Kastom Biliv 2: Olketa Nogud Pipol Safa Long Hell

Hao nao kastom biliv hem start?

Georges Minois talem olsem: “Wanfala man long Greece bifor kam wea barava mekhae long idea abaotem wei for biliv long Hell, hem nao Plato.”​—⁠Histoire des enfers (The History of Hell) page 50.

“From midol long mek-tu century AD, olketa Christian wea skul abaotem olketa idea bilong Greece start for tingse olketa mas joinim idea hia witim faith bilong olketa . . . Idea wea Plato teachim nao barava fitim olketa hia.”​—⁠The New Encyclopædia Britannica (1988), Volume 25, page 890.

“Church gohed for teach abaotem hell wea no savve finis. Taem olketa man dae, soul bilong olketa wea duim bigfala sin hem go long hell. Long there nao olketa safa and kasem panis ‘insaed fire wea no savve finis.’ Bigfala panis long hell, hem nao wei for no fren witim God for olowe.”​—⁠Catechism of the Catholic Church, 1994 edition, page 270.

Wanem nao Bible talem?

“Olketa wea laef savve olketa bae dae, bat olketa wea dae finis no savve long eni samting,  . . bikos taem iumi go long Sheol, ples wea iumi bae go long hem, bae iumi no waka, no tingting, no garem savve, and no wise tu.”​—⁠Ecclesiastes 9:​5, 10.

Disfala Hebrew word Sheol, wea minim “grev bilong olketa man,” long samfala Bible olketa transleitim “hell.” Disfala scripture storyim wanem samting abaotem olketa wea dae finis? Waswe, olketa safa long Sheol for rong samting wea olketa duim? Nomoa, bikos olketa “no savve long eni samting.” Dastawe Job wea kasem bigfala sik and safa tumas hem barava askem God olsem: “Protectim mi long hell [Hebrew, Sheol].” (Job 14:13; Douay-Rheims Version) Sapos Sheol hem ples for safa for olowe, why nao Job laek for go long there? Long Bible, ‘hell’ hem minim nomoa grev bilong olketa man, wea man no savve duim eni samting moa.

Disfala mining abaotem hell hem barava klia and hem followim wanem Bible talem. Hard tumas for God wea garem love for mekem man gohed safa for olowe nomata wanem nogud samting hem duim. (1 John 4:⁠8) Bat sapos hellfire hem wanfala kastom biliv, waswe long wei for go long heven?

Lukim olketa scripture hia: Psalm 146:​3, 4; Acts 2:​25-​27; Romans 6:​7, 23