Kwestin From Reader
Waswe, hem tru aposol Paul lusim Christian faith taem hem sei long Sanhedrin: “Mi wanfala Pharisee”?
For minim disfala toktok bilong Paul, long Acts 23:6, iumi need for tingim samting wea happen wea mekem hem talem datwan.
Bihaen wanfala raf grup bilong olketa Jew attakim Paul long Jerusalem, hem story olsem long olketa: “Mi kasem education long [Jerusalem] from Gamaliel and mi kasem instruction long hao for followim evribit Law bilong olketa laen dadi bilong iumi.” Nomata olketa lisin long Paul for lelebet taem, olketa kamap kros moa, so komanda bilong army tekem hem go long haos bilong olketa soldia. Taem olketa klosap for whipim Paul, hem sei: “Waswe, hem stret long law for iufala whipim wanfala man from Rome wea no duim eni rong samting?”—Acts 21:27–22:29.
Long next day, datfala komanda tekem Paul go long Sanhedrin, wea hem nao hae kot bilong olketa Jew. Paul lukluk gud long evriwan and hem lukim olketa Sadducee and Pharisee nao insaed Sanhedrin. Then hem sei: “Olketa man, olketa brata, mi wanfala Pharisee, wanfala son bilong olketa Pharisee. Olketa judgem mi from mi garem hope long resurrection.” Olketa Pharisee and Sadducee raoa taem olketa herem diswan, “from olketa Sadducee sei no eni resurrection, angel and spirit, bat olketa Pharisee talemaot olketa bilivim evri samting hia.” Samfala long sekson bilong olketa Pharisee tok kros olsem: “Long tingting bilong mifala, man hia no duim eni rong samting.”—Acts 23:6-10.
Staka pipol savve finis Paul hem wanfala strong Christian, so hem hard for Paul mekem Sanhedrin bilivim hem wanfala Pharisee. Olketa Pharisee bae no acceptim eniwan wea sei hem wanfala Pharisee bat hem no bilivim evri teaching bilong olketa. So, taem Paul sei hem wanfala Pharisee, hem minim hem bilivim samfala samting wea olketa Pharisee bilivim tu, and luk olsem hem nao hao olketa Pharisee wea stap long there minim toktok bilong Paul.
Taem Paul sei olketa judgem hem from hem garem hope long resurrection, hem minim long disfala wei nao, hem olsem olketa Pharisee. Long eni raoa abaotem resurrection, samting Paul bilivim hem semsem witim olketa Pharisee and no olketa Sadducee wea no bilivim resurrection.
Wanem Paul bilivim from hem wanfala Christian, hem no againstim samting olketa Pharisee bilivim olsem resurrection, olketa angel and samfala nara samting long Law. (Philippians 3:5) So from olketa teaching hia nao, Paul hem savve saed witim olketa Pharisee, and Sanhedrin minim toktok wea hem talem. Hem mekius long wei wea hem wanfala Jew for deal witim hae kot bilong Jew wea no laekem olketa Christian.
Bat wei wea Jehovah appruvim Paul nao hem bigfala pruv wea showimaot hem no lusim faith bilong hem. Long naet bihaen Paul talem datfala toktok, Jesus sei long hem: “No fraet! Long sem kaen wei wea iu witness evribit abaotem mi long Jerusalem, bae iu mas duim olsem tu long Rome.” From God appruvim Paul, iumi fit for sei hem no lusim Christian faith bilong hem.—Acts 23:11.