Followim ‘God wea Barava Holy’

BIBLE showimaot no eniwan hem holy olsem Jehovah God taem hem sei: “Jehovah hem holy, holy, holy.” (Isa. 6:3; Rev. 4:8) Datfala word “holy” long Hebrew and Greek languis hem minim worship wea God hapi long hem, and tu, stretfala wei bilong man. Taem Bible storyim God hem holy, diswan minim evri wei bilong hem barava stret.

From Jehovah hem holy, olketa wea worshipim hem mas holy tu. Datwan minim body bilong olketa mas klin and wei bilong olketa mas stret mekem olketa savve fren gud witim Jehovah. Tru tumas, Bible talem Jehovah laekem pipol bilong hem for olketa mas holy. Long 1 Peter 1:​16 hem sei olsem: “Iufala mas holy bikos mi nao holy.” So waswe, olketa man wea sin savve holy olsem Jehovah? Ia, bat olketa no savve barava holy olsem hem. Sapos iumi fren gud witim Jehovah and worshipim hem nomoa, long tingting bilong God iumi holy.

Bat from wei bilong pipol long world hem no stret, wanem nao savve helpem iumi for holy? Wanem kaen samting nao iumi mas no duim? Waswe, iumi mas changem samfala wei bilong iumi and toktok bilong iumi? Distaem bae iumi storyim wanem nao God laekem olketa Jew for duim taem olketa lusim Babylon and go bak long hom bilong olketa long 537 B.C.E., and wanem nao iumi savve lanem from diswan.

‘Wanfala Road Bae Stap wea Nem Bilong Hem Holy’

Jehovah talem hao pipol bilong hem wea prisoner long Babylon bae kam bak long hom bilong olketa. Hem promis olsem: “Wanfala big road bae stap wea nem bilong hem Holy.” (Isa. 35:8a) Toktok hia showimaot Jehovah mekem wei for olketa Jew go bak long hom bilong olketa, and tu, bae hem protectim olketa.

Jehovah mekem wanfala ‘road wea Holy’ for pipol bilong hem distaem mekem olketa savve kamaot from Bigfala Babylon, wea hem nao evri giaman religion. Long 1919, Hem mekem olketa anointed Christian lusim giaman religion and gogo olketa lusim evri laea teaching. Pipol bilong Jehovah distaem worshipim hem long stretfala wei and diswan mekem olketa fren gud witim hem and olketa brata and sista long kongregeson.

Olketa anointed Christian witim “datfala big sekson” disaed for wakabaot followim datfala road wea holy and olketa askem nara pipol for wakabaot witim olketa tu. (Luke 12:32; Rev. 7:9; John 10:16) Evriwan wea laek “givim body bilong [olketa] olsem sakrifaes wea laef, holy, and wea God hapi long hem,” olketa savve wakabaot long datfala ‘road wea Holy.’​—Rom. 12:​1.

“Man wea Wei Bilong Hem No Stret No Savve Wakabaot Long Road Hia”

Long 537 B.C.E., olketa Jew wea go bak long hom bilong olketa mas duim wanfala samting. Isaiah 35:8b story olsem abaotem olketa wea fit for wakabaot long datfala ‘road wea Holy.’ Hem sei: “Man wea wei bilong hem no stret no savve wakabaot long road hia. And man wea krangge tu no savve followim datwan. Man wea wei bilong hem stret, hem nomoa savve wakabaot long road hia.” From olketa Jew kam bak long Jerusalem for startim trufala worship moa, olketa wea tingim olketa seleva nomoa, no tinghae long olketa holy samting, and worshipim olketa giaman god, olketa no savve go bak long Jerusalem. Pipol wea go bak long Jerusalem mas followim olketa wei bilong Jehovah. Pipol distaem wea laekem God for hapi long olketa mas olsem tu. Olketa mas followim ‘God wea barava holy.’ (2 Cor. 7:1) So wanem kaen samting nao iumi mas no duim?

Aposol Paul talem olsem: “Olketa nogud samting wea man laek for duim hem showaot, and hem nao wei for durong, no klin, olobaot.” (Gal. 5:​19) For durong hem minim tufala wea no marit iusim private part for duim evri difren kaen sex. For olobaot hem minim man “barava nating hol bak for duim sex olobaot; barava aftarem samting wea showimaot man nating respectim eni standard saed long fasin; and for no shame.” From Jehovah hem barava holy, wei for durong and for olobaot hem barava no stret long tingting bilong hem. Dastawe olketa wea duim kaen samting olsem no savve kamap wanfala brata or sista long Christian kongregeson, or sapos olketa insaed kongregeson finis and duim kaen samting olsem, bae olketa disfellowship. Sem samting tu bae kasem olketa wea duim samting wea barava no klin, wea hem nao “enikaen samting wea no klin wea man laek duim olowe.”​—Eph. 4:​19.

Datfala toktok “samting wea no klin” hem savve minim staka difren kaen sin wea man duim. Greek word for diswan minim eni samting wea barava no klin, olsem toktok bilong man, wei bilong hem, and for join insaed samting bilong nara religion. Hem minim tu olketa samting wea man duim wea no klin wea judicial komiti maet no need for lukluk long hem.a Bat waswe, pipol wea duim olketa samting wea no klin olketa followim God wea barava holy?

