“Duim Evribit Ministry Bilong Iu”

“Duim service bilong iu evribit.”—2 TIMOTHY 4:5, Byington.

1, 2. Nomata evri Christian talemaot gud nius, wanem nao Bible markem saed long olketa elder?

WASWE, iu wanfala wea talemaot Kingdom? Sapos olsem, thankiu long Jehovah God for disfala nambawan privilege. Waswe, iu wanfala elder long kongregeson? Datwan hem extra privilege from Jehovah. Bat iumi mas no forget hao wei wea iumi kamap fit for ministry or for olsem overseer long kongregeson hem no depend long bigfala education or wei for savve tumas for givim tok. Jehovah nao mekem iumi kamap fit for duim ministry, and from samfala brata long iumi kasem mark from Bible nao dastawe olketa kasem privilege for serve olsem overseer.—2 Corinthians 3:5, 6; 1 Timothy 3:1-7.

² Evri Christian wea dedicate duim waka for talemaot gud nius, bat olketa overseer, or elder nao, barava need for showim gud example saed long ministry. God and Christ, and olketa nara Witness bilong Jehovah tu savve long olketa elder wea “waka hard for toktok and teach.” (1 Timothy 5:17; Ephesians 5:23; Hebrews 6:10-12) Nomata wanem, teaching bilong wanfala elder mas strongim olketa wea lisin long spiritual wei, from aposol Paul talem datfala overseer Timothy: “Wanfala taem bae kam wea olketa bae no acceptim healthy teaching, bat, for fitim wanem olketa laekem, olketa bae hipimap olketa teacher for switim ear bilong olketa; and olketa bae tanem ear bilong olketa awe from truth, for lisin long olketa laea story. Bat, iu, iusim gudfala tingting long evri samting, stand strong taem iu safa long nogud samting, duim waka for talemaot gud nius, duim evribit ministry bilong iu.”—2 Timothy 4:3-5.

3. For mekem giaman teaching no spoelem kongregeson, wanem nao mas kamap?

³ For mek sure olketa giaman teaching no spoelem spiritual saed bilong kongregeson, wanfala overseer mas followim kaonsel bilong Paul: “Iusim gudfala tingting long evri samting, . . . duim service bilong iu evribit.” (2 Timothy 4:5, Byington) Tru nao, elder need for ‘duim ministry bilong hem evribit.’ Hem mas fulfillim evribit. Elder wea duim ministry bilong hem evribit bae waka hard long evri responsibility bilong hem, hem bae no miss for duim eni samting or hafhaf for duim. Kaen man olsem hem faithful nomata long smol samting.—Luke 12:48; 16:10.

4. Wanem nao savve helpem iumi for duim ministry bilong iumi evribit?

⁴ For duim ministry bilong iumi evribit no evritaem minim man needim moa taem, bat hem minim wei for iusim taem long gudfala wei. Wanfala living wea balance and wea followim schedule savve helpem evri Christian for duim ministry. For spendem moa taem long field service, elder need for organize gud mekem schedule bilong hem balance and for savve wanem waka for assignim long olketa narawan and hao for duim datwan. (Hebrews 13:17) Wanfala elder wea kasem respect hem elder wea duim part bilong hem, olsem Nehemiah, wea hem tu tekpart for buildim bak wall bilong Jerusalem. (Nehemiah 5:16) And evri servant bilong Jehovah shud share evritaem long waka for preachim Kingdom.—1 Corinthians 9:16-18.

5. Hao nao iumi shud feel abaotem ministry?

⁵ Assignment iumi kasem for talemaot datfala Kingdom long heven hem givim bigfala hapi! Iumi tinghae long privilege iumi kasem for tekpart for preachim gud nius evriwea long earth bifor end bae kam. (Matthew 24:14) Nomata iumi no perfect, toktok bilong Paul hia savve strongim iumi: “Iumi garem disfala riches [ministry] long olketa clay pot, wei wea paoa wea winim wanem iumi garem hem bilong God and no bilong iumiseleva.” (2 Corinthians 4:7) Tru nao, iumi savve givim service wea God acceptim—bat only witim strong and wisdom wea kam from God.—1 Corinthians 1:26-31.

