Minim Purpose Bilong Discipline
WANEM nao iu tingim taem iu herem datfala word “discipline”? Wanfala dictionary hem sei discipline hem “wei for mekem pipol obeyim olketa rul or standard saed long fasin, and for panisim olketa taem olketa no obeyim.” Nomata diswan hem no only mining bilong datfala word, planti pipol ting olsem abaotem discipline.
Bat, long Bible discipline hem no olsem. Wise King Solomon raet olsem: “Discipline bilong Jehovah, O son bilong mi, no rejectim.” (Proverbs 3:11) Toktok hia no storyim eni kaen discipline, bat hem storyim “discipline bilong Jehovah,” wea minim discipline wea garem faondeson long olketa haefala principle bilong God. Datkaen discipline nomoa bae helpem man long spiritual wei and tu, man bae wantem. Long wei wea difren, discipline wea garem faondeson long tingting bilong man wea againstim olketa haefala principle bilong Jehovah hem planti taem spoelem and mekem man feel pain. Dastawe planti pipol tingim discipline olsem nogud samting.
Why nao iumi kasem encouragement for acceptim discipline bilong Jehovah? Bible storyim discipline wea God givim olsem samting wea showimaot love bilong hem for olketa man. Dastawe, Solomon go ahed for sei: “Man wea Jehovah lovem hem repruvim, olsem wanfala dadi hem duim long son wea hem hapi long hem.”—Proverbs 3:12.
Discipline or Panis —Hao Nao Tufala Difren?
Discipline wea Bible storyim hem garem planti saed—wei for givim direction, instruction, training, repruv, for stretem, and tu for panis. Bat evritaem, Jehovah givim discipline from love nao muvim hem, and goal bilong hem for helpem man wea go rong. No enitaem, discipline wea Jehovah givim for stretem man hem for panisim hem nomoa.
Long narasaed, panis wea God givim hem no evritaem for stretem or teachim man wea rong. Olsem example, long sem day wea Adam and Eve sin, tufala start for safa from wei wea tufala no obey. Jehovah raosem tufala from datfala paradaes garden bilong Eden, and gogo tufala kasem olketa samting wea kamaot from wei for no perfect, hem nao sik and wei for olo. Bihaen olketa stap for planti handred year insaed long hard living, olketa dae for olowe. Evriting hia hem panis from God, bat hem no discipline for stretem olketa. From Adam and Eve min for no obey and tufala no repent, no eni wei nao for stretem tufala.
Olketa nara story abaotem samting God duim for givim panis hem nao Flood long taem bilong Noah, wei wea Sodom and Gomorrah distroe, and taem hem finisim evribit army bilong Egypt long Red Sea. Olketa samting hia wea Jehovah duim hem no for leadim, givim instruction, or trainim olketa wea kasem panis. Saed long olketa panis olsem wea God givim, aposol Peter raet olsem: “Hem no hol bak for panisim world wea stap bifor, bat hem keepim Noah, wanfala man wea preach abaotem raeteous fasin, for stap sef witim sevenfala pipol taem hem mekem flood kam long wanfala world bilong pipol wea no followim God; and hem judgem tufala taon bilong Sodom and Gomorrah taem hem mekem tufala taon hia kamap asis, and diswan showim wanfala example bilong samting wea bae kasem pipol wea no followim God.”—2 Peter 2:5, 6.
Hao nao olketa wei for givim panis hia hem “showim wanfala example bilong samting wea bae kasem pipol wea no followim God”? Long leta bilong Paul for olketa long Thessalonica, hem point kam long taem bilong iumi olsem taem wea God, thru long Son bilong hem Jesus Christ, bae “pei bak long olketa wea no savve long God and olketa wea no obeyim gud nius.” Paul sem moa: “Olketa hia bae kasem panis for finis evribit.” (2 Thessalonians 1:8, 9) Hem klia hao kaen panis olsem hem no for teachim or mekem kamap moabeta olketa wea kasem datwan. Bat, taem Jehovah invaetem olketa worshiper bilong hem for acceptim discipline bilong hem, hem no minim wei wea hem panisim olketa sinner wea no repent.
Hem important for lukim hao Bible hem no storyim Jehovah olsem man for givim panis nomoa. Winim datwan, Bible planti taem storyim hem olsem wanfala loving teacher and datwan wea givim training witim patient fasin. (Job 36:22; Psalm 71:17; Isaiah 54:13) Tru nao, discipline from God wea hem givim for stretem man hem evritaem join witim love and patient fasin. Thru long wei for minim purpose bilong discipline, hem bae moa isi for olketa Christian acceptim and givim discipline witim stretfala tingting.
Discipline Bilong Loving Parents
Evriwan insaed famili and tu insaed Christian kongregeson need for minim purpose bilong discipline. Diswan barava tru saed long olketa wea garem position for lead, olsem parents. Proverbs 13:24 sei: “Man wea no iusim stik hem heitim son bilong hem, bat datwan wea lovem hem bae givim hem discipline.”
Hao nao parents shud givim discipline? Bible explainim olsem: “Iufala dadi, no mekem olketa pikinini bilong iufala kros, bat go ahed for trainim olketa long discipline and wei for stretem tingting wea kam from Jehovah.” (Ephesians 6:4) Disfala kaonsel hem stap moa long olketa toktok hia: “Iufala dadi, no mekem pikinini bilong iufala kros evritaem, nogud heart bilong olketa kamap hevi.”—Colossians 3:21.
