No Followim “Spirit Bilong World”
“Iumi no kasem spirit bilong world, bat iumi kasem spirit wea kam from God.” —1 COR. 2:12.
1, 2. (a) Why nao gavman long England mekem law for evri mine mas garem tufala smol bird? (b) Wanem nogud samting nao olketa Christian feisim distaem?
LONG 1911, gavman long England mekem wanfala law for protectim olketa man wea waka long coal mine. Evri mine mas garem tufala smol bird. For wanem? Sapos fire hem start insaed long coal mine, olketa man wea kam for sevem olketa wakman bae karem kam tufala smol bird hia. Sapos eni poison gas hem stap insaed long mine, tufala smol bird hia bae start for seksek and foldaon. Datwan bae mekem olketa man hia luksavve danger hem stap. Sapos olketa no tekem tufala smol bird hia insaed long mine, olketa man hia witim olketa wakman, olketa savve dae from olketa hard for luksavve sapos poison gas hem stap.
2 Iumi olketa Christian feisim sem samting olsem olketa wakman insaed long mine hia. Wanem nao datwan? Taem Jesus hem talem olketa disaepol bilong hem for preachim gud nius long full world, hem savve finis Satan and world bilong hem bae laek spoelem olketa. (Matt. 10:16; 1 John 5:19) From Jesus barava tingim olketa disaepol bilong hem, hem prea olsem long Dadi bilong hem: “Mi no askem iu for tekem olketa aot from disfala world, bat mi askem iu for lukaftarem olketa gud, mekem Satan no spoelem olketa.”—John 17:15.
3, 4. Wanem nao Jesus talem long olketa disaepol bilong hem? Why nao toktok bilong hem barava fitim iumi tu?
3 Jesus talem olketa disaepol hao olketa mas luksavve long nogud samting wea savve mekem olketa dae. Toktok bilong hem barava fitim iumi tu from iumi stap long taem wea world hem gogo for finis. Hem talem olketa disaepol: “Gohed for lukaot . . . mekem iufala savve standap strong taem evri samting hia hem happen, and mekem iufala savve standap front long Son bilong man.” (Luke 21:34-36) Bat Jesus talem tu hao Dadi bilong hem bae givim kam holy spirit long olketa. Disfala paoa bae helpem olketa for tingim moa wanem olketa lanem finis, and for gohed lukaot and no fraet.—John 14:26.
4 Bat waswe long iumi distaem, God savve givim disfala paoa for helpem iumi tu? Sapos olsem, wanem nao iumi mas duim for kasem datwan? Wanem nao spirit bilong world, and wanem nao hem savve mekem man duim? Wanem nao bae helpem iumi for no followim spirit bilong world?—Readim 1 Corinthians 2:12.
Waswe, Holy Spirit Nao Leadim Iumi or Spirit Bilong World?
5, 6. Holy spirit savve helpem iumi long olketa wanem wei? Bat wanem nao iumi mas duim for kasem datfala paoa?
5 God savve givim holy spirit long iumi tu distaem. Datfala paoa savve helpem iumi for duim samting wea stret and for mekem iumi strong for duim waka bilong God. (Rom. 12:11; Phil. 4:13) Holy spirit savve mekem man garem love, for kaen long narawan, and for duim gudfala samting. (Gal. 5:22, 23) Bat Jehovah God no savve givim holy spirit bilong hem long pipol wea no laek kasem datfala spirit.
6 So hem fitim for iumi askem kwestin olsem: ‘Wanem nao mi savve duim for kasem holy spirit?’ Bible hem storyim staka samting wea iumi savve duim. First samting nao, iumi mas askem God for givim kam holy spirit long iumi. (Readim Luke 11:13.) Nara samting moa, iumi mas studyim Bible and followim wanem iumi readim. (2 Tim. 3:16) Hem tru, no evriwan wea readim Bible nomoa savve kasem holy spirit bilong God. Bat taem wanfala Christian hem studyim Bible, hem savve minim tingting bilong God wea stap insaed. Iumi mas luksavve tu Jehovah hem markem Jesus for kam for Hem and hem nao man wea God iusim for givim kam holy spirit bilong hem. (Col. 2:6) Dastawe iumi mas followim wei bilong Jesus and olketa toktok bilong hem. (1 Pet. 2:21) Sapos olsem, iumi bae kasem holy spirit.
