Olketa Mekem Heart Bilong Dadi and Mami Bilong Olketa Hapi
“SON bilong mi, sapos heart bilong iu kamap wise, heart bilong mi bae hapi.” (Proverbs 23:15) Tru tumas, taem pikinini bilong Christian parents kasem wisdom wea kam from God, tufala hapi fogud. Long Saturday, September 10, 2005, wanfala grup bilong 6,859 pipol from olketa difren kantri attendim graduation bilong mek-119 class bilong Watchtower Bible Skul bilong Gilead. Evriwan hapi tumas, especially parents bilong 56-fala wea graduate.
David Walker, wea hem stap long United States Bethel for staka year, hem openem program witim wanfala prea wea talemaot feeling from heart. Then, chairman bilong datfala program, David Splane wea hem member bilong Governing Body bilong Olketa Jehovah’s Witness, startim program taem hem sei olsem long olketa dadi and mami bilong olketa wea graduate: “Iufala fit for kasem praise. Olketa fasin wea iufala mekem grow insaed long olketa son and dota bilong iufala hem muvim olketa for kamap missionary.” Maet olketa dadi and mami hia wari bikos olketa son and dota bilong olketa redi for go long olketa farawe assignment bilong olketa. Nomata olsem, Brata Splane hem encouragem olketa olsem: “Iufala no wari abaotem pikinini bilong iufala. Jehovah savve lukaftarem olketa winim iufala.” Then hem sei: “Tingim olketa gudfala samting wea olketa son and dota bilong iufala bae duim. Pipol wea safa bae kasem trufala comfort for firstaem long laef bilong olketa.”
Hao for Gohed Mekem Nara Pipol Hapi
Chairman hem introducem fofala speaker. First wan hem Ralph Walls member bilong United States Branch Komiti wea storyim theme “Eye Bilong Iu Mas Gohed for Open.” Hem sei spiritual wei for blind hem moa worse winim physical wei for blind. Olketa insaed kongregeson long Laodicea long first century olketa lusim spiritual wei for lukluk long samting. Jesus willing for helpem olketa Christian wea blind insaed datfala kongregeson. Nomata olsem, hem moabeta for no kamap blind olsem long wei for keepim spiritual eye bilong iumi open evritaem. (Revelation 3:14-18) Speaker hem sei: “Eye bilong iufala mas gohed for open, and iufala mas garem sem wei for ting long olketa brata wea lead, olsem hao Jehovah ting long olketa.” Olketa shud no ova tumas for wari sapos kongregeson garem samfala problem. Lord Jesus Christ hem savve long evri samting olsem. Hem bae stretem evri samting olsem long best taem for duim datwan.
Long next tok, Samuel Herd bilong Governing Body hem ansarem disfala kwestin “Waswe, Iu Redi?” Long sem wei wea man for travel hem tekem kaleko wea hem needim, olketa wea graduate mas evritaem werem niufala fasin olsem kaleko. Olketa mas garem fasin for kea olsem Jesus. Taem wanfala man wea garem leprosy hem talem hem: “Sapos iu laekem, iu savve mekem mi klin,” Jesus hem sei: “Mi laekem. Kamap klin.” (Mark 1:40-42) Then speaker sei: “Sapos iu really laek for helpem pipol, iu bae faendem wei for duim datwan.” Philippians 2:3 sei olketa Christian mas ting long ‘narafala pipol olsem hae winim olketa.’ Brata Herd hem sei: “For garem heart wea hambol hem moa important winim wei for garem savve. Pipol wea iu meetim taem iu duim ministry and olketa brata and sista long kongregeson bae kasem gudfala samting from savve wea iu garem sapos iu hambol.” Hem finisim tok bilong hem long wei for talem hao sapos olketa wea graduate gohed for werem Christian love olsem kaleko, olketa redi nao for travel go long assignment bilong olketa, and bae olketa win.—Colossians 3:14.
Mark Noumair, wanfala instructor bilong Gilead skul hem mekem evriwan luk forward long tok bilong hem witim disfala title, “Waswe, Bae Iu Gohed for Showimaot Datwan?” “Datwan” hem minim wei wea iumi barava tinghae long gudfala fasin bilong Jehovah. Psalm 103:2 hem sei: “Blessim Jehovah, O soul bilong mi, and no forgetim evri samting wea hem duim.” Olketa Israelite no showimaot thankiu for manna wea helpem olketa for stap laef, bat olketa kolem datwan “rabis bred.” (Numbers 21:5) Nomata bihaen plande year, manna hem still important, bat olketa nating tinghae long datwan. Datfala brata hem sei: “Sapos iu forgetim olketa samting wea Jehovah duim and gogo iu letem assignment bilong iu for kamap olsem samting nating long iu, datwan bae spoelem tingting bilong iu saed long waka wea Jehovah givim long iu.” Psalm 103:4 sei Jehovah hem ‘showimaot loving-kaeness long iu.’ Olketa wea graduate bae feelim loving-kaeness bilong God long olketa niu kongregeson bilong olketa.
