Hao Nao Iu Savve Stretem Pikinini Bilong Iu?

SAPOS iu wanfala dadi or mami, maet iu minim feeling bilong olketa wea iumi storyim finis. Taem pikinini bilong iu duim samting wea no stret, waswe, iu savve long wanem nao iu shud duim for stretem hem, or iu no savve sapos iu shud stretem hem? Waswe, hem rong for stretem pikinini bilong iu?

WEI FOR STRETEM PIKININI

Taem Bible iusim disfala toktok “stretem” hem no minim for panisim man nomoa. Bat hem minim for teachim, trainim, and helpem man for luksavve long stret samting. Hem nating minim for spoelem or raf long narawan.—Proverbs 4:1, 2.

Wei wea dadi and mami stretem pikinini hem olsem taem man wakem garden. Hem bae houm graon, mek sure plant hem garem wata and fertilizer, hem mas weeding, and no letem olketa samting for spoelem datfala plant. Taem datfala plant hem gohed for grow, maet datfala man mas prunim mekem hem savve grow stret. Hem luksavve sapos hem duim evri samting hia datwan bae helpem datfala plant for grow gud. Dadi and mami tu duim staka samting for lukaftarem pikinini bilong olketa. Olsem wei for prunim wanfala plant, samfala taem dadi and mami mas stretem pikinini for helpem hem lusim eni nogud wei bilong hem mekem hem duim stret samting. Bat taem man prunim wanfala plant hem mas careful nogud hem spoelem datfala plant. Olsem tu, dadi and mami mas showimaot love taem tufala stretem pikinini.

Jehovah, God wea Bible storyim, showimaot gudfala example long diswan for olketa parents. Taem Jehovah stretem olketa wea faithful for worshipim hem, datwan barava helpem olketa and hem mekem olketa hapi for Jehovah stretem olketa. (Proverbs 12:1) Wei wea Jehovah hem stretem olketa mekem olketa laek for “followim kaonsel evritaem.” (Proverbs 4:13) Dadi and mami savve helpem pikinini for duim stret samting long wei for followim thrifala samting wea God duim taem hem stretem iumi: (1) Hem showimaot love, (2) no ova tumas, and (3) duim wanem hem sei hem bae duim.

SHOWIMAOT LOVE

Jehovah stretem iumi bikos hem lovem iumi. Bible sei: “Jehovah hem stretem man wea hem lovem, olsem wanfala dadi hem stretem son wea hem lovem.” (Proverbs 3:12) And tu, Jehovah hem ‘showimaot mercy, hem kaen tumas, and hem no savve kros kwiktaem.’ (Exodus 34:6) Dastawe Jehovah hem no savve raf or spoelem man. No enitaem hem talem olketa toktok wea no kaen, and hem no tok spoelem man or tok daonem hem, wea datwan savve mekem man feel nogud tumas “olsem sword wea katem man.”—Proverbs 12:18.

Iumi savve olketa parents no perfect, so samfala taem hem no isi for olketa followim example bilong God for kontrolem olketa seleva. Maet samfala taem iu no savve patient. Long taem olsem, tingim, sapos iu panisim pikinini from iu kros datwan savve ova tumas and hem bae no helpem pikinini bilong iu for duim stret samting. Hem no stret for panisim pikinini taem iu kros or feel nogud long hem. Datwan hem showimaot nomoa iu no kontrolem iuseleva.

Sapos iu showimaot love and kontrolem iuseleva taem iu stretem pikinini, datwan bae helpem pikinini for laek duim stret samting. Tingim wanem George and Nicole wea iumi storyim long start bilong disfala article duim for stretem pikinini bilong olketa.

“Mi and waef bilong mi kros tumas taem Jordan kam bak long haos, bat mifala letem hem for explainim why hem leit. From hem midolnaet nao, mifala disaed for story moa abaotem diswan long morning. Mifala prea tugeta, and then go sleep. Long next day mitufala no kros tumas and savve story gud witim boy bilong mifala. Hem sei hem sorre for wanem hem duim and hem agree mitufala shud panisim hem for datwan. Mitufala hapi mifala no duim samting taem mifala kros. Mitufala luksavve hem gud for mifala lisin firstaem long boy bilong mitufala.”—George.