7. Spirit bilong world savve mekem man duim olketa wanem samting?
7 Bat spirit bilong world savve mekem pipol followim olketa wei bilong Satan. (Readim Ephesians 2:1-3.) Hem savve mekem man duim staka samting. Olsem iumi lukim distaem, spirit bilong world savve mekem man les for followim olketa mark bilong God. Hem mekem man laek duim nomoa “samting wea body laekem and samting wea eye laekem and for show-off witim samting wea man garem.” (1 John 2:16) Hem savve mekem man duim olketa nogud samting, olsem for durong, worshipim idol, duim samting wea join witim devildevil, jealous, kros, and for drunk. (Gal. 5:19-21) And hem mekem man talem olketa toktok wea againstim samting wea holy. (2 Tim. 2:14-18) So sapos wanfala man letem spirit bilong world for leadim hem, bae hem followim olketa wei bilong Satan nao.
8. Evri man mas disaedem wanem samting?
8 No eni man fit for sei, ‘Mi no laekem eniwan for leadim mi.’ Bat evri man mas disaed seleva sapos hem laekem holy spirit nao for leadim hem or spirit bilong world for leadim hem. Olketa wea followim spirit bilong world savve lusim nogud wei bilong olketa and letem holy spirit nao for leadim olketa. Bat nara samting tu savve happen. Nomata olketa wea holy spirit leadim olketa, maet olketa lusim gudfala wei bilong olketa and letem spirit bilong world nao for leadim olketa. (Phil. 3:18, 19) Distaem bae iumi storyim wanem nao iumi savve duim mekem iumi no followim spirit bilong world.
Samting wea Showimaot Man Start for Followim Spirit Bilong World
9-11. Wanem nao samfala samting wea showimaot iumi start for followim spirit bilong world?
9 Olsem iumi storyim finis, olketa man wea waka long coal mine mas garem olketa smol bird for mekem olketa luksavve sapos poison gas hem stap insaed long mine. Sapos olketa lukim wanfala bird hem foldaon, olketa savve olketa mas kwiktaem duim samting nao sapos olketa no laek dae. Long sem wei tu, iumi mas luksavve long olketa samting wea showimaot sapos iumi start for followim spirit bilong world. Wanem nao samfala samting hia?
10 Taem iumi lanem olketa tru toktok long Bible gogo iumi dedicate long Jehovah, long datfala taem iumi hapi tumas for readim Bible. Maet iumi prea evritaem tu. And iumi hapi for go long olketa meeting, bikos olketa meeting nao strongim iumi. Olketa samting hia helpem iumi for lusim olketa nogud wei bilong iumi and for no followim moa spirit bilong world.
11 Waswe, iumi gohed yet for readim Bible evriday? (Ps. 1:2) Waswe, iumi prea evritaem? Waswe, iumi laek tumas for go long evri meeting? (Ps. 84:10) Or waswe, distaem iumi no savve duim nao samfala samting hia? Hem tru, maet iumi mas duim samfala waka wea tekem taem and strong bilong iumi, and maet datwan mekem hem no isi for iumi duim olketa samting hia for Jehovah. Bat maet iumi no duim olketa samting hia distaem bikos spirit bilong world nao start for pullim tingting bilong iumi. Sapos olsem, iumi mas waka hard for duim olketa samting wea Jehovah laekem.
No Ova Tumas
12. Wanem nao Jesus talem long olketa disaepol? Why nao hem talem datwan?
12 Wanem samting moa iumi savve duim mekem iumi no followim spirit bilong world? Taem Jesus talem olketa disaepol bilong hem for “gohed lukaot,” hem storyim firstaem olketa samting wea olketa mas keakea long hem. Hem sei: “Lukluk gud long iufala seleva, nogud iufala gohed nomoa for kaikai tumas and drink tumas and wari nomoa abaotem olketa samting long laef, and seknomoa datfala day hem kam and hem olsem iufala insaed trap nao.”—Luke 21:34, 35.
