu taem iumi iusim samting wea iumi garem for keepim Kingdom Hall and lukaftarem gud. (2 Kings 22:3-7; 2 Corinthians 9:6, 7) Tru nao, “sapos iumi garem taem wea hem fitim, letem iumi duim samting wea hem gud long evriwan, bat main wan nao long olketa wea garem sem faith olsem iumi.”—Galatians 6:10.
25 Iumi no savve wanem nao bae happen wea bae mekem iumi need for showimaot gudfala fasin. So, taem iumi feisim olketa niufala challenge, letem iumi lukaotem savve from Bible, prea for holy spirit bilong Jehovah, and barava duim best for duim gudfala and perfect will bilong hem. (Romans 2:9, 10; 12:2) Iumi savve sure Jehovah bae barava blessim iumi taem iumi go ahed for showimaot gudfala fasin.
Hao Nao Bae Iu Ansa?
• Hao nao iumi savve duim gud samting wea winim evri narawan?
• Why nao gudfala fasin hem wanfala ‘frut bilong laet’?
• Why nao gudfala fasin hem wanfala ‘frut bilong spirit’?
• Long wanem wei nao gudfala fasin bilong iumi hem affectim nara pipol?
[Piksa long page 17]
Word bilong God and holy spirit bilong hem helpem iumi for showimaot gudfala fasin
[Olketa Piksa long page 18]
Wei for showimaot gudfala fasin mekem gud samting kamap