Olketa Mekem Laef Bilong Olketa Kamap Moabeta— Waswe, Iu Savve Duim Sem Samting?
WANFALA brata long Canada wea nem bilong hem Marc, hem waka for wanfala bisnis wea wakem olketa spesol robot wea olketa sekson wea go long space olketa iusim. Hem duim part-taem waka and hem wanfala regular pioneer. Then wanfala boss laek givim long Marc full-taem waka wea tekem bigfala pei. Wanem nao Marc duim?
Amy, wanfala sista long Philippines, hem regular pioneer taem hem skul yet. Bihaen hem graduate, hem garem chance for duim full-taem waka wea bae mekem hem barava busy, bat bae hem tekem bigfala pei. Wanem nao Amy disaed for duim?
Disison bilong Marc hem difren from disison bilong Amy, and samting wea kamap from samting each wan chusim hem showimaot hao datfala kaonsel wea aposol Paul givim long olketa Christian long Corinth hem barava wise. Hem sei: “So . . . olketa wea iusim olketa samting bilong world shud no iusim evribit.”—1 Cor. 7:29-31.
Iusim World, Bat No Evribit
Bifor iumi storyim samting wea happen long Marc and Amy, bae iumi storyim mining bilong datfala word “world” (wea hem nao koʹsmos long Greek languis) wea Paul iusim long leta bilong hem for olketa long Corinth. Long datfala leta wea Paul raetem, koʹsmos hem minim world wea iumi stap insaed, wea hem nao olketa man evriwea long world. Insaed diswan hem olketa samting wea part long laef evriday, olsem haos, kaikai, and kaleko.a For kasem olketa need bilong iumi, klosap evriwan long iumi mas waka for selen. Tru nao, iumi mas mekius long disfala world for mekem iumi followim komand from Bible for provaed for iumiseleva and famili bilong iumi. (1 Tim. 5:8) Bat long semtaem, iumi luksavve hao ‘world hem gogo for finis.’ (1 John 2:17) Dastawe, iumi iusim olketa samting bilong disfala world bat no iusim “evribit.”—1 Cor. 7:31.
Datfala kaonsel from Bible for no iusim world evribit hem muvim plande brata and sista for lukluk gud long wanem nao olketa duim. Olketa lusim full-taem waka and tekem part-taem waka, and mekem laef bilong olketa moa simpol. No longtaem bihaen, olketa luksavve hao really, olketa mekem laef bilong olketa kamap moabeta from olketa garem moa taem witim famili, and moa taem for servem Jehovah. And tu, wei for garem simpol laef hem mekem olketa for no depend long world bat for depend long bigfala wei moa long Jehovah. Waswe, iu savve mekem laef bilong iu moa simpol mekem iu garem moa taem for duim olketa samting wea mekem Jehovah hapi?—Matt. 6:19-24, 33.
“Mifala Fren Gud Witim Jehovah Winim Enitaem Bifor”
Marc, wea iumi storyim bifor, hem followim datfala advaes long Bible for no iusim world evribit. Hem no acceptim datfala full-taem waka wea garem bigfala pei. Tu-thri day bihaen, boss bilong Marc offerim hem pei wea moa big for trae switim hem for acceptim datfala niu waka. Marc hem sei: “Datwan hem wanfala test, bat mi no acceptim.” Hem explainim why hem no acceptim: “Mi and waef bilong mi, Paula, laek for duim best bilong mifala for iusim laef bilong mifala for servem Jehovah. Dastawe mifala disaed for mekem laef bilong mifala moa simpol. Mifala prea long Jehovah for wisdom for duim diswan and mifala markem wanfala date for start for duim moa samting for servem Jehovah.”
Paula hem sei: “Mi duim secretary waka thrifala day evri week long wanfala hospital and kasem gud pei. Mi duim regular pioneer tu. Bat, olsem Marc, mi laek for servem Jehovah long eni ples wea needim samfala moa pablisa for talemaot Kingdom. Bat taem mi talem boss hao mi laek for finis from waka, hem sei mi fit for kasem wanfala position wea moa hae wea olketa lukaotem samwan for duim. No eni nara secretary wea waka long datfala hospital tekem bigfala pei winim datwan, nomata olsem, mi gohed long samting wea mi disaedem finis. Taem mi talem boss reason why mi bae no tekem datfala waka, hem praisem mi for faith bilong mi.”
