Kwestin From Reader
Waswe, disfala word “maet,” wea stap long Zephaniah 2:3 hem minim olketa servant bilong God no savve sure sapos olketa bae kasem laef olowe?
Disfala scripture hem sei: “Luk aotem Jehovah, iufala evriwan wea garem kwaet fasin long earth, wea followim law bilong Hem. Luk aotem raeteous fasin, luk aotem kwaet fasin. Maet iufala savve haed long day bilong kros bilong Jehovah.” Why nao disfala verse iusim “maet”?
For minim hao Jehovah bae deal witim olketa faithful wan long Armageddon, hem gud for rememberim olketa samting wea Bible talem abaotem hao God bae deal witim olketa wea dae bifor datfala taem for judge. Samfala bae laef bak for kamap olketa spirit for stap olowe long heven, and samfala bae laef bak for stap olowe long Paradaes earth. (John 5:28, 29; 1 Corinthians 15:53, 54) Sapos Jehovah bae rememberim and rewardim olketa loyal wan bilong hem wea dae bifor Armageddon, hem bae duim sem samting for olketa servant bilong hem wea laef yet long datfala day bilong kros bilong hem.
Toktok bilong aposol Peter wea stap insaed Bible savve encouragem iumi tu. Hem sei: “[God] hem keepim Noah, wanfala man wea preach abaotem raeteous fasin, for stap sef witim sevenfala pipol taem hem mekem flood kam long wanfala world wea fulap witim pipol wea no followim God; and hem judgem tufala taon bilong Sodom and Gomorrah taem hem mekem tufala taon hia kamap asis, . . . and hem sevem raeteous Lot . . . Jehovah savve hao for sevem pipol wea lovem hem from test, bat for keepim pipol wea no raeteous for day bilong judgment, for finis evribit.” (2 Peter 2:5-9) Nomata Jehovah finisim olketa wicked man bifor, hem sevem Noah and Lot wea faithful long hem. Jehovah bae sevem pipol wea lovem hem tu taem hem finisim wicked pipol long Armageddon. “Wanfala big crowd” bilong olketa raeteous wan nao bae sev.—Revelation 7:9, 14.
Nomata Bible iusim datfala word ‘maet’ long Zephaniah 2:3, hem no minim iumi no sure sapos God fit for sevem pipol bilong hem or nomoa. So, datfala word “maet,” savve fitim nomoa taem man start for luk aotem raeteous fasin and kwaet fasin. Bat for hem sev, hem mas gohed for luk aotem raeteous fasin and kwaet fasin.—Zephaniah 2:3.
[Piksa long page 31]
“Jehovah savve hao for sevem pipol wea lovem hem from test”