Kwestin From Reader

Why nao Wastaoa bilong April 1, 2002, talem long page 11, long paragraf 7, dat wata baptism bilong olketa Jew wea biliv long Pentecost 33 C.E. showimaot “olketa seleva dedicate long God thru long Christ,” bat iumi bilivim firstaem hao baptism for olketa Jew long 33 C.E. go kasem 36 C.E. no needim wei for olketa seleva dedicate?

Long 1513 B.C.E., Jehovah God givim olketa Israelite wanfala chance for kamap holy nation sapos olketa ‘obeyim evribit voice bilong hem and keepim covenant bilong hem.’ Olketa ansa olsem: “Evri samting wea Jehovah talem mifala willing for duim.”—Exodus 19:3-8; 24:1-8.

Olketa Israelite dedicatem olketa seleva long God, taem olketa agree for keepim covenant long Law bilong Moses. Olketa Jew wea born bihaen 1513 B.C.E. born insaed nation wea dedicate finis. Nomata olsem, baptism bilong olketa Jew wea kamap follower bilong Jesus Christ start long Pentecost 33 C.E. hem minim difren samting from wei for givim olketa seleva long God olsem pipol wea part long wanfala nation wea dedicate. Baptism showimaot dedication bilong olketa long Jehovah God insaed wanfala niu wei for fren witim hem thru long Jesus Christ. Hao nao olsem?

Bihaen holy spirit kapsaet long samting olsem 120 disaepol wea hipap long rum antap long Jerusalem long Pentecost 33 C.E., aposol Peter standap and start for preach long planti Jew and olketa niu follower wea hipap for lukim wanem nao happen. Bihaen Peter witness evribit, hem sei long olketa Jew wea feel shame: “Repent, and letem each wan long iufala baptaes long nem bilong Jesus Christ for kasem forgiveness for sin bilong iufala.” For followim encouragement bilong Peter, “olketa wea acceptim word bilong hem witim full heart olketa baptaes, and long datfala day samting olsem thri thousand soul join insaed.”—Acts 2:1-41.

Olketa Jew wea baptaes bihaen Peter encouragem olketa, waswe, olketa member bilong wanfala nation wea dedicate finis? Waswe, olketa dedicate long God? Nomoa. Aposol Paul hem sei ‘God finisim evribit Law taem hem nilam go long torture stake.’ (Colossians 2:14) Thru long dae bilong Christ long 33 C.E., Jehovah God finisim Law covenant—wea hem nao faondeson bilong dedication bilong olketa for Hem. Datfala nation wea rejectim Son bilong God kamap nation wea God rejectim. “Datwan wea Israel long really wei” bae no savve sei moa hem wanfala nation wea dedicate long God.—1 Corinthians 10:18; Matthew 21:43.

Datfala Law covenant finis long 33 C.E., bat taem bilong God for givim spesol favor and for lukluk long olketa Jew no end long datfala taem.a Datfala taem bilong spesol favor hem go ahed kasem 36 C.E., taem Peter preach long man from Italy wea fraet long God, Cornelius and olketa long haos bilong hem and tu olketa nara Gentile. (Acts 10:1-48) Wanem nao faondeson for showimaot favor long olketa hia?

Daniel 9:27 sei, “[Datfala Messiah] mas keepim datfala covenant open for planti pipol for wanfala week.” Datfala covenant wea open for seven year, or “wanfala week,” from baptism bilong Jesus and start long pablik ministry bilong Messiah long 29 C.E., hem covenant bilong Abraham. For insaed datfala covenant, man mas born insaed laen bilong Abraham nomoa. Datfala covenant bilong Jehovah for Abraham no savve givim man wanwan faondeson for dedicate long Jehovah. Dastawe, olketa Jew wea biliv and baptaes bihaen tok bilong Peter long Pentecost 33 C.E., nomata olketa garem spesol privilege olsem olketa really Jew, kanduit for sei olketa dedicate long God taem Law covenant finis. Olketa seleva need for dedicate long God.

Hem important for nara reason moa for olketa Jew and niu follower for dedicatem olketa seleva for baptaes long Pentecost 33 C.E. Aposol Peter encouragem olketa wea lisin for repent and baptaes long nem bilong Jesus. For luksavve long Jesus olsem Lord and Messiah, Hae Priest, and datwan wea sidaon long raet hand saed bilong God long heven hem minim for rejectim wei bilong world. Olketa need for singaot long nem bilong Jehovah God for salvation thru long Christ Jesus, insaed diswan hem wei for showimaot faith long Christ and for luksavve long hem olsem Leader. Datfala faondeson for fren witim God and for kasem forgiveness for sin hem change nao. Olsem man wanwan, olketa Jew wea biliv need for acceptim disfala niu arrangement. Hao? Thru long wei for mekem dedication long God and for showimaot long pablik taem olketa baptaes long nem bilong Jesus Christ. Wata baptism showimaot dedication bilong olketa long God, for bringim olketa insaed niu wei for fren witim God thru long Jesus Christ.—Acts 2:21, 33-36; 3:19-23.

[Footnote]