“Iu Mas Lovem God Bilong Iu Jehovah”

1. Wanem nao mekem love bilong Jesus and Dadi bilong hem kamap strong?

JESUS storyim wei wea hem and Dadi bilong hem fren gud tugeta taem hem sei: “Mi lovem Dadi long heven.” And Jesus sei tu: “Dadi hem lovem Son.” (John 5:20; 14:31) Tufala waka tugeta for staka billion year bifor Jesus kam long earth. (Prov. 8:30) Taem tufala waka tugeta, Jesus lanem staka samting abaotem olketa wei bilong Dadi bilong hem. Wei wea tufala stap tugeta hem mekem love bilong tufala kamap strong.

2. (a) Taem iu lovem samwan, wanem kaen feeling nao iu garem? (b) Olketa wanem kwestin nao bae iumi storyim?

² Taem iu lovem samwan, iu garem feeling for hem wea barava strong. David sei: “Mi lovem iu Jehovah. Iu nao strong bilong mi.” (Ps. 18:1) Iumi tu shud feel olsem abaotem God. Sapos iumi obeyim Jehovah, hem bae showimaot hem lovem iumi. (Readim Deuteronomy 7:12, 13.) Bat iumi no savve lukim God, so hao nao iumi savve lovem hem? Wanem nao hem minim for lovem Jehovah? Why nao iumi shud lovem hem? Hao nao iumi savve showimaot iumi lovem God?

IUMI SAVVE LOVEM GOD

3, 4. Why nao iumi fit for lovem Jehovah?

³ Iumi no savve lukim God bikos “God hem wanfala Spirit.” (John 4:24) Nomata olsem, iumi savve lovem Hem. Bible sei iumi mas lovem Jehovah. Olsem example, Moses sei olsem long olketa Israelite: “Iufala mas lovem God bilong iufala Jehovah long full heart bilong iufala, long full soul bilong iufala, and long full strong bilong iufala.”​—Deut. 6:5.

⁴ Why nao iumi fit for lovem God? Taem God wakem iumi hem mekem iumi garem need for worshipim hem, and hem mekem iumi fit for showimaot love tu. Taem iumi gohed lane abaotem Jehovah, love bilong iumi for hem kamap strong, and datwan mekem iumi hapi. Diswan nao samting wea Jesus story abaotem taem hem sei: “Olketa wea luksavve olketa needim God bae hapi, bikos Kingdom bilong God hem bilong olketa.” (Matt. 5:3) A. C. Morrison wea raetem disfala buk Man Does Not Stand Alone sei from bifor kam, pipol bilong evri kantri lukaotem God and laek for biliv God hem stap. Olsem disfala man, staka pipol tu luksavve olketa man garem need for worshipim God.

5. Wanem nao mekem iumi savve hem no hard for savve long God?

⁵ Waswe, hem hard for olketa man savve long God? Nomoa, hem no hard. God laekem iumi for savve long hem and fren witim hem. Aposol Paul storyim datwan long wanfala grup long Athens bifor. Staka long olketa hia savve worshipim datfala woman god wea nem bilong hem Athena long wanfala temple. Bat Paul sei olketa fit for savve long tru God “wea wakem world and evri samting insaed.” Hem sei God no stap insaed olketa temple. Pipol wea laek for savve long God fit for faendem hem nomata wea nao olketa stap long earth. Then hem sei: “Hem no hard nomoa for savve long [God].” (Acts 17:24-27) Tru nao, pipol fit for savve long God. Winim seven and haf million Witness bilong Jehovah savve long hem and barava lovem hem.

WANEM HEM MINIM FOR LOVEM GOD

6. Wanem ‘law nao important winim olketa nara law’?

⁶ Hao nao iumi shud lovem Jehovah? Wanfala Pharisee askem Jesus olsem: “Teacher, wanem law nao hem important winim olketa nara law insaed datfala Law wea God givim long Moses?” Jesus sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem.”​—Matt. 22:34-38.

