Profesi Bilong Hosea Helpem Iumi for Wakabaot Witim God

“Bae olketa wakabaot followim Jehovah.”—HOSEA 11:10.

1. Wanem drama nao stap insaed buk bilong Hosea?

WASWE, iu savve laek lukluk long drama wea interesting pipol act insaed and wea story bilong hem mekem iu barava interest? Wanfala drama stap insaed buk bilong Hosea long Bible and hem piksarem wanfala samting.a Datfala drama hem abaotem samting wea happen insaed famili bilong Hosea, profet bilong God, and hem join witim wei wea Jehovah maritim Israel long tokpiksa wei thru long datfala covenant bilong Law bilong Moses.

2. Wanem information nao iumi savve abaotem Hosea?

² Iumi lukim long Hosea chapter 1 hao luk olsem Hosea stap long area bilong ten-tribe kingdom bilong Israel (wea olketa kolem Ephraim, from hem nao main tribe long datfala area). Hosea talemaot olketa profesi long olketa year wea sevenfala last king bilong Israel hem rul and long olketa year wea King Uzziah, Jotham, Ahaz, and Hezekiah olketa rulim Judah. (Hosea 1:1) So Hosea gohed talemaot olketa profesi for samting olsem 59 year. Hosea finis for raetem disfala buk no longtaem bihaen 745 B.C.E. Nomata olsem, toktok insaed disfala buk hem barava fitim distaem tu, bikos plande million pipol distaem trae hard for duim samting wea hem profesi abaotem taem hem sei: “Bae olketa wakabaot followim Jehovah.”—Hosea 11:10.

Samting Iumi Lanem From Olketa Main Point

3, 4. Storyim lelebet olketa main point insaed Hosea chapter 1 go kasem 5.

³ Wei for savve firstaem abaotem olketa main point bilong Hosea chapter 1 go kasem 5 bae strongim wei wea iumi disaed for wakabaot witim God thru long wei for showimaot faith and duim samting followim will bilong hem. Nomata pipol long kingdom bilong Israel olketa guilty from olketa duim spiritual adultery, God hem willing for showimaot mercy sapos olketa repent. Diswan hem showaot klia long wei wea Hosea deal witim waef bilong hem, Gomer. Bihaen Gomer bornem wanfala pikinini bilong Hosea, luk olsem hem garem tufala nara pikinini from difren man. Nomata olsem, Hosea tekem hem bak. Diswan semsem witim wei wea Jehovah willing for showim mercy long olketa Israelite wea repent.—Hosea 1:1–3:5.

⁴ Jehovah fit for mekem wanfala case saed long law againstim Israel bikos no eniwan long olketa laekem truth, showimaot loving-kaeness, or savve abaotem God. Hem bae askem ansa from kingdom bilong Israel wea worshipim idol and kingdom bilong Judah wea olobaot. Bat taem pipol bilong God “kasem trabol” olketa lukaotem Jehovah.—Hosea 4:1–5:15.

Samting wea Happen Insaed Datfala Drama

5, 6. (a) Wei for duim fornication insaed ten-tribe kingdom bilong Israel hem kamap hao big? (b) Why nao warning wea Jehovah givim long Israel bifor hem fitim iumi distaem tu?

⁵ God komandim Hosea olsem: “Go, tekem for iuseleva wanfala waef wea duim fornication and olketa pikinini wea kamap from fornication, bikos fornication nao mekem land hem barava lusim wei for followim Jehovah.” (Hosea 1:2) Long Israel, wei for duim fornication hem kamap hao big? Bible hem sei: “Wei for duim fornication hem mekem [pipol bilong ten-tribe kingdom] go difren, and from fornication olketa no stap anda long God bilong olketa. . . . Olketa dota bilong iufala duim fornication and olketa dota-in-law olketa duim adultery. . . . Olketa man olketa go witim olketa jury woman, and olketa savve go sakrifaes witim olketa jury woman bilong temple.”—Hosea 4:12-14.

