Problem Saed Long Waka
“Waka—waka! Iumi hapi tumas from iumi still garem waka for duim.”—Katherine Mansfield, woman for raetem buk (1888-1923).
WASWE, iu garem sem tingting abaotem waka olsem datfala toktok antap? Wanem nao tingting bilong iu abaotem waka? Waswe, iu ting hem samting wea man mas duim nomoa go kasem weekend? Or waswe, hem kamap main samting wea iu laekem tumas winim eni nara samting?
Waka nao main samting wea staka pipol duim start long morning go kasem evening. Waka savve affectim tu ples wea iumi stap and living wea iumi garem. Staka pipol lukim hao waka nao main samting insaed laef bilong olketa start from taem olketa young go kasem taem olketa retire. Samfala long iumi barava feel satisfae taem iumi duim waka bilong iumi. Samfala maet hapi long waka bilong olketa from olketa kasem staka selen or bignem. Samfala narawan maet ting long waka olsem samting for busy long hem nomoa, or ting waka hem westem taem nomoa.
Samfala pipol waka bikos olketa trae for kasem samting olketa needim, and samfala waka bikos olketa interest tumas for duim datwan. Bat, samfala pipol dae tu from waka bilong olketa. Olsem example, wanfala report bilong United Nations talem hao waka nao kosim moa pain and killim dae moa pipol winim “olketa war and total namba bilong pipol wea dae from olketa drug and alcohol.” Wanfala niuspepa bilong London, The Guardian, hem sei olsem: “Evri year winim tu million pipol dae from olketa accident or sik wea kamap from waka bilong olketa . . . Wei wea pipol waka long ples wea dust, garem chemical, wea mek noise and garem radiation, [hem] mekem olketa sik olsem cancer, sik long heart, and stroke for kamap.” Tufala nara barava nogud samting wea happen distaem saed long waka, hem nao wei wea pipol mekius long olketa pikinini for duim hard waka and wei wea pipol forcem man for waka.
Steven Berglas, wea hem studyim mind and fasin bilong pipol, hem sei wanfala nara samting wea savve happen tu, hem wei wea samfala pipol ‘ova tumas for waka gogo datwan spoelem olketa.’ Hem storyim hao man savve barava waka hard gogo hem kasem hae position, then, winim wei for hapi, ‘hem feel fraet, wari, and sorre from hem tingse hem mas waka olsem for olowe and hem feel hem hard for lusim disfala waka, bat long semtaem, hem feel waka bilong hem no mekem hem satisfae and hapi.’
Waka Hard or Ova Tumas
From pipol mas waka for plande hour, iumi need for luksavve hao man wea waka hard hem difren from man wea ova tumas for waka. Olketa man wea ova tumas for waka tingse wakples nomoa hem gud ples for stap long hem, bikos olketa ting world hem danger tumas and savve change evritaem. Bat, olketa man wea waka hard ting long waka olsem wanfala samting wea hem mas duim wea savve mekem man satisfae samfala taem. Olketa man wea ova tumas savve letem waka bilong olketa kamap main samting long laef bilong olketa. Bat, olketa man wea waka hard savve stop waka, tingim difren samting, and tingim olketa important samting saed long famili. Taem olketa man wea ova tumas long waka garem staka waka fogud, olketa ting datwan nao barava gud and taem olketa duim hem mekem olketa feel gud tumas. Bat, olketa man wea waka hard no feel olsem.
From world distaem mekem wei for ova tumas long waka luk olsem gud samting, pipol no lukim klia wanem nao wei for waka hard and wanem nao wei for ova tumas. Olketa mobile telephone and kaen samting olsem, hem mekem pipol gohed duim waka bilong olketa nomata taem olketa stap long haos. So olketa no luksavve wanem taem nao for stop waka. From pipol fit for duim waka bilong olketa long eni ples and enitaem nomoa, bae samfala man waka gogo olketa spoelem olketa seleva.
Hao nao samfala pipol deal witim kaen samting olsem? Olketa savveman wea studyim wei wea pipol stap tugeta, lukim hao pipol wea waka tumas and kasem hevi from waka savve trae for mixim lotu and waka. Datfala niuspepa San Francisco Examiner hem sei wei wea “pipol mixim lotu and waka hem samting wea kamap big tumas distaem.”
Wanfala report abaotem Silicon Valley, wea hem main ples wea olketa savve wakem olketa niu technology long United States, hem sei olsem: “Olketa ples for putim car hem gogo for emti, bikos olketa bisnis long there finisim samfala wakman, bat, long olketa ples wea pipol go hipap for prea, olketa ples for putim car hem fulap.” Plande pipol distaem lukim hao Bible hem barava helpem olketa for garem gudfala tingting abaotem waka bilong olketa, diswan mekem olketa balance long living bilong olketa.
Hao nao Bible savve helpem iumi for garem balance tingting abaotem waka? Waswe, eni Bible principle stap wea savve helpem iumi deal witim olketa hard samting wea kamap long wakples bilong iumi? Insaed next article bae iumi story raonem olketa kwestin hia.