7. Wanem nao hem minim for lovem God long (a) “full heart”? (b) “full soul”? (c) “full mind”?

⁷ Wanem nao Jesus minim taem hem sei iumi mas lovem God long “full heart,” “full soul,” and “full mind”? Datfala toktok “full heart” hem minim evri feeling bilong iumi and evri samting wea iumi laekem. “Full soul” hem minim wanem kaen man nao iumi and tu evri samting wea iumi duim long laef. “Full mind” hem minim hao iumi ting and wanem iumi ting abaotem. So Jesus showimaot iumi mas lovem Jehovah long full heart and witim evri samting wea iumi garem.

8. Hao nao iumi showimaot iumi lovem God?

⁸ Iumi showimaot iumi lovem God long full heart, soul, and mind taem iumi evritaem studyim Bible, duim evri samting wea hem laekem iumi for duim, and strong for preach abaotem Kingdom long nara pipol. (Matt. 24:14; Rome 12:1, 2) Taem iumi duim olketa samting hia, datwan bae strongim wei wea iumi fren witim Jehovah. (Jas. 4:8) Iumi no fit for storyim evri reason why hem fitim for iumi lovem God, bat bae iumi storyim samfala long olketa.

WHY IUMI SHUD LOVEM JEHOVAH

9. Why nao iu lovem Jehovah?

⁹ Jehovah nao wakem iumi and givim evri samting wea iumi needim. Paul sei: “Hem nao mekem iumi laef and savve wakabaot and duim samting.” (Acts 17:28) Jehovah wakem naesfala earth for iumi stap long hem. (Ps. 115:16) And tu, hem givim kaikai and olketa nara samting wea iumi needim for stap laef. Dastawe Paul talem pipol long Lystra for no worshipim idol bat olketa shud worshipim Jehovah, datfala “God wea laef.” Paul sei: “[God] duim olketa gud samting for showimaot gudfala wei bilong hem long iufala. Hem givim rain for iufala and mekem garden bilong iufala barava grow gud. Hem givim staka kaikai and mekem iufala hapi.” (Acts 14:15-17) From Jehovah lovem iumi hem givim evri samting wea iumi needim. Dastawe iumi shud lovem Jehovah!​—Eccl. 12:1.

10. Wanem nao tingting bilong iu abaotem sakrifaes bilong Jesus?

¹⁰ God bae aotem sin and dae wea iumi kasem from Adam. (Rome 5:12) Bible sei: “Christ hem dae for iumi taem iumi sin yet, wea diswan showimaot God hem lovem iumi.” (Rome 5:8) Sapos iumi barava repent and showimaot faith long sakrifaes bilong Jesus, God bae forgivim olketa sin bilong iumi. Iumi barava thankiu long Jehovah bikos hem lovem iumi tumas dastawe hem sendem Son bilong hem for dae for iumi.​—John 3:16.

11, 12. Olketa wanem hope nao Jehovah givim long iumi?

¹¹ Jehovah givim iumi hope for laef olowe. (Rome 15:13) Datfala hope helpem iumi for no givap taem iumi kasem test. Olketa anointed Christian wea faithful garem hope for laef olowe long heven. (Rev. 2:10) Olketa nara Christian wea faithful garem hope for laef olowe long Paradaes long earth. (Luke 23:43) Wanem nao tingting bilong iumi abaotem hope wea iumi garem? Hem mekem iumi hapi, garem peace, and lovem God wea givim iumi “evri gud and perfect present.”—Jas. 1:17.

¹² Jehovah givim iumi resurrection hope. (Acts 24:15) Iumi barava sorre taem samwan wea iumi lovem hem dae. Bat iumi no sorre tumas olsem “olketa wea no garem hope,” bikos Jehovah promis bae hem mekem olketa wea dae for laef bak. (1 Thess. 4:13) Jehovah laekem tumas for resurrectim staka million pipol wea dae finis, especially olketa wea faithful long hem. (Job 14:15) Tingim hapi wea olketa dadi and mami bae garem taem olketa lukim moa pikinini bilong olketa wea dae, and olketa gud fren lukim each other moa! Iumi barava lovem Dadi bilong iumi long heven bikos hem givim iumi disfala nambawan hope!