⁶ Long physical wei and spiritual wei fornication hem kamap big tumas long Israel. Dastawe Jehovah bae ‘askem ansa’ for samting wea olketa Israelite duim. (Hosea 1:4; 4:9) Disfala warning hem important tumas for iumi bikos Jehovah bae askem bak ansa from pipol wea duim dirty fasin distaem and wea tekpart long worship wea no klin. Bat olketa wea wakabaot witim God olketa followim standard bilong hem saed long klin worship and olketa savve hao “man wea duim fornication . . . no garem share insaed long kingdom bilong Christ and God.”—Ephesians 5:5; James 1:27.

7. Wanem nao marit bilong Hosea and Gomer hem piksarem?

⁷ Taem Hosea maritim Gomer, luk olsem hem wanfala young gele, and taem hem ‘bornem wanfala son bilong Hosea,’ Gomer faithful yet for stap witim hem. (Hosea 1:3) Olsem samting wea happen insaed disfala drama, no longtaem bihaen God mekem olketa Israelite free from Egypt long 1513 B.C.E., hem mekem wanfala covenant witim olketa wea olsem wanfala agreement for wanfala klin marit. Taem Israel agree long datfala covenant, hem promis for faithful long Jehovah wea hem “hasband wea ownim [hem].” (Isaiah 54:5) Tru nao, datfala klin marit bilong Hosea and Gomer hem piksarem wei wea God maritim Israel long tokpiksa wei. Bat evri samting barava change!

8. Hao nao kingdom bilong Israel wea garem tenfala tribe hem start, and wanem kaen worship nao olketa garem?

⁸ Waef bilong Hosea “hem babule moa and hem bornem wanfala dota.” Luk olsem datfala gele and nara pikinini wea hem garem bihaen, olketa born from wei wea Gomer duim adultery. (Hosea 1:6, 8) From Gomer hem piksarem Israel, maet iu ask, ‘Hao nao gogo Israel duim adultery?’ Long 997 B.C.E., tenfala tribe bilong Israel separate from tufala tribe long south, hem nao Judah and Benjamin. Ten-tribe kingdom bilong Israel wea stap long north start for worshipim young buluka. Diswan hem for mekem pipol no go long Judah for worshipim Jehovah long temple bilong hem long Jerusalem. Wei for worshipim datfala false god Baal, wea insaed diswan hem olketa nogud party wea fulap witim dirty fasin, hem kamap samting wea olketa long Israel laekem tumas and olketa duim evritaem.

9. Olsem Hosea 1:6 talem, wanem nao happen long Israel?

⁹ Taem Gomer bornem mek-tu pikinini bilong hem wea luk olsem hem from difren man, God sei long Hosea: “Kolem hem Lo-ruhamah [wea minim “Hem No Kasem Mercy”], bikos bae mi no showimaot mercy moa long haos bilong Israel, bikos bae mi barava tekem olketa go.” (Hosea 1:6) Jehovah “tekem olketa go” taem olketa bilong Assyria mekem olketa Israelite kamap prisoner long 740 B.C.E. Nomata olsem, God showimaot mercy long tu-tribe kingdom bilong Judah and hem sevem olketa, bat hem no iusim bow, sword, war, horse, or olketa man wea raedem horse. (Hosea 1:7) Long 732 B.C.E., insaed wanfala naet nomoa wanfala angel killim dae 185,000 soldia bilong Assyria wea plan for attakim Jerusalem, kapitol taon bilong Judah.—2 Kings 19:35.

Case Bilong Jehovah Againstim Israel

10. Wei wea Gomer duim adultery hem piksarem wanem?

¹⁰ Gomer hem lusim Hosea and kamap “waef wea duim fornication” from hem go stap witim wanfala difren man. Diswan piksarem wei wea kingdom bilong Israel hem mekem olketa agreement witim olketa nation wea worshipim idol and start for depend long olketa. Winim wei for sei Jehovah nao givim hem evri material blessing, Israel hem sei olketa god bilong olketa nation hia nao duim datwan and hem spoelem marit covenant bilong hem witim God from hem join insaed false worship. Dastawe Jehovah fit for mekem wanfala case saed long law againstim datfala nation wea duim adultery long spiritual wei!—Hosea 1:2; 2:2, 12, 13.

