“Dadi Bilong Iufala Hem Showimaot Mercy”
“Gohed for showimaot mercy, olsem Dadi bilong iufala tu hem showimaot mercy.”—LUKE 6:36.
1, 2. Long wanem wei nao toktok wea Jesus talem long olketa scribe and Pharisee and olketa follower bilong hem showimaot mercy hem gudfala fasin for garem?
SAMTING olsem 600 difren law nao insaed long Law wea God givim long Moses. Nomata olketa Israelite mas obeyim Law bilong Moses, hem barava important tu for olketa showimaot mercy. Tingim samting wea Jesus talem long olketa Pharisee wea nating showimaot mercy long olketa narawan. Tufala taem nao hem tok strong long olketa from olketa no duim diswan, and hem talem olketa hao God hem sei: “Mi no laekem sakrifaes, mi laekem mercy.” (Matthew 9:10-13; 12:1-7; Hosea 6:6) Gogo for end long ministry bilong hem, Jesus sei olsem: “Iufala olketa scribe and Pharisee, iufala hypocrite, trabol bae kasem iufala! bikos iufala givim mek-ten part bilong mint and dill and cumin, bat iufala nating tingim olketa samting bilong Law wea moa important olsem justice and mercy and faithful fasin.”—Matthew 23:23.
2 Tru nao, Jesus ting long mercy olsem wanfala barava important fasin for garem. Hem sei olsem long olketa follower bilong hem: “Gohed for showimaot mercy, olsem Dadi bilong iufala tu hem showimaot mercy.” (Luke 6:36) Bat for iumi “followim wei bilong God” saed long diswan, iumi need for savve wanem hem really minim for showimaot mercy. (Ephesians 5:1) And tu, wei for luksavve long olketa gudfala samting wea iumi kasem taem iumi showimaot disfala fasin, bae muvim iumi for showimaot disfala fasin long wei wea moa big.
Showimaot Mercy Long Olketa wea Needim Datwan
3. Why nao Jehovah hem best wan for teachim iumi abaotem wanem hem really minim for showimaot mercy?
3 Man wea raetem samfala psalm hem sing olsem: “Jehovah hem kaen and showimaot mercy, hem no savve kros kwiktaem and loving-kaeness bilong hem big tumas. Jehovah hem duim gudfala samting long evriwan, and hem showimaot mercy long evri samting wea hem wakem.” (Psalm 145:8, 9) Jehovah hem “Dadi wea tingim and showimaot mercy long iumi and God wea barava comfortim iumi.” (2 Corinthians 1:3) Man wea showimaot mercy hem kea long narawan. Diswan hem wanfala main fasin bilong God. Example wea hem showimaot and instruction wea kam from hem savve teachim iumi wanem hem really minim for showimaot mercy.
4. Wanem nao iumi lanem abaotem mercy long Isaiah 49:15?
4 Long Isaiah 49:15, Jehovah hem sei: “Waswe, waef savve forgetim baby bilong hem mekem hem no feel sorre for son wea kamaot from bele bilong hem?” Long disfala scripture, hem garem disfala toktok “feel sorre.” Long Psalm 145:8, 9 wea stap long paragraf 3, hem garem samfala nara word for datfala toktok long Hebrew languis taem hem story abaotem mercy. Feeling wea muvim Jehovah for showimaot mercy hem olsem datfala feeling wea mami savve garem for baby wea hem susum. Maet baby hem hangre or needim eni nara samting. From mami hem feel sorre long baby bilong hem, hem givim wanem baby needim. Jehovah garem feeling for kea olsem for olketa wea hem showimaot mercy long olketa.
