“Hapi Nao Olketa wea Luksavve Long Spiritual Need Bilong Olketa”
TAEM olketa bird wekap long morning, wei bilong olketa hem for singsing lelebet bifor olketa go luk aotem kaikai. Long evening, olketa kam bak long tree bilong olketa, singsing lelebet moa, and then sleep nao. Kasem taem long year, olketa faendem partner, leim egg, and feedim and trainim olketa pikinini bilong olketa. Olketa nara animal garem laef wea klosap semsem tu.
Iumi olketa man iumi difren. Hem tru, iumi kaikai, sleep, and garem pikinini, bat staka long iumi no satisfae long olketa samting hia nomoa. Iumi laek for savve why nao iumi laef. Iumi laek for faendem wanem nao important long laef. Iumi laek for garem hope for future tu. Olketa need hia wea man mas barava fulfillim bifor hem satisfae, point go long wanfala fasin wea olketa man nomoa garem—spiritual fasin, hem nao wei for interest long olketa samting wea no join witim olketa physical need bilong iumi.
God Wakem Iumi Long Image Bilong Hem
Bible talemaot why man needim spiritual samting taem hem sei: “God hem creatim man long image bilong hemseleva, long image bilong God nao hem creatim hem; hem creatim tufala olsem man and woman.” (Genesis 1:27) Wei wea God creatim iumi “long image bilong [Hem]” hem minim nomata iumi garem sin and no perfect, iumi fit for showimaot samfala fasin bilong God. Wanfala example nao hem wei wea iumi savve wakem samting. Iumi garem tu lelebet wisdom, feeling for laekem justice, and fasin for showimaot love long wei for givim iumiseleva. And tu, iumi savve ting bak long samting wea happen bifor and mekem plan for future.—Proverbs 4:7; Ecclesiastes 3:1, 11; Micah 6:8; John 13:34; 1 John 4:8.
Wei wea iumi interest long spiritual saed bilong iumi hem showaot klia long feeling wea iumi garem for laek worshipim God. Sapos iumi no satisfaem datfala need for fren gud witim Creator, bae hem hard for iumi faendem trufala hapi wea stap for olowe. Jesus hem sei: “Hapi nao olketa wea luksavve long spiritual need bilong olketa.” (Matthew 5:3) Bat iumi mas mek sure iumi satisfaem datfala need witim olketa tru spiritual information—olketa tru samting abaotem God, olketa standard bilong hem, and plan bilong hem for olketa man. Wea nao iumi savve faendem tru spiritual information? Insaed Bible.
“Word Bilong Iu Nao Truth”
Aposol Paul hem raet olsem: “Full Bible hem kam from God and hem gud for teachim man, for givim kaonsel, for stretem evri samting.” (2 Timothy 3:16) Disfala toktok bilong Paul hem agree witim toktok bilong Jesus wea sei olsem taem hem prea long God: “Word bilong iu nao truth.” Distaem, datfala Word hem Holy Bible, and hem wise for chekim sapos olketa samting iumi bilivim and olketa standard iumi followim, hem fitim samting wea Bible talem or nomoa.—John 17:17.
Taem iumi markem wanem iumi bilivim witim Word bilong God, iumi followim pipol bilong Beroea bifor, wea mek sure olketa teaching bilong Paul hem fitim samting wea olketa Scripture talem. Luke no tok daonem olketa long Beroea bat hem praisem olketa for disfala samting wea olketa duim. “Olketa barava willing tumas for kasem word, and olketa lukluk gud long olketa Scripture evriday for pruvim evri samting hia.” (Acts 17:11) Taem iumi tingim olketa teaching long world distaem saed long religion and fasin wea againstim each other, hem important for iumi followim example bilong olketa long Beroea wea garem gudfala tingting.
Narafala wei for luksavve long tru spiritual information, hem for lukim hao diswan affectim laef bilong pipol. (Matthew 7:17) Olsem example, wei for garem living wea followim truth insaed Bible shud mekem man kamap hasband, dadi, waef, or mami wea moabeta, wea mekem famili moa hapi and mekem man moa satisfae. Jesus hem sei: “Hapi nao olketa wea herem word bilong God and followim!”—Luke 11:28.
