Toktok Bilong Jehovah Hem Laef
Olketa Main Point From Buk Bilong Hosea
KLOSAP evriwan long ten-tribe kingdom bilong Israel no followim tru worship. Taem Jeroboam II hem rul, olketa Israelite garem staka material samting, bat bihaen hem dae olketa no garem plande material samting. Raf fasin and problem saed long politik hem kamap. Long sixfala king wea kamap bihaen, fofala dae from samwan killim dae olketa. (2 Kings 14:29; 15:8-30; 17:1-6) Start long 804 B.C.E., Hosea gohed for talemaot olketa profesi for 59 year and olketa profesi hia gohed for fulfill long nogud taem wea iumi stap long hem distaem.
Tingting bilong Jehovah abaotem datfala bighed nation bilong Israel hem showaot klia long samting wea happen long marit bilong Hosea. Message wea Hosea hem talemaot hem abaotem olketa sin wea Israel duim and wei wea kingdom bilong Israel and Judah bae kasem judgment. Long disfala buk wea Hosea raetem, hem iusim olketa kaenfala toktok and strongfala toktok. From hem part long Word bilong God, message wea stap insaed disfala buk hem laef and garem paoa.—Hebrews 4:12.
“MARITIM WANFALA GELE WEA DUIM DIRTY FASIN”
Jehovah sei long Hosea: “Go maritim wanfala gele wea duim dirty fasin.” (Hosea 1:2) Hosea obeyim datwan and bihaen Gomer bornem wanfala son. Luk olsem tufala nara pikinini wea Gomer bornem hem from difren man. Nem bilong tufala hem Lo-ruhamah and Lo-ammi, wea minim Jehovah no showim mercy long olketa Israelite and hem rejectim pipol bilong hem wea no faithful.
Wanem nao tingting bilong Jehovah abaotem pipol bilong hem wea bighed? Hem sei long Hosea: “Tekem bak datfala woman wea duim adultery and wea nara man lovem, and lovem hem moa long sem wei wea Jehovah lovem olketa son bilong Israel nomata olketa worshipim olketa nara god.”—Hosea 3:1.
Ansa for Olketa Bible Kwestin:
1:1—Why nao Hosea talem nem bilong fofala king wea rul long Judah, bat hem talem nomoa nem bilong wanfala ruler long Israel taem hem duim waka bilong hem? Hem bikos olketa king wea kam from laen bilong David nomoa garem right for rulim pipol bilong God. Olketa king bilong kingdom long north no kam from laen bilong David olsem olketa long Judah.
1:2-9—Waswe, Hosea hem really maritim wanfala gele wea duim dirty fasin? Ia, Hosea hem maritim wanfala woman wea bihaen tufala marit, hem duim adultery. Datfala profet no talem eni samting for showimaot hao samting wea happen long famili bilong hem, hem wanfala dream or wanfala vision.
1:7—Wanem taem nao Jehovah showimaot mercy and sevem nation bilong Judah? Diswan hem fulfill long 732 B.C.E., taem King Hezekiah hem rul. Long datfala taem, Jehovah stopem Assyria for attakim Jerusalem taem hem sendem wanfala angel for killim dae 185,000 soldia bilong Assyria long wanfala naet nomoa. (2 Kings 19:34, 35) Jehovah hem no iusim “bow or sword or man for faet or olketa man wea raedem olketa horse for faet” for sevem Judah, bat hem iusim wanfala angel nomoa.
1:10, 11—From Assyria hem tekovarem kingdom bilong Israel long north long 740 B.C.E., hao nao olketa son bilong Israel “hipap tugeta moa” witim olketa son bilong Judah? Staka pipol wea kam from kingdom bilong north go long Judah bifor olketa bilong Babylon tekem pipol wea stap long Judah olsem prisoner long 607 B.C.E. (2 Chronicles 11:13-17; 30:6-12, 18-20, 25) Taem olketa Jew prisoner go bak long Jerusalem long 537 B.C.E., olketa pikinini bilong olketa wea kam from kingdom bilong Israel long north tu go bak witim olketa.—Ezra 2:70.