5. Wanem nao Jehovah duim for olketa Israelite wea showimaot hem garem “bigfala mercy”?
5 Hem gud samting for feel sorre long olketa narawan, bat hem moabeta for duim samting for helpem olketa. Tingim samting wea Jehovah duim taem pipol wea worshipim hem slave long Egypt samting olsem 3,500 year go finis. Hem sei olsem long Moses: “Mi barava lukim nogud samting wea kasem pipol bilong mi wea stap long Egypt, and mi herem singaot bilong olketa bikos long pipol wea forcem olketa for waka; from mi barava savve long olketa hard samting olketa safa long hem. And bae mi go daon nao for sevem olketa from olketa bilong Egypt and tekem olketa aot from datfala ples go long ples wea barava naes and wea big tumas, and wea garem staka milk and honey.” (Exodus 3:7, 8) Samting olsem 500 year bihaen Jehovah mekem olketa Israelite kamap free from Egypt, hem sei olsem for remindim olketa: “Mi nao tekem Israel go aot from Egypt and sevem iufala from olketa bilong Egypt and from evri kingdom wea spoelem iufala.” (1 Samuel 10:18) From olketa Israelite no followim olketa raeteous standard bilong God, plande taem nao olketa kasem barava hard taem. Nomata olsem, Jehovah feel sorre long olketa and hem sevem olketa plande taem. (Judges 2:11-16; 2 Chronicles 36:15) Diswan showimaot samting wea God hem duim from hem garem bigfala love for olketa wea garem need, kasem hard taem, or wea stap long danger. Jehovah hem “garem bigfala mercy.”—Ephesians 2:4.
6. Long wanem wei nao Jesus Christ followim example bilong Dadi bilong hem saed long wei for showimaot mercy?
6 Taem Jesus Christ stap long earth, hem followim example bilong Dadi bilong hem for showimaot mercy long perfect wei. Wanem nao Jesus duim taem tufala blind man ask strong olsem: “Lord, Son bilong David, plis iu showimaot mercy long mitufala”? Tufala askem Jesus for duim mirakol for mekem tufala savve lukluk. Jesus duim datwan long wei wea showimaot feeling long tufala. Bible hem sei: “Jesus tasim eye bilong tufala, and semtaem nomoa tufala savve lukluk.” (Matthew 20:30-34) Wei for feel sorre hem muvim Jesus for duim plande mirakol wea mekem olketa wea blind for lukluk, aotem olketa demon from pipol, healim olketa wea garem sik leprosy, and helpem parents wea pikinini bilong olketa needim help.—Matthew 9:27; 15:22; 17:15; Mark 5:18, 19; Luke 17:12, 13.
7. Wanem nao iumi lanem from example bilong Jehovah God and Son bilong hem abaotem mercy?
7 Example bilong Jehovah God and Jesus Christ showimaot tufala samting nao insaed long mercy. First wan, wei for feel sorre and barava tingim pipol wea garem hard taem, and mek-tu, duim samting for helpem olketa. So for man showimaot mercy hem mas olsem nao. Long Bible, plande taem mercy hem wei wea man showimaot kaenfala fasin long wei for helpem olketa wea garem need. Bat wanem nao hem minim for showimaot mercy long wanfala judicial case? Waswe, wei for showimaot mercy savve minim tu for no duim samting, olsem wei for no givim discipline or panis?
Mercy for Olketa wea Duim Sin
8, 9. Long wanem wei nao God showimaot mercy long David bihaen hem sin witim Bath-sheba?
8 Tingim samting wea happen bihaen profet Nathan hem story witim King David bilong Israel abaotem wei wea hem duim adultery witim Bath-sheba. David, wea feel sorre tumas from sin wea hem duim, prea olsem: “Plis God, showimaot kaenfala fasin long mi fitim loving-kaeness bilong iu. From iu garem bigfala mercy, aotem olketa sin bilong mi. Barava wasim aot rong bilong mi, and mekem mi klin from olketa sin bilong mi. From mi savve long olketa rong bilong mi, and evritaem nomoa mi tingim sin wea mi duim. Mi barava sin againstim iu nao, and mi duim nao samting wea iu sei hem nogud.”—Psalm 51:1-4.
9 David hem barava feel sorre from samting wea hem duim. Jehovah forgivim sin wea hem duim and hol bak for givim panis wea David and Bath-sheba fit for kasem. For fitim Law bilong Moses, tufala shud dae. (Deuteronomy 22:22) Nomata tufala kasem samting wea kamaot from sin bilong olketa, God letem tufala for gohed laef. (2 Samuel 12:13) Nara samting abaotem mercy bilong God hem wei wea hem forgivim sin tu. Nomata olsem, hem no hol bak for givim panis wea fitim.
10. Nomata Jehovah hem showimaot mercy taem hem judgem man, why nao iumi mas no tingse iumi shud evritaem kasem mercy bilong God?
10 Evri man fit for dae bikos “thru long wanfala man [Adam] sin hem kam insaed long world” and “pei bilong sin hem dae.” (Romans 5:12; 6:23) Iumi tinghae tumas long wei wea Jehovah hem showimaot mercy taem hem judgem iumi! Bat iumi mas careful for no tingse iumi shud evritaem kasem mercy bilong God. Deuteronomy 32:4 hem sei: “[Jehovah] evritaem duim samting wea stret.” Taem God chus for showimaot mercy, evritaem hem followim olketa perfect standard bilong hem saed long justice.