Tingim sapos wanfala Christian start for lukluk long olketa rabis piksa. Gogo hem start for garem feeling for laek duim sex and hem no strong olsem bifor for followim stretfala wei bilong Jehovah. Maet hem no duim samting wea barava no klin, bat hem no tingim nao ‘samting wea klin, wea pipol tok gud abaotem, wea gud, and wea fit for kasem praise.’ (Phil. 4:8) Hem no stret for lukluk long olketa rabis piksa and diswan barava spoelem wei wea man fren witim God. Iumi mas no storyim tu eni samting wea no klin.​—Eph. 5:3.

Tingim narafala samting. Maet wanfala Christian hem duim nanali (holholem private part bilong hem and plei witim for mekem hem feel gud). Maet hem duim diswan taem hem lukluk long olketa rabis piksa. Nomata Bible hem no talem datfala word “nanali,” iumi savve taem man duim diswan hem barava spoelem tingting and feeling bilong hem! Sapos man gohed for duim kaen samting olsem, hem spoelem tu wei wea hem fren witim Jehovah, and long tingting bilong Jehovah man hia no holy nao! Iumi mas barava followim toktok bilong aposol Paul for “stap klia long evri samting wea savve mekem body and tingting bilong iumi for no klin” and for “killim dae olketa feeling long body for laek durong, duim samting wea no klin, wei for laekem tumas sex, wei for laekem nogud samting, and wei for kavet.”​—2 Cor. 7:1; Col. 3:5.

World bilong Satan letem nomoa for pipol duim enikaen samting wea no stret, and hem switim olketa for duim olketa samting hia tu. Maet hem no isi for olketa tru Christian stap klia long diswan. Nomata olsem, olketa mas no “followim pipol bilong olketa nation wea followim nogud tingting bilong olketa seleva.” (Eph. 4:​17) Sapos iumi duim samting wea no stret taem iumi stap seleva or taem pipol lukim iumi, Jehovah bae no letem iumi wakabaot long datfala ‘road wea Holy.’

“No Eni Lion Bae Stap Long There”

Sapos iumi laekem Jehovah God wea holy for hapi long iumi, maet iumi need for barava changem samfala wei bilong iumi and toktok bilong iumi. Isaiah 35:9 hem talem: “No eni lion bae stap long there and olketa difren kaen wild animal bae no stap tu” long datfala ‘road wea Holy.’ Pipol wea tok raf olowe and wei bilong olketa hem raf tu, olketa olsem wild animal. Hard tumas for God letem olketa for stap insaed niu world bilong hem wea gudfala pipol bae stap long hem. (Isa. 11:6; 65:25) Dastawe pipol wea laekem God for hapi long olketa mas lusim nogud wei wea olsem wild animal and followim wei bilong God for holy.

Bible talem iumi olsem: “Iufala mas lusim evri wei for feel nogud long man and no kros long eniwan and no singaot nogud and no tok spoelem nara man, and iufala mas lusim evri nogud wei tu.” (Eph. 4:​31) Long Colossians 3:8 hem talem diswan: “Barava lusim evri rabis wei. Iufala mas no kros long eniwan, no tingting for spoelem man, no tok spoelem nara man, and no talem eni rabis toktok.” Long tufala scripture hia wea talem disfala toktok “tok spoelem nara man,” hem minim toktok for daonem man, mekem man feel nogud, and barava spoelem gudfala nem bilong hem.

Distaem hem wei bilong staka pipol for talem olketa barava rabis toktok for spoelem man, nomata long famili tu. Olketa wea marit savve tok nogud long waef or hasband and long olketa pikinini bilong olketa tu wea mekem olketa feel nogud tumas. Hem no fitim olketa Christian famili for talem kaen toktok olsem.​—1 Cor. 5:​11.

Man Kasem Gud Samting Taem Hem Followim ‘God wea Barava Holy’!

Hem wanfala spesol samting for worshipim Jehovah God wea holy! (Josh. 24:19) Iumi tinghae tumas long spiritual paradaes wea Jehovah tekem iumi kam long hem. Nambawan samting for iumi duim long laef nao hem for duim samting wea Jehovah hapi long hem.

Klosap nao Paradaes wea God promisim bae hem kamap long earth. (Isa. 35:​1, 2, 5-7) Olketa wea barava laek stap long there and wea followim wei bilong God for holy, olketa nao bae stap long there. (Isa. 65:17, 21) Dastawe iumi mas gohed fren gud witim God and worshipim hem nomoa.

[Footnote]

[Piksa long page 26]

Wanem nao olketa Jew mas duim sapos olketa laek wakabaot long ‘road wea Holy’?

[Piksa long page 27]

Sapos man lukluk long rabis piksa, datwan spoelem wei wea hem fren witim Jehovah

[Piksa long page 28]

‘Iufala mas lusim evri wei for singaot nogud and for tok spoelem nara man’