Showimaot Glory Bilong God

6. Hao nao olketa spiritual Israelite difren from really Israel?

⁶ Taem hem storyim olketa anointed Christian, Paul sei God “barava mekem iumi kamap fit for olsem olketa minister bilong wanfala niu covenant.” Disfala aposol markem datfala niu covenant wea spiritual Israel insaed long hem thru long Jesus Christ, witim datfala old Law covenant wea really Israel insaed long hem thru long Moses. Paul sei tu hao taem Moses kam daon from Maunt Sinai witim tufala ston wea garem Tenfala Komandment, feis bilong hem shaen braet wea mekem olketa Israelite no fit for luk stret long hem. Bat gogo, samting wea moa serious happen from “tingting bilong olketa no klia” and samting satem heart bilong olketa. Bat, taem olketa tan go long Jehovah and worshipim hem witim full heart, datfala heart hem open moa. Taem hem storyim datfala ministry bilong olketa wea insaed niufala covenant, Paul hem sei: “Evriwan long iumi, . . . witim feis wea no kava long kaleko showimaot glory bilong Jehovah olsem olketa mirror.” (2 Corinthians 3:6-8, 14-18; Exodus 34:29-35) Olketa “nara sheep” bilong Jesus tu kasem privilege distaem for showimaot glory bilong Jehovah.—John 10:16.

7. Hao nao olketa man savve showimaot glory bilong God?

⁷ Hao nao olketa man wea sin fit for showimaot glory bilong God sapos olketa no savve lukim feis bilong Hem and stap laef? (Exodus 33:20) Iumi mas luksavve hao, glory bilong Jehovah hem join witim purpose bilong hem for vindicatem rul bilong hem thru long Kingdom. Olketa truth saed long Kingdom hem part long “olketa nambawan samting bilong God” wea olketa kasem holy spirit long olketa start for talemaot long Pentecost 33 C.E. (Acts 2:11) Olketa fit for fulfillim ministry bilong olketa evribit taem olketa followim lead bilong spirit.—Acts 1:8.

8. Saed long ministry, wanem nao Paul disaed strong for duim?

⁸ Paul disaed strong for no letem eniting stopem hem from wei for duim evribit ministry bilong hem. Hem raet olsem: “From iumi garem disfala ministry fitim mercy wea iumi kasem, iumi no givap; bat iumi rejectim finis olketa samting wea no honest wea mekem iumi shame, no followim giaman wei, and no spoelem word bilong God tu, bat thru long wei for mekem truth showaot klia iumi recommendim iumiseleva long conscience bilong evri man front long God.” (2 Corinthians 4:1, 2) Thru long samting Paul kolem “disfala ministry,” truth hem showaot and spiritual laet hem kasem olketa difren kantri.

9, 10. Hao nao man savve showimaot glory bilong Jehovah?

⁹ Saed long Wan wea Givim physical and spiritual laet, Paul hem raet: “God nao datwan wea sei: ‘Letem laet shaen kamaot from darkness,’ and hem shaen long heart bilong iumi for givim laet from nambawan savve bilong God thru long feis bilong Christ.” (2 Corinthians 4:6; Genesis 1:2-5) From iumi kasem nambawan privilege for kamap minister bilong God, iumi shud keepim iumiseleva klin mekem olsem mirror iumi savve showimaot glory bilong Jehovah.

¹⁰ Pipol wea stap long darkness long spiritual wei bae hard for lukim glory bilong Jehovah or wei wea hem showaot thru long Jesus Christ, datfala Moses wea Moa Hae. Bat iumi olketa servant bilong Jehovah kasem glory bilong laet from Bible and showimaot long nara pipol. For mekem pipol wea stap long spiritual darkness kasem laef, olketa needim laet from God. So witim bigfala hapi and strong, iumi obeyim datfala komand from God for letem laet shaen aot from darkness for givim Jehovah glory.

Letem Laet Bilong Iu Shaen Long Olketa Bible Study

11. Wanem nao Jesus talem abaotem wei for shaenim aot laet bilong iumi, and wanem nao wanfala wei for duim diswan long ministry bilong iumi?

¹¹ Jesus talem olketa follower bilong hem: “Iufala nao laet bilong world. Wanfala taon kanduit haed sapos hem stap antap maunten. Pipol savve laetem lamp and putim, no andanit basket, bat antap lampstand, and hem shaen long evriwan insaed haos. Olsem tu, letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Father bilong iufala wea stap long heven.” (Matthew 5:14-16) Gudfala fasin bilong iumi savve muvim pipol for givim glory long God. (1 Peter 2:12) And olketa difren part bilong waka for talemaot gud nius givim iumi staka chance for shaenim aot laet bilong iumi. Wanfala main goal bilong iumi hem for showimaot laet from Word bilong God thru long wei for conductim olketa Bible study long gudfala wei. Diswan hem barava important wei for duim evribit ministry bilong iumi. Olketa wanem idea nao savve helpem iumi conductim olketa Bible study wea muvim heart bilong olketa wea luk aotem truth?

