Followim Holy Spirit and Duim Wanem Iu Promisim Long God
“Sapos iufala gohed followim spirit, bae iufala no duim eni nogud samting.”—GAL. 5:16.
1. Wanem tufala wei for baptaes nao happen long Pentecost?
LONG Pentecost 33 C.E., pipol wea followim Jesus toktok long olketa difren languis bihaen olketa baptaes long holy spirit. Holy spirit mekem olketa duim olketa spesol samting. (1 Cor. 12:4-10) Wanem nao kamaot from wei wea olketa toktok long difren languis and from tok wea aposol Peter givim? Staka pipol “sorre tumas.” Samting wea Peter talem mekem pipol for repent and baptaes. Bible sei: “Olketa wea barava bilivim toktok bilong hem olketa baptaes, and long datfala taem thri thousand pipol nao joinim sekson bilong olketa.” (Acts 2:22, 36-41) Olsem Jesus talem finis, olketa hia baptaes long wata long nem bilong Dadi and bilong Son and bilong holy spirit.—Matt. 28:19.
2, 3. (a) Wanem nao hem minim for baptaes long holy spirit and wanem nao hem minim for baptaes long nem bilong holy spirit? (b) Why nao evri tru Christian distaem mas baptaes long wata?
2 Bat waswe, wei for baptaes long holy spirit and wei for baptaes long nem bilong holy spirit tufala difren? Ia. Olketa wea baptaes long holy spirit olketa born moa for kamap olketa anointed son bilong God. (John 3:3) God anointim olketa for kamap king and priest long Kingdom bilong God long heven and olketa part bilong spiritual body bilong Christ. (1 Cor. 12:13; Gal. 3:27; Rev. 20:6) So wei wea Jehovah baptaesim pipol long holy spirit long Pentecost and bihaen datwan, hem for chusim olketa wea bae rul witim Christ. (Rom. 8:15-17) Bat waswe long wei for baptaes long nem bilong holy spirit wea iumi lukim evritaem long olketa assembly and convention bilong Olketa Jehovah’s Witness?
3 Olketa tru Christian baptaes long wata for showimaot olketa dedicate long Jehovah God. Hem nao samting wea olketa wea garem hope for go long heven duim. Bat wei for baptaes long wata hem samting wea staka million man and woman wea garem hope for laef olowe long earth mas duim tu. Nomata wanem hope nao man garem, wei for baptaes long wata long nem bilong Dadi and bilong Son and bilong holy spirit hem important samting wea man mas duim mekem God savve hapi long hem. Evri Christian wea baptaes finis long wata mas “gohed followim holy spirit.” (Readim Galatians 5:16.) Waswe, iu followim holy spirit and duim samting wea iu promisim long God?
Wanem Hem Minim for “Followim Holy Spirit”
4. Wanem nao hem minim for “followim holy spirit”?
4 Taem iu “followim holy spirit,” datwan minim iu letem holy spirit leadim iu long evri samting wea iu duim evriday. Galatians chapter 5 storyim hao man wea letem holy spirit leadim hem, hem barava difren from man wea duim olketa nogud samting wea body laekem.—Readim Galatians 5:17, 18.
5. Man wea letem holy spirit leadim hem bae no duim olketa wanem samting?
5 Sapos holy spirit leadim iu, iu bae waka hard for no duim olketa nogud samting wea body laekem. Olketa nogud samting hia nao “wei for durong, no klin, olobaot, worshipim idol, samting wea join witim devildevil, for enemy long narawan, faet, jealous, kros, raoa, wei for divaed, wei for followim wanfala man, kavet, wei for drunk, olketa party wea pipol savve drunk and olobaot.” (Gal. 5:19-21) Hem olsem iu “letem spirit for helpem [iu] for barava no duim moa olketa rabis samting.” (Rom. 8:5, 13) Sapos holy spirit leadim iu, iu bae tingim nomoa olketa samting bilong spirit and followim datwan, and iu bae no duim samting wea body laekem.
