Waswe, Iu Lukluk Strong Long Datfala Reward?
DATFALA sik hem isisi for kamap moa worse. Firstaem, man no savve lukluk long aotsaed part bilong eye. Sapos hem no treatim datwan, hem savve spread go long midol bilong eye. Gogo, datwan savve mekem man kamap blind. Wanem nao datwan? Glaucoma, wea hem nao wanfala main samting wea kosim pipol for kamap blind.
Long sem wei wea iumi savve isisi for kamap blind long physical wei, iumi savve kamap blind tu long wei wea moa important—wei wea iumi lukluk long spiritual wei. Dastawe hem important tumas for iumi barava tinghae long olketa spiritual samting olsem first samting long laef bilong iumi.
Lukluk Klia Long Datfala Reward
Wanfala “samting wea [really] eye no lukim” hem nambawan reward bilong laef olowe, wea Jehovah bae givim long olketa wea loyal long hem. (2 Corinthians 4:18) Tru, main reason why olketa Christian servem God hem from olketa lovem hem. (Matthew 22:37) Nomata olsem, Jehovah wantem iumi for luk forward long reward bilong iumi. Hem wantem iumi for ting long hem olsem wanfala kaen Dadi wea “givim reward long olketa wea barava luk aotem hem.” (Hebrews 11:6) Dastawe, olketa wea really savve long God and lovem hem barava tinghae long olketa blessing wea hem promisim and olketa wantem tumas for olketa promis hia fulfill.—Romans 8:19, 24, 25.
Planti pipol wea readim disfala magasin and nara magasin wea sapotim, Wekap! magasin, laekem tumas olketa piksa wea stap insaed abaotem Paradaes earth wea bae kamap. Hem tru, iumi no savve hao nao bae lukluk bilong Paradaes earth, and olketa piksa hia followim tingting bilong olketa wea drawim taem olketa readim scripture olsem Isaiah 11:6-9. Nomata olsem, wanfala Christian woman sei: “Taem mi lukim olketa piksa abaotem Paradaes wea bae kamap wea stap insaed Wastaoa and Wekap! magasin, mi lukluk gud long olketa, olsem wei for lukluk long brochure wea storyim ples wea man savve go holiday. Mi trae for tingim olsem mi long there nao from mi barava hope for stap long there long datfala taem wea God markem.”
Aposol Paul garem sem feeling abaotem “hope for go long heven.” Hem no ting dat hem kasem finis datfala goal, bikos hem need for faithful go kasem end. Bat hem go ahed for “barava trae hard for kasholem olketa samting long front.” (Philippians 3:13, 14) Olsem tu, Jesus stand strong long wanfala torture stake “from datfala hapi wea stap front long hem.”—Hebrews 12:2.
Waswe, enitaem iu garem daot sapos iu bae go insaed long niu world? Hem gud for no ova tumas for trustim seleva, from iumi bae kasem prize bilong laef only sapos iumi stap faithful go kasem end. (Matthew 24:13) Nomata olsem, sapos iumi traem best for duim olketa samting wea God askem, iumi shud feel sure bae iumi kasem datfala reward. Remember hao Jehovah “hem no laekem eniwan for dae bat hem laekem evriwan for repent.” (2 Peter 3:9) Sapos iumi trustim Jehovah, hem bae helpem iumi for kasem goal bilong iumi. Tru tumas, hem no fasin bilong hem nao for luk aotem olketa reason for mekem olketa wea traem best for mekem hem hapi for kamap no fit.—Psalm 103:8-11; 130:3, 4; Ezekiel 18:32.
Wei for savve feeling bilong Jehovah for pipol bilong hem givim iumi hope—samting wea important olsem faith wea iumi garem tu. (1 Corinthians 13:13) Greek word wea olketa transleitim “hope” long Bible hem minim wei for “luk forward long wanfala gud samting.” Aposol Paul tingim kaen hope olsem taem hem raet: “Mifala laekem evriwan long iufala for showimaot semkaen fasin for waka hard mekem iufala savve garem full trust long datfala hope go kasem end, mekem iufala no kamap lesy, bat followim olketa wea thru long faith and patient fasin kasem olketa promis.” (Hebrews 6:11, 12) Lukim hao sapos iumi go ahed faithful for servem Jehovah, iumi garem full trust hao iumi bae kasem wanem iumi hope long hem. Disfala hope hem difren from olketa hope bilong world from “hem no savve fail.” (Romans 5:5) So hao nao iumi savve mekem hope bilong iumi barava stap klia insaed mind bilong iumi?