Toktok bilong Jesus mekem iumi tingim toktok bilong Dadi bilong hem long heven for olketa bilong Israel bifor: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem. O sapos iufala barava obeyim olketa komandment bilong mi! Then peace bilong iufala bae kamap olsem wanfala river, and raeteous fasin bilong iufala olsem olketa wave long sea.” (Isaiah 48:17, 18) For sure, kaen loving encouragement olsem bae muvim evriwan wea lovem gudfala and raeteous fasin!
Samfala Laek for Herem Nomoa “Samting Olketa Laek for Herem”
God hem talem datfala loving encouragement long olketa Israelite bikos olketa bilivim olketa laea bilong religion. (Psalm 106:35-40) Iumi tu mas protectim iumiseleva from olketa laea teaching. Paul raet olsem abaotem olketa wea sei olketa Christian: “Wanfala taem bae kam wea pipol bae no laek for herem gudfala teaching, bat olketa bae laek for followim tingting bilong olketa seleva nomoa and faendem olketa teacher wea teachim nomoa samting wea olketa laek for herem; and olketa bae no laek for herem truth, bat olketa bae laek for lisin long olketa laea story.”—2 Timothy 4:3, 4.
Olketa bigman bilong religion talem pipol samting wea olketa laek for herem, taem olketa letem nomoa olketa samting wea bae satisfaem feeling bilong man for laekem rong samting, olsem wei for duim sex nomata man no marit, homosexual fasin, and fasin for drunk. Bible barava talem klia hao olketa wea acceptim and duim kaen samting olsem bae “no kasem kingdom bilong God.”—1 Corinthians 6:9, 10; Romans 1:24-32.
Tru nao, for garem laef wea followim olketa standard bilong Bible, man mas no fraet, nomata pipol mekfani long hem. Staka pipol wea kamap Jehovah’s Witness iusim drug, drunk, durong, raf, steal, and laea bifor. Nomata olsem, olketa barava followim samting wea Bible talem and from holy spirit bilong God helpem olketa, olketa changem laef bilong olketa mekem olketa fit for “wakabaot fitim Jehovah.” (Colossians 1:9, 10; 1 Corinthians 6:11) From olketa stap long peace witim God, olketa kasem peace long mind, and tu, wanfala tru hope for future, wea bae iumi storyim.
Hope Bilong Kingdom
Kingdom bilong God nao bae mekem kamap datfala hope for peace wea stap insaed Bible, for olketa man wea obey. Jesus sei olsem long example prea bilong hem: “Mekem kingdom bilong iu kam. Mekem will bilong iu kamap long earth, olsem long heven.” (Matthew 6:10) Tru nao, Kingdom bilong God nomoa bae mek sure will bilong God hem kamap long earth. Why nao olsem? Bikos datfala Kingdom long heven—gavman wea Jesus Christ nao rul insaed—hem samting wea God bae iusim for showimaot hem nomoa garem right for sovereign ruler bilong earth.—Psalm 2:7-12; Daniel 7:13, 14.
Jesus Christ wea King bilong datfala Kingdom long heven bae mekem olketa man wea obey for kamap free from sin wea kam from Adam and sik and dae wea kamaot from datwan. Revelation 21:3, 4 hem sei: “Lukim! Tent bilong God hem stap witim olketa man . . . And [Jehovah God] bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.”
Peace for olowe bae kamap long full earth. Why nao iumi sure long datwan? Reason hem stap for datwan long Isaiah 11:9, wea sei: “Olketa [olketa wea stap anda long Kingdom] bae no spoelem eniwan or spoelem eni samting long holy maunten bilong mi; from earth bae fulap witim savve bilong Jehovah olsem wata hem kavarem sea.” Tru nao, evri man long earth bae garem stretfala savve abaotem God and obeyim hem. Waswe, datfala hope mekem heart bilong iu hapi? Sapos olsem, distaem nao hem taem for start for kasem datfala spesol “savve abaotem Jehovah.”
