Kwestin From Reader
Sapos olketa demon spoelem samwan, wanem nao savve helpem hem?
Word bilong God hem showimaot hao olketa wea demon spoelem olketa, savve kasem help for kamap free from datwan. Prea nao hem barava important for helpem man olsem. (Mark 9:25-29) Bat samwan wea safa from demon spoelem hem maet need for duim moa samting. Olketa samting wea olketa Christian long first century duim showimaot wanem nao maet hem need for duim.
Bifor samfala long Ephesus kamap follower bilong Christ, olketa worshipim olketa demon. Bat, bihaen olketa disaed strong for servem God, “olketa wea duim magic hipimap olketa buk bilong olketa and bonem front long evriwan.” (Acts 19:19) Olketa niu follower long Ephesus showimaot gudfala example for eniwan wea no laekem olketa demon for spoelem olketa, taem olketa bonem olketa buk bilong olketa abaotem divination. Hem barava important tumas for olketa hia distroem olketa samting wea join witim spiritism. Hem nao olketa buk, magasin, movie, information from Internet, music wea join witim spiritism, and tu, olketa smol idol or olketa nara samting wea pipol werem for “protectim” olketa or wea join witim spiritism olsem ginger and green leaf.—Deuteronomy 7:25, 26; 1 Corinthians 10:21.
Samfala year bihaen olketa Christian long Ephesus bonem olketa buk bilong olketa abaotem magic, aposol Paul hem sei: “Iumi insaed wanfala faet . . . [iumi faetem] olketa wicked spirit.” (Ephesians 6:12) Paul encouragem olketa Christian olsem: “Werem full kaleko for faet wea kam from God mekem iufala savve stand strong againstim evri trik bilong Devil.” (Ephesians 6:11) Datfala advaes hem fitim iumi distaem tu. Olketa Christian mas strongim spiritual saed bilong olketa, mekem olketa stand strong againstim olketa wicked spirit. Aposol Paul hem strongim disfala point taem hem sei: “Winim evri samting, karem bigfala shield bilong faith mekem iufala savve stopem olketa arrow bilong fire bilong wicked wan.” (Ephesians 6:16) Wei for studyim Bible hem strongim faith bilong man. (Romans 10:17; Colossians 2:6, 7) Dastawe, wei for studyim Bible evritaem hem helpem iumi for garem faith wea savve protectim iumi againstim olketa wicked spirit.—Psalm 91:4; 1 John 5:5.
Olketa Christian long Ephesus need for duim narafala important samting tu. Paul talem olketa: “Taem iufala gohed for prea strong from heart, gohed for prea evritaem thru long paoa bilong spirit.” (Ephesians 6:18) Tru nao, for olketa demon no spoelem iumi distaem, hem barava important tumas for iumi prea strong long Jehovah for kasem protection. (Proverbs 18:10; Matthew 6:13; 1 John 5:18, 19) Bible hem talem stret: “So, stap anda long God; bat againstim Devil, and hem bae ranawe from iufala.”—James 4:7.
Nomata datwan wea demon spoelem hem prea strong for help, olketa nara tru Christian savve prea tu for man wea barava laek for servem Jehovah and wea trae hard for againstim olketa wicked spirit. Olketa savve askem God for helpem hem for kasem spiritual strong for againstim olketa demon wea laek spoelem hem. From Word bilong God hem sei hao “prea wea wanfala raeteous man talem from heart savve garem bigfala paoa,” olketa prea wea olketa servant bilong God talem bae barava helpem olketa wea safa from demon spoelem olketa, for duim best bilong olketa for “againstim Devil.”—James 5:16.
[Piksa long page 31]
Olketa Christian long Ephesus bonem olketa buk bilong olketa abaotem magic