2:21-23—Wanem nao Jehovah profesi abaotem taem hem sei: “Mi bae plantim [Jezreel] olsem seed bilong mi long earth, and mi bae showimaot mercy long hem”? Nem bilong firstborn pikinini bilong Hosea wea Gomer bornem hem Jezreel. (Hosea 1:2-4) Datfala nem hem minim “God Bae Plantim Seed,” and hem wanfala profesi wea fulfill taem Jehovah hipimap wanfala smol sekson wea faithful long 537 B.C.E. and plantim olketa olsem seed long Judah. Datfala land wea no eniwan stap long hem for 70 year bae garem grain, swit wine, and oil. Disfala profesi hem wanfala poem, and insaed disfala poem olketa samting hia bae askem earth for givim kam gud samting for mekem olketa grow, and earth bae askem skae for givim kam rain. Skae tu bae askem God for givim kam olketa cloud for mekem hem rain. Evri samting hia hem for helpem datfala smol sekson wea bae go bak long Jerusalem for kasem evri samting wea olketa needim. Aposol Paul and Peter iusim disfala scripture long Hosea 2:23 saed long wei for hipimap wanfala smol sekson bilong spiritual Israel.—Romans 9:25, 26; 1 Peter 2:10.
Olketa Leson for Iumi:
1:2-9; 3:1, 2. Tingim wei wea Hosea no duim samting wea hemseleva nomoa laekem, bat hem stap witim woman wea duim adultery from hem laek for obeyim God and duim will bilong hem. Waswe, iumi willing for sakrifaesim samfala samting wea iumiseleva laek for duim, mekem iumi savve duim will bilong God?
1:6-9. Jehovah hem heitim wei wea man stop for servem hem long sem wei wea hem heitim wei for duim adultery.
1:7, 10, 11; 2:14-23. Profesi wea Jehovah talem abaotem Israel and Judah hem fulfill. Toktok bilong Jehovah hem evritaem kamap tru.
2:16, 19, 21-23; 3:1-4. Jehovah hem willing for forgivim olketa wea barava repent. (Nehemiah 9:17) Iumi shud kaen and garem feeling taem iumi deal witim olketa narawan olsem Jehovah hem duim.
“JEHOVAH HEM MEKEM WANFALA KOT CASE”
“Jehovah hem mekem wanfala kot case againstim pipol bilong disfala land.” Why nao olsem? Bikos “no eniwan long hia followim truth, showimaot loving-kaeness, and savve abaotem God.” (Hosea 4:1) Pipol long Israel wea apostate showimaot olketa stop for servem Jehovah taem olketa ravem pipol, killim pipol dae, and duim dirty fasin. Olketa no askem God for helpem olketa, bat olketa “askem Egypt for help, and olketa go long Assyria for help.”—Hosea 7:11.
Jehovah talemaot judgment bilong hem and sei: “Israel mas finis.” (Hosea 8:8) Kingdom bilong Judah hem guilty. Hosea 12:2 hem sei: “Jehovah mekem wanfala kot case againstim Judah, and hem bae mekem Jacob givim ansa for nogud wei bilong hem and hem bae panisim hem for olketa samting wea hem duim.” Bat God promisim hao olketa bae kamap gud moa taem hem sei: “Mi bae sevem olketa from Sheol; mi bae mekem olketa kam bak from dae.”—Hosea 13:14.
Ansa for Olketa Bible Kwestin:
6:1-3—Hu nao sei: “Iufala pipol kam, and iumi go bak long Jehovah”? Maet olketa Israelite wea no faithful nao encouragem each other for go bak long Jehovah. Sapos diswan hem tru, olketa act nomoa olsem olketa repent. Loving-kaeness wea olketa showimaot hem for lelebet taem nomoa, olsem “cloud wea float antap long graon long morning and . . . dew wea kwiktaem nomoa hem finis.” (Hosea 6:4) Bat maet Hosea nao barava askem olketa pipol hia for go bak long Jehovah. Nomata hu nao talem datfala toktok, olketa bighed Israelite long ten-tribe kingdom bilong Israel mas showimaot olketa barava repent and go bak long Jehovah.
7:4—Long wanem wei nao olketa Israelite wea duim adultery olketa olsem “oven wea barava hot”? Disfala tokpiksa showimaot nogud feeling wea insaed long heart bilong olketa hem barava strong olsem oven wea barava hot.
Olketa Leson for Iumi:
4:1, 6. Sapos iumi laekem Jehovah for hapi long iumi, iumi mas gohed for kasem savve abaotem hem and followim wanem iumi lanem.
4:9-13. Olketa wea duim dirty fasin and join insaed long worship wea no klin mas givim ansa long Jehovah for samting wea olketa duim.—Hosea 1:4.
5:1. Olketa wea leadim pipol bilong God distaem shud barava rejectim wei for apostate. Sapos nomoa, maet olketa apostate pullim samfala for join insaed long false worship, wea datwan hem ‘wanfala trap and wanfala net’ wea kasholem olketa.
