For Winim Prize, Showimaot Fasin for Kontrolem Seleva!
“Evri man wea tekpart long wanfala resis hem kontrolem hemseleva long evri samting.”—1 CORINTHIANS 9:25.
1. For followim kaonsel long Ephesians 4:22-24, hao nao planti million pipol sei yes long Jehovah?
TAEM iu baptaes olsem wanfala Jehovah’s Witness, iu showimaot long pablik hao iu willing for go insaed wanfala resis wea garem laef olowe olsem prize. Iu sei yes for duim will bilong Jehovah. Bifor iumi dedicate long Jehovah, planti long iumi mekem olketa bigfala change mekem dedication bilong iumi garem mining and samting wea God bae acceptim. Iumi followim kaonsel wea aposol Paul givim for olketa Christian: “Lusim oldfala fasin wea followim wei bilong iufala bifor and wea kamap nogud followim olketa giaman samting wea hem wantem . . . Werem niufala fasin wea God wakem fitim will bilong Hem long trufala raeteous fasin and loyal fasin.” (Ephesians 4:22-24) Diswan minim, bifor iumi sei yes for dedicate long God, iumi sei no long living bilong iumi bifor wea God no acceptim.
2, 3. Hao nao 1 Corinthians 6:9-12 showimaot tufala wei for change wea iumi mas duim for God appruvim iumi?
2 Samfala part bilong oldfala fasin wea olketa wea laek kamap olketa Witness bilong Jehovah mas lusim hem olketa samting wea Word bilong God barava tok strong againstim. Long leta bilong hem for olketa long Corinth, Paul listim samfala fasin hia taem hem sei: “Olketa wea duim fornication, or worshipim idol, or duim adultery, or duim homosexual fasin, or man wea leidaon witim man, or man for steal, or man wea greedy, or man wea savve drunk, or man wea tok againstim narafala man, or man wea forcem narawan for givim selen, bae no kasem kingdom bilong God.” Then hem showimaot hao olketa Christian long first century changem fasin bilong olketa taem hem sei: “Hem nao wei bilong samfala long iufala bifor.” Lukim hao hem sei, bifor, no distaem.—1 Corinthians 6:9-11.
3 Paul talem hao iumi maet need for mekem samfala moa change from hem go ahed for sei: “Evri samting hem fitim law for mi; bat no evri samting hem helpem man.” (1 Corinthians 6:12) Dastawe, planti wea laek kamap Olketa Jehovah’s Witness luksavve hao olketa mas sei no long samfala samting wea nomata hem no rong, hem no helpem or givim eni gud samting long olketa. Olketa samting hia maet westem taem nomoa and tanem mind bilong olketa awe from samting wea moa important.
4. Olketa Christian wea dedicate agree witim wanem toktok bilong Paul?
4 Iumi dedicatem iumiseleva long God long willing wei, no long wei wea no willing wea maet luk olsem hem needim iumi for mekem barava bigfala sakrifaes. Olketa Christian wea dedicate finis agree witim Paul, wea bihaen hem kamap follower bilong Christ, hem sei: “Bikos long [Jesus] mi lusim evri samting and mi tingim olketa olsem rabis samting nomoa, mekem mi savve kasem Christ.” (Philippians 3:8) Paul hapi for sei no long olketa samting wea no important wea minim hem savve go ahed for sei yes long God.
5. Wanem resis nao Paul win long hem, and hao nao iumi savve duim sem samting?
5 Paul showimaot fasin for kontrolem seleva long spiritual resis bilong hem and long end hem sei: “Mi faet long nambawan faet finis, mi ran go kasem end, mi followim disfala faith finis. Start from distaem wanfala crown bilong raeteous fasin stap for mi, wea Lord, datfala raeteous judge, bae givim mi olsem reward long datfala day, bat no for mi nomoa, bat for olketa wea lovem wei wea hem showaot klia.” (2 Timothy 4:7, 8) Waswe, bae iumi fit for talem sem samting long future? Bae iumi duim sapos long faith iumi showimaot fasin for kontrolem seleva taem iumi go ahed long Christian resis bilong iumi go kasem end.
