Kwestin From Reader
Wanem nao wei for baptaes for olketa wea dae finis?
Taem Paul raet abaotem resurrection for go long heven, hem raetem wanfala barava interesting toktok. Long King James Version, hem read olsem: “For wanem reason nao olketa baptaes for olketa wea dae finis, sapos olketa wea dae finis bae no laef bak? So why nao olketa baptaes for olketa wea dae finis?” And The New Jerusalem Bible transleitim disfala verse olsem: “Wanem nao pipol tingim taem olketa seleva baptaes for olketa wea dae finis? Sapos olketa wea dae finis bae no resurrect, why nao olketa baptaes for olketa?”—1 Corinthians 15:29.
Waswe, Paul minim olketa wea laef mas baptaes for olketa wea no baptaes bifor olketa dae? From wanem iumi readim insaed tufala scripture hia and olketa narawan tu hem maet luk olsem diswan hem tru. Bat, taem iumi lukluk gud long olketa Scripture hia and long Greek languis wea Paul iusim, ansa hem barava difren from datfala idea. Wanem Paul hem minim hem wei wea olketa anointed Christian olketa baptaes or go insaed long wanfala laef wea olsem laef bilong Christ wea hem faithful go kasem taem hem dae. Bihaen, olketa bae resurrect and kamap spirit tu olsem Christ.
Bible saportim diswan. Long leta bilong Paul for olketa long Rome hem raet: “Waswe, iufala no savve iumi evriwan wea baptaes insaed long Christ Jesus baptaes insaed long dae bilong hem?” (Romans 6:3) Long leta bilong hem for olketa long Philippi, Paul talem hao hemseleva “share long olketa samting wea [Christ] safa long hem, willing for dae olsem hem, for lukim sapos mi savve kasem first resurrection from dae.” (Philippians 3:10, 11) Paul showim hao wei bilong laef bilong wanfala anointed follower bilong Christ hem for faithful anda long test, for feisim dae evriday, and last samting for dae long faithful wei wea bihaen hem resurrection for go long heven.
Hem important for luksavve hao olketa scripture hia, and olketa narawan wea story abaotem dae and olketa wea baptaes, olketa hia really story abaotem olketa man wea laef yet and wea baptaes finis and no olketa man wea dae finis. Paul talem olketa narafala anointed Christian: “From iufala berem iufala witim hem long baptism bilong hem, and from iufala join long hem iufala tu laef bak tugeta thru long faith bilong iufala long paoa bilong God, wea resurrectim hem from dae.”—Colossians 2:12.
Long 1 Corinthians 15:29 long samfala difren Bible version, olketa transleitim datfala Greek word hy·perʹ, olsem “for” wea minim tu “for kamap.” Dastawe, olsem olketa nara Bible text, New World Translation of the Holy Scriptures hem transleitim disfala verse long stretfala wei: “Olketa wea bae baptaes for kamap olketa wea bae dae, bae duim wanem? Sapos olketa wea dae bae nating resurrect, why nao olketa baptaes for kamap olsem?”