“Mi no minim why nao boy bilong mi laek for killim nogud sista bilong hem olsem. Mi hard for kontrolem kros bilong mi, so mi talem hem for go stap firstaem long rum bilong hem. Taem mi no kros tumas, mi showim hem garekil long hed bilong sista bilong hem and talem hem, hem no stret for raf long eniwan. Datwan helpem hem for luksavve hem duim samting wea no stret. Hem talem sorre long sista bilong hem and hagem hem.”—Nicole.

So iumi stretem pikinini bikos iumi lovem hem, and samfala taem datwan maet minim for panisim hem.

NO OVA TUMAS

Jehovah evritaem “stretem man followim wanem hem fitim.” (Jeremiah 30:11; 46:28) Hem luksavve long why nao man hem duim wanfala samting. Olketa parents savve trae for luksavve tu long why nao pikinini bilong olketa duim samting wea no stret. Stephen sei olsem abaotem gele bilong hem Natalie: “Nomata mifala feel sorre tumas taem hem gohed for sei hem no stealim datfala ring, mifala mas luksavve hem six year nomoa and hem no minim staka samting yet.”

Robert, hasband bilong Nicole tu trae for luksavve why nao olketa pikinini bilong tufala savve noti. Hem ting raonem sapos hem firstaem for pikinini duim datwan or hem duim staka taem finis. Hem tingim sapos pikinini feel taed or hem sik. And hem trae for luksavve sapos eni nara samting wea happen nao mekem hem for noti.

Olketa parents mas tingim tu olketa pikinini no savve long staka samting yet. Aposol Paul luksavve long datwan from hem sei: “Taem mi pikinini, toktok bilong mi, tingting bilong mi, and wei wea mi ting raonem samting hem olsem bilong pikinini nomoa.” (1 Corinth 13:11) Robert hem sei: “Wanfala samting wea helpem mi for minim olketa pikinini and no kros tumas long olketa hem for tingim mi tu duim olketa samting olsem taem mi smol boy.”

Hem important for no expectim pikinini for savve long evri samting, bat taem hem duim samting wea no stret, iu mas stretem hem. Taem iu luksavve long wanem pikinini fit for minim, olketa samting wea hem no savve yet long hem, and olketa nara samting wea maet mekem hem duim samting wea no stret, datwan bae helpem iu for stretem hem long wei wea no ova tumas.

DUIM WANEM IU SEI IU BAE DUIM

Long Malachi 3:6 hem sei: “Mi nao Jehovah. Mi nating change.” Pipol bilong God savve trustim hem bikos long diswan. Taem pikinini savve long wanem dadi and mami laekem and no laekem olketa for duim, datwan bae mekem pikinini for hapi. Bat sapos iu changem wanem iu laekem olketa for duim followim tingting bilong iu, datwan savve mekem pikinini for feel nogud and konfius.

Tingim disfala samting wea Jesus talem: “Sapos iu sei iu bae duim samting, iu mas duim datwan. Sapos iu sei iu bae no duim samting, then no duim datwan.” Hem gud for olketa parents followim datwan tu. (Matthew 5:37) No talem samting wea iu bae duim for panisim pikinini, bat iu no duim nomoa. Taem iu warnim pikinini iu bae panisim hem sapos hem duim samting wea no stret, iu mas duim wanem iu sei iu bae duim.

Mami and dadi mas story tugeta mekem tufala evriwan duim wanem tufala sei tufala bae duim. Robert sei: “Sapos mi agree for olketa pikinini duim samting bat mi no savve waef bilong mi no agree long datwan, taem mi savve long diswan mi bae followim wanem waef bilong mi talem finis for showim olketa pikinini mitufala wan mind long olketa samting.” Sapos dadi and mami garem difren tingting abaotem hao for stretem pikinini, hem gud for tufala storyim wanem for duim and agree long datwan.

MAS STRETEM PIKININI

Sapos iu followim example bilong Jehovah for showimaot love, no ova tumas, and duim samting wea iu sei iu bae duim taem iu stretem pikinini bilong iu, iu savve sure datwan bae helpem pikinini for garem gudfala wei taem hem big. Olsem Bible sei: “Trainim wanfala boy for followim stretfala wei. Nomata taem hem kamap olo, hem bae no lusim datwan.”—Proverbs 22:6.