11. Taem Jehovah deal witim David saed long sin wea hem duim witim Bath-sheba, long wanem wei nao hem showimaot hem barava tingim justice?
11 Only wei for David and Bath-sheba no kasem panis for dae hem for tufala mas kasem forgiveness for sin bilong tufala. Jehovah no givim paoa long olketa judge bilong Israel for forgivim olketa sin bilong tufala. Sapos Jehovah letem olketa judge for deal witim datwan, bae olketa mas killim tufala dae nao. Diswan nao samting wea Law hem talem. Bat from covenant wea Jehovah mekem witim David, hem laek for lukim sapos eni reason stap for forgivim sin bilong David. (2 Samuel 7:12-16) Dastawe Jehovah God, wea hem “Judge bilong full earth” and wea “lukluk gud long heart,” hem disaed for hemseleva nao deal witim diswan. (Genesis 18:25; 1 Chronicles 29:17) God fit for savve wanem nao insaed heart bilong David, luksavve sapos hem really repent or nomoa, and forgivim hem.
12. Wanem nao mekem wei for man wea sin savve kasem mercy bilong God?
12 Mercy wea Jehovah showimaot long iumi wea givim chance for iumi no kasem panis for dae from sin wea iumi born witim, hem sapotim justice bilong hem. For Jehovah savve forgivim olketa sin and long semtaem no againstim standard bilong hem saed long justice, hem givim Son bilong hem, Jesus Christ, olsem sakrifaes. Diswan hem wei for showimaot mercy wea winim eni nara wei for showimaot mercy. (Matthew 20:28; Romans 6:22, 23) For kasem gudfala samting from mercy bilong God, wea savve mekem iumi no kasem panis for dae from sin wea iumi born witim, iumi mas “showimaot faith long Son.”—John 3:16, 36.
God wea Showimaot Mercy and Justice
13, 14. Waswe, mercy bilong God hem balancem justice bilong hem? Explainim diswan.
13 Hem tru, mercy bilong Jehovah no againstim standard bilong hem saed long justice, bat waswe, mercy changem justice bilong hem, wea sapos datwan hem tru, datwan minim justice bilong hem no stret? And tu, samfala taem mercy hem lelebet daonem full panis wea maet justice bilong Jehovah hem markem for wanfala man, bat waswe, diswan minim mercy hem mekem justice bilong God kamap moabeta? Nomoa.
14 Thru long profet Hosea, Jehovah sei olsem long olketa Israelite: “Mi bae mekem iu kamap waef bilong mi for olowe. Long wei for showimaot raeteous fasin, justice, loving-kaeness, and mercy, mi bae mekem iu kamap waef bilong mi.” (Hosea 2:19) Toktok hia showimaot klia hao wei wea Jehovah showimaot mercy hem evritaem fitim olketa narafala fasin bilong hem, wea wanfala nao hem justice. Jehovah hem “God wea showimaot mercy and kaenfala fasin, . . . forgivim mistek and rong and sin, bat hem bae no letem man wea duim rong samting for missim panis.” (Exodus 34:6, 7) Jehovah hem God wea showimaot mercy and justice. Bible sei olsem abaotem hem: “Hem nao datfala Ston, and evri samting wea hem duim hem perfect, and hem evritaem duim samting wea stret.” (Deuteronomy 32:4) Justice and mercy bilong God tufala evriwan perfect. No eniwan hem moabeta winim narawan, and tu, narawan no needim narawan for balancem hem. Tufala fasin hia waka tugeta long perfect wei.
15, 16. (a) Wanem nao showimaot justice bilong God hem no spoelem man? (b) Olketa wea worshipim Jehovah savve sure long wanem samting taem hem finisim disfala wicked world?
15 Justice bilong Jehovah hem no spoelem man. Klosap evritaem justice hem join witim law, wea plande taem datwan lead go for man kasem panis wea fitim from hem brekem law. Bat nara samting wea justice bilong God savve duim tu hem for givim salvation long olketa wea fit for kasem. Olsem example, taem wicked pipol long taon bilong Sodom and Gomorrah distroe, God sevem Lot and tufala dota bilong hem.—Genesis 19:12-26.