Waswe, Bae Iu Lisin Long Message Abaotem Kingdom?
God bae iusim Kingdom for aotem evri samting wea Satan duim, and tu, for teachim pipol bilong hem abaotem olketa raeteous wei bilong Hem. Dastawe iumi no sapraes hao Kingdom nao hem main samting insaed teaching bilong Jesus. Hem sei olsem: “Mi mas talemaot gud nius bilong kingdom bilong God, bikos hem nao why hem sendem mi kam.” (Luke 4:43) Christ komandim olketa disaepol bilong hem for sharem datfala sem message witim olketa narawan. (Matthew 28:19, 20) Hem talemaot disfala samting wea bae happen: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (Matthew 24:14) Datfala end hem klosap nao. Dastawe hem important tumas for pipol wea garem honest heart for lisin long datfala gud nius wea savve sevem laef bilong olketa!
Albert, wea iumi storyim long fasfala article hem herem message bilong Kingdom taem waef and son bilong hem start for studyim Bible witim Olketa Jehovah’s Witness. Fastaem, Albert hem garem daot. Hem askem wanfala bigman bilong religion long area bilong hem tu for visitim waef and son bilong hem for showim long tufala hao olketa Witness rong. Bat datfala bigman no laek for duim datwan. So Albert disaed for lisin taem wanfala Bible study gohed mekem hem savve talem stret olketa rong samting long teaching bilong olketa Witness. Bihaen wanfala study nomoa, hem join insaed datfala study nao from hem barava laek for lanem moa samting. Bihaen, hem talem why nao tingting bilong hem change. Hem sei: “Diswan nao samting mi luk aotem longtaem kam finis.”
Datfala taem nao Albert start for satisfaem spiritual need bilong hem, and hem nating sorre from hem duim datwan. Truth insaed Bible mekem hem kasem samting wea hem luk aotem long full laef bilong hem, wea diswan nao Kingdom wea bae stretem fasin for raverave and wei for no followim justice long world, and tu, wanfala hope for future. Truth insaed Bible mekem hem kasem peace long mind. Waswe, iu satisfaem spiritual need bilong iu? Hao sapos iu markem lelebet taem for readim olketa kwestin wea stap long box long page 6? Sapos iu laek savve long moa samting, Olketa Jehovah’s Witness bae hapi tumas for helpem iu.
[Box/Olketa Piksa long page 6]
WASWE, IU SATISFAEM SPIRITUAL NEED BILONG IU?
Waswe, iu satisfae long spiritual kaikai wea iu kasem? Mifala invaetem iu for readim olketa kwestin long daon and tickim olketa wea iu savve ansarem.
□ Hu nao God, and wanem nao nem bilong hem?
□ Hu nao Jesus Christ? Why nao hem mas dae? Hao nao dae bilong hem savve helpem iu?
□ Waswe, Devil hem stap? Sapos olsem, wea nao hem start kam from?
□ Wanem nao happen long iumi taem iumi dae?
□ Wanem nao plan bilong God for earth and for olketa man?
□ Wanem nao Kingdom bilong God?
□ Wanem nao olketa standard bilong God saed long fasin?
□ Insaed famili, wanem nao waka wea God givim long hasband and waef? Wanem nao samfala Bible principle wea mekem famili kamap moa hapi?
Sapos iu no sure long ansa for eniwan long olketa kwestin hia, iu savve ask for wanfala copy bilong brochure Wanem Nao God Mas Kasem From Iumi? Disfala brochure wea Olketa Jehovah’s Witness pablisim long klosap 300 languis, hem storyim 16-fala main Bible topic and givim ansa from Bible for evri kwestin antap.
[Olketa Piksa long page 4]
Olketa man garem spiritual need, wea mekem olketa difren from olketa animal
[Piksa long page 5]
“Olketa bae faendem olketa teacher wea teachim nomoa samting wea olketa laek for herem.”—2 Timothy 4:3
[Piksa long page 7]
Messiah Kingdom bilong God bae mekem peace kamap for olowe