Spiritual Living and Health Bilong Iu
MAET iu spendem staka taem for kea for physical health bilong iu. Each day, iu spendem klosap eitfala hour for sleep, tu-thri hour for kuki and kaikai, and eitfala hour or winim for waka for selen for peim rent and kaikai. Taem iu sik, maet iu spendem taem and selen for lukim doctor or for redyim hom medicine. Iu klinim haos, swimim body, and maet exercise tu for kasem gud health.
Bat for garem gud health hem minim moa samting winim wei for kea for physical need nomoa. Nara samting stap wea barava affectim health bilong iu. Medical research showimaot hao physical health hem join long klos wei witim spiritual health.
Barava Join Tugeta
Professor Hedley G. Peach bilong University of Melbourne, Australia, hem sei: “Staka long olketa research wea mifala kasem stret from olketa wea duim showimaot wei for grow long spiritual saed hem barava join witim health wea moabeta.” Saed long olketa samting olketa research hia faendemaot, The Medical Journal of Australia (MJA) sei: “Wei for active long religion hem join tu witim . . . katdaon long blood pressure, cholesterol . . . and colon cancer tu.”
Olsem tu, long United States, long 2002, University of California (UC), Berkeley, duim research long 6,545 pipol and faendaot “pipol wea attendim service wantaem evri week olketa laef moa long winim olketa wea attend samfala taem nomoa or nating attend nomoa.” Doug Oman, man wea leadim disfala research and teacher long UC Berkeley’s School of Public Health, hem sei: “Mifala lukim diswan nomata taem mifala markem witim position bilong man, wei wea hem lukaftarem health, wea insaed diswan sapos hem smoke and exercise.”
Saed long olketa nara gud samting wea pipol wea garem spiritual living kasem, MJA hem sei: “Olketa research long Australia faendaot pipol for lotu garem marit wea moa strong, and no ova tumas long alcohol and drug, suisaed, wari and feeling for wikdaon, and wei for tingim seleva, olsem olketa narawan.” And tu, BMJ (wea bifor hem The British Medical Journal) reportim: “Hem luk olsem taem samwan wea klos long olketa hem dae, pipol wea moa strong long biliv bilong olketa saed long religion kwiktaem finisim sorre winim pipol wea no garem eni spiritual biliv.”
Staka tingting stap abaotem mining bilong trufala spiritual wei. Bat, spiritual living bilong iu hem affectim body and mind bilong iu. Diswan hem agree witim toktok wea Jesus Christ talem samting olsem 2,000 year bifor. Hem sei: “Hapi nao olketa wea luksavve long spiritual need bilong olketa.” (Matthew 5:3) From spiritual living bilong iu hem affectim health and hapi bilong iu, hem mek sense for ask: ‘Wea nao mi savve faendem spiritual help wea fit for mi trustim? And wanem nao hem minim for kamap spiritual man?’
[Picture Credit Line long page 2]
Photo Credits: Page 18: Mao Tse-tung and Golda Meir: Hulton/Archive by Getty Images; Francis Ferdinand: From the book The War of the Nations; Hirohito, Lindbergh, & Einstein: U.S. National Archives photo; Stalin: U.S. Army photo; Roosevelt: Franklin D. Roosevelt Library; Churchill: The Trustees of the Imperial War Museum (MH 26392)