13, 14. Hem gud for iumi tingim olketa wanem kwestin abaotem wei for kaikai and drink?
13 Tingim datfala toktok bilong Jesus. Waswe, Jesus hem sei iumi mas no hapi for kaikai and drink? Nomoa! Hem savve finis long disfala toktok bilong Solomon: “Mi luksavve hao no eni samting hem winim wei for hapi and for duim olketa gudfala samting long laef bilong iumi. And hao evri man tu mas kaikai and drink and hapi long olketa gudfala samting wea hem waka hard long hem. Hem nao samting wea God givim long iumi.” (Eccl. 3:12, 13) Nomata olsem, Jesus savve finis hao spirit bilong world savve mekem man ova tumas long kaikai and drink.
14 Wanem nao bae mekem iumi luksavve sapos spirit bilong world spoelem tingting bilong iumi long tufala samting hia? Hem gud for iumi tingim olketa kwestin hia: ‘Taem mi readim toktok long Bible or long olketa buk bilong iumi abaotem wei for greedy long kaikai, hao nao tingting bilong mi? Waswe, mi ting nating long datfala toktok or mi tingse hem ova tumas? Waswe, mi excuse and sei wei bilong mi hem gud nomoa?a Wanem nao tingting bilong mi long samting wea Bible talem abaotem wei for drinkim alcohol and “wei for drunk”? Waswe, mi ting datfala toktok hem no fitim mi? Waswe, mi savve kros sapos samwan talem mi hao mi drink tumas? Waswe, mi talem olketa narawan olketa no need for barava followim samting wea Bible talem?’ Tru tumas, tingting bilong man nao savve showimaot sapos hem followim spirit bilong world or nomoa.—Markem witim Romans 13:11-14.
No Gohed for Wari
15. Jesus talem iumi for no duim wanem samting?
15 Sapos iumi no laek followim spirit bilong world, iumi mas no gohed for wari. Jesus savve finis hem wei bilong iumi man for wari tumas abaotem samting wea iumi needim. Hem talem olketa disaepol bilong hem: “No gohed for wari.” (Matt. 6:25) Hem tru, iumi savve warim olketa big samting, olsem for duim wanem God laekem, olketa waka bilong iumi for Jehovah, and for lukaftarem famili bilong iumi. (1 Cor. 7:32-34) So wanem nao iumi savve lanem from samting wea Jesus talem?
16. Spirit bilong world savve mekem staka pipol garem wanem kaen tingting?
16 Spirit bilong world savve mekem man wari tumas from hem mekhae long wei for man show-off long samting wea hem garem. Pipol distaem laekem iumi for tingse sapos man garem selen, bae hem no savve wari nao. Olketa sei man wea garem staka material samting nao bae hapi winim man wea followim God. Pipol wea bilivim diswan barava waka hard for kasem staka selen and olketa tingting tumas evritaem for kasem olketa niufala samting. (Prov. 18:11) Kaen tingting olsem abaotem material samting savve mekem man wari tumas gogo hem no fren gud witim God nao.—Readim Matthew 13:18, 22.
17. Wanem nao bae helpem iumi for no wari?
17 Iumi bae no wari sapos iumi obeyim disfala toktok bilong Jesus: “Gohed for faithful long kingdom and for duim olketa samting wea God sei hem stret. Wei for duim olsem hem mas important long iufala winim eni nara samting.” Jesus talem sapos iumi duim olsem, God bae givim iumi olketa samting wea iumi needim. (Matt. 6:33) Iumi savve showimaot iumi bilivim datfala toktok taem iumi duim samting wea God sei hem stret. Wanfala samting nao, iumi no laea long gavman long haomas selen nao iumi tekem from iumi no laek peim bigfala tax. Iumi honest tu taem iumi duim bisnis witim pipol. Sapos iumi garem kaon, iumi mas peim bak datwan. Bible talem hao “sapos iumi sei iumi bae duim samting, iumi mas duim datwan” nao. (Matt. 5:37; Ps. 37:21) Sapos man hem honest, maet datwan no mekem hem kasem staka material samting, bat God bae hapi long hem, hem bae garem gudfala tingting, and hem bae no wari tumas.