6. Storyim wanem man mas duim mekem hem showimaot olketa wei bilong holy spirit.
6 Taem iu letem holy spirit leadim iu, iu bae showimaot olketa wei bilong God wea “spirit hem mekem man for garem.” (Gal. 5:22, 23) Bat iu luksavve iu mas waka hard for garem olketa wei bilong God. Tingim disfala tokpiksa. Wanfala farmer redyim graon for garden bilong hem. Hem tru, garden needim sun and wata bikos sapos nomoa farmer bae no harvestim eni kaikai. Iumi savve sei holy spirit hem olsem sun. Sapos iumi laek showimaot olketa wei bilong holy spirit, iumi needim datfala spirit. Bat waswe, farmer bae harvestim eni kaikai sapos hem no waka hard? (Prov. 10:4) Long sem wei tu, sapos iu redyim gud graon wea piksarem heart bilong iu, iu bae showimaot gud olketa wei bilong holy spirit. So tingim diswan, ‘Waswe, mi waka hard for showimaot olketa wei bilong holy spirit?’
7. Sapos iu laek for garem olketa wei bilong holy spirit, why nao hem important tumas for studyim Bible and ting raonem wanem iu readim?
7 Sapos farmer laek for harvestim staka kaikai, hem mas watarem garden bilong hem. Sapos iu laek garem olketa wei bilong holy spirit, iu need for kasem wata wea hem nao olketa tru teaching long Bible wea iu savve herem tu long olketa meeting. (Isa. 55:1) Maet iu storyim long staka pipol hao God givim holy spirit for helpem olketa man for raetem Bible. (2 Tim. 3:16) Nara samting tu, wakaman wea faithful and wise helpem iumi for minim olketa tru teaching long Bible wea olsem klinfala wata. (Matt. 24:45-47) Hem klia long iumi nao, sapos iumi laekem holy spirit for leadim iumi, iumi mas readim Bible and ting raonem wanem iumi readim. Sapos iu duim olsem, iu followim gudfala example bilong olketa profet wea “trae hard for savve gud” long information wea olketa kasem. Olketa angel tu interest tumas for savve long olketa tru samting abaotem Pikinini wea God promisim and kongregeson bilong olketa anointed Christian.—Readim 1 Peter 1:10-12.
Wanem Iu Savve Duim for Letem Holy Spirit Leadim Iu
8. Why nao hem important for askem Jehovah for holy spirit?
8 Hem tru, iumi need for studyim Bible and ting raonem wanem iumi readim, bat iumi mas gohed for askem Jehovah tu for helpem iumi and leadim iumi. Jehovah savve “duim staka samting winim wanem iumi askem or tingim.” (Eph. 3:20; Luke 11:13) Bat wanem nao bae iu talem sapos wanfala man askem iu olsem, “Why nao mi shud gohed askem God for wanem mi needim sapos hem savve finis ‘long diswan bifor mi askem hem’?” (Matt. 6:8) Hem bikos taem iu prea long Jehovah for givim holy spirit long iu, iu showimaot iu trustim hem. Tingim diswan. Sapos samwan askem iu for helpem hem, iu bae trae hard for helpem hem. Iu duim olsem bikos hem askem iu for helpem hem and datwan showimaot hem trustim iu. (Markem witim Proverbs 3:27.) Long sem wei tu, Jehovah hapi taem iu askem hem for holy spirit bilong hem, and hem bae givim long iu.—Prov. 15:8.
9. Hao nao wei for go long olketa meeting helpem iu for letem holy spirit leadim iu?
9 Nara samting wea iu savve duim for letem holy spirit bilong God leadim iu, hem taem iu go long olketa meeting, assembly, and convention. Hem barava important for go long olketa meeting hia and lisin gud long program. Taem iu duim olsem, datwan bae helpem iu for minim “wisdom bilong God wea big tumas.” (1 Cor. 2:10) Iu savve kasem gud samting tu taem iu givim koment evritaem. Tingim olketa meeting wea iu go long hem long fofala week wea go finis. Haomas taem nao iu trae for givim koment for talemaot faith bilong iu? Waswe, iu savve waka hard moa long datwan? Sapos iu luksavve iu need for duim olsem, disaedem wanem nao iu bae duim long olketa week wea bae kam. Jehovah bae lukim iu willing for koment and hem bae givim holy spirit long iu, wea datwan bae helpem iu for kasem staka gud samting from olketa meeting wea iu go long hem.
