Waswe, Iu Remember?
Waswe, iu enjoyim wei for readim olketa Wastaoa insaed olketa month wea go pas finis? Trae for ansarem olketa kwestin long daon:
• Wanem nao samfala wei wea Ruth showimaot gudfala example?
Hem showimaot gudfala example saed long love bilong hem for Jehovah, loyal love bilong hem for Naomi, and long fasin for waka hard and hambol. Dastawe, pipol garem gudfala reason for kolem hem “wanfala nambawan woman.” (Ruth 3:11)—4/15, page 23-6.
• Hao nao iumi savve Jehovah kea for olketa man nating?
Hem talem olketa Israelite, wea olketa long Egypt bin deal witim olketa long nogud wei, for mas deal long gud wei witim olketa man nating. (Exodus 22:21-24) Jesus, wea olsem Father bilong hem, showimaot interest long olketa man nating, and olketa aposol wea hem chusim olketa “no skul gud and man nating.” (Acts 4:13; Matthew 9:36) Iumi tu savve followim example bilong God taem iumi showimaot iumi kea for narawan, olsem example olketa young wan.—4/15, page 28-31.
• Wanem nao mekem iumi sure Jehovah tinghae long samting iumi duim?
Bible showimaot hao Jehovah hem tinghae long olketa samting wea olketa man duim. Hem tinghae long sakrifaes wea Abel offerim, and hem tinghae long wei wea iumi givim ‘sakrifaes bilong praise, wea hem nao frut bilong mouth.’ (Hebrews 13:15) Jehovah luksavve hao Enoch hem trae hard for mekem hem hapi thru long wei for garem living and fasin wea klin. And God lukim tu hao wanfala widow woman bilong Zarephath wea no wanfala Israelite hem sharem lelebet kaikai wea hem garem witim profet Elijah. Jehovah tinghae tu long olketa samting wea iumi duim wea showimaot faith.—5/1, page 28-31.
• Why nao iumi fit for sei olketa Jew wea kamap Christian bihaen Pentecost 33 C.E., mas dedicatem olketa seleva long God?
Long 1513 B.C.E., olketa Israelite bifor dedicate long Jehovah. (Exodus 19:3-8) Bihaen datfala taem olketa Jew born insaed datfala nation wea dedicate and wea anda long Law covenant. Bat Jehovah aotem datfala Law covenant thru long dae bilong Christ long 33 C.E. (Colossians 2:14) Start long datfala taem, olketa Jew wea want for servem God long wei wea hem acceptim mas dedicatem olketa seleva long hem and mas baptaes long nem bilong Jesus Christ.—5/15, page 30-1.
• Waswe, wei for bonem incense hem fitim tru worship distaem?
Wei for bonem incense hem part bilong tru worship long Israel bifor. (Exodus 30:37, 38; Leviticus 16:12, 13) Law covenant, wea insaed diswan hem wei for bonem incense, hem finis taem Christ hem dae. Olketa Christian savve disaed seleva sapos olketa laek bonem incense long wei wea no join witim religion, bat diswan hem no part long tru worship distaem. Iumi mas tingim tu feeling bilong olketa narawan nogud iumi mekem eniwan stambol.—6/1, page 28-30.
• Wanem nius report nao mekem planti for ting moa strong hao Jesus really stap bifor long earth?
Planti pipol story abaotem wanfala box for keepim bon bilong man insaed, wea olketa faendem long Israel. Luk olsem hem from taem bilong first century, and raeting long datfala box hem sei: “James, son bilong Joseph, brata bilong Jesus.” Samfala ting long diswan olsem hem “barava oldfala pruv abaotem Jesus wea olketa faendem wea Bible no storyim” wea pruvim hao Jesus stap bifor.—6/15, page 3-4.
• Hao nao man savve lane for garem love?
Olketa man lane for garem love thru long example and training from parents. Taem hasband and waef showimaot love and respect for each other, olketa pikinini lane for garem love. (Ephesians 5:28; Titus 2:4) Nomata sapos man no kam from wanfala famili wea garem love, hem savve lane for garem love thru long wei for acceptim help bilong Jehovah olsem dadi bilong hem, kasem help from holy spirit, and thru long loving saport bilong olketa Christian brata.—7/1, page 4-7.
• Hu nao Eusebius, and wanem nao iumi savve lanem from laef bilong hem?
Eusebius hem wanfala man for raetem history bifor wea, long 324 C.E., hem finisim datfala raeting wea garem tenfala volume wea garem nem History of the Christian Church. Nomata hem biliv hao Father hem stap bifor Son, Eusebius acceptim difren tingting wea kamap long council bilong Nicaea. Luk olsem hem no laek tingim wei wea Jesus askem olketa follower bilong hem for “no part long world.” (John 17:16)—7/15, page 29-31.
• Waswe, Jehovah changem tingting bilong hem abaotem wei for garem winim wanfala waef?
Nomoa, Jehovah hem no changem tingting bilong hem abaotem wei for garem winim wanfala waef. (Malachi 3:6) Arrangement bilong God for datfala first man hem for hem “mas stap witim waef bilong hem” and kamap wan body witim hem. (Genesis 2:24) Jesus sei sapos man hem divorce bat no from fornication and then hem marit moa hem duim adultery. (Matthew 19:4-6, 9) Jehovah finisim wei for garem winim wanfala waef taem Christian kongregeson hem start.—8/1, page 28.