11. Wanem nao happen long Law covenant taem Jehovah letem Israel and Judah for kamap prisoner?

¹¹ Wanem nao panis wea Israel kasem from hem lusim hasband bilong hem wea ownim hem? God mekem hem “go long wilderness” bilong Babylon, wea hem nao nation wea winim Assyria, ples wea olketa Israelite stap olsem prisoner start long 740 B.C.E. (Hosea 2:14) Long taem hia wea Jehovah mekem datfala 10-tribe kingdom for finis, hem no endim marit covenant bilong hem witim 12-tribe nation bilong Israel. Tru nao, nomata God letem olketa bilong Babylon for distroem Jerusalem long 607 B.C.E. and letem olketa pipol bilong Judah for kamap prisoner, hem no finisim yet covenant bilong Law bilong Moses wea thru long datwan 12-tribe nation bilong Israel maritim Jehovah long tokpiksa wei. Israel stap olsem waef bilong Jehovah go kasem taem wea olketa leader bilong olketa Jew rejectim Jesus Christ and killim hem dae long 33 C.E.—Colossians 2:14.

Jehovah Kaonselem Israel

12, 13. Wanem nao Hosea 2:6-8 hem storyim, and hao nao toktok hia fulfill long Israel?

¹² God kaonselem Israel for “lusim wei for duim fornication,” bat Israel laek for aftarem olketa wea laek duim fornication witim hem. (Hosea 2:2, 5) So Jehovah hem sei, “Dastawe bae mi mekem wanfala fence bilong nila grass for satem road bilong iu; and bae mi hipimap wanfala ston wall for satem hem, mekem bae hem no savve faendem olketa road bilong hem. And hem bae aftarem olketa wea laek duim fornication witim hem, bat hard for hem kasem olketa; and hem bae barava lukaotem olketa, bat hem bae no faendem olketa. And hem bae sei, ‘Mi laek go bak long hasband bilong mi, datfala first wan, from mi stap gud long datfala taem winim hao mi stap distaem.’ Bat hem nating luksavve hao mi nao givim hem grain and swit wine and oil, and mi nao mekem hem garem staka silver, and gold, wea olketa iusim for Baal [or, wea olketa “iusim for wakem image bilong Baal,” footnote].”—Hosea 2:6-8.

¹³ Nomata Israel lukaotem help from olketa nation wea “laek duim fornication witim hem,” no eniwan long olketa fit for helpem hem. Hem olsem hem stap insaed wanfala ples wea garem thik bushes raonem and wea hard for man go insaed, wea mekem hem hard for sendem eni help for hem. Army bilong Assyria hem raonem kapitol taon bilong hem for thrifala year, then long 740 B.C.E., olketa bilong Assyria tekovarem Samaria. Bihaen datwan datfala ten-tribe kingdom hem no kamap moa. Samfala nomoa long olketa Israelite wea kamap prisoner luksavve hao taem laen dadi bilong olketa servem Jehovah olketa stap gud. Disfala sekson rejectim wei for worshipim Baal and laek for fren bak witim Jehovah.

Lukluk Moa Long Datfala Drama

14. Why nao Hosea sleep moa witim Gomer?

¹⁴ For minim gud wei wea marit bilong Hosea hem olsem wei wea Israel fren witim Jehovah, tingim olketa toktok hia: “Jehovah gohed for sei long mi: ‘Go bak moa, lovem wanfala woman wea nara man lovem hem and wea duim adultery.’” (Hosea 3:1) Hosea followim disfala komand and hem go baem bak Gomer from man wea hem go stap witim. Bihaen, Hosea talem disfala kaonsel long waef bilong hem: “Bae iu bilong mi and bae iu stap witim mi for plande day. Iu mas no duim fornication, and iu mas no bilong eni nara man.” (Hosea 3:2, 3) Gomer acceptim datfala discipline, and Hosea sleep witim hem moa. Hao nao diswan join witim wei wea God deal witim pipol bilong Israel and Judah?