18. Wanem nao important samting long laef bilong Jesus? Wanem gud samting nao iumi kasem taem iumi followim hem?
18 Kingdom mas important long iumi winim eni nara samting. Tingim Jesus. Samfala taem hem werem wanfala spesol kaleko. (John 19:23) Hem hapi for kaikai witim olketa fren bilong hem and drinkim wine tu. (Matt. 11:18, 19) Bat olketa samting hia hem no important long hem. Samting wea important long hem nao hem for duim samting wea Jehovah laekem. (John 4:34-36) Sapos iumi followim wei bilong Jesus, iumi bae kasem staka gud samting! Iumi bae hapi taem iumi iusim Bible for helpem pipol. Olketa brata and sista long kongregeson bae lovem iumi and helpem iumi. And Jehovah bae hapi long iumi tu. Sapos Kingdom nao hem important long iumi, olketa material samting and hapitaem bae no big samting long iumi. Bat iumi ting long olketa samting hia hem for helpem iumi worshipim Jehovah. Sapos iumi waka hard for sapotim Kingdom bilong God, spirit bilong world bae no savve spoelem iumi.
Gohed for ‘Tingim Holy Spirit’
19-21. Wanem nao bae helpem iumi for gohed ‘tingim holy spirit’? Why nao iumi mas duim datwan?
19 Man savve duim samting wea hem tingim. Pipol wea duim olketa nogud samting olketa duim datwan bikos olketa tingim nomoa samting wea body bilong olketa laekem. Dastawe aposol Paul talem iumi for no letem eni samting spoelem tingting bilong iumi. Hem sei: “Olketa wea duim olketa samting wea body laekem, olketa tingim nomoa body bilong olketa, bat olketa wea duim samting wea holy spirit laekem, olketa tingim nomoa holy spirit.”—Rom. 8:5.
20 Wanem nao bae helpem iumi for no tingim and no duim olketa samting wea followim spirit bilong world? Iumi mas no letem olketa nogud tingting bilong world for spoelem tingting bilong iumi. Iumi no lukluk long olketa movie wea showim pipol durong and killkill olobaot. Iumi savve God bae no givim holy spirit long pipol wea tingim olketa rabis samting. (Ps. 11:5; 2 Cor. 6:15-18) Bat iumi savve kasem holy spirit taem iumi readim Bible and ting raonem datwan, prea, and go long olketa meeting. Holy spirit bae helpem iumi tu taem iumi duim preaching waka.
21 Iumi mas no followim spirit bilong world and samting wea body bilong iumi laekem. Iumi mas waka hard for no duim olketa samting hia bikos Paul hem sei: “Sapos man tingim samting wea body laekem bae hem dae, bat sapos man tingim wanem holy spirit laekem, bae hem laef and stap gud.”—Rom. 8:6.
[Footnote]
a Samting wea showimaot man hem ova tumas and greedy long kaikai nao hem tingting bilong hem abaotem kaikai, and no from hem fat tumas. Man wea thin tu savve greedy long kaikai. Maet wanfala man hem fat bikos hem garem wankaen sik. So tingting bilong man nao bae showimaot sapos hem greedy long kaikai and no body bilong hem.—Lukim “Kwestin From Reader” insaed long Wastaoa bilong November 1, 2004.
Waswe, Iu Savve Long Ansa?
• Wanem nao iumi mas duim for kasem holy spirit?
• Long wanem wei nao spirit bilong world savve spoelem iumi?
• Wanem nao iumi savve duim mekem iumi no followim spirit bilong world?
[Piksa long page 21]
Askem God for holy spirit bifor iu go long waka or long skul
[Piksa long page 23]
Tingim olketa gud samting, honest taem iumi duim bisnis, and no ova tumas long kaikai and drink