6:1-4; 7:14, 16. Man wea sei hem repent bat no showimaot datwan hem wanfala hypocrite and samting wea hem duim hem iusles nomoa. For God showim mercy long man wea duim rong samting, datfala man mas showimaot hem barava repent and duim samting for showimaot hem go bak long ples wea “moa hae,” wea minim stretfala wei for worship. Olketa samting wea hem duim mas followim olketa hae standard bilong God.—Hosea 7:16, footnote.
6:6. Man wea gohed duim sin hem showimaot hem no lovem and hem no faithful long God. Nomata sapos hem trae for duim plande samting long spiritual wei for kavarem datfala sin, datwan no showimaot hem lovem and faithful long God.
8:7, 13; 10:13. Datfala principle long Bible wea sei ‘man bae harvestim samting wea hem plantim’ barava kamap tru long olketa Israelite wea worshipim olketa idol.—Galatians 6:7.
8:8; 9:17; 13:16. Olketa profesi abaotem kingdom bilong north hem kamap tru taem Assyria hem tekovarem kapitol taon bilong hem, Samaria. (2 Kings 17:3-6) Iumi savve sure hao God bae duim samting wea hem talem.—Numbers 23:19.
8:14. Jehovah iusim olketa long Babylon for “bonem olketa taon long [Judah]” long 607 B.C.E. Datwan fulfillim profesi wea talem hao Jerusalem and land bilong Judah bae distroe. (2 Chronicles 36:19) Toktok wea God talem hem kamap tru evritaem.—Joshua 23:14.
9:10. Nomata olketa Israelite dedicate long tru God, olketa “go long Baal long Peor, and gohed for dedicatem olketa seleva long datfala nogud samting.” Iumi wise sapos iumi lane from datfala nogud example wea olketa showimaot and no duim eni samting wea bae spoelem wei wea iumi dedicate long Jehovah.—1 Corinthians 10:11.
10:1, 2, 12. Iumi shud no hypocrite taem iumi worshipim God. Taem iumi ‘plantim seed for iumiseleva witim raeteous fasin, iumi bae harvestim loving-kaeness bilong God.’
10:5. Beth-aven (wea minim “Haos bilong Barava Nogud Samting”) hem nogud nem wea olketa iusim for Bethel (wea minim “Haos bilong God”). Taem olketa tekem aot from Samaria datfala idol buluka bilong Beth-aven, olketa wea stap long Samaria barava sorre for lusim datfala samting wea olketa worshipim. Hem krangge samting for trustim wanfala idol wea no laef and wea no savve protectim hemseleva!—Psalm 135:15-18; Jeremiah 10:3-5.
11:1-4. Jehovah evritaem showimaot love taem hem deal witim pipol bilong hem. Hem no wanfala hevi for stap anda long God.
11:8-11; 13:14. Samting wea Jehovah talem abaotem wei wea pipol bilong hem bae go bak long tru worship ‘hem kamap tru.’ (Isaiah 55:11) Long 537 B.C.E., olketa Israelite kamap free from Babylon and wanfala smol sekson go bak long Jerusalem. (Ezra 2:1; 3:1-3) Evri samting wea Jehovah talem thru long olketa profet bilong hem bae kamap tru evritaem.
12:6. Iumi shud disaed strong for showimaot loving-kaeness, duim samting wea stret, and for trust long Jehovah evritaem.
13:6. Olketa Israelite “satisfae and heart bilong olketa kamap praod. Dastawe olketa forgetim [Jehovah].” Iumi mas stap klia long wei for apim iumiseleva.
“OLKETA WEI BILONG JEHOVAH HEM STRET”
Hosea barava ask olsem: “Plis olketa Israelite, kam bak long Jehovah, God bilong iufala, from iufala sin againstim hem.” Hem encouragem pipol for sei long Jehovah: “Plis forgivim sin bilong mifala and acceptim gud samting wea mifala duim, and mouth bilong mifala bae praisem iu.”—Hosea 14:1, 2.
Man wea repent from rong samting wea hem duim shud kam bak long Jehovah, followim olketa wei bilong hem, and praisem hem. Why nao olsem? Bikos “olketa wei bilong Jehovah hem stret, and olketa wea raeteous nao bae wakabaot followim olketa.” (Hosea 14:9) Iumi hapi hao ‘long olketa last day, plande pipol moa bae fraet long Jehovah and worshipim hem from gudfala fasin bilong hem’!—Hosea 3:5.
[Piksa long page 15]
Samting wea happen long marit bilong Hosea showimaot wei wea Jehovah deal witim Israel
[Piksa long page 17]
Ten-tribe kingdom bilong Israel hem finis taem Assyria tekovarem Samaria long 740 B.C.E.