Why Nao Iumi Shud Letem Holy Spirit for Leadim Iumi?

“Iu nao God bilong mi and spirit bilong iu hem gud. Mi laekem spirit bilong iu for leadim mi.”—PS. 143:10.

1. Storyim wanem magnetism savve duim.

TINGIM compass wea stap long ship. Compass hem barava important samting wea captain depend long hem mekem hem kasem stretfala ples wea hem laek for go long hem. Compass hem garem nidol wea olsem magnet wea evritaem point long north. Wanfala paoa wea Jehovah wakem wea iumi no savve lukim wea pipol kolem magnetism nao mekem datfala nidol for muv. For staka handred year, pipol iusim compass taem olketa travel long sea for leadim olketa.

2, 3. (a) Wanem nao Jehovah iusim for wakem evri samting? (b) Why nao iumi savve holy spirit savve helpem iumi distaem?

² Bat Jehovah iusim nara important paoa wea iumi no savve lukim for leadim iumi. Wanem nao datwan? Hem paoa wea iumi read abaotem long Genesis 1:1, 2. Hem sei: “Long start, God wakem skae and earth.” Iumi savve Jehovah iusim wanfala strong paoa for wakem evri samting bikos verse 2 hem sei: “Paoa bilong God hem gohed for mumuv antap long wata.” Wanem paoa nao God iusim? Hem iusim holy spirit. Iumi hapi tumas Jehovah iusim holy spirit for wakem olketa man and olketa nara samting tu.—Job 33:4; Ps. 104:30.

³ Nomata Jehovah iusim holy spirit for wakem olketa man, waswe, holy spirit savve helpem iumi tu? Jesus talem olketa disaepol holy spirit bae leadim olketa. Hem sei holy spirit bae helpem olketa for “barava minim gud olketa samting wea tru.” (John 16:13) Wanem nao holy spirit? Why nao iumi shud letem holy spirit for leadim iumi?

Wanem Nao Holy Spirit?

4, 5. (a) Olketa wea bilivim Trinity garem wanem rong idea abaotem holy spirit? (b) Wanem nao holy spirit?

⁴ Samfala pipol wea iumi story witim olketa long preaching waka biliv long Holy Ghost wea King James Version and samfala nara Bible transleison storyim. Olketa wea biliv long Trinity garem rong idea and sei holy spirit hem wanfala man wea semsem witim God wea hem Dadi long heven. (1 Cor. 8:6) Tingim diswan. Long 1833, Noah Webster hem pablisim The Webster Bible wea hem transleitim followim King James Version. Long datfala Bible, hem iusim toktok “Holy Spirit” and no “Holy Ghost.” Hem duim olsem bikos hem luksavve datfala toktok “Holy Ghost” hem minim difren samting.a

⁵ So wanem nao holy spirit? Footnote long Genesis 1:2 long New World Translation of the Holy Scriptures—With References transleitim datfala Hebrew word ruʹach olsem “spirit.” Long olketa nara verse olketa transleitim datfala word ruʹach olsem “wind” or olketa iusim olketa nara word wea garem sem mining. (Comparem footnote long Genesis 3:8; 8:1.) Nomata iumi no savve lukim wind, iumi savve lukim wanem hem duim. Hem semsem tu witim holy spirit. Iumi no savve lukim holy spirit bat iumi savve lukim olketa samting wea hem duim. Holy spirit hem no wanfala man bat hem paoa bilong God. God givim datwan long pipol or long olketa nara samting for mekem plan bilong hem kamap tru. Tru tumas, Olmaeti God nao givim kam holy spirit!—Readim Isaiah 40:12, 13.

6. Wanem nao David askem long Jehovah?

⁶ Waswe, Jehovah savve iusim spirit bilong hem for leadim iumi tu? Hem promis olsem long David: “Bae mi teachim iu olketa stretfala wei for iu followim and bae mi givim gudfala tingting long iu.” (Ps. 32:8) Waswe, David laekem God for leadim hem? Ia, hem laekem bikos hem prea olsem long Jehovah: “Plis iu teachim mi for duim wanem iu laekem. Iu nao God bilong mi and spirit bilong iu hem gud. Mi laekem spirit bilong iu for leadim mi.” (Ps. 143:10) Iumi tu shud laekem spirit bilong God for leadim iumi. Why nao olsem? Bae iumi storyim fofala reason.

Man No Fit for Bossim Laef Bilong Hemseleva

7, 8. (a) Why nao man no fit for bossim laef bilong hemseleva? (b) Wanem tokpiksa nao helpem iumi for luksavve iumi needim God for leadim iumi?

⁷ Firstfala reason why iumi shud laekem holy spirit for leadim iumi hem bikos iumi no fit for duim datwan seleva. For leadim samwan hem minim for showim hem stretfala wei for followim. Jehovah wakem iumi long wei wea iumi needim samwan for leadim iumi. And from iumi no perfect, iumi savve mekem staka mistek taem iumi laek followim tingting bilong iumiseleva. Profet Jeremiah sei: “Jehovah, mi luksavve man no fit for bossim laef bilong hemseleva.” (Jer. 10:23) Why nao olsem? God talem reason long Jeremiah. Hem sei: “Heart bilong man hem laea long hem and hem laekem tumas for duim rabis samting. Hu nao savve gud long heart bilong man?”—Jer. 17:9; Matt. 15:19.