Narafala instructor bilong Gilead, Lawrence Bowen, hem storyim disfala subject: “Waswe, Bae Olketa Barava Kasem Iu?” Hem sei olketa member bilong mek-119 class bilong Gilead kasem bigfala training for kamap olketa gudfala missionary. Bat, olketa mas barava stap klos long Jehovah and waka wea hem markem olketa for duim. Revelation 14:1-4, storyim wei wea datfala 144,000 “followim datfala Lamb long evri ples wea hem go long hem.” Evriwan insaed datfala sekson loyal long Jehovah and Son bilong hem nomata olketa kasem test, and olketa kasem goal bilong olketa. Hem sei: “Nomata wanem samting happen, iumi tu loyal long Jehovah and waka wea hem givim long iumi.” Sapos olketa wea graduate duim datwan, bae olketa “barava kasem” blessing bilong Jehovah.—Deuteronomy 28:2.
Mekem Waka Bilong Olketa Kasem Frut
Taem skul gohed, olketa student share insaed field ministry evri weekend. Taem Wallace Liverance, registrar bilong skul story witim olketa long program, hem klia hao olketa student hia win saed long diswan. Olketa preachim gud nius insaed samting olsem 10-fala languis and startim samfala Bible study. Wanfala hasband and waef insaed class startim Bible study witim wanfala Chinese man. Bihaen olketa go bak tufala taem, olketa askem hem hao hem feel from hem start for savve long Jehovah. Hem openem Bible bilong hem and askem tufala for readim John 17:3. Hem sei hem luksavve distaem hem stap long road wea bae lead go long laef.
Then, Anthony Morris, wea hem member bilong Governing Body hem interviewim thrifala brata wea serve long olketa Branch Komiti bilong Côte d’Ivoire, Dominican Republic, and Ecuador. Olketa brata hia talem olketa wea graduate hao olketa long Branch Komiti luk forward for welkamim olketa and bae olketa helpem olketa for getius long assignment bilong olketa.
Next speaker, Leonard Pearson, bilong United States Bethel famili hem story witim thrifala Branch Komiti member from Democratic Republic of the Congo, Papua New Guinea, and Uganda. Olketa brata hia encouragem olketa wea graduate for join insaed long field ministry evribit. Wanfala hasband and waef wea missionary for winim 21 year long Congo, helpem finis 60 pipol for dedicate and baptaes. Distaem tufala conductim 30 Bible study, and 22 student bilong tufala attendim olketa kongregeson meeting. From bigfala spiritual harvest hem stap, distaem hem nambawan taem for waka olsem missionary.
Talemaot Witness Witim Feeling for Hariap
Gerrit Lösch bilong Governing Body nao givim last tok. Theme bilong hem nao “Wei for Story Abaotem God and Givim Witness Abaotem Jesus Long Day Bilong Lord.” Datfala word “witness,” “olketa witness,” and “wei for witness” hem kamap 19-fala taem insaed buk bilong Revelation. So Jesus hem showimaot klia wanem kaen waka nao hem laekem pipol bilong hem for duim. Wanem taem nao bae iumi talemaot witness olsem? Insaed long “day bilong Lord.” (Revelation 1:9, 10) Datfala day hem start long 1914, hem gohed kam kasem taem bilong iumi, and bae gohed long future. Olsem Revelation 14:6, 7 hem talem, olketa angel nao sapotim waka for story abaotem God. Revelation 22:17 showimaot hao responsibility for leadim waka for talemaot witness abaotem Jesus hem bilong datfala remnant bilong olketa anointed Christian. Bat iumi evriwan mas mekius long datfala privilege distaem. Long verse 20, Jesus hem sei: “Mi bae kam kwiktaem.” Brata Lösch encouragem evriwan olsem: “Talemaot long pipol, ‘Kam, tekem wata bilong laef wea free.’ Jesus bae kam kwiktaem. Waswe, iumi redi?”
Fred Rusk, wea duim waka olsem Gilead Skul instructor for 11-fala year, hem finisim program witim wanfala prea for sei thankiu long Jehovah, wea barava muvim heart bilong evriwan wea attend. Datwan hem nambawan wei for finisim wanfala day wea mekem evriwan hapi tumas.
[Piksa long page 13]
INFORMATION ABAOTEM CLASS
Haomas kantri olketa kam from: 10
Haomas kantri olketa bae go long hem: 25
Haomas student: 56
Average age: 32.5
Average year insaed truth: 16.4
Average year insaed full-taem ministry: 12.1
[Piksa long page 15]
Mek-119 Class bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Helgesen, S.; Daugaard, H,; Pierluissi, A.; Joseph, I,; Racanelli, C. (2) Byrge, T.; Butler, D.; Freedlun, J., K,; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O; Doumen, A.(4) Tirion, A.; Connally, L.; Fournier, C,; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.