12. Hao nao prea hem join witim wei for studyim Bible witim pipol?

¹² Wei for prea long Jehovah abaotem diswan hem showimaot wei wea iumi barava want for conductim olketa Bible study. Hem showimaot tu iumi luksavve long wei wea hem important for helpem pipol savve long God. (Ezekiel 33:7-9) Jehovah bae ansarem prea bilong iumi and blessim wei wea iumi waka hard long ministry. (1 John 5:14, 15) Bat iumi no just prea for faendem samwan for studyim Bible witim. Bihaen iumi startim study, wei for prea and ting raonem olketa need bilong datfala Bible student bae helpem iumi for duim evri study witim hem long gudfala wei.—Romans 12:12.

13. Wanem nao savve helpem iumi for duim olketa gudfala hom Bible study?

¹³ For duim olketa gudfala Bible study, iumi mas prepare gud for each study. Sapos iumi feel iumi no fit, hem gud for lukluk gud long wei wea Kongregeson Buk Study overseer hem duim buk study evri week. Samfala taem, maet iumi savve joinim olketa nara Kingdom pablisa wea garem olketa hom Bible study wea muv ahed gud. Tingting and wei bilong Jesus Christ for teach hem barava fitim iumi for lukluk gud long hem.

14. Hao nao iumi savve kasem heart bilong Bible student?

¹⁴ Jesus hapi tumas for duim will bilong Dadi bilong hem long heven and for story long pipol abaotem God. (Psalm 40:8) Hem garem kwaet fasin and fit for kasem heart bilong olketa wea hem story witim. (Matthew 11:28-30) So iumi shud waka hard for kasem heart bilong olketa Bible student bilong iumi. For duim olsem, iumi need for tingim living bilong each student taem iumi prepare for each study. Olsem example, sapos hem kam from wanfala kantri wea no savve tumas abaotem Bible, iumi maet need for mekem hem bilivim Bible hem tru. So, iumi mas readim staka scripture and explainim olketa.

Helpem Olketa Student for Minim Tokpiksa

15, 16. (a) Olketa wanem wei nao iumi savve helpem student wea no minim wanfala tokpiksa insaed Bible? (b) Wanem nao iumi savve duim sapos wanfala pablikeson bilong iumi iusim tokpiksa wea wanfala Bible student no minim?

¹⁵ Wanfala Bible student maet no savve gud long wanfala tokpiksa insaed Bible. Olsem example, maet hem no minim why nao Jesus storyim wei for putim lamp antap lampstand. (Mark 4:21, 22) Jesus hem storyim kaen oil lamp bilong bifor wea garem wick wea fire bone long hem. Olketa putim kaen lamp olsem long ples for lamp and diswan mekem full haos for garem laet. Iumi maet need for duim research long topic olsem “Lamp” and “Lampstand” insaed buk olsem Insight on the Scriptures for mekem iumi savve minim klia datfala tokpiksa bilong Jesus.a Iumi feel satisfae taem iumi kam long Bible study and fit for explainim gud wanfala samting wea student minim klia and enjoyim!

¹⁶ Buk wea iu studyim Bible insaed maet iusim tokpiksa wea hard for student bilong iu minim. Tek taem for explainim datwan, or iusim nara tokpiksa wea minim sem point. Maet wanfala pablikeson mekhae long wei wea hem important samting insaed marit for garem gudfala marit partner and for waka gud tugeta. For minim diswan, maet buk storyim tokpiksa abaotem tufala man for acrobat wea kleva tumas for swing raon, wea each wan depend long narawan for kasem hem. Nara tokpiksa wea iumi savve iusim for minim hao hem important for garem gud marit partner and for waka gud tugeta hem nao wei wea olketa wakman wea aotem kago from wanfala boat pasim kago long each other followim laen.

17. Wanem nao iumi savve lanem from Jesus saed long olketa tokpiksa?

¹⁷ For redy witim nara tokpiksa maet needim wei for prepare firstaem. Bat hem nao wei for showimaot wei wea iumi really interest long Bible student. Jesus iusim olketa simpol tokpiksa for explainim olketa hard samting. Sermon bilong hem long Maunten garem samfala example long diswan, and Bible showimaot wei wea teaching bilong hem affectim olketa wea lisin long hem long gudfala wei. (Matthew 5:1–7:29) From Jesus barava interest long pipol, hem explainim olketa samting long patient wei.—Matthew 16:5-12.