10. Wanem invitation nao man wea followim holy spirit talem long pipol?
10 Iu followim holy spirit tu taem iu acceptim invitation long Revelation 22:17 wea sei: “Holy spirit and waef bilong Christ gohed for sei: ‘Iufala kam!’ And evriwan wea herem toktok hia mas sei tu: ‘Iufala kam!’ Iufala wea laek drink, iufala kam. Iufala wea laekem tumas diswan, iufala kam drinkim free wata wea mekem man laef olowe.” Holy spirit helpem olketa anointed Christian for invaetem pipol for kam drinkim wata wea mekem man laef olowe. Sapos iu acceptim invitation for “kam!” waswe, iu talem olketa narawan for “Kam!” tu? Hem nambawan privilege for duim disfala waka wea savve sevem pipol!
11, 12. Hao nao holy spirit helpem iumi long preaching waka?
11 Holy spirit nao leadim iumi for duim disfala important waka. Bible storyim wanem holy spirit duim long first century for helpem olketa missionary for go long olketa niu territory. ‘Holy spirit stopem aposol Paul and olketa narawan for no storyim gud nius long Asia’ and long Bithynia tu. Bible no storyim hao nao holy spirit stopem olketa for no go long olketa ples hia, bat hem klia hao holy spirit leadim Paul for go long bigfala territory long Europe. Paul lukim long vision wanfala man long Macedonia askem hem for kam helpem olketa.—Acts 16:6-10.
12 Distaem tu holy spirit bilong Jehovah leadim preaching waka evriwea long world. No eniwan lukim vision for savve wea nao for go preach, nomata olsem, Jehovah iusim holy spirit for leadim olketa anointed Christian. And holy spirit helpem olketa brata and sista for duim best bilong olketa for preach long pipol and teachim olketa. Mifala savve iu tu duim disfala barava important waka. Waswe, iu savve duim samfala samting moa mekem iu barava hapi for duim disfala important waka?
13. Wanem nao iu savve duim for letem holy spirit leadim iu? Storyim experience.
13 Iu savve letem holy spirit leadim iu taem iu followim information wea pipol bilong God kasem. Tingim Mihoko wea kam from Japan. From hem just start for pioneer, long tingting bilong hem, hem no savve hao for duim olketa return visit. Hem tingse hem no savve story long wei wea bae mekem man interest. Bat long datfala taem, Kingdom Ministry Bilong Iumi storyim samfala idea long hao for duim olketa return visit wea short nomoa. Then olketa brata and sista kasem disfala brochure A Satisfying Life—How to Attain It. Brochure hia barava helpem staka pipol long Japan. Mihoko followim olketa idea long hao for iusim datfala brochure for duim olketa return visit. No longtaem nomoa, hem startim olketa Bible study witim pipol wea maet firstaem olketa no laek for study. Hem sei, “Mi garem staka study. Samfala taem mi garem 12-fala study, so mi mas talem samfala for weit firstaem bifor mi savve start study witim olketa!” Tru tumas, taem iu followim holy spirit and wanem organization bilong Jehovah talem, bae iu kasem staka blessing.
Letem Holy Spirit Nao Helpem Iu
14, 15. (a) Wanem nao savve helpem olketa man wea no perfect for duim wanem olketa promisim long God? (b) Wanem nao iu savve duim mekem iu garem olketa gudfala fren?
14 From iu wanfala Witness bilong Jehovah, iu garem ministry for duim. (Rom. 10:14) Maet iu ting iu no barava fit for duim disfala waka. Bat God nao mekem iu fit for duim disfala waka olsem hem mekem olketa anointed Christian tu fit for duim waka hia. (Readim 2 Corinthians 3:5.) Iu savve duim wanem iu promisim long God taem iu duim best bilong iu and letem holy spirit nao helpem iu.