⁸ Long samfala kantri bae man stap long danger sapos hem lus long bush. Tingim sapos man laek go long wanfala ples and hem mas wakabaot long bush for kasem datfala ples. Hem no wise for hem go seleva sapos hem no savve hao for kasem datfala ples. Datwan bae mekem laef bilong hem stap long danger. Bat hem shud tekem samwan wea savve hao for wakabaot long bush and hao for kasem datfala ples. Hem semsem tu witim man wea laek followim tingting bilong hemseleva and no laekem God for leadim hem. Sapos hem duim olsem, hem putim laef bilong hem long danger bikos iumi stap long world wea barava nogud. Iumi shud prea for Jehovah helpem iumi olsem David duim. Hem sei: “Plis helpem mi for followim stretfala wei bilong iu mekem mi no foldaon.” (Ps. 17:5; 23:3) Wanem nao iumi savve duim for God helpem iumi?

9. Olsem piksa long page 17 showim, hao nao holy spirit savve helpem iumi?

⁹ Sapos iumi hambol and willing for depend long Jehovah, hem bae givim holy spirit for leadim iumi. Hao nao holy spirit savve helpem iumi? Jesus sei long olketa disaepol: “Holy spirit wea Dadi bae sendem kam long nem bilong mi for helpem iufala bae teachim iufala evri samting, and bae mekem iufala tingim moa evri samting wea mi talem long iufala.” (John 14:26) Taem iumi prea and studyim Bible and olketa teaching bilong Jesus, holy spirit bae helpem iumi for minim wisdom bilong Jehovah wea big tumas. Datwan bae helpem iumi for obeyim hem. (1 Cor. 2:10) And spirit bilong God bae helpem iumi for savve wanem for duim taem seknomoa eni samting happen. Holy spirit bae helpem iumi for tingim olketa Bible principle wea iumi lanem finis and hao for followim taem iumi disaedem samting.

Jesus Letem Holy Spirit Leadim Hem

10, 11. Wanem profesi nao Jesus savve long hem, and wanem nao holy spirit helpem hem for duim?

¹⁰ Mek-tu reason why iumi shud laekem holy spirit for leadim iumi hem bikos Jesus tu letem holy spirit leadim hem. Jesus savve taem hem stap long earth holy spirit bae helpem hem. Hem savve long disfala profesi abaotem hem: “Spirit bilong Jehovah bae stap long hem. Dastawe hem bae wise, minim samting, garem gudfala tingting, strong, garem bigfala savve, and barava respectim Jehovah.” (Isa. 11:2) Jesus barava laekem God for givim holy spirit long hem bikos hem savve bae hem kasem olketa hard taem.

¹¹ Toktok bilong Jehovah kamap tru. Gospel bilong Luke storyim wanem hem happen bihaen Jesus baptaes. Hem sei: “Then Jesus hem lusim Jordan River. God givim holy spirit long hem and spirit hia leadim hem go long wilderness.” (Luke 4:1) Taem Jesus stap long wilderness hem no kaikai. Hem gohed for prea and ting raonem evri samting wea hem lanem. Luk olsem Jehovah talem Jesus wanem for duim and redyim hem for wanem bae happen. Holy spirit helpem Jesus for tingting gud and disaedem olketa samting. Datwan nao helpem Jesus for savve long wanem Jehovah laekem hem for duim and obeyim hem.

12. Why nao iumi need for askem God for holy spirit leadim iumi?

¹² Holy spirit barava helpem Jesus dastawe hem encouragem olketa disaepol for askem God for datwan and letem spirit for leadim olketa. (Readim Luke 11:9-13.) Why nao iumi need for askem God for holy spirit leadim iumi? Bikos holy spirit savve helpem iumi for garem “tingting bilong Christ.” (Rom. 12:2; 1 Cor. 2:16) Datwan minim holy spirit savve helpem iumi followim example bilong Christ.—1 Pet. 2:21.

Tingting Bilong Pipol Long World Savve Spoelem Iumi

13. Sapos iumi followim tingting bilong pipol long world, wanem nao savve happen?

¹³ Mek-thri reason why iumi shud laekem holy spirit for leadim iumi hem bikos tingting bilong pipol long world savve spoelem iumi. Diswan spoelem staka pipol long world and hem mekem olketa for duim samting wea barava difren from wanem holy spirit leadim iumi for duim. Pipol no garem tingting bilong Christ bat olketa tingim and duim samting followim ruler bilong disfala world, Satan. (Readim Ephesians 2:1-3; Titus 3:3.) Sapos iumi letem tingting bilong pipol long world for kontrolem iumi and iumi start for duim olketa nogud samting, bae iumi no kasem Kingdom bilong God.—Gal. 5:19-21.

