“Olketa wea Laek Savve” Acceptim Gud Nius
“Olketa wea laek savve long laef olowe kamap pipol wea biliv.”—ACTS 13:48.
1, 2. Wanem nao olketa first Christian duim for obeyim profesi bilong Jesus for preachim gud nius abaotem Kingdom long full earth?
BIBLE buk bilong Acts barava storyim gud olketa samting wea olketa first Christian duim for obeyim profesi bilong Jesus for preachim gud nius abaotem Kingdom long full earth. (Matt. 24:14) Olketa hia wea strong for preach showimaot example for olketa wea bae duim sem waka bihaen. From olketa disaepol bilong Jesus strong for preach long Jerusalem, plande thousand pipol and “plande long olketa priest” tu kam insaed kongregeson long first century.—Acts 2:41; 4:4; 6:7.
2 Olketa firstfala missionary helpem staka for kamap Christian. Wanfala nao hem Philip wea go long Samaria and plande pipol willing for lisin long hem. (Acts 8:5-8) Paul hem gogo witim olketa difren wan long staka ples, and preach abaotem Christ long Cyprus, long samfala ples long Asia Minor, Macedonia, Greece, and Italy. Long olketa taon wea hem preach long hem, plande Jew and Greek kamap Christian. (Acts 14:1; 16:5; 17:4) Titus hem preach long Crete. (Titus 1:5) Peter hem preach long Babylon, and taem hem raetem firstfala leta bilong hem long samting olsem 62-64 C.E., plande pipol long Pontus, Galatia, Cappadocia, Asia, and Bithynia savve finis long waka bilong olketa Christian for preach. (1 Pet. 1:1; 5:13) Datwan hem barava naesfala taem stret! Olketa firstfala Christian strong tumas for preach dastawe olketa enemy bilong olketa sei olketa hia “kosim problem long full earth.”—Acts 17:6; 28:22.
3. Wanem gudfala waka nao olketa pablisa duim distaem, and wanem nao tingting bilong iu long diswan?
3 Long distaem tu, staka pipol joinim Christian kongregeson. Taem iu lukim report bilong Olketa Jehovah’s Witness evri year wea showim olketa gudfala waka wea gohed raonem world, waswe, datwan mekem iu hapi tumas? Waswe taem iu lukim hao olketa pablisa duim winim six million Bible study long 2007 service year? And taem iumi lukim full namba wea kam long Memorial bilong dae bilong Jesus Christ long last year, hem showaot hao klosap ten million pipol wea interest long gud nius bat olketa no Witness bilong Jehovah nao hipap long datfala taem. Diswan showimaot hao bigfala waka stap yet for iumi duim.
4. Hu nao lisin long message abaotem truth?
4 Distaem tu “olketa wea laek savve long laef olowe” willing for lisin long message abaotem truth. (Acts 13:48) Jehovah hem leadim pipol for go long organization bilong hem. (Readim Haggai 2:7.) For iumi share evribit long disfala waka for hipimap pipol, wanem tingting nao iumi shud garem long Christian ministry?
Preach Long Eniwan
5. Jehovah hem laekem wanem kaen pipol?
5 Olketa firstfala Christian savve “God hem no saed witim eniwan, bat hem acceptim nomoa eni man long eni kantri wea fraet long hem and wea duim raeteous samting.” (Acts 10:34, 35) Man wea laek for fren gud witim Jehovah mas garem faith long ransom sakrifaes bilong Jesus. (John 3:16, 36) Samting Jehovah laekem nao hem for “evri difren kaen man mas sev and kasem stretfala savve abaotem truth.”—1 Tim. 2:3, 4.
6. Olketa wea preachim Kingdom message mas no duim wanem and why nao olsem?
6 Iumi mas no judgem man from kala skin, living, lukluk, religion, or eni nara samting wea mekem hem difren from narawan. Waswe, iu hapi bikos man wea storyim truth long iu firstaem hem willing for preach long eniwan? Dastawe iumi mas storyim disfala message for sevem laef long eniwan wea willing for lisin!—Readim Matthew 7:12.
7. Why nao iumi mas no judgem pipol wea iumi preach long olketa?
7 Jehovah markem Jesus for Judge, dastawe hem no fitim for iumi judgem eniwan. Datwan hem stret bikos iumi judgem samting followim “samting wea eye bilong [iumi] lukim” or “samting wea ear bilong [iumi] herem.” Bat Jesus savve long trufala tingting and samting wea muvim heart bilong man.—Isa. 11:1-5; 2 Tim. 4:1.
8, 9. (a) Saul hem wanem kaen man bifor hem kamap wanfala Christian? (b) Wanem nao iumi lanem from story bilong aposol Paul?