Kontrolem Seleva for Duim Gud Samting
6. Wanem nao fasin for kontrolem seleva, and wanem nao tufala wei wea iumi mas showimaot diswan?
6 Olketa Hebrew and Greek word long Bible wea olketa transleitim “kontrolem seleva” minim man garem paoa for kontrolem body bilong hem. Planti taem olketa word hia savve minim wei for stopem seleva for duim nogud samting. Bat iumi needim fasin for kontrolem seleva tu for iusim body bilong iumi for duim gudfala samting. Hem wei bilong iumi man wea no perfect for duim rong samting, so iumi garem tufala difren samting wea iumi stragol long hem. (Ecclesiastes 7:29; 8:11) Iumi mas stap klia from wei for duim nogud samting, and long semtaem forcem iumiseleva for duim gud samting. Tru nao, wei for kontrolem body bilong iumi for duim gud samting hem wanfala best wei for no duim olketa nogud samting.
7. (a) Olsem David, iumi shud prea for wanem? (b) Wei for ting raonem olketa wanem samting bae helpem iumi for showimaot fasin for kontrolem seleva?
7 Hem klia, for fulfillim dedication bilong iumi long God, iumi mas garem fasin for kontrolem seleva. Iumi need for prea olsem David: “Mekem insaed long mi wanfala klinfala heart, O God, and putim insaed long mi wanfala niufala spirit, wanfala strong wan.” (Psalm 51:10) Iumi savve ting raonem olketa gud samting wea iumi savve kasem from wei for stap klia long rong fasin and samting wea savve spoelem body. Tingim nogud samting wea iumi maet kasem sapos iumi no stap klia long nogud samting: bigfala sik, spoelem famili and wei for fren, and dae. Long narasaed, tingim olketa gud samting wea kamaot taem iumi live followim wei wea Jehovah markem for iumi. Bat iumi mas no forget hao heart bilong iumi savve giamanim iumi. (Jeremiah 17:9) Iumi mas disaed strong for againstim wei wea heart bilong iumi trae for mekem iumi no ting strong tumas long need for followim olketa standard bilong Jehovah.
8. Wanem nao tru samting wea iumi lanem from samting wea iumi experiencem? Givim example.
8 Planti long iumi savve finis from samting wea iumi experiencem hao planti taem body bilong iumi wea no willing hem trae for daonem willing spirit. Olsem example, tingim Kingdom preaching. Jehovah hem hapi long willing spirit bilong olketa man for tekpart long disfala waka wea savve givim laef long pipol. (Psalm 110:3; Matthew 24:14) Long firstaem, planti long iumi faendem hem hard for lane for duim disfala pablik preaching waka, and maet hem hard yet. For duim datwan iumi need for kontrolem body bilong iumi, “whipim” hem and “leadim olsem wanfala slave,” winim wei for letem body bilong iumi stopem iumi for preach.—1 Corinthians 9:16, 27; 1 Thessalonians 2:2.
“Long Evri Samting”?
9, 10. Wanem nao insaed wei for ‘kontrolem iumiseleva long evri samting’?
9 Kaonsel long Bible for ‘kontrolem iumiseleva long evri samting’ minim moa samting winim wei for kontrolem kros bilong iumi and for stap klia from dirty fasin. Maet iumi savve kontrolem iumiseleva saed long olketa samting hia, and sapos olsem, iumi savve hapi long datwan. Nomata olsem, waswe long olketa nara samting long laef wea need for kontrolem seleva maet no showaot klia olsem? Olsem example, tingim sapos iumi stap long wanfala rich kantri wea garem gudfala living. Saed long wei for spendem selen long olketa samting wea no important, bae hem wise for lane for sei no. Hem gud sapos parents teachim olketa pikinini for no peim evri samting olketa lukim wea olketa laekem nomata olketa fit for peim. Hem tru, for pikinini lanem diswan, parents mas showimaot gudfala example.—Luke 10:38-42.
10 For lane for no garem samting wea iumi wantem or needim savve strongim fasin bilong iumi. Hem savve mekem iumi tinghae go moa long olketa material samting wea iumi garem finis and helpem iumi minim feeling bilong olketa wea no garem samting, no from olketa disaed for no garem, bat from no eni wei stap for olketa kasem. Hem tru, simpol living hem barava opposite from tingting bilong world wea encouragem pipol for “kaen long iuseleva” or wea sei “iu fit for kasem best samting.” Olketa advertising bisnis encouragem pipol for kasem samting olketa wantem kwiktaem for mekem olketa satisfae, bat olketa duim datwan for kasem selen nomoa. Diswan savve spoelem wei wea iumi trae for showimaot fasin for kontrolem seleva. No longtaem go nomoa, wanfala magasin from wanfala rich kantri long Europe hem sei: “Sapos hem hard for pipol wea barava poor for kontrolem feeling bilong olketa for wantem planti samting, hem mas barava hard for pipol wea stap long olketa rich kantri distaem!”