13. Wanem nao showimaot God barava tingim iumi?

¹³ Jehovah barava tingim iumi. (Readim Psalm 34:6, 18, 19; 1 Peter 5:6, 7.) From iumi savve Jehovah hem redi evritaem for helpem olketa wea faithful long hem, datwan mekem iumi hapi and stap gud. (Ps. 79:13) And tingim olketa gud samting wea God bae duim for iumi long future. Jesus hem King long Kingdom bilong God and hem bae finisim pipol wea raf, wea spoelem narawan, and wea duim nogud samting. Then God bae blessim olketa wea obeyim hem, and givim evri nara samting wea olketa needim for enjoyim laef. (Ps. 72:7, 12-14, 16) Taem iumi ting raonem olketa promis hia, datwan mekem iumi for lovem God long full heart, soul, strong, and mind bilong iumi.—Luke 10:27.

14. Wanem nambawan privilege nao God givim long iumi?

¹⁴ Jehovah givim iumi nambawan privilege for kamap Witness bilong hem. (Isa. 43:10-12) Iumi lovem God bikos hem givim iumi chance for sapotim Kingdom bilong hem and for talemaot hope wea iumi garem long evriwan wea safa. Iumi garem faith and no fraet for talemaot gud nius long pipol bikos message wea iumi talemaot hem kam from Bible, and wanem God promisim hem evritaem kamap tru. (Readim Joshua 21:45; 23:14.) Iumi garem staka reason for lovem Jehovah. Bat hao nao iumi savve showimaot iumi lovem hem?

HAO IUMI SAVVE SHOWIMAOT IUMI LOVEM GOD

15. Hao nao wei for studyim Bible and duim wanem iumi lanem savve helpem iumi?

¹⁵ Studyim Bible evritaem and duim wanem iumi lanem. Taem iumi duim olsem, datwan showimaot iumi lovem Jehovah and barava laek for followim wanem Bible talem. (Ps. 119:105) Taem iumi kasem hard taem, iumi savve kasem comfort from olketa promis olsem: “God bilong mi, iu bae no lusim man wea heart bilong hem barava sorre and pisis.” “Jehovah, love wea iu garem for mi nao hem gohed sapotim mi. Taem olketa samting wea mi warim hem staka tumas, iu comfortim mi and mekem mi feel gud.” (Ps. 51:17; 94:18, 19) Jehovah and Jesus feel sorre long evriwan wea safa. (Isa. 49:13; Matt. 15:32) Taem iumi studyim Bible iumi lanem hao Jehovah barava lovem iumi, and datwan strongim love wea iumi garem for hem.

16. Hao nao wei for prea evritaem savve strongim love wea iumi garem for God?

¹⁶ Prea long God evritaem. Taem iumi prea long God and luksavve hem ansarem olketa prea bilong iumi, datwan strongim love wea iumi garem for hem. (Ps. 65:2) Olsem example, maet iumi luksavve hem no letem iumi for kasem hard samting wea iumi no fit for winim. (1 Cor. 10:13) Sapos iumi warim eni samting and iumi prea long Jehovah for helpem iumi, iumi savve kasem “peace bilong God.” Jehovah nomoa savve givim iumi disfala peace. (Phil. 4:6, 7) Samfala taem maet iumi prea kwaet olsem Nehemiah duim, and bihaen iumi luksavve Jehovah ansarem prea bilong iumi. (Neh. 2:1-6) Taem iumi gohed prea and lukim wei wea Jehovah ansarem olketa prea bilong iumi, datwan strongim love wea iumi garem for hem, and hem mekem iumi sure Jehovah bae helpem iumi for no givap taem iumi kasem test.—Rome 12:12.