14, 15. Wanem nao bae helpem iumi for no followim tingting bilong pipol long world?

¹⁴ Jehovah helpem iumi for no followim tingting bilong pipol long world. Aposol Paul sei: “Iufala mas gohed kasem strong from Lord and from bigfala strong bilong hem . . . mekem iufala fit for againstim enemy hia long datfala nogud taem.” (Eph. 6:10, 13) Holy spirit savve strongim iumi for againstim olketa trik bilong Satan. (Rev. 12:9) Hem no isi for iumi againstim tingting bilong pipol long world. Nomata olsem, holy spirit hem strongfala paoa bilong God wea savve helpem iumi for winim datwan!

¹⁵ Aposol Peter story abaotem samfala long first century wea lusim truth. Hem sei: “Olketa lusim olketa tru teaching and olketa go difren.” (2 Pet. 2:15) Iumi hapi tumas “iumi no kasem tingting bilong pipol long disfala world, bat iumi kasem holy spirit bilong God.” (1 Cor. 2:12) Taem iumi letem holy spirit for leadim iumi and mekius long evri samting wea Jehovah givim for strongim wei wea iumi fren witim hem, datwan bae helpem iumi for duim stret samting and no followim tingting bilong pipol long world.—Gal. 5:16.

Holy Spirit Mekem Iumi for Garem Gudfala Wei

16. Holy spirit savve helpem iumi for garem olketa wanem kaen wei?

¹⁶ Mek-foa reason why iumi shud laekem holy spirit for leadim iumi hem bikos hem helpem iumi for garem olketa gudfala wei. (Readim Galatians 5:22, 23.) Tru tumas, iumi laek for garem olketa gudfala wei olsem love, hapi, peace, and for patient. Iumi laek for kaen long narawan, duim gudfala samting, garem faith, hambol, and kontrolem seleva. Taem iumi showimaot olketa gudfala wei hia, bae iumi kasem gud samting. Famili bilong iumi and olketa long kongregeson tu bae kasem gud samting. Nomata iumi garem olketa wei hia finis, iumi mas gohed waka hard for showimaot datwan.

17. Wanem nao bae helpem iumi for garem olketa wei bilong holy spirit?

¹⁷ Tingim diswan: ‘Waswe, toktok and wanem iumi duim showimaot holy spirit nao leadim iumi and mekem iumi for garem olketa gudfala wei?’ (2 Cor. 13:5a; Gal. 5:25) Sapos iumi luksavve iumi no garem samfala wei hia, hem gud for iumi waka hard for letem holy spirit leadim iumi. Samting wea bae helpem iumi nao hem for study abaotem olketa wei hia long Bible and long olketa buk bilong iumi. Iumi shud ting raonem hao for showimaot olketa wei bilong spirit and waka hard for duim datwan.b Taem iumi lukim wei wea holy spirit helpem iumi and olketa brata and sista, datwan helpem iumi for luksavve iumi needim holy spirit for leadim iumi.

Waswe, Iu Letem Holy Spirit for Leadim Iu?

18. Wanem nao iumi savve lanem from example bilong Jesus?

¹⁸ Taem God wakem universe, Jesus hem “nambawan wakaman” bilong hem. So Jesus savve gud abaotem disfala paoa wea olketa kolem magnetism wea savve mekem nidol long compass for muv. (Prov. 8:30; John 1:3) Bat Bible no sei Jesus iusim magnetism for leadim hem long ples wea hem laek for go. Bible sei holy spirit nao leadim hem. Jesus luksavve God iusim holy spirit for leadim hem, and hem willing for followim datwan. (Mark 1:12, 13; Luke 4:14) Waswe, iu letem holy spirit leadim iu olsem Jesus duim?

19. Wanem nao iumi mas duim for letem holy spirit leadim iumi?

¹⁹ Distaem tu holy spirit leadim olketa wea willing for followim datwan. Wanem nao iu savve duim for letem holy spirit leadim iu? Prea long Jehovah mekem hem savve givim iu holy spirit and helpem iu for followim datwan. (Readim Ephesians 3:14-16.) Jehovah nao givim holy spirit long olketa man for raetem Bible, so wei for studyim Bible showimaot iu laekem holy spirit for leadim iu. (2 Tim. 3:16, 17) Obeyim olketa wisefala toktok wea stap insaed Bible and followim wei wea holy spirit leadim iu. Taem iu duim olketa samting hia, datwan showimaot iu garem faith hao Jehovah savve leadim iu nomata iu stap long disfala nogud world.

[Olketa Footnote]

Waswe, Iu Tingim Main Point?

• Hao nao holy spirit savve helpem iumi?

• Wanem nao fofala reason why iumi shud laekem holy spirit for leadim iumi?

• Wanem nao iu savve duim for letem holy spirit leadim iu?

[Piksa long page 15]

Holy spirit barava helpem Jesus

[Piksa long page 17]

Holy spirit leadim olketa wea willing for followim datwan