Kwestin From Reader
Waswe, tufala flat ston nomoa stap insaed long ark bilong covenant, or olketa nara samting tu stap insaed?
Long 1026 B.C.E., taem olketa dedicatem temple bilong Solomon, “only samting wea stap insaed long Ark nao hem tufala flat ston wea Moses givim taem Jehovah mekem covenant witim olketa son bilong Israel long Horeb taem olketa kamaot from Egypt.” (2 Chronicles 5:10) Bat, disfala ark bilong covenant no evritaem garem tufala flat ston nomoa insaed.
“Long mek-thri month bihaen olketa son bilong Israel kamaot from land bilong Egypt,” olketa go insaed long wilderness bilong Sinai. (Exodus 19:1, 2) Bihaen datwan, Moses go ap long Maunt Sinai and hem kasem Law wea God raetem long tufala flat ston. Hem sei: “Then mi tan raon and mi kam daon from maunten and mi putim tufala flat ston insaed long ark wea mi wakem, mekem tufala gohed stap insaed, olsem Jehovah komandim mi for duim.” (Deuteronomy 10:5) Disfala ark hia hem container wea Jehovah talem Moses for wakem for putim tufala flat ston bilong Law insaed for lelebet taem, go kasem taem ark bilong covenant hem redi. (Deuteronomy 10:1) Datfala ark bilong covenant hem redi klosap long end bilong 1513 B.C.E.
No longtaem bihaen olketa kamap free from Egypt, olketa Israelite start for komplen abaotem kaikai. So Jehovah provaedem manna for olketa. (Exodus 12:17, 18; 16:1-5) Long datfala taem, Moses talem Aaron: “Tekem wanfala container and putim wanfala omer bilong manna insaed and putim front long Jehovah olsem samting for keepim for olketa genereson bilong iufala.” Bible hem sei: “Olsem Jehovah komandim Moses, Aaron hem putim diswan witim datfala Testimony [ples for keepim sef olketa important samting insaed] olsem samting for keepim.” (Exodus 16:33, 34) Iumi sure hao Aaron putim manna insaed long container long datfala taem, bat hem mas weit go kasem taem Moses wakem datfala Ark bifor hem savve putim datwan witim datfala Testimony.
Olsem iumi savve finis, olketa wakem datfala ark bilong covenant klosap long end bilong 1513 B.C.E. Staka year bihaen, Moses putim stik bilong Aaron insaed long Ark bihaen Korah and olketa narawan bighed againstim Moses. Aposol Paul hem storyim, “datfala ark bilong covenant . . . , wea insaed datwan hem datfala gold container wea manna stap insaed and datfala stik bilong Aaron wea garem flaoa bifor and tufala flat ston bilong covenant.”—Hebrews 9:4.
Datfala manna hem kaikai wea God provaedem long taem olketa Israelite wakabaot long wilderness for 40-fala year. Taem “olketa start for kaikaim samting wea olketa harvestim long datfala graon” wea God promis for givim, hem no gohed for provaedem datwan nao. (Joshua 5:11, 12) Olketa putim stik bilong Aaron insaed ark bilong covenant for givim witness againstim datfala genereson wea bighed. So luk olsem datfala stik stap for full taem olketa wakabaot long wilderness. From datwan, luk olsem, hem fitim for iumi sei olketa aotem stik bilong Aaron and datfala gold container wea manna stap insaed from ark bilong covenant, bihaen Israel go insaed long Promis Land and bifor olketa dedicatem temple bilong Solomon.