15, 16. (a) Wanem nao nation bilong God wea kasem discipline mas duim for kasem mercy? (b) Hao nao Hosea 2:18 hem fulfill?

¹⁵ Taem olketa bilong Israel and Judah stap olsem prisoner long Babylon, God iusim olketa profet bilong hem for ‘story long heart bilong olketa.’ For kasem mercy from God, pipol bilong hem mas showimaot olketa repent and olketa mas go bak long hasband wea ownim olketa, olsem wei wea Gomer go bak long hasband bilong hem. Then Jehovah bae tekem datfala nation wea hem disciplinem and wea olsem waef, go aot from “wilderness” bilong Babylon and tekem hem kam bak long Judah and Jerusalem. (Hosea 2:14, 15) Hem fulfillim datfala promis long 537 B.C.E.

¹⁶ God fulfillim tu disfala promis: “Bae mi mekem wanfala covenant long datfala day witim olketa wild animal long field and witim olketa samting wea flae long heven and olketa samting wea krol long graon, and bow and sword and war bae mi finisim from datfala land, and bae mi mekem olketa leidaon long peace.” (Hosea 2:18) Datfala smol sekson bilong olketa Jew go bak long hom bilong olketa and stap sef, olketa no need for fraetem olketa animal. Disfala profesi hem fulfill tu long 1919 C.E., taem smol sekson bilong spiritual Israel hem kamap free from “Bigfala Babylon,” wea hem nao evri false religion. Distaem olketa stap sef and enjoyim laef insaed wanfala spiritual paradaes witim olketa fren bilong olketa wea garem hope for stap olowe long earth. Olketa tru Christian hia no garem olketa fasin wea olsem fasin bilong animal.—Revelation 14:8; Isaiah 11:6-9; Galatians 6:16.

Followim Samting wea Iumi Lanem

17-19. (a) Olketa wanem fasin bilong God nao iumi kasem encouragement for followim? (b) Hao nao mercy bilong Jehovah and wei wea hem feel sorre for man hem shud affectim iumi?

¹⁷ God hem garem mercy and hem savve feel sorre long man, and iumi tu shud olsem. Datwan nao wanfala samting wea iumi lanem from olketa firstfala chapter bilong Hosea. (Hosea 1:6, 7; 2:23) Wei wea God hem willing for showimaot mercy long olketa Israelite wea repent hem join witim samting wea disfala toktok long Proverbs hem talem: “Man wea haedem sin bilong hem no savve win, bat man wea talemaot and lusim olketa bae kasem mercy.” (Proverbs 28:13) And olketa wea duim nogud samting and wea repent savve kasem comfort tu from disfala toktok bilong man wea raetem psalm: “Olketa sakrifaes long God hem wanfala spirit wea brek; wanfala heart wea brek and pisis, O God, iu bae no lukdaonem.”—Psalm 51:17.

¹⁸ Profesi bilong Hosea hem mekhae long wei wea God wea iumi worshipim hem savve sorre long iumi and showimaot mercy. Nomata samfala go difren from olketa raeteous wei bilong hem, olketa savve repent and tan raon. Sapos olketa duim datwan, Jehovah bae welkamim olketa kam bak. Hem showimaot mercy long olketa bilong Israel wea repent and wea hem maritim long tokpiksa wei. Nomata olketa no obeyim Jehovah and ‘olketa mekem Holy Wan bilong Israel feel sorre, hem showimaot mercy and hem gohed for tingim hao olketa man nomoa.’ (Psalm 78:38-41) Disfala mercy shud muvim iumi for gohed wakabaot witim God bilong iumi, Jehovah, wea feel sorre long iumi.

