Report Bilong Olketa wea Talemaot Kingdom

Olketa “Herem” Message Bilong Kingdom Long Brazil

FOR mekem olketa talemaot gud nius bilong Kingdom long community wea olketa earpas stap, planti Jehovah’s Witness long Brazil acceptim disfala hardfala samting for lanem Saen Languis bilong Brazil. Nambawan samting kamaot from hard waka bilong olketa, olsem olketa experience hia showimaot.

Eva,a wanfala woman wea earpas wea stap long São Paulo, start for lanem saen languis bihaen hem and thrifala pikinini bilong hem olketa muv and go stap witim wanfala man wea earpas. Long wanfala shopping center, Eva and boyfren bilong hem meetim samfala Jehovah’s Witness wea earpas and olketa invaetem tufala long meeting long Kingdom Hall. Tufala acceptim invitation, from tufala ting datwan bae hem wanfala hapitaem.

From savve bilong hem long saen languis no big tumas, Eva minim lelebet nomoa long wanem olketa talem long datfala meeting. Bihaen datwan, samfala Witness invaetem hem long haos bilong olketa for kaikai. For explainim promis bilong God for wanfala paradaes earth long future, olketa Witness hia iusim olketa piksa insaed long brochure, Hapi for Stap long Earth Olowe! Eva laekem wanem hem lanem and start for attendim olketa meeting evritaem.

Bihaen datwan, Eva lusim boyfren bilong hem for live followim olketa mark bilong Bible. Nomata barava strongfala wei for againstim hem kam from famili bilong hem, hem go ahed for grow long spiritual wei and hem baptaes long 1995. Six month bihaen, Eva kamap wanfala pioneer, or wan wea full taem for talemaot kingdom. Start kam from datfala taem hem helpem fofala wea earpas kamap redy for dedicate and baptaes.

Taem Carlos born hem earpas nao. From taem hem smol pikinini, hem start for join insaed wei for iusim olketa drug, duim dirty fasin, and wei for steal. From hem stap insaed danger from samfala difren gang member laek spoelem hem, Carlos ranawe go long São Paulo and stap for lelebet taem witim João. João, hem olsem Carlos tu, hem earpas and garem laef wea olabaot.

Samfala year bihaen, Carlos lanem message bilong Kingdom and datwan muvim hem for stretem living bilong hem and stretem marit bilong hem saed long law. Bihaen hem stretem living bilong hem fitim olketa mark bilong Bible, Carlos hem baptaes for showimaot dedication bilong hem long Jehovah. Long semtaem, Carlos no savve hao João tu start for kasem savve abaotem gud nius, and hem tu mekem olketa bigfala change long laef bilong hem. Taem hem lane hao Jehovah no appruvim wei for iusim image, João torowem “olketa saint” wea hem bin keepim. Bihaen hem lusim living bilong hem bifor, João tu baptaes.

Carlos and João barava hapi tumas taem tufala meet long wanfala Kingdom Hall and lukim olketa change wea tufala mekem! Distaem tufala kamap gudfala famili hed and serve olsem strongfala Kingdom pablisa.

Long Brazil, distaem hem garem 30 saen languis kongregeson and 154 grup, wea garem winim 2,500 pablisa, and samting olsem 1,500 long olketa hia earpas. Long 2001 “Pipol wea Teachim Word bilong God” Distrik Convention long Brazil for olketa wea earpas, winim 3,000 nao attendim, and 36 nao baptaes. Witim blessing bilong Jehovah, iumi hope planti moa wea earpas bae acceptim message bilong Kingdom.

[Footnote]