8 Evri difren kaen pipol nao worshipim Jehovah. Saul from Tarsus, wea kamap aposol Paul hem wanfala nambawan example bilong diswan. Saul hem wanfala Pharisee wea barava strong for againstim olketa Christian. Hem duim olsem long olketa insaed Christian kongregeson bikos hem tingse olketa no worshipim Jehovah long stretfala wei. (Gal. 1:13) Long tingting bilong man, luk olsem hem nao lalas man for kamap wanfala Christian. Bat Jesus lukim gudfala samting insaed heart bilong Saul and hem chusim hem for duim wanfala spesol waka. Saul hem kamap wanfala man wea strong tumas for duim waka insaed Christian kongregeson long first century.
9 Wanem nao iumi lanem from story bilong aposol Paul? Long ples wea iumi preach, maet samfala luk olsem olketa no laek for herem message wea iumi talem. Nomata maet staka long olketa bae no kamap tru Christian, iumi shud no givap for gohed story gud witim olketa. Samfala taem, man wea iumi tingse hem no interest, hem nao lisin long iumi. Iumi garem waka for gohed preach long evriwan and “nating givap.”—Readim Acts 5:42.
Olketa wea Preach and “Nating Givap” Bae Kasem Gud Samting
10. Why nao iumi mas preach long evriwan nomata long samfala wea iumi fraetem tu? Talem eni story olsem.
10 Samfala taem samting iumi lukim savve laea long iumi. Ignacio,a hem wanfala man wea Olketa Jehovah’s Witness studyim Bible witim hem taem hem stap long prison long wanfala kantri long South America. From hem raf tumas pipol fraetem hem, and olketa nara prisoner savve askem Ignacio for go askem bak selen from olketa wea garem kaon. Bat taem Ignacio start for followim samting wea hem lanem from Bible, hem change and kamap man wea kaen tumas. Distaem no eniwan talem hem for askem bak eni kaon. Ignacio hem hapi tumas long olketa samting wea hem lanem from Bible and spirit bilong God wea mekem hem for changem fasin bilong hem. Hem tinghae tumas long olketa Kingdom pablisa wea willing for study witim eniwan.
11. Why nao iumi go bak olowe long pipol?
11 Iumi go bak olowe long pipol wea iumi storyim finis gud nius long olketa from living and tingting bilong olketa savve change. Maet long nextfala visit bilong iumi samfala kasem bigfala sik, no garem waka, or samwan wea olketa lovem hem dae. (Readim Ecclesiastes 9:11.) Olketa problem wea kamap long world maet mekem samfala pipol for tingting strong abaotem future. Kaen samting olsem savve mekem man wea no interest or againstim iumi, for lisin long iumi. Dastawe iumi mas talemaot gud nius long pipol long evri chance wea kamap.
12. Iumi shud garem wanem tingting long pipol iumi preach long olketa, and why nao olsem?
12 Hem wei bilong olketa man for judgem pipol. Bat Jehovah tingim evri man. Hem lukim gudfala fasin bilong man wanwan. (Readim 1 Samuel 16:7.) Iumi tu shud traem best for duim olsem long preaching waka bilong iumi. Iumi herem plande story wea showimaot gudfala samting iumi savve kasem sapos iumi garem gudfala tingting long evriwan wea iumi preach long olketa.
13, 14. (a) Why nao tingting wea wanfala pioneer garem long wanfala woman wea hem preach long hem, hem no stret? (b) Wanem nao iumi savve lanem from disfala story?
13 Wanfala pioneer sista wea nem bilong hem Sandra, hem stap long wanfala island long Caribbean taem hem preach long Ruth, wea interest tumas long olketa festival. Tufala taem nao Ruth winim first prize long festival olsem. Hem barava interest long samting wea Sandra talem, so tufala markem taem for duim Bible study. Sandra talem olsem: “Taem mi go insaed haos bilong hem, mi lukim long wall wanfala maeti piksa bilong Ruth wea werem kastom kaleko bilong datfala festival, and tu olketa trophy wea hem winim. Mi tingse woman olsem wea staka pipol savve long hem and wea laek tumas for joinim olketa festival bae interest long truth for lelebet taem nomoa. So mi no go for lukim hem moa.”
14 Gogo wanfala taem Ruth seleva kam long Kingdom Hall and taem meeting hem finis, hem askem Sandra olsem: “Why nao iu no savve kam distaem for study witim mi?” Sandra sei sorre long hem and markem taem for tufala study moa. Ruth hem gohed gud long study bilong hem, aotem from wall olketa piksa bilong festival, start for go long evri meeting and duim waka for preach, and dedicate long Jehovah. Sandra luksavve hao tingting wea hem garem long firstaem hem preach long Ruth hem no stret.
15, 16. (a) Wanem gud samting nao kamaot from wei wea wanfala pablisa preach long relative bilong hem? (b) Nomata hem luk olsem hem hard for wanfala relative lisin long gud nius, why nao datwan bae no stopem iumi for preach long hem?
