Wanem Nao Truth Abaotem Hell?

NOMATA wanem iu tingim taem iu herem datfala word “hell,” planti pipol tingim hell olsem ples for kasem panis from sin. Bible sei olsem abaotem sin and samting wea kamaot from hem: “Thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan sin.” (Romans 5:12) Bible sei tu: “Pei bilong sin hem dae.” (Romans 6:23) From panis bilong sin hem nao dae, important kwestin for helpem iumi faendaot wanem nao hell hem: Wanem nao happen long iumi taem iumi dae?

Waswe, eni laef go ahed bihaen man dae? Wanem nao hell, and wanem kaen pipol nao bae go long there? Waswe, eni hope stap for olketa wea insaed hell? Bible talem olketa trufala ansa for olketa kwestin hia wea bae mekem man satisfae.

Laef Stap Bihaen Dae?

Waswe, eni samting insaed iumi, olsem soul or spirit wea stap laef bihaen body hem dae? Tingim hao first man, Adam, kasem laef. Bible sei: “Jehovah God hem wakem man from dust bilong graon and blowim go insaed long nose bilong hem wind bilong laef.” (Genesis 2:7) Nomata wei for brith mekem hem go ahed for laef, wei for putim “wind bilong laef” insaed nose bilong Adam hem moa samting winim wei for blowim air nating insaed lung bilong hem. Hem minim God putim start bilong laef—“paoa bilong laef,” wea mekem evri samting long earth for laef, insaed body bilong Adam wea no garem laef. (Genesis 6:17; 7:22) Bible kolem disfala paoa bilong laef “spirit.” (James 2:26) Datfala spirit hem olsem electric paoa wea savve mekem olketa machine or wanfala samting for duim waka bilong hem. Long sem wei wea electric paoa hem no savve kamap datfala samting wea hem givim paoa long hem, paoa bilong laef tu no savve garem fasin bilong olketa samting wea hem mekem laef. Hem no garem fasin and no savve tingting.

Wanem nao happen long spirit taem man hem dae? Psalm 146:4 sei: “Spirit bilong hem go aot, hem go bak long graon; long datfala day tingting bilong hem finis evribit.” Taem man dae finis, spirit bilong hem wea no garem eni feeling no go ahed for laef long nara ples olsem wanfala spirit creature. Hem “go bak long trufala God wea givim.” (Ecclesiastes 12:7) Diswan minim eni hope for laef bak moa long future hem depend evribit long God.

Olketa savveman bilong Greek bifor olsem Socrates and Plato bilivim hao soul insaed long man hem go ahed for laef bihaen man dae and hem bae no dae. Wanem nao Bible teachim abaotem soul? Genesis 2:7 sei Adam “hem kamap wanfala living soul.” Hem no kasem wanfala soul: hem nao datfala soul—wanfala full man. Bible storyim wei wea soul savve waka, laekem kaikai, samwan stealim, no savve sleep, and samfala samting moa olsem. (Leviticus 23:30; Deuteronomy 12:20; 24:7; Psalm 119:28) Tru nao, man seleva nao soul. Taem man hem dae, datfala soul dae tu.—Ezekiel 18:4.

So, olketa wea dae olketa hao? Taem Jehovah talemaot judgment long Adam, hem sei: “Iu dust nomoa and iu bae go bak long dust.” (Genesis 3:19) Wea nao Adam bifor God wakem hem from dust bilong graon and givim hem laef? Hem no stap! Taem hem dae, Adam kamap olsem hao hem bifor, hem no garem eni laef. Hem showaot klia long Ecclesiastes 9:5, 10 hao nao olketa wea dae finis, hem read olsem: “Olketa wea dae no savve eniting . . . Long grev, ples wea bae iu go long hem, no eni waka no eni plan no eni savve no eni wisdom stap.” (New International Version) Long Bible, dae hem wei for no stap nao. Olketa wea dae no savve eniting, no garem feeling, no garem tingting.

Wei for Safa Olowe or Grev Nomoa?

From olketa wea dae no savve eniting, hell hem kanduit for wanfala ples bilong fire wea wicked pipol bae safa bihaen olketa dae. So, wanem nao hell? For helpem iumi ansarem disfala kwestin iumi lukluk long samting wea happen long Jesus bihaen hem dae. Man wea raetem Bible, Luke, hem sei: “[Jesus] no stap olowe long Hades [hell, King James Version] and tu body bilong hem no rotten.”a (Acts 2:31) Wea nao hell wea Jesus go insaed? Aposol Paul raet olsem: “Mi pasim go long iufala . . . hao Christ dae for olketa sin bilong iumi for fitim olketa Scripture; and olketa berem hem, yes, hem laef bak long mek-thri day for fitim olketa Scripture.” (1 Corinthians 15:3, 4) So Jesus go insaed hell, datfala grev, bat hem no stap olowe long there, from bihaen hem laef bak, or resurrect.

