Hao, Mi Shud Prea lo Olketa Saint?

Ansa from Bible

Nomoa. Bible sei iumi shud prea lo God nomoa, and talem prea blo iumi lo nem blo Jesus. Jesus sei lo olketa disaepol blo hem: “Iufala mas prea lo wei olsem: Dadi blo mifala lo heven, mifala laekem nem blo iu for holy.” (Matthew 6:9, New American Bible) No enitaem Jesus talem olketa disaepol blo hem for prea lo olketa saint, angel, or eni narawan, bat for prea lo God nomoa.

Jesus sei lo olketa disaepol blo hem: “Mi nao wei, truth, and laef. No eniwan savve go lo Dadi bat thru lo mi nomoa.” (John 14:6, NAB) Jesus nomoa savve story lo God for iumi.—Hebrew 7:25.

Hao if mi prea lo God and prea tu lo olketa saint?

Wanfala law wea God givim lo Ten Komandment hem sei: “Mi nao LORD, God blo iufala, and mi wanfala jealous God.” (Exodus 20:5, NAB) Wat nao scripture hia minim taem hem sei God hem “jealous”? Lo footnote blo New American Bible hem sei “mas worshipim God nomoa.” God barava laekem pipol for worshipim hem and prea lo hem nomoa.—Aesaea 48:11.

God no hapi lo iumi if iumi prea lo olketa saint, angel, or eni narawan. Taem aposol John laek for worshipim wanfala angel, angel hia sei: “No duim olsem! Mi wanfala servant nomoa olsem iu and olsem olketa brata blo iu wea preach abaotem Jesus. Worshipim God nomoa.”—Revelation 19:10, NAB.