17. Sapos iumi lovem God, hao nao bae iumi ting long wei for go long olketa meeting?

¹⁷ Evritaem attendim olketa meeting, assembly, and convention. (Heb. 10:24, 25) Olketa Israelite hipap for lisin and lane abaotem Jehovah mekem olketa savve worshipim hem and obeyim olketa Law bilong hem. (Deut. 31:12) Sapos iumi barava lovem Jehovah, bae iumi evritaem go long olketa meeting. (Readim 1 John 5:3.) Iumi shud traem best for no misstim eni meeting. Iumi mas no lusim datfala love for Jehovah wea iumi garem taem iumi firstaem lane abaotem hem.—Rev. 2:4.

18. From iumi lovem God, wanem nao iumi laek for duim?

¹⁸ Gohed strong for storyim “gud nius” long nara pipol. (Gal. 2:5) From iumi lovem God, iumi laek for story abaotem Kingdom bilong God long nara pipol. Long Armageddon, Jesus, wea hem King wea God markem, bae mekhae long rul bilong Jehovah. (Ps. 45:4; Rev. 16:14, 16) Iumi barava hapi for helpem pipol lane abaotem love wea God garem and niu world wea hem promisim!—Matt. 28:19, 20.

19. Why nao iumi shud tinghae long olketa elder long kongregeson?

¹⁹ Showimaot iu tinghae long olketa elder. (Acts 20:28) Jehovah evritaem laekem iumi for kasem gud samting, dastawe hem givim iumi olketa elder long kongregeson. Olketa elder olketa “olsem wanfala ples for haed from wind and wanfala ples for haed from bigfala rain, olsem river long drae ples, olsem shadow bilong bigfala ston long hotfala ples.” (Isa. 32:1, 2) Iumi hapi taem iumi faendem ples for haed from strong wind or bigfala rain, or iumi faendem shade long taem hem hot sun! Long sem wei, olketa elder savve helpem and strongim iumi for gohed worshipim Jehovah nomata iumi kasem olketa hard samting long laef. Why nao iumi obeyim olketa elder? Bikos iumi tinghae long olketa man hia wea “olsem present,” and iumi lovem Jehovah and Christ, wea hem Hed bilong kongregeson.—Eph. 4:8; 5:23; Heb. 13:17.

GOHED STRONGIM LOVE WEA IU GAREM FOR GOD

20. Sapos iu lovem God, wanem nao bae iu duim?

²⁰ Jehovah givim iumi datfala “perfect law,” wea talem iumi evri samting wea hem laekem iumi for duim. (Readim James 1:22-25.) Sapos iu laek for barava fren gud witim Jehovah, hem no inaf for lisin nomoa long hem. (Ps. 19:7-11) Iu mas duim wanem iu lanem. Olsem example, from iu lovem God, bae iu traem best for story abaotem hem long nara pipol and givim koment long olketa meeting.

21. Olketa prea bilong iumi wea kam from heart olketa olsem wanem?

²¹ Iumi prea long Jehovah evritaem bikos iumi lovem hem. Long Israel, olketa priest savve bonem incense for Jehovah evriday. King David sei prea bilong hem olsem incense. Hem sei: “Plis ting long prea bilong mi olsem incense front long iu [Jehovah], and wei wea mi liftimap hand bilong mi olsem grain sakrifaes long evening.” (Ps. 141:2; Ex. 30:7, 8) Jehovah herem olketa prea wea David talem. Sapos iumi hambol taem iumi prea, prea from heart, and talem thankiu long Jehovah, then olketa prea bilong iumi bae olsem incense wea mekem Jehovah hapi.—Rev. 5:8.

22. Wanem nao bae iumi lanem long next study?

²² Jesus sei iumi mas lovem God, and iumi mas lovem olketa narawan tu. (Matt. 22:37-39) Taem iumi lovem Jehovah and tinghae long olketa Bible principle, datwan bae helpem iumi for lovem olketa narawan. Long next study bae iumi lanem wanem Jesus minim taem hem sei for lovem olketa narawan.