15 Gudfala samting savve kamaot tu taem samfala preach long famili, nomata maet luk olsem olketa no willing for lisin. Tingim story bilong Joyce, wanfala Christian sista long America. Tabu bilong hem savve go olowe long prison start taem hem teenager yet. Joyce hem sei: “Pipol sei hem wanfala iusles man nomoa bikos hem tekem olketa drug, hem man for steal, and duim staka nara samting. Nomata luk olsem hem bae nating change, mi storyim olketa truth insaed Bible long hem for 37 year.” From Joyce no givap for helpem disfala relative, hem kasem bigfala blessing taem man hia hem start for studyim Bible witim Olketa Jehovah’s Witness and hem barava change. No longtaem go nomoa, taem hem 50 year, datfala tabu bilong Joyce hem baptaes long wanfala distrik convention long California, long America. Joyce hem sei: “Mi krae from mi barava hapi. Mi hapi tumas from mi no givap for story witim hem!”
16 Maet iu fraet lelebet for story long samfala relative abaotem Bible bikos long living bilong olketa. Kaen wei for fraet olsem hem no stopem Joyce for story long tabu bilong hem. For tok stret, hu nao savve long samting wea stap long heart bilong narawan? Maet hem barava lukaotem trufala religion. Dastawe, iumi mas givim hem chance for faendem truth.—Readim Proverbs 3:27.
Nambawan Buk for Studyim Bible
17, 18. (a) Olketa report from samfala kantri showim hao datfala buk Wanem Nao Really Samting wea Bible Teachim hem gud long olketa wanem wei? (b) Wanem gudfala samting nao iu kasem taem iu iusim disfala buk?
17 Report from samfala kantri talem hao staka wea interest long truth studyim disfala buk Wanem Nao Really Samting wea Bible Teachim? Penni, wanfala pioneer sista long America, hem studyim disfala buk witim pipol. Hem study witim tufala olo wea strong long lotu bilong tufala. Penni hem no savve long hao nao tufala bae ting long olketa truth wea insaed disfala Wanem Bible Teachim buk. Bat taem hem study witim tufala, hem talem diswan: “From olketa raetem disfala buk long wei wea klia and isi for minim, tufala no feel nogud or raoa abaotem samting tufala lanem bat tufala kwiktaem acceptim datwan olsem truth.”
18 Pat hem study witim wanfala woman wea ranawe go long England from kantri bilong hem long Asia. Woman hia mas ranawe from hom bilong hem bikos olketa militant tekem hasband and olketa son bilong hem. Laef bilong hem stap long danger, olketa bonem haos bilong hem, and olketa rapem hem. Evri samting hia mekem hem laek dae nomoa and samfala taem hem laek for killim hemseleva dae tu. Bat taem hem studyim Bible, hem laek for laef nao. Pat hem talem olsem: “From disfala buk Wanem Bible Teachim hem isi for minim and garem olketa nambawan tokpiksa, diswan barava muvim hem.” Study hia hem muv ahed kwiktaem and hem kamap anbaptaes pablisa and laek for baptaes. Iumi barava hapi taem iumi helpem pipol for savve and tinghae long olketa promis wea Bible storyim!
“No Givap for Duim Gudfala Samting”
19. Why nao waka for preach hem important distaem winim enitaem bifor?
19 Waka bilong iumi for preach and mekem pipol kamap disaepol hem moa important distaem winim enitaem bifor. Plande thousand pipol wea laek savve long God acceptim datfala message taem iumi preach long olketa. Bat nomata “bigfala day bilong Jehovah hem klosap,” staka pipol no luksavve long plan bilong God and olketa “no stedy taem olketa wakabaot go for dae.”—Zeph. 1:14; Prov. 24:11.
20. Iumi evriwan mas strong for duim wanem?
20 Iumi fit yet for helpem pipol olsem. Bat for duim datwan iumi mas followim example bilong olketa first Christian wea “gohed and nating givap for teach and talemaot gud nius abaotem datfala Christ, wea hem nao Jesus.” (Acts 5:42) Gohed for followim example bilong olketa long wei for no givap long olketa hard taem, lukluk gud “long wei bilong [iumi] for teach,” and for preach long eniwan. Sapos iumi “no givap for duim gudfala samting” iumi bae kasem staka blessing from God.—2 Tim. 4:2; readim Galatians 6:9.
[Footnote]
a Mifala changem nem.
Bae Iu Ansa Hao?
• Hu nao willing for lisin long gud nius?
• Why nao iumi shud no judgem olketa wea iumi preach long olketa?
• Wanem samting nao kamaot from wei for iusim buk Wanem Nao Really Samting wea Bible Teachim?
[Piksa long page 13]
Staka thousand pipol nao willing for lisin long gud nius
[Piksa long page 15]
Wanem nao iumi savve lanem from story bilong aposol Paul?
[Piksa long page 16]
Iumi no judgem pipol taem iumi talemaot gud nius