Followim Example Bilong Profet Hosea
1. Wanem kwestin nao maet hem gud for iu tingim?
1 Taem iu ting raonem wei wea Jehovah kaen tumas and garem bigfala mercy, maet iu tingim disfala kwestin: ‘Wanem samting nao mi willing for sakrifaesim mekem mi duim wanem Jehovah laekem?’ (Ps. 103:2-4; 116:12) Hosea willing for duim wanem Jehovah talem hem for duim, nomata hem mas sakrifaesim samting for duim datwan. Wanem nao iumi savve duim for followim example bilong Hosea?
2. Wanem nao iumi savve duim for followim gudfala example bilong Hosea long wei for no givap for preach?
2 Preach Nomata Long Taem wea Hem Hard: Message bilong Hosea hem for ten tribe kingdom bilong Israel, wea klosap evriwan long olketa lusim tru worship. King Jeroboam II duim samting wea Jehovah no laekem and gohed leadim pipol for worshipim buluka olsem Jeroboam I duim. (2 Ki. 14:23, 24) Olketa king wea rul bihaen long hem gohed for duim olketa nogud samting wea spoelem tru worship, gogo datfala kingdom hem finis long 740 B.C.E. Nomata staka pipol worshipim olketa false god, profet Hosea gohed faithful for talemaot message bilong Jehovah for 59 year. Waswe, iumi gohed strong for preach, nomata pipol no interest or againstim iumi?—2 Tim. 4:2.
3. Hao nao wei wea Hosea deal witim samting wea happen long hem helpem iumi minim mercy bilong Jehovah?
3 Tingim Mercy Bilong Jehovah: Jehovah talem Hosea for maritim “wanfala woman wea bae durong.” (Hos. 1:2) Nomata Hosea and waef bilong hem, Gomer, garem wanfala son, bihaen Gomer hem durong and garem tufala pikinini moa. Wei wea Hosea willing for forgivim waef bilong hem helpem iumi minim bigfala mercy wea Jehovah garem for pipol bilong Israel taem olketa repent. (Hos. 3:1; Rom. 9:22-26) Waswe, iumi willing for no duim samting wea iumiseleva laekem mekem iumi savve talemaot mercy bilong Jehovah long olketa difren kaen pipol?—1 Cor. 9:19-23.
4. Wanem nao samfala samting wea maet iumi sakrifaesim mekem iumi duim wanem Jehovah laekem?
4 From samfala wea worshipim Jehovah laek for duim staka samting long ministry, olketa sakrifaesim waka wea olketa savve kasem big pei for hem. Olketa narawan stap singol or disaed for no garem pikinini mekem Kingdom hem first samting long laef bilong olketa. Taem iumi ting raonem wanem Hosea duim, maet iumi ting olsem, ‘Hard tumas for mi duim samting wea hem duim.’ Bat, taem iumi tinghae long wei wea Jehovah hem kaen tumas and depend long holy spirit bilong hem for strongim iumi, Jehovah savve iusim iumi for duim wanem iumi tingse iumi no fit for duim, olsem Hosea.—Matt. 19:26; Phil. 2:13.