No longtaem bihaen, Marc and Paula kasem assignment for spesol pioneer long wanfala smol kongregeson long wanfala farawe ples long Canada. Hao nao datfala assignment? Marc hem sei: “Bihaen mi lusim datfala gud waka wea mi duim for staka year, mi wari lelebet, bat Jehovah blessim ministry bilong mifala. Mifala kasem bigfala hapi from wei for helpem olketa narawan for servem God. Full-taem service hem helpem marit bilong mifala tu. Mitufala evritaem storyim olketa samting wea barava important—olketa samting wea join witim service bilong mifala for Jehovah. Mifala fren gud witim Jehovah winim enitaem bifor.” (Acts 20:35) Paula hem sei: “Taem iu lusim waka bilong iu and gudfala living wea iu garem, iu mas barava trustim Jehovah. Mifala duim datwan, and Jehovah blessim mifala. Olketa brata and sista long niu kongregeson bilong mifala olketa kaen tumas and mekem mifala feel olsem olketa lovem and needim mifala. Distaem mi iusim strong wea mi iusim long waka for selen for helpem pipol savve long God. Mi hapi tumas for serve long disfala assignment.”
‘Garem Plande Selen Bat No Hapi’
Amy, wea iumi storyim bifor, hem disaed for duim difren samting. Hem acceptim datfala big waka bihaen hem graduate. Amy hem sei: “Long firstfala year, mi gohed busy long ministry bat isisi waka nao kamap main important samting long laef bilong mi, no service bilong mi for Jehovah. Mi kasem samfala chance for garem position wea moa hae, so mi start for aftarem datwan. Taem mi garem moa responsibility saed long waka, mi no garem taem nao for duim ministry. Gogo, mi no go preaching nao.”
Taem hem ting go bak long datfala taem, Amy hem sei: “Mi kasem bigfala selen. Mi travel go long staka difren ples and mi enjoyim wei wea pipol respectim mi from mi garem hae position. Bat mi no hapi. Nomata mi garem staka selen, mi garem plande problem tu. Mi no minim why nao olsem. Then gogo mi luksavve hao wei wea mi aftarem waka long disfala world klosap mekem mi ‘lusim biliv’ bilong mi. From datwan, mi ‘kasem staka trabol’ wea hem nao Word bilong God talem.”—1 Tim. 6:10.
Wanem nao Amy hem duim? Hem sei: “Mi askem olketa elder for helpem mi fren bak witim God and mi start for attendim olketa meeting. Long taem bilong wanfala song, mi start for krae. Mi tingim wei wea mi barava hapi long faevfala year wea mi pioneer and duim preaching waka, nomata mi no garem staka material samting. Mi savve mi mas finis for weistim taem for aftarem selen and mas putim Kingdom firstaem. Mi tekem wanfala difren waka long sem company wea pei bilong hem haf long wanem mi tekem bifor, and mi start for tekpart moa long preaching waka.” Amy hem hapi and sei: “Mi pioneer for tu-thri year, and datwan barava mekem mi hapi. Distaem mi barava satisfae and datwan nao samting wea mi nating garem taem mi iusim full taem bilong mi for waka for world.”
Waswe, iu savve changem samfala samting and mekem laef bilong iu moa simpol? Sapos iu iusim datfala taem for busy long Kingdom waka, iu tu bae mekem laef bilong iu kamap moabeta.—Prov. 10:22.
[Footnote]
a Lukim Insight on the Scriptures, Volume 2, page 1207-8.
[Blurb long page 19]
Waswe, iu savve changem samfala samting and mekem laef bilong iu moa simpol?
[Box/Piksa long page 19]
“Mi Barava Enjoyim Datwan!”
David, wanfala Christian elder long United States, hem laekem tumas for duim full-taem service witim waef and olketa pikinini bilong hem. Hem finis from full-taem waka and kasem part-taem waka long sem company and hem kamap wanfala regular pioneer. Waswe, diswan mekem laef bilong hem kamap moabeta? Tu-thri month bihaen, David raet go long wanfala fren bilong hem and sei: “No eni samting mekem mi satisfae winim wei for servem Jehovah full taem witim famili. Mi tingse hem bae tekem mi longtaem lelebet for getius long pioneer waka, bat kwiktaem nomoa mi barava enjoyim datwan! Hem barava strongim mi.”
[Piksa long page 18]
Marc and Paula long preaching waka