Mek-123 Gilead Graduation

Olketa wea Skul Long Gilead Mas “Digdig”

LONG Saturday, September 8, 2007, total bilong 6,352 pipol from 41 kantri go long graduation bilong mek-123 class bilong Wastaoa Bible Skul bilong Gilead. Long 10:⁠00 klok long morning, chairman bilong program, Anthony Morris wea hem wanfala member bilong Governing Body, hem welkamim evriwan. Bihaen hem story lelebet hem askem Gary Breaux wanfala member bilong Branch Komiti long America for givim firstfala tok.

Brata Breaux talem olketa student nomata hao nao lukluk bilong olketa, pipol wea duim will bilong Jehovah luk naes tumas long Hem. (Jer. 13:11) Hem encouragem olketa student hia for keepim gud diskaen wei for luk naes. Bihaen diswan, Gerrit Lösch bilong Governing Body talemaot hao hem gud nomoa for laek kasem wanfala reward taem iumi servem Jehovah. (Heb. 11:6) Bat, samting wea shud muvim iumi nao hem love wea no aftarem samting for seleva.

Long next tok, overseer bilong Theocratic Skul Department, William Samuelson hem encouragem olketa student for faithful long nambawan assignment wea olketa garem for story abaotem King wea rul distaem, and tu, for showimaot olketa tinghae long diswan.a Sam Roberson wea hem mek-tu overseer bilong Theocratic Skul Department, encouragem olketa student for tingim gud saed bilong narawan evritaem. Sapos olketa duim olsem, olketa bae fit for “lovem olketa brata.”​—1 Pet. 2:​17.

Bihaen olketa tok hia, brata wea teach long Gilead, Mark Noumair hem interviewim samfala Gilead student wea talemaot olketa experience wea olketa kasem long preaching waka taem skul gohed. Evriwan wea stap long there luksavve hao olketa student hia lovem tumas ministry and laek for helpem nara pipol. Then Kent Fischer bilong Bethel Office long Patterson hem interviewim samfala Branch Komiti member from thrifala difren kantri wea garem olketa missionary. Toktok bilong olketa brata hia mekem olketa long audience, wea staka nao dadi and mami bilong olketa student hia, for luksavve hao olketa niu missionary bae kasem plande help long assignment bilong olketa. Long nextfala part Izak Marais wea waka long Translation Services Department hem interviewim samfala wea missionary for longfala taem, and experience bilong olketa hem showimaot hapi wea olketa student bae kasem.

Main tok long program wea Geoffrey Jackson bilong Governing Body givim hem garem theme “Bihaen Evri Samting wea Iufala Herem​—Wanem Nao Bae Iufala Duim?” Brata Jackson, wea duim missionary waka for klosap 25 year long South Pacific hem storyim lastfala part bilong datfala Sermon long Maunten. Long datfala Sermon, Jesus hem story abaotem tufala man, wanfala hem wise, and narawan hem krangge wea tufala hia buildim tufala haos. Hem talem hao maet tufala haos hia stap long sem ples. Man wea krangge hem build antap long sand, bat man wea wise hem dig go daon go kasem ston bifor hem buildim faondeson bilong hem antap. Taem big wind and rain hem kam, haos bilong man wea build antap long ston hem no foldaon, bat haos antap long sand hem foldaon.​—Matt. 7:​24-​27; Luke 6:​48.

Jesus hem sei datfala krangge man hem minim pipol wea lisin long toktok bilong Jesus bat no followim. Datfala wise man hem olsem pipol wea lisin and followim tu toktok bilong Jesus. Brata Jackson hem talem olketa student hia: “Long missionary waka bilong iu, sapos iu followim wanem iu lanem from study wea iu duim insaed Bible, iu bae olsem datfala wisefala man.” Long end bilong tok hem encouragem olketa student for “digdig” long missionary assignment bilong olketa.

Last samting, olketa student kasem diploma bilong olketa and herem wea nao assignment bilong olketa. And Brata Morris hem talem samfala last advaes. Hem encouragem olketa student for evritaem followim Jesus and depend evritaem long Jehovah for strongim olketa. Then datfala graduation program hem finis nao.

[Footnote]

[Box long page 31]

INFORMATION ABAOTEM CLASS

Haomas kantri olketa kam from: 10

Haomas kantri olketa bae go long hem: 24

Haomas student: 56 

Average age: 33.5

Average year insaed truth: 17.9

Average year insaed full-taem ministry: 13.8

[Piksa long page 32]

Mek-123 Class bilong Wastaoa Bible Skul bilong Gilead

List long daon start long front and go bihaen, and olketa nem start long left saed go long raet saed bilong each laen.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck; Budanov, H.; Braz, C.; Peltz, K.; Siaw, A. (4) Leveton,S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino,P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.