18. Wanem nao gud samting for duim witim olketa scripture insaed olketa pablikeson bilong iumi?

¹⁸ Wei wea iumi interest long pipol bae muvim iumi for ‘iusim olketa Scripture for pullim tingting.’ (Acts 17:2, 3) Diswan needim wei for studyim word bilong God witim prea and for iusim gud olketa pablikeson wea “datfala faithful wakman” provaedem. (Luke 12:42-44) Olsem example, datfala buk Savvy wea Lead Go Long Laef Olawe garem staka scripture.b Olketa raetem toktok bilong samfala scripture nomoa from no inaf spes stap for raetem evriwan. Long taem bilong Bible study, hem important for readim and explainim samfala long olketa scripture hia. Tru nao, teaching bilong iumi kam from Word bilong God, and hem garem bigfala paoa. (Hebrews 4:12) Insaed study evritaem point go long Bible, mekius long olketa scripture long olketa paragraf. Helpem student for lukim wanem nao Bible talem abaotem wanfala subject or wei for duim samting. Trae hard for showim hem hao wei for obeyim God bae helpem hem.—Isaiah 48:17, 18.

Askem Olketa Kwestin wea Mekem Man Tingting

19, 20. (a) Why nao iumi shud iusim olketa kwestin for pullim tingting taem iumi studyim Bible witim samwan? (b) Waswe sapos iu need for story moa long wanfala subject?

¹⁹ Gudfala wei wea Jesus iusim olketa kwestin helpem pipol for tingting. (Matthew 17:24-27) Sapos iumi askem tingting bilong man long wei wea no mekem hem shame, ansa bilong hem savve showimaot hao hem really feel abaotem datfala subject. Iumi savve faendaot sapos hem hol strong yet long olketa tingting wea no followim Bible. Olsem example, hem maet biliv long Trinity. Chapter 3 bilong Savvy buk showimaot hao datfala word “Trinity” nating stap long Bible. Datfala buk garem olketa scripture and toktok bilong samfala scripture for showimaot Jehovah and Jesus tufala separate, and hao holy spirit hem active force bilong God, no wanfala man. For readim and storyim olketa Bible text hia maet inaf. Bat waswe sapos diswan hem no inaf? Maet bihaen nextfala study, iu savve iusim nara pablikeson bilong Olketa Jehovah’s Witness, maet datfala brochure Should You Believe in the Trinity? for story moa long datfala topic. Bihaen datwan, iumi savve go ahed long study insaed Savvy buk.

²⁰ Wanfala student maet talem tingting bilong hem wea mekem iu sapraes or wiki. Sapos hem subject wea isi for mekem man feel nogud, maet hem abaotem wei for smoke, maet iumi sei for study go ahed and for storyim datwan moa long nara taem. For savve student hem smoke yet bae helpem iumi for faendem information wea savve helpem hem grow long spiritual wei. Witim wei for waka hard for kasem heart bilong student, iumi savve prea for Jehovah helpem student grow long spiritual wei.

21. Wanem nao savve happen taem iumi teach long wei wea barava fitim need bilong olketa Bible student?

²¹ Witim wei for prepare gud and help bilong Jehovah, iumi savve mekem wei wea iumi teach hem barava fitim need bilong Bible student. Maet iumi savve gogo helpem hem mekem grow deep love for God. Maet iumi savve mekem hem garem tu wei for respectim and tinghae long organization bilong Jehovah. And hem givim bigfala hapi taem olketa Bible student sei ‘God hem barava stap midolwan long iumi’! (1 Corinthians 14:24, 25) So iumi mas go ahed for duim olketa gudfala Bible study and duim best for helpem pipol kamap disaepol bilong Jesus.

Wei for Tinghae Long Samting wea Garem Hae Price

22, 23. Wanem nao iumi needim for duim ministry bilong iumi evribit?

²² For duim evribit ministry bilong iumi, iumi mas depend long strong wea kam from God. Paul raet olsem long olketa nara anointed Christian abaotem ministry: “Iumi garem disfala riches long olketa clay pot, wei wea paoa wea winim wanem iumi garem hem bilong God and no bilong iumiseleva.”—2 Corinthians 4:7.

²³ Nomata iumi bilong anointed or bilong “nara sheep,” iumi olsem clay dish wea isi for brek. (John 10:16) Nomata olsem, Jehovah savve givim iumi strong wea iumi needim for fulfillim assignment bilong iumi nomata wanem hevi iumi kasem. (John 16:13; Philippians 4:13) Dastawe, iumi shud trust evribit long Jehovah, tinghae long service bilong iumi wea garem hae price, and duim ministry bilong iumi evribit.

[Olketa Footnote]

Hao Nao Bae Iu Ansa?

• Wanem nao olketa elder savve duim for duim ministry bilong olketa evribit?

• Hao nao iumi savve mekem wei wea iumi duim Bible study kamap moabeta?

• Wanem nao bae iu duim sapos wanfala Bible student no minim wanfala tokpiksa or needim moa information abaotem wanfala subject?

[Piksa long page 16]

Olketa Christian elder teach long kongregeson and help for trainim nara brata or sista long ministry

[Piksa long page 18]

For duim gudfala Bible study hem wanfala wei for shaenim aot laet bilong iumi