Wei for Feel Sure and Satisfae Abaotem Waka Kasem Attak
“RIGHT for duim waka” hem wanfala main need bilong evri man, hem nao samting wea Universal Declaration of Human Rights, wea United Nations appruvim, hem talem. Nomata olsem, olketa man no evritaem kasem disfala right. For feel sure iu bae garem or keepim waka hem depend long staka samting—olsem selen bilong kantri or wei wea olketa difren kantri duim bisnis. Nomata olsem, wei for lusim waka staka taem kosim olketa demonstration, raoa long pablik, and strike. Staka kantri kasem disfala problem. Wanfala man for raet hem sei datfala word “ ‘waka’ hem olowe bin wanfala word wea mekem strongfala feeling kamap.”
Waka hem important long iumi for staka reason. Hem givim iumi selen bat, tu, hem mekem iumi stap gud saed long mind and feeling. Waka hem fulfillim wei wea man laek for duim samting and for garem purpose long laef. Hem mekem iumi garem feeling for respectim seleva. Dastawe, nomata olketa wea garem staka selen winim wanem olketa needim and wea fit for retire, olketa laek for go ahed for waka. Tru nao, from waka hem barava important, staka serious problem savve kamap saed long living taem no inaf waka stap.
Long narasaed, samfala garem waka bat from olketa feisim staka hevi long wakples, olketa lusim feeling for satisfae long waka. Olsem example, from evri bisnis distaem trae for winim narawan, staka company katem daon haomas wakman olketa garem mekem bisnis no spendem tumas selen. Diswan putim moa hevi long olketa nara wakman wea maet need for duim extra waka.
Niu technology, wea olketa wakem for mekem laef moa isi and waka moabeta, hem maet mekem hevi long wakples kamap moa big. Olsem example, olketa computer, fax machine, and Internet letem pipol tekem waka long haos long end bilong day, wea mekem haos bilong man kamap wakples tu. Wanfala wakman feel olsem pager and mobile phone bilong company hem olsem rope wea evritaem joinim hem long boss.
Wanfala wari bilong olketa wea gogo for olo distaem hem bigfala change saed long selen and wakples wea mekem nara pipol ting long olketa olsem olketa shud retire, bifor olketa kasem age for retire. Saed long diswan, Human Rights Commissioner bifor, Chris Sidoti, hem sei: “Pipol garem tingting hao, sapos iu ovarem 40 year, iu no savve hao for iusim computer and niu technology.” From diswan, staka wea waka hard, wea bifor pipol tingim olketa olsem olketa best wan for duim waka, distaem pipol ting long olketa olsem olo tumas for duim eniting. Barava sorre samting!
Dastawe iumi no sapraes hao, insaed olketa year wea just go pas, pipol no tinghae long man wea waka hard and loyal long company. Wanfala magasin long France, Libération, hem sei: “Taem olketa company sakem pipol from company lus lelebet long profit, wei for loyal long company hem nomoa nao. Hem tru, iu mas waka, bat tingim iuseleva nomoa, no company.”
Nomata olketa problem olsem kamap moa big, datfala main need bilong man for waka hem stap yet. So long distaem wea go ahed for change, hao nao man savve garem balance tingting saed long waka for selen and, long semtaem, keepim feeling for sure and satisfae long waka bilong hem?
[Piksa long page 3]
Niu technology hem mekem hevi long wakples kamap moa big