Planti Distaem Interest Long “Olketa Saint”

“Waswe, iu tingim hao bifor iumi nating interest long pipol wea duim olketa spesol samting? Disfala tingting nating affectim 4.2 million pipol long America wea lukluk long funeral bilong Mother Teresa long Sept. 13. Start from taem hem dae long Sept. 5, pipol askem Vatican for markem hem olsem wanfala saint. Klosap evriwan biliv hem bae kamap olsem.”—Sun-sentinel, United States, October 3, 1997.

PLANTI pipol tingim waka wea Catholic missionary Mother Teresa duim for helpem pipol, hem nao showimaot fasin bilong wanfala tru saint. Olketa nara religion tu garem pipol wea bin duim olketa spesol samting. Bat, olketa main wan wea pipol luksavve long olketa olsem saint, hem nao olketa wea Roman Catholic Church markem.

Insaed rul bilong Pope John Paul II hem markem winim 450 pipol olsem saint, diswan winim namba bilong evri saint wea olketa nara pope bin markem insaed mek-20 century.a Nomata planti Catholic no savve long evri saint hia, why nao pipol laek tumas for worshipim olketa?

Lawrence Cunningham, wanfala savveman from Notre Dame University sei olsem: “Pipol interest for savve hao insaed long disfala world maet samfala samting wea holy hem stap yet. Wei for luksavve long olketa saint showimaot pipol biliv hao, nomata distaem, man savve iusim laef bilong hem for duim olketa spesol samting.” And tu, pipol biliv hao “olketa saint” garem spesol wei for story long God, diswan minim olketa wea laef yet savve prea thru long olketa. Taem olketa faendem olketa samting or olketa bon bilong wanfala “saint,” olketa mekhae long diswan tu from olketa biliv hao paoa hem kam from olketa samting hia.

Insaed The Catechism of the Council of Trent, wea olketa pablisim long mek-16 century for strongim moa Catholic teaching, church sei olsem: “Mifala garem gud reason for talem, hao wei for honorim olketa saint ‘wea sleep long Lord,’ for askem olketa for prea for iumi, and for mekhae long olketa samting bilong olketa wea holy and asis bilong olketa, hem no daonem glory bilong God bat hem mekem glory bilong hem moa big. Diswan strongim and mekem hope bilong wanfala Christian kamap really samting long hem and maet diswan muvim hem for followim example bilong olketa saint.” (The Catechism of the Council of Trent, 1905) Hem barava tru hao olketa tru Christian want for live followim gud fasin, worshipim God long stretfala wei, and kasem help from God. (James 4:7, 8) Dastawe, for fitim samting wea Word bilong God talem, hu nao olketa tru saint? And wanem nao waka bilong olketa?

[Footnote]