Hao for Mekem Spiritual Wei for Lukluk Kamap Moabeta
Physical eye bilong iumi no savve lukluk klia long tufala samting long semtaem. Datwan hem semsem tu witim spiritual eye bilong iumi. Sapos iumi lukluk nomoa long olketa samting bilong disfala system, bae iumi no lukim klia niu world wea God promisim. Gogo, maet bae iumi no interest tumas long datfala samting wea no mas klia and then iumi no lukim nao. Datwan bae barava sorre samting! (Luke 21:34) Dastawe hem important tumas for iumi keepim ‘eye wea simpol’—wea lukluk klia long Kingdom bilong God and reward bilong laef olowe!—Matthew 6:22.
Wei for keepim eye wea simpol hem no isi evritaem. Olketa problem wea iumi feisim evri day mekem iumi busy for deal witim olketa, and samting wea pullim tingting bilong iumi—olketa temptation tu—maet kamap. Taem iumi kasem olketa samting olsem, hao nao iumi savve lukluk strong long Kingdom and niu world bilong God wea hem promisim and long semtaem no fail for lukaftarem olketa nara important samting? Iumi bae storyim thrifala wei for duim diswan.
Studyim Word bilong God evriday. Readim Bible evriday and studyim olketa Bible pablikeson for helpem mind bilong iumi tingting long olketa spiritual samting. Hem tru, maet iumi studyim Word bilong God for planti year finis, bat iumi mas go ahed for studyim, long sem wei wea iumi need for evritaem kaikaim physical kaikai mekem iumi stap laef. Iumi no stop for kaikai bikos iumi kaikai planti thousand taem finis. So nomata iumi savve gud long Bible, iumi need for go ahed kaikaim spiritual kaikai evritaem for mekem hope bilong iumi strong and strongim faith and love bilong iumi.—Psalm 1:1-3.
Ting raonem Word bilong God witim wei for tinghae. Why nao wei for ting raonem hem important? Tufala reason stap. First wan, wei for ting raonem hem mekem iumi fit for minim wanem iumi readim and mekem grow wei for tinghae from heart. Mek-tu reason, wei for ting raonem hem stopem iumi for forgetim Jehovah, olketa nambawan samting wea hem duim, and hope wea hem putim front long iumi. Olsem example: Olketa Israelite wea leavim Egypt witim Moses lukim witim eye bilong olketa bigfala wei wea paoa bilong Jehovah showaot. Olketa kasem tu loving protection bilong hem taem hem leadim olketa long ples wea hem promis for givim long olketa. Nomata olsem, taem olketa Israelite kasem wilderness for go long Promis Land, olketa start for komplen, wea showimaot olketa barava short long faith. (Psalm 78:11-17) Wanem nao problem bilong olketa?
Pipol hia no lukluk strong long Jehovah and nambawan hope wea hem putim front long olketa bat olketa tingim nomoa wei for garem gudfala living long datfala taem and samting wea body wantem. Nomata olketa seleva lukim olketa mirakol, staka Israelite kamap pipol for komplen wea no garem faith. Psalm 106:13 sei: “Olketa kwiktaem forgetim olketa samting wea [Jehovah] duim.” Datkaen wei for no tinghae hem mekem datfala genereson bilong olketa Israelite no go insaed long Promis Land.
