Followim Jesus Worshipim God Long Wei wea Hem Laekem

God hem askem pipol long “evri kantri, tribe, pipol, and languis” for worshipim hem. (Rev. 7:​9, 10; 15:​3, 4) Pipol wea laek for worshipim Jehovah olketa “lukim olketa gudfala wei bilong Jehovah.” (Ps. 27:4; 90:17) Olketa praisem God olsem man wea raetem disfala psalm: “Iumi baodaon and worshipim Jehovah. Iumi nildaon front long hem from hem nao wakem iumi.”​—Ps. 95:6.

Worship wea Jehovah Laekem

From Jesus hem spesol Son bilong God, hem savve gud long tingting bilong Dadi bilong hem and olketa mark bilong hem. Dastawe Jesus no fraet for talem pipol wanem nao stretfala wei for olketa worshipim Jehovah. Hem talem olsem: “Mi nao datfala wei and truth and laef. Man savve kam long Dadi thru long mi nomoa.”​—John 1:​14; 14:6.

Jesus hem stap anda long Dadi bilong hem. Hem sei: “Mi nating duim eni samting followim tingting bilong miseleva, bat wanem Dadi hem lanem mi, hem nao mi lanem long iufala.” Then hem sei: “Mi evritaem duim olketa samting wea hem hapi long hem.” (John 8:​28, 29) Wanem nao Jesus duim wea mekem Dadi bilong hem hapi long hem?

Wanfala samting nao, Jesus hem barava lovem Dadi bilong hem. Jesus showimaot diswan taem hem obeyim Dadi bilong hem and hem duim wanem Jehovah laekem nomata hem mas dae. (Phil. 2:​7, 8) Jesus evritaem preach and mekem pipol kamap disaepol. Gogo olketa wea biliv long hem and pipol wea no biliv long hem, olketa sei hem nao Teacher. (Matt. 22:23, 24; John 3:2) Jesus duim staka samting tu for helpem pipol. Staka taem hem no garem taem for rest, bat hem hapi nomoa for helpem olketa narawan. (Matt. 14:13, 14; 20:28) Nomata hem busy, Jesus evritaem prea long Dadi bilong hem long heven. (Luke 6:​12) God barava tinghae long wei wea Jesus worshipim hem!

Waka Hard for Mekem God Hapi

Jehovah lukim gudfala samting wea Son bilong hem duim and Hem talemaot datwan. (Matt. 17:5) Bat Satan tu lukim hao Jesus hem faithful. So Satan barava laek testim Jesus. For wanem? Hem laek duim olsem bikos no eni man bifor long hem obeyim God long perfect wei. Satan no laekem Jesus for gohed worshipim Jehovah long wei wea God laekem.​—Rev. 4:​11.

So Satan kam long Jesus from hem laek testim hem. Hem tekem Jesus go long “wanfala barava hae maunten and showim hem evri kantri long world and olketa nambawan samting wea olketa garem.” Then Satan hem sei: “Evri samting hia mi bae givim long iu sapos iu baodaon and worshipim mi distaem.” Wanem nao Jesus talem? Hem sei: “Iu go nao Satan! Olketa Holy Raeting talem finis, ‘Iu mas baodaon long God bilong iu Jehovah, and iu mas worshipim hem nomoa.’” (Matt. 4:​8-​10) Tru tumas, nomata Satan laek givim staka samting long Jesus, Jesus luksavve sapos hem baodaon long Satan, hem worshipim Satan nao. Jesus nating laek worshipim eni nara man. Hem laek worshipim Jehovah nomoa.

Maet Satan no laek givim long iumi olketa kantri and olketa nambawan samting wea olketa garem. Nomata olsem, hem no laekem iumi for worshipim God. Satan laekem iumi for worshipim nara man or nara samting.​—2 Cor. 4:4.

Jesus Christ hem faithful go kasem taem hem taem. From hem faithful long God, hem mekhae long Jehovah long perfect wei. Iumi distaem waka hard for followim wei wea Jesus hem faithful. Iumi worshipim Jehovah nomoa. Tru tumas, nambawan samting long iumi nao hem for fren gud witim God.

Gud Samting Iumi Kasem Taem Iumi Worshipim God Long Wei wea Hem Laekem

Taem iumi worshipim God long “klin and stretfala wei,” iumi kasem staka gud samting. (Jas. 1:​27) Pipol long world distaem “lovem olketa seleva, lovem selen, mekhae long seleva,” and “no laekem eni samting wea gud.” (2 Tim. 3:​1-5) Bat long kongregeson bilong God, iumi hipap witim pipol wea garem gudfala wei and wea waka hard for worshipim God long stretfala wei. Datwan barava strongim iumi!

From iumi no followim world, iumi garem gudfala tingting tu. Iumi bae gohed for garem gudfala tingting sapos iumi followim olketa toktok bilong God and obeyim olketa law bilong gavman wea no againstim olketa law bilong God.​—Mark 12:17; Acts 5:​27-​29.

Iumi kasem olketa nara gud samting tu taem iumi worshipim God witim full strong bilong iumi. Taem iumi duim samting wea God laekem firstaem, bae iumi hapi. Iumi no garem kaen tingting olsem: “Iumi kaikai and drink, from tumoro bae iumi dae,” bat iumi savve iumi bae stap olowe long paradaes long earth.​—1 Cor. 15:32.

Revelation storyim hao long future, olketa wea worshipim Jehovah long stretfala wei bae “kamaot from datfala big trabol.” Hem sei “Datwan wea sidaon long throne bae protectim olketa.” (Rev. 7:​13-15) Datwan wea sidaon long throne nao hem Jehovah God, nambawan Man long universe. Tingim hao long datfala taem Jehovah bae protectim iu mekem no eni samting savve spoelem iu! Distaem tu hem savve lukaftarem iumi gud.

And tu, Bible storyim hao Jesus bae leadim evriwan wea worshipim God long stretfala wei long “olketa springwata bilong laef.” Olketa springwata hia nao hem olketa samting wea Jehovah givim for mekem iumi savve kasem laef olowe. And from Christ hem givim laef bilong hem, “God bae aotem evri wata from eye bilong olketa.” (Rev. 7:​17) From evriwan bae kamap perfect, olketa bae hapi tumas. Distaem tu olketa wea worshipim God hapi tumas and olketa praisem Jehovah olsem olketa long heven praisem hem olsem: “Jehovah God, iu nao garem evri paoa. Olketa waka bilong iu barava nambawan. Iu nao King for olowe and olketa wei bilong iu hem stret and tru tumas. Jehovah, evriwan bae fraet long iu and mekhae long nem bilong iu from iu nomoa iu faithful! Pipol long evri kantri long world bae kam and worshipim iu, bikos olketa luksavve olketa law bilong iu hem stret.”​—Rev. 15:​3, 4.

[Piksa long page 27]

Wanem nao Satan laek givim iumi sapos iumi no worshipim God?