Olketa Israelite Promis lo Jehovah

Samting olsem tu months bihaen olketa Israelite lusim Egypt, olketa kasem nao Maunt Sinai and camp lo there. Jehovah story lo Moses, wea go ap lo maunten and sei lo hem: ‘Mi duim samting for sevem olketa Israelite. Sapos olketa obeyim mi and followim olketa law blo mi, olketa bae kamap spesol pipol blo mi.’ Moses go daon and storyim lo olketa Israelite samting wea Jehovah talem. Wat nao olketa sei? Olketa sei: ‘Mifala willing for duim evriting wea Jehovah talem.’

Moses go ap moa lo maunten. Taem Moses kasem lo there, Jehovah sei: ‘Lo mek-thri day, bae mi story kam lo iu. Warnim pipol hia for no trae for kam klosap lo Maunt Sinai.’ Moses go daon and talem olketa Israelite for redi for herem wat Jehovah bae talem.

Then bihaen mek-thri day, olketa Israelite lukim laetning and dark cloud kavarem datfala maunten. Olketa herem tu big thunder and saond blo horn. Then Jehovah kam daon lo top blo datfala maunten lo fire. Olketa Israelite fraet tumas gogo olketa seksek nao. Smoke kavarem datfala full maunten and hem seksek big tumas. Saond blo datfala horn hem krae big go moa. And then God hem sei: ‘Mi nao Jehovah. Iufala mas no worshipim eni nara god.’

Moses go ap moa lo maunten, and Jehovah givim lo Moses olketa law abaotem hao pipol hia shud worshipim Hem, and wat olketa shud duim lo laef blo olketa. Moses raetem daon olketa law hia and readim lo olketa Israelite. Olketa promis olsem: ‘Mifala bae duim evriting wea Jehovah talem.’ Yes, olketa mekem wanfala promis lo God. Bat hao, bae olketa keepim datfala promis?