11. Why nao hem gud for lane for no garem samting wea iumi wantem, bat wanem nao mekem diswan hard?
11 Sapos iumi faendem hard for luksavve hao samting wea iumi wantem hem difren from samting iumi barava needim, maet hem helpem iumi for duim samfala samting for mek sure iumi duim wise samting. Olsem example, sapos iumi laek for kontrolem wei for spendem tumas selen, maet iumi disaed strong for no garem kaon, or taem iumi go long stoa, tekem selen wea fitim nomoa. Remember, Paul talem hao “love for God witim wei for satisfae” hem “wei for kasem nambawan samting.” Hem sei: “Iumi no tekem kam eni samting insaed long world, and iumi bae no savve tekem eni samting go aot. So, sapos iumi garem kaikai and ples for stap, iumi mas satisfae witim olketa samting hia.” (1 Timothy 6:6-8) Waswe, iumi satisfae? For lane for garem simpol living wea free from wei for evritaem satisfaem seleva wea savve stopem iumi for duim samting wea moa important, iumi mas garem fasin for kontrolem seleva. Bat, sapos iumi lanem diswan, hem savve barava helpem iumi.
12, 13. (a) Hao nao fasin for kontrolem seleva hem join witim olketa Christian meeting? (b) Iumi need for garem fasin for kontrolem seleva saed long olketa wanem samting moa?
12 Iumi needim fasin for kontrolem seleva tu for attendim olketa Christian meeting, assembly, and convention. Olsem example, iumi needim datfala fasin for stopem mind bilong iumi for wakabaot taem program hem go ahed. (Proverbs 1:5) Maet iumi need for kontrolem seleva for lisin gud long speaker and no disturbim narawan long wei for tok smol. Maet iumi need for kontrolem iumiseleva for changem schedule bilong iumi mekem iumi no kam leit. And tu, maet iumi needim datfala fasin for markem taem for prepare and tekpart long olketa meeting.
13 For showimaot fasin for kontrolem seleva long smolfala samting savve strongim iumi for duim long samting wea moa important. (Luke 16:10) Dastawe, hem barava wise for mek sure iumi evritaem readim Word bilong God and olketa Bible pablikeson, studyim olketa and ting raonem samting iumi lanem! Hem wise tu for iumi kontrolem iumiseleva saed long waka wea no fitim, hu iumi fren witim, tingting, wei bilong iumi or for sei no long samting wea savve westem taem wea iumi markem for servem God! For busy long service bilong Jehovah hem gudfala protection againstim olketa samting wea savve pullim iumi awe from datfala spiritual paradaes bilong kongregeson bilong Jehovah evriwea long world.
Kamap Full-Grown Thru Long Fasin for Kontrolem Seleva
14. (a) Hao nao olketa pikinini shud lane for showimaot fasin for kontrolem seleva? (b) Wanem nao olketa gud samting wea kamaot taem olketa pikinini lanem diswan taem olketa smol yet?
14 Wanfala baby wea just born no garem fasin for kontrolem seleva. Wanfala pepa wea olketa savveman saed long fasin bilong olketa pikinini raetem, hem explainim olsem: “Fasin for kontrolem seleva hem no samting wea seknomoa happen or kamap seleva. Parents mas isisi saportim and trainim pikinini for garem fasin for kontrolem seleva. . . . Witim direction from parents, olketa pikinini go ahed for lane for kontrolem seleva taem olketa growap.” Wanfala research wea lukluk long olketa pikinini wea foa year, showimaot hao olketa wea lane for showimaot fasin for kontrolem seleva “kamap olketa teenager wea moa balance, nara pikinini laekem olketa, interest for duim niu samting, feel sure abaotem olketa seleva and pipol savve depend long olketa.” Olketa wea no start for lane for garem fasin hia “planti taem feel lonely, hard for feel satisfae and bighed. Taem olketa kasem hevi olketa givap and stap klia from eni challenge.” Hem klia, for growap olsem full-grown man wea balance, pikinini mas lane for showimaot fasin for kontrolem seleva.
15. Wei for short long fasin for kontrolem seleva hem showimaot wanem samting, wea difren evribit from wanem goal wea Bible markem for iumi?