Christian parents wea minim purpose bilong discipline bae no duim samting long raf wei. Principle wea stap long 2 Timothy 2:24 savve fitim tu hao parents givim discipline. Paul hem raet olsem: “Wanfala slave bilong Lord hem no need for faet, bat hem mas kaen long evriwan, fit for teach.” Wei for no savve kontrolem kros, wei for shout long man, and wei for talem olketa toktok wea tok spoelem or tok daonem man hem no wei for givim discipline witim love and hem mas no part long living bilong wanfala Christian.—Ephesians 4:31; Colossians 3:8.
Wei for Parents stretem pikinini hem no just wei for givim panis kwiktaem and finis nao. Klosap evri pikinini need for herem kaonsel planti taem bifor diswan bae stretem tingting bilong hem. Dastawe, parents mas iusim planti taem, garem patient fasin, and mas tingting gud abaotem hao olketa givim discipline. Olketa mas remember hao olketa mas trainim olketa pikinini witim “discipline and wei for stretem tingting wea kam from Jehovah.” Diswan minim wei for trainim olketa for planti year.
Olketa Christian Shepherd Discipline Witim Kwaet Fasin
Olketa sem principle fitim tu olketa Christian elder. Olsem olketa shepherd wea showimaot love, olketa trae hard for encouragem flock thru long wei for provaedem instruction, direction, and repruv taem need hem kamap. Taem olketa duim diswan, olketa tingim really purpose bilong discipline. (Ephesians 4:11, 12) Sapos olketa tingting nomoa long wei for givim panis, bae olketa disciplinem man wea go rong and no duim eniting moa. Bat moa samting hem insaed discipline bilong God. From love nao muvim olketa elder, olketa go ahed for trae hard for helpem man wea go rong. From olketa really laek for helpem datfala man, olketa savve go bak planti taem for givim encouragement and training.
For fitim kaonsel wea stap long 2 Timothy 2:25, 26, nomata sapos taem olketa deal witim man wea no willing for acceptim discipline, olketa elder mas givim instruction “witim kwaet fasin.” Datfala scripture hem talem tu purpose bilong discipline: “Maet God letem olketa for repent wea lead go long stretfala savve long truth, and olketa savve kasem bak gudfala tingting bilong olketa and aot from trap bilong Devil.”
Samfala taem, need kamap for disfellowshipim from kongregeson olketa wea duim rong and no repent. (1 Timothy 1:18-20) Disfala strongfala wei for deal witim man hem shud still wanfala wei for givim discipline, hem no just panis nomoa. Samfala taem, olketa elder trae hard for visitim olketa wea disfellowship wea no go ahed for duim rong samting. Long olketa visit olsem, olketa elder mas duim samting followim really purpose bilong discipline thru long wei for talemaot olketa samting wea man hia mas duim for kam bak long Christian kongregeson.
Jehovah Hem Perfect Judge
Parents, olketa Christian shepherd, and olketa narawan wea garem paoa for givim discipline shud ting long disfala responsibility olsem serious samting. Olketa mas no judgem narawan for sei no eni wei stap for stretem olketa or helpem olketa for kam bak. Dastawe, discipline bilong olketa hem mas no olsem panis wea man givim for pei bak or witim kros.
Tru nao, Bible storyim Jehovah olsem datwan wea givim panis wea strong and for olowe. And tu, Bible sei hao “hem samting wea mekem man fraet, for God wea laef judgem hem.” (Hebrews 10:31) Bat no eni man shud trae for markem hemseleva witim Jehovah saed long diswan or long eni nara wei. And no eniwan shud fraetem wei wea parents or wanfala elder insaed kongregeson givim discipline long olketa.
Jehovah savve hao for balance long perfect wei taem hem givim discipline. Olketa man no savve duim diswan. God savve readim heart and luksavve taem hem hard nao for stretem samwan, dastawe hem fit for kasem strongfala panis for olowe. Bat saed long olketa man, olketa no fit for givim kaen judgment olsem. From diswan, taem olketa need for givim discipline, olketa wea garem paoa for duim diswan mas evritaem duim witim purpose for stretem man.
Acceptim Discipline Bilong Jehovah
Iumi evriwan needim discipline bilong Jehovah. (Proverbs 8:33) Tru nao, iumi shud barava wantem discipline wea garem faondeson long Word bilong God. Taem iumi studyim Word bilong God, iumi savve acceptim discipline wea kam stret from Jehovah thru long olketa Scripture. (2 Timothy 3:16, 17) Bat, samfala taem iumi bae kasem discipline from olketa Christian brata and sista. For luksavve long reason why olketa givim datfala discipline bae helpem iumi for willing for acceptim.
Aposol Paul hem sei: “Tru nao, no eni discipline hem hapi samting taem man kasem, bat hem mekem man sorre.” Then hem sei moa: “Nomata olsem, bihaen, for olketa wea kasem training from diswan olketa bae garem frut bilong peace, hem nao, raeteous fasin.” (Hebrews 12:11) Deepfala love wea Jehovah garem for iumi hem showaot thru long discipline bilong hem. Nomata sapos iumi kasem or givim discipline, iumi mas olowe rememberim purpose bilong discipline bilong God and lisin long disfala wise kaonsel bilong Bible: “Hol strong long discipline; no lusim. Gardim gud, from hem nao laef bilong iu.”—Proverbs 4:13.
[Olketa Piksa long page 21]
Olketa sinner wea no repent bae kasem judicial panis from God, no discipline for stretem olketa
[Olketa Piksa long page 22]
From love nao muvim olketa elder, olketa iusim taem for duim research and helpem olketa wea go rong
[Olketa Piksa long page 23]
Parents givim “discipline and wei for stretem tingting wea kam from Jehovah,” witim patient fasin and love