Kwestin From Reader
Waswe, hem stret for sei mercy bilong Jehovah hem kontrolem justice bilong hem?
Nomata pipol maet talem diswan, hem gud for stap klia from wei for talem bikos hem savve minim mercy bilong Jehovah hem katem daon or holem bak justice bilong hem, wea diswan mekem mercy luk olsem hem winim justice. Diswan hem no stret.
Hebrew word for “justice” savve minim “judgment” tu. Mining bilong justice hem klosap semsem witim raeteous fasin. Bat, planti taem justice hem join witim law. Raeteous fasin hem no olsem. Hem tru, justice bilong Jehovah savve minim wei for givim panis wea man fit for kasem, bat hem savve minim tu wei for givim salvation long olketa wea fit for kasem. (Genesis 18:20-32; Isaiah 56:1; Malachi 4:2) So, hem no fitim for sei justice bilong Jehovah hem strong tumas or need stap for katem daon.
Hebrew word for “mercy” savve minim wei for hol bak for givim judgment. Hem savve minim tu wei for showaot fasin for kea, wea comfortim olketa wea safa.—Deuteronomy 10:18; Luke 10:29-37.
Jehovah hem wanfala God bilong justice and mercy. (Exodus 34:6, 7; Deuteronomy 32:4; Psalm 145:9) Justice and mercy bilong hem perfect, and tufala waka gud tugeta. (Psalm 116:5; Hosea 2:19) Tufala fasin hia balancem each other long perfect wei. Sapos iumi sei mercy bilong Jehovah hem kontrolem justice bilong hem, then bae hem stret tu for sei justice bilong hem kontrolem mercy bilong hem.
Isaiah talem profesi: “Jehovah bae stap redy for acceptim iu, and dastawe hem bae getap for showim mercy long iu. From Jehovah hem wanfala God bilong judgment [“justice,” The New English Bible].” (Isaiah 30:18) Long hia, Isaiah hem showimaot hao justice bilong Jehovah muvim Hem for showim mercy winim wei for sei mercy bilong hem katem daon or holem bak justice bilong Hem. Jehovah showim mercy bikos hem followim justice and tu bikos hem garem love.
Hem tru, man wea raetem Bible, James, hem raet: “Mercy hem barava win ovarem judgment.” (James 2:13b) Bat, long hia James hem no storyim mercy bilong Jehovah bat bilong olketa Christian—olsem example, for olketa wea safa and poor. (James 1:27; 2:1-9) Taem olketa wea showaot mercy olsem kasem judgment, Jehovah ting long wanem olketa duim and long wei bilong mercy forgivim olketa long faondeson bilong sakrifaes bilong Son bilong hem. From diswan, mercy wea olketa showimaot bae win ovarem eni nogud judgment wea olketa maet bin fit for kasem.—Proverbs 14:21; Matthew 5:7; 6:12; 7:2.
So, hem no stret for sei mercy bilong Jehovah kontrolem judgment, long wei for minim olsem mercy need for katem daon justice bilong hem. Jehovah hem balance long perfect wei long tufala fasin hia evriwan. Tufala balancem each other long sem wei wea tufala balancem olketa nara fasin bilong Jehovah olsem love and wisdom.