15 Long sem wei, for kamap olketa full-grown Christian, iumi mas lane for showimaot fasin for kontrolem seleva. Sapos iumi short long diswan hem showimaot iumi baby yet long spiritual wei. Bible encouragem iumi for “kamap full-grown man long paoa for minim samting.” (1 Corinthians 14:20) Goal bilong iumi hem for “kasem wan mind long datfala faith and long stretfala savve bilong Son bilong God, olsem wanfala full-grown man, and kasem full wei wea Christ showaot.” Why nao olsem? “Mekem iumi no go ahed olsem baby, wea seksek olabaot olsem wave pushim iumi from evri kaen teaching wea olsem wind wea kamaot from giaman wei bilong man, from olketa kleva for duim rong samting.” (Ephesians 4:13, 14) Hem klia, iumi mas lane for showimaot fasin for kontrolem seleva for kamap spiritual man.
Mekem Grow Fasin for Kontrolem Seleva
16. Hao nao Jehovah provaedem help?
16 For mekem grow fasin for kontrolem seleva, iumi needim help bilong God and datfala help hem stap. Word bilong God, olsem wanfala perfect mirror, hem showim long iumi olketa change wea iumi need for duim, and hem provaedem kaonsel long hao for duim diswan. (James 1:22-25) Olketa loving brata stap redy for helpem iumi tu. Olketa Christian elder showimaot fasin for luksavve taem olketa willing for helpem iumi wanwan. Jehovah no hol bak for givim holy spirit bilong hem sapos iumi prea for diswan. (Luke 11:13; Romans 8:26) So iumi hapi for iusim olketa samting hia wea hem provaedem. Olketa idea long page 21 maet helpem iu.
17. Hao nao Proverbs 24:16 encouragem iumi?
17 Hem comfortim iumi for savve hao Jehovah hem tinghae long wei wea iumi trae for mekem hem hapi! Diswan shud muvim iumi for go ahed for trae for showimaot fasin for kontrolem seleva long bigfala wei moa. Nomata haomas taem iumi foldaon, iumi mas no givap. “Raeteous wan maet foldaon sevenfala taem, and bae hem getap.” (Proverbs 24:16) Evritaem wea iumi win for mekem Jehovah hapi, iumi garem reason for hapi long iumiseleva. Iumi savve feel sure tu hao Jehovah hem hapi long iumi. Wanfala Witness talem hao bifor hem dedicatem laef bilong hem long Jehovah, taem hem win for no smoke for wanfala full week hem givim reward long hemseleva long wei for peim samting witim datfala selen wea hem sevem from hem kontrolem hemseleva and no peim smoke.
18. (a) Wanem nao insaed wei wea iumi stragol for showimaot fasin for kontrolem seleva? (b) Jehovah promisim wanem samting?
18 Winim evri samting, iumi shud no forgetim hao tingting and feeling bilong iumi nao insaed fasin for kontrolem seleva. Iumi luksavve long diswan from toktok bilong Jesus: “Evriwan wea go ahed for lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:28; James 1:14, 15) Bae hem moa isi for man wea lane finis for kontrolem tingting and feeling bilong hem for kontrolem full body bilong hem. So iumi mas strongim go moa disison bilong iumi for no just stap klia long wei for duim rong samting, bat for stap klia long wea for ting abaotem datwan tu. Sapos rongfala tingting hem kamap, rejectim stretawe. Iumi savve ranawe from temptation thru long prea and wei for tingim evritaem example bilong Jesus. (1 Timothy 6:11; 2 Timothy 2:22; Hebrews 4:15, 16) Taem iumi duim best bilong iumi, iumi followim kaonsel bilong Psalm 55:22: “Torowem hevi bilong iu long Jehovah, and hem nao bae strongim iu. Hem bae nating letem raeteous wan for seksek.”
Waswe, Iu Remember?
• Wanem nao tufala wei wea iumi mas showimaot fasin for kontrolem seleva?
• Wanem nao hem minim for ‘kontrolem iumiseleva long evri samting’?
• Wanem nao olketa gudfala idea for mekem grow fasin for kontrolem seleva wea iu lukim insaed study bilong iumi?
• Fasin for kontrolem seleva hem start witim wanem samting?
[Box/Olketa Piksa long page 21]
Hao for Strongim Fasin for Kontrolem Seleva
• Mekem grow nomata long olketa smolfala samting
• Ting raonem gud samting wea kamaot from datfala fasin distaem and long future
• Changem samting wea God tambuim witim samting wea hem encouragem iumi for duim
• Rejectim olketa rongfala idea stretawe
• Fulimap mind bilong iu witim tingting wea buildimap spiritual saed bilong iu
• Acceptim help bilong olketa mature Christian brata and sista
• Stap klia long samting wea savve mekem temptation kamap
• Prea for help bilong God taem temptation kamap
[Olketa Piksa long page 19]
Fasin for kontrolem seleva muvim iumi for duim gud samting