16 Iumi savve sure hao taem Jehovah finisim disfala wicked world, hem bae sevem datfala “big crowd” bilong olketa tru worshiper wea “wasim finis kaleko bilong olketa and mekem kamap white long blood bilong Lamb.” From diswan, olketa hia bae “kamaot from datfala big trabol.”—Revelation 7:9-14.
Why Nao Iumi Shud Showimaot Mercy?
17. Wanem nao wanfala main reason for iumi showimaot mercy?
17 Tru nao, example bilong Jehovah and Jesus Christ helpem iumi luksavve wanem hem really minim for showimaot mercy. Proverbs 19:17 hem talem iumi wanfala main reason for showimaot mercy taem hem sei: “Man wea showimaot kaenfala fasin long samwan wea poor, hem olsem hem givim samting long Jehovah, and Jehovah bae rewardim hem for gudfala samting wea hem duim.” Jehovah hem hapi taem iumi followim example bilong hem and Son bilong hem for showimaot mercy long narawan. (1 Corinthians 11:1) And diswan hem encouragem olketa narawan tu for showimaot mercy, bikos taem iumi showimaot mercy long olketa, olketa tu bae showimaot mercy long iumi.—Luke 6:38.
18. Why nao iumi shud traem best for showimaot mercy long narawan?
18 Plande nara gudfala fasin nao insaed wei for showimaot mercy. Olketa fasin hia hem kaenfala fasin, love, and gudfala fasin. Kaenfala fasin and wei for feel sorre long man nao muvim iumi for showimaot mercy. Hem tru, mercy bilong God no spoelem justice, nomata olsem, Jehovah no savve kros kwiktaem, hem patient, and hem givim inaf taem for olketa wea duim rong samting for repent. (2 Peter 3:9, 10) So mercy hem join witim patient fasin and long-safaring. From man mas garem olketa nara gudfala fasin mekem hem savve showimaot mercy, wea samfala hia hem olketa frut bilong spirit bilong God, wei for showimaot mercy givim hem chance for showimaot olketa fasin hia long wei wea moabeta. (Galatians 5:22, 23) Hem barava important for iumi traem best for showimaot mercy long narawan!
“Hapi Nao Olketa wea Showimaot Mercy”
19, 20. Long wanem wei nao mercy hem barava win ovarem judgment?
19 Disaepol James hem talem iumi why iumi shud evritaem showimaot mercy long narawan. Hem sei: “Mercy hem barava win ovarem judgment.” (James 2:13b) James hem story abaotem mercy wea man wea worshipim Jehovah hem showimaot long narawan. Mercy hem win ovarem judgment bikos taem man mas ‘ansa long God’ for samting wea hem duim, Jehovah bae tingim wei wea hem showimaot mercy long narawan, and from ransom sakrifaes bilong Son bilong hem, Hem bae forgivim man hia. (Romans 14:12) For sure, wanfala reason why God showimaot mercy long David for sin wea hem duim witim Bath-sheba, hem from David tu hem man wea showimaot mercy long olketa narawan. (1 Samuel 24:4-7) Long narasaed, God bae no showimaot mercy long “man wea no showimaot mercy” long olketa narawan. (James 2:13a) Diswan barava helpem iumi for minim hao long tingting bilong God, pipol wea “no showimaot mercy . . . fit for dae”!—Romans 1:31, 32.
20 Long Sermon bilong Jesus long Maunten, hem sei: “Hapi nao olketa wea showimaot mercy, from olketa bae kasem mercy tu.” (Matthew 5:7) Toktok hia barava showimaot klia hao olketa wea laekem God for showimaot mercy long olketa mas showimaot mercy long olketa narawan tu! Next article bae storyim hao iumi savve showimaot mercy long wanem iumi duim evriday.
Wanem Nao Iu Lanem?
• Wanem nao mercy?
• Wanem nao samfala wei wea man savve showimaot mercy?
• Long wanem wei nao Jehovah hem God wea showimaot mercy and justice?
• Why nao iumi shud showimaot mercy?
[Piksa long page 3]
Feeling for kea wea Jehovah garem for olketa wea garem need hem olsem feeling wea mami garem for baby bilong hem
[Piksa long page 5]
Olketa mirakol wea Jesus duim teachim iumi wanem abaotem mercy?
[Piksa long page 6]
Taem Jehovah showimaot mercy long David, waswe, hem againstim justice bilong hem?
[Piksa long page 7]
Mercy wea God showimaot long olketa man wea sin hem fitim justice bilong hem