¹⁹ Nomata olketa sin olsem wei for killim dae man, steal, and adultery hem big tumas long Israel, Jehovah ‘story go long heart bilong hem.’ (Hosea 2:14; 4:2) Taem iumi ting raonem mercy bilong God and wei wea hem sorre long iumi, diswan shud muvim heart bilong iumi and strongim wei wea iumi fren witim Jehovah. So iumi shud askem iumiseleva: ‘Hao nao mi savve kamap moabeta long wei for followim example bilong Jehovah saed long mercy and wei for feel sorre taem mi deal witim olketa narawan? Sapos wanfala Christian wea mekem mi feel nogud hem askem mi for forgivim hem, waswe, bae mi willing for forgive olsem God?’—Psalm 86:5.

20. Talem example for showimaot hao iumi fit for trustim hope wea God givim for iumi.

²⁰ God givim iumi trufala hope. Olsem example, hem promis olsem: “Bae mi givim hem . . . flat ples bilong Achor olsem door wea lead go long hope.” (Hosea 2:15) Organization bilong Jehovah wea stap bifor and wea olsem waef bilong hem, garem strongfala hope for go bak moa long hom bilong olketa, long “flat ples bilong Achor.” From datfala promis hem fulfill long 537 B.C.E. iumi garem strongfala reason for hapi long strong hope wea Jehovah givim for future.

21. Hao nao wei for kasem savve hem join witim wei wea iumi wakabaot witim God?

²¹ For gohed wakabaot witim God, iumi need for gohed kasem savve abaotem hem and followim datwan insaed laef bilong iumi. Staka long Israel no garem savve abaotem Jehovah. (Hosea 4:1, 6) Bat, samfala barava tinghae long teaching bilong God and olketa duim samting followim datwan. From datwan, olketa kasem bigfala blessing. Samfala long olketa hia nao hem Hosea, and tu, 7,000 wea stap long taem bilong Elijah wea no baodaon long Baal. (1 Kings 19:18; Romans 11:1-4) Wei wea iumi tinghae long teaching bilong God bae helpem iumi for gohed wakabaot witim hem.—Psalm 119:66; Isaiah 30:20, 21.

22. Wanem kaen tingting nao iumi shud garem abaotem apostate fasin?

²² Jehovah expectim olketa man wea leadim pipol bilong hem for rejectim apostate fasin. Bat, Hosea 5:1 hem sei: “Herem diswan, O iufala priest, and lisin kam, O iufala bilong Israel, and iufala bilong king, herehere kam, from judgment hem for iufala pipol; bikos iufala kamap olsem wanfala trap for Mizpah and olsem wanfala net ovarem Tabor.” Olketa apostate leader olketa olsem wanfala trap and net for olketa Israelite, from olketa pullim olketa pipol for worshipim olketa idol. Luk olsem Maunt Tabor and wanfala ples wea nem bilong hem Mizpah hem olketa main ples for duim kaen false worship olsem.

23. Wanem gud samting nao iu kasem from wei for studyim Hosea chapter 1 go kasem 5?

²³ Long disfala article, profesi bilong Hosea hem showim iumi hao Jehovah hem wanfala God wea showimaot mercy and wea givim hope and blessim olketa wea followim samting hem teachim and wea rejectim wei for apostate. Olsem olketa Israelite long bifor wea repent, iumi tu mas lukaotem Jehovah and trae hard evritaem for mekem hem hapi. (Hosea 5:15) Taem iumi duim datwan, iumi bae harvestim gud samting and bae iumi savve kasem bigfala hapi and peace wea pipol wea wakabaot followim God savve garem.—Psalm 100:2; Philippians 4:6, 7.

[Footnote]

Wanem Nao Ansa Bilong Iu?

• Wanem nao marit bilong Hosea and Gomer hem piksarem?

• Why nao Jehovah fit for mekem wanfala case saed long law againstim Israel?

• Wanem samting wea iu lanem from Hosea chapter 1 go kasem 5 nao iu barava laekem?

[Piksa long page 18]

Waswe, iu savve hu nao waef bilong Hosea hem piksarem?

[Piksa long page 19]

Olketa bilong Assyria tekovarem Samaria long 740 B.C.E.

[Piksa long page 20]

Hapi pipol go bak long hom bilong olketa