Wanem Nao Kasem Hellfire?
WANEM piksa nao kam long mind bilong iu taem iu herem disfala word “hell”? Waswe, iu lukim wanfala really ples bilong fire and sulfur, ples bilong safa and pain for olowe? Or waswe, hell hem wanfala tokpiksa nomoa abaotem wankaen living bilong olketa man?
For planti handred year, olketa leader bilong Christendom sei olketa man wea sin bae go long hell, ples bilong fire wea man bae safa from bigfala pain. Disfala idea hem big yet long planti religion distaem. U.S.News & World Report hem sei: “Christian lotu nao maet mekem planti pipol for herem disfala word, bat hem no teaching bilong hemseleva. Wei for sei man bae kasem panis long wei for feelim bigfala pain bihaen hem dae hem samting wea insaed long klosap evri main religion long world and insaed long samfala smol religion tu.” Olketa Hindu, Buddhist, Muslim, Jain, and Taoist biliv long samfala difren kaen hell.
Bat distaem narafala tingting abaotem hell hem kamap. Datfala magasin wea olketa talem long firstaem hem sei: “Nomata samfala go ahed for bilivim hell hem ples bilong fire, planti distaem start for tingim wei for judgem man for olowe hem nogud wei for stap seleva nomoa, and no wanfala really ples bilong fire wea pipol bilivim bifor.”
Datfala magasin bilong olketa Jesuit La Civiltà Cattolica hem sei: “Hem savve leadim man rong . . . for tingim hao God, thru long olketa demon, mekem olketa wea hem judgem kasem planti nogud wei for safa olsem long fire.” Hem sei moa: “Hell, hem no wanfala ples bat hem wankaen living, hem wei wea wanfala man hem kasem pain long mind from hem stap separate from God.” Long 1999, Pope John Paul II sei: “Winim wei for sei hem wanfala ples, hell hem minim living bilong olketa wea want for separate evribit from God, wea hem nao start bilong laef and hapi.” Abaotem idea bilong hell olsem ples bilong fire, hem sei: “Diswan hem showimaot hao laef wea no garem God insaed hem konfius evribit and no garem eni mining.” Martin Marty, man for raetem history abaotem olketa church, sei sapos pope hem storyim hell olsem ples bilong “fire and wanfala devil wea werem redfala kaleko wea garem wanfala pitchfork, bae pipol no bilivim datwan.”
Samfala change wea semsem witim diswan hem kakamap long olketa nara religion tu. Wanfala report bilong teaching commission bilong Church of England hem sei: “Hell hem no wei for safa for olowe, bat hem wei for disaed strong for chusim living wea barava opposite evribit long God so gogo end bilong olketa hem for finis evribit.”
Review bilong datfala United States Episcopal Church explainim hell olsem “wei for dae for olowe from iumi rejectim God.” Datfala U.S.News & World Report sei planti pipol go ahed for apim datfala idea hao “end bilong wicked pipol hem wei for distroe, no wei for safa olowe. . . . [Olketa] sei hao olketa wea rejectim God bae finis evribit insaed ‘bigfala fire’ bilong hell.”
Nomata tingting bilong distaem hem for rejectim idea abaotem fire and sulfur, planti go ahed for bilivim hao hell hem wanfala really ples for safa. Albert Mohler from Southern Baptist Theological Seminary long Louisville, Kentucky, U.S.A. hem sei: “Bible hem talem klia hao hell hem wanfala really ples for safa from fire.” And datfala report The Nature of Hell, wea Evangelical Alliance Commission redyim hem sei: “Hell hem samting wea man really feelim from God rejectim hem and mekem hem safa.” Hem sei moa: “Planti difren kaen panis and wei for safa stap long hell wea depend long hao big nao sin wea man duim taem hem long earth.”
Bat waswe, hell hem really ples for safa olowe long fire or for distroe evribit? Or waswe, hem just wei wea man stap separate from God? Really, wanem nao hell?
[Box/Olketa Piksa long page 4]
Lelebet History Bilong Hellfire
WANEM taem nao olketa wea sei olketa Christian start for bilivim hellfire? Longfala taem bihaen taem bilong Jesus Christ and olketa aposol bilong hem. French Encyclopædia Universalis hem sei: “The Apocalypse of Peter (mek-2 century C.E.) hem firstfala Christian raeting [wea no stap insaed Bible] wea storyim panis and wei for safa bilong olketa sinner wea stap long hell.”
Bat, midolwan long olketa firstfala Church Father, olketa raoa abaotem hell. Justin Martyr, Clement of Alexandria, Tertullian, and Cyprian bilivim hell hem wanfala ples bilong fire. Origen and savveman bilong religion Gregory of Nyssa tingim hell hem ples wea man stap separate from God—for safa long spiritual wei. Long narasaed, Augustine of Hippo bilivim hao wei for safa long hell hem spiritual, and tu, hem samting wea man bae feelim—diswan hem tingting wea gogo olketa acceptim. Professor J.N.D. Kelly hem raet olsem: “Kasem mek-faev century strongfala teaching wea sei olketa sinner no garem mek-tu chance bihaen olketa dae and hao fire wea bae bonem olketa bae no savve finis hem kamap big tumas evriwea.
Long mek-16th century, olketa Protestant man wea mekem change kamap olsem Martin Luther and John Calvin explainim disfala wei for safa long fire bilong hell hem tokpiksa wei for stap separate from God for olowe. Bat, idea bilong hell olsem ples for safa hem kamap moa insaed tu handred year bihaen. Protestant man for preach Jonathan Edwards savve mekem olketa first white man wea go long America long mek-18 century fraet fogud taem hem storyim olketa samting wea happen long hell.
Bat, no longtaem bihaen, fire bilong hell start for katdaon. U.S.News & World Report hem sei: “Mek-20 century hem klosap killim dae hell.”
[Olketa Piksa]
Justin Martyr bilivim hell hem wanfala ples bilong fire
Augustine of Hippo teachim hao wei for safa long hell hem spiritual and physical