Tingim tu story bilong datfala raeteous man Job, wea safa tumas. From hem laek for finisim wei wea hem safa, hem ask olsem: “Hu nao bae givim mi diswan, mekem iu protectim mi insaed hell [Sheol], and haedem mi go kasem taem kros bilong iu go pas?”b (Job 14:13, Douay Version) Hem nating fitim man for tingse Job laek for go long ples bilong hotfala fire for kasem protection! Long tingting bilong Job, “hell” hem nao grev, ples wea wei for safa bae finis. So, hell wea Bible storyim, hem grev bilong olketa man nomoa, wea gud and nogud pipol bae go long hem.

Hellfire—For Bone Evribit?

Waswe, fire bilong hell hem piksarem wei for bone evribit or wei for distroe evribit? Bible showimaot hao fire and Hades, or hell, tufala difren, taem hem sei: “Olketa torowem dae and Hades go insaed long lake bilong fire.” “Lake” wea hem storyim long hia hem wanfala tokpiksa, from dae and hell (Hades) wea olketa torowem insaed kanduit for really bone. “Diswan [lake bilong fire] hem minim mek-tu dae”—dae wea no garem eni hope for resurrect.—Revelation 20:14.

Datfala lake bilong fire garem mining wea semsem olsem “fire bilong Gehenna [hell fire, King James Version]” wea Jesus tok abaotem. (Matthew 5:22; Mark 9:47, 48) Gehenna kamap 12-fala taem insaed long Christian Greek Scripture, and hem minim valley bilong Hinnom, wea stap aotsaed olketa wall bilong Jerusalem. Taem Jesus stap long earth, olketa iusim disfala valley for torowe rabis insaed, ples “wea olketa torowem olketa dead body bilong olketa criminal, and dead body bilong olketa animal, and evri nara kaen rabis.” (Smith’s Dictionary of the Bible) Olketa putim sulfur insaed for mekem olketa fire go ahed for laet mekem hem bae bonem olketa rabis hia. Jesus iusim datfala valley olsem wanfala stretfala tokpiksa abaotem wei for distroe evribit.

Long sem wei olsem Gehenna, datfala lake bilong fire tu hem piksarem wei for distroe evribit. Wei wea olketa “torowem” dae and Hades insaed datfala lake bilong fire hem minim taem olketa man kamap free from sin and judgment bilong dae olketa bae finis evribit. Olketa sinner wea min for duim samting and wea no repent olketa tu “bae go insaed” datfala lake. (Revelation 21:8) Olketa bae finis for olowe. Long narasaed, olketa wea stap long hell—grev bilong olketa man—wea God rememberim bae garem wanfala nambawan future.

Hell bae Emti!

Revelation 20:13 hem sei: “Sea givim go olketa wea dae insaed long hem, and dae and Hades givim go olketa wea dae insaed long olketa.” Yes, hell wea Bible storyim bae kamap emti. Olsem Jesus promisim, “hour bae kam wea evriwan wea stap long olketa memory grev bae herem voice bilong [Jesus’] and kamaot.” (John 5:28, 29) Nomata olketa no garem eni laef distaem, planti million wea dae finis wea stap long memory bilong Jehovah God bae resurrect, or laef bak moa, insaed paradaes wea bae kamap long earth.—Luke 23:43; Acts 24:15.

Insaed niu world bilong God, olketa man wea resurrect wea followim olketa raeteous law bilong hem bae no need for dae moa. (Isaiah 25:8) Jehovah “bae aotem evri wata from eye bilong olketa, and dae bae nomoa, sorre and krae and pain bae nomoa tu.” Tru tumas, “evri samting bifor hem finis nao.” (Revelation 21:4) Wanfala nambawan blessing hem stap for olketa wea insaed hell—“olketa memory grev”! Disfala blessing hem wanfala gud reason for iumi mas kasem moa savve abaotem Jehovah God and Son bilong hem, Jesus Christ.—John 17:3.

[Olketa Footnote]

[Piksa long page 5]

Job prea for protection insaed hell

[Piksa long page 6]

Fire bilong Gehenna—hem piksarem wei for finis for olowe

[Piksa long page 7]

‘Olketa wea insaed memory grev bae kamaot’