So, taem iu readim olketa Scripture or Bible pablikeson, iusim moa taem for ting raonem wanem iu readim. Wei for ting raonem samting olsem hem important for mekem iu stap healthy and grow long spiritual saed. Olsem example, taem iu readim Psalm 106, wea iumi readim wanfala verse antap, ting raonem olketa fasin bilong Jehovah. Lukim wei wea hem patient and showimaot mercy long olketa Israelite. Lukim hao hem duim staka samting for helpem olketa kasem datfala Promis Land. Lukim wei wea olketa go ahed for bighed againstim hem. Tingim wari and pain bilong Jehovah taem pipol hia wea barava no tinghae long bigfala mercy and patient fasin wea hem showim long olketa. And tu, taem iumi ting raonem verse 30 and 31, wea storyim wei wea Phinehas no fraet for strong for raeteous fasin, diswan mekem iumi feel sure hao Jehovah no forgetim olketa loyal wan bilong hem and hem givim bigfala reward long olketa.
Followim olketa Bible principle long living. Taem iumi followim olketa Bible principle, iumiseleva lukim hao kaonsel bilong Jehovah hem helpem man. Proverbs 3:5, 6 hem sei: “Trustim Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae stretem gogo bilong iu.” Tingim hao dirty fasin wea planti pipol duim kosim olketa problem saed long mind, feeling and body. Wei for laek satisfaem samting wea body wantem wea for short taem nomoa savve mekem man kasem planti year bilong trabol, maet for full laef tu. Long wei wea difren tumas, olketa wea followim ‘road wea no isi for wakabaot long hem’ kasem lelebet idea bilong niu system and diswan encouragem olketa for go ahed long road for laef.—Matthew 7:13, 14; Psalm 34:8.
Hem wanfala challenge for followim olketa Bible principle. Samfala taem, maet wanfala wei hem stap for stretem problem kwiktaem, bat maet datwan no followim Bible. Olsem example, long hard taem saed long selen, maet iu ting for busy firstaem for kasem need bilong iu nomata datwan hem affectim wei for putim firstaem Kingdom. Bat, olketa wea duim samting from faith nao muvim olketa and lukluk klia long spiritual wei savve sure hao gogo “evri samting bae go ahed gud for olketa wea fraet long trufala God.” (Ecclesiastes 8:12) Wanfala Christian maet need for waka ovataem long samfala taem, bat hem bae no kamap olsem Esau, wea ting smol long olketa spiritual samting, ting olketa no important.—Genesis 25:34; Hebrews 12:16.
Jesus explainim klia olketa responsibility wea iumi olketa Christian garem. Iumi mas “go ahed for luk aotem firstaem kingdom and raeteous fasin bilong hem.” (Matthew 6:33) Sapos iumi duim datwan, Jehovah bae showimaot love wea hem garem olsem dadi taem hem mek sure iumi garem material samting wea iumi needim. Hem barava no wantem iumi for putim hevi long iumiseleva for wari abaotem olketa samting wea hem sei bae hem nao provaedem. Kaen wei for wari tumas hem olsem spiritual sik long eye—wea sapos man no treatim, bae hem isisi mekem iumi lukim nomoa olketa material samting and long end bae iumi blind long spiritual wei. Sapos iumi go ahed olsem, day bilong Jehovah bae kasem iumi “olsem wanfala trap.” Datwan bae hem barava sorre samting!—Luke 21:34-36.
Lukluk Strong Olsem Joshua
Iumi want for lukluk strong evritaem long nambawan Kingdom hope bilong iumi, and garem stret tingting long olketa nara responsibility. Taem iumi go ahed long schedule for study, wei for ting raonem samting, and followim olketa Bible principle, hope bilong iumi savve stap strong olsem Joshua. Bihaen hem leadim Israel go long Promis Land finis, hem sei: “Iufala barava savve witim full heart bilong iufala and witim full soul bilong iufala hao no eni toktok long evri gudfala toktok wea God bilong iufala Jehovah talem long iufala hem fail. Evriwan kamap tru for iufala. No eni toktok hia hem fail.”—Joshua 23:14.
Kingdom hope savve strongim iu and mekem iu hapi taem iu showimaot diswan long tingting, feeling, olketa samting iu disaedem and duim.—Proverbs 15:15; Romans 12:12.
[Piksa long page 21]
Waswe, enitaem iu daotem sapos iu bae go insaed long niu world?
[Piksa long page 22]
Wei for ting raonem samting hem important part bilong Bible study
[Olketa Piksa long page 23]
Lukluk strong long olketa samting bilong Kingdom