15 Hem tru, from iumi no perfect, hem no isi for iumi duim wanem iumi promisim long Jehovah God wea perfect. Maet wanfala hard samting nao hem taem olketa fren bilong iu bifor no minim why iu changem wei bilong iu and maet olketa ‘tok nogud abaotem iu.’ (1 Pet. 4:4) Bat tingim hao iu garem olketa niu fren distaem and Jehovah and Jesus Christ nao tufala gud fren bilong iu. (Readim James 2:21-23.) Hem important tu for savve long olketa Christian brata and sista long kongregeson bilong iu. Olketa hia join witim “evri brata” long world. (1 Pet. 2:17; Prov. 17:17) Jehovah iusim holy spirit bilong hem for helpem iu garem olketa fren wea bae helpem iu for garem olketa gudfala wei.
16. Olsem Paul, why nao iu savve ‘hapi nomata iu garem olketa wik point’?
16 Nomata iu garem olketa fren long kongregeson wea savve helpem iu, maet hem no isi for iu winim hard taem wea iu kasem evriday. Maet samfala taem iu no savve wanem for duim nao bikos iu kasem staka hard taem and hem olsem olketa problem bilong iu no savve finis nao. Long taem olsem nao hem important for iu askem Jehovah for holy spirit bilong hem. Aposol Paul sei: “Taem mi wik, hem nao taem wea mi strong.” (Readim 2 Corinthians 4:7-10; 12:10.) Paul savve holy spirit savve helpem man nomata wanem samting nao mekem hem wik. So holy spirit savve strongim iu long taem wea iu wik and taem wea iu needim help. Paul hem sei “nomata hem garem olketa wik point, hem hapi nomoa.” Hem luksavve taem hem wik nao holy spirit helpem hem. Iu tu savve kasem sem samting!—Rom. 15:13.
17. Hao nao holy spirit savve helpem iu for kasem ples wea iu laek go long hem?
17 Iumi needim holy spirit bilong God mekem iumi savve gohed duim samting wea iumi promisim long hem. Tingim sapos iu kapten bilong wanfala sailing ship. Goal bilong iu hem for worshipim Jehovah for olowe. Holy spirit nao hem olsem wind wea bae helpem iu for arrive sef long ples wea iu laek go long hem. Iu no laekem tingting bilong pipol long world bilong Satan blowim iu olobaot. (1 Cor. 2:12) Iu mas luksavve long stretfala wind for followim and followim datwan. Stretfala wind hia nao hem holy spirit. Bible and organization bilong God wea holy spirit leadim bae leadim iu for go long stretfala ples.
18. Wanem nao iu laek gohed for duim distaem, and why nao olsem?
18 Sapos iu study witim Olketa Jehovah’s Witness, iu go long olketa meeting, bat iu no dedicate and baptaes yet, tingim diswan, ‘Wanem nao mekem mi no dedicate and baptaes?’ Sapos iu luksavve Jehovah iusim holy spirit for duim wanem hem laekem and iu tinghae long wei wea holy spirit helpem iu, then duim samting wea iu savve hem stret. Jehovah bae barava blessim iu. Hem bae givim holy spirit long iu evritaem. Sapos iu baptaes for staka year finis, iu luksavve holy spirit barava helpem iu. Iu savve hao God iusim holy spirit for strongim iu. Holy spirit savve gohed strongim iu for olowe. So gohed followim holy spirit.
Waswe, Iu Tingim Yet?
• Wanem nao hem minim for “followim holy spirit”?
• Wanem nao savve helpem iu for “gohed followim holy spirit”?
• Wanem nao savve helpem iu for duim samting wea iu promisim long God?
[Piksa long page 15]
Waka hard for redyim gud graon wea piksarem heart bilong iu
[Olketa Piksa long page 16, 17]
Waswe, iu letem holy spirit leadim iu?