Toktok Bilong Jehovah Hem Laef
Olketa Main Point From Wan and Tu Thessalonians and Wan and Tu Timothy
BIHAEN aposol Paul startim datfala kongregeson long Thessalonica, pipol againstim olketa Christian long there. So taem Timothy kam bak from Thessalonica witim gudfala nius, Paul hem barava hapi dastawe hem raetem firstfala leta long olketa Christian long there for strongim olketa. Maet Paul hem raetem datfala leta long 50 C.E., and hem nao firstfala leta wea hem raetem long Bible. No longtaem bihaen, hem raetem mek-tu leta long olketa Christian long Thessalonica. Long datfala leta, hem stretem tingting bilong samfala and hem strongim go moa faith bilong olketa brata.
Bihaen tenfala year go pas, Paul hem stap long Macedonia and Timothy hem stap long Ephesus. Paul hem raet go long Timothy and talem hem for stap long Ephesus for helpem olketa brata and sista long there gohed fren gud witim Jehovah bikos samfala insaed kongregeson teachim laea samting. Long 64 C.E., bihaen wanfala big fire hem bonem Rome, olketa Christian kasem barava hard taem. Long datfala taem nao Paul raetem mek-tu leta long Timothy. Datwan nao lastfala leta wea hem raetem long Bible. Iumi distaem tu savve kasem gud samting long fofala leta hia wea Paul raetem.—Heb. 4:12.
“GOHED FOR LUKAOT”
Paul barava tinghae long olketa Christian long Thessalonica. Olketa ‘waka hard, olketa faithful for duim waka bilong olketa, and olketa no givap.’ Hem talem hao olketa nao mekem hem ‘hapi.’—1 Thess. 1:3; 2:19.
Bihaen Paul hem talem olketa Christian long Thessalonica for gohed strongim narawan abaotem hope for laef bak moa, hem sei: “Day bilong Jehovah bae kam olsem man for steal hem kam long naet.” Hem talem olketa for “gohed for lukaot” and for tingting gud.—1 Thess. 4:16-18; 5:2, 6.
Ansa for Olketa Bible Kwestin:
4:15-17—Olketa hu nao “go ap long olketa cloud for kasem Lord long skae,” and hao nao olketa go? Hem nao olketa anointed Christian wea laef long taem wea Christ hem King. Olketa “kasem Lord” Jesus long skae. Bat bifor olketa go ap for kasem Lord, olketa mas dae firstaem and laef bak olsem spirit. (Rom. 6:3-5; 1 Cor. 15:35, 44) From Christ hem King distaem, sapos eni anointed Christian hem dae, semtaem nomoa olketa laef bak olsem spirit nao.—1 Cor. 15:51, 52.
5:23—Wanem nao Paul minim taem hem prea for “no eni samting spoelem spirit and soul and body bilong olketa brata”? Paul hem storyim olketa anointed Christian wea olketa olsem wanfala kongregeson. Hem prea for “spirit” bilong datfala kongregeson, wea minim hem laekem kongregeson hia for gohed garem gudfala tingting. Hem prea for “soul” bilong datfala kongregeson, wea minim hem laekem for kongregeson hia gohed stap. Hem prea tu for olketa anointed Christian wea olketa olsem wanfala “body.” (1 Cor. 12:12, 13) Disfala prea wea Paul talem hem showimaot hem barava tingim olketa anointed Christian wea olsem wanfala kongregeson.
Wanem Nao Iumi Lanem?
1:3, 7; 2:13; 4:1-12; 5:15. Sapos iu laek for givim kaonsel long nara man, hem gud for iu praisem hem and talem hem wanem moa hem savve duim.
4:1, 9, 10. Pipol bilong Jehovah mas gohed fren gud witim Hem.
5:1-3, 8, 20, 21. From day bilong Jehovah hem klosap, iumi mas “garem gudfala tingting. Faith and love bilong iumi mas olsem spesol kaleko wea wanfala soldia werem for kavarem chest bilong hem. Wei wea iumi trustim God for sevem iumi, hem mas olsem hat wea soldia hem werem.” And iumi mas tingting strong tu long olketa profesi wea Bible hem talem.
“STAND STRONG”
Samfala long kongregeson talem samting wea difren from wanem Paul raetem long firstfala leta bilong hem. Olketa sei klosap nao “Lord bae stap.” So for stretem tingting bilong olketa, Paul hem storyim olketa samting wea mas ‘happen firstaem.’—2 Thess. 2:1-3.
Paul hem sei: “Stand strong and no lusim olketa samting wea mifala teachim long iufala finis.” Hem talem olketa for “no followim olketa brata wea duim olketa nogud samting.”—2 Thess. 2:15; 3:6.
Ansa for Olketa Bible Kwestin:
2:3, 8—Hu nao “datfala man for brekem law,” and long wanem wei nao bae hem finis? Datfala “man” nao hem olketa bigman bilong religion wea sei olketa Christian. Jesus Christ hem “datfala Toktok,” wea hem nao man wea toktok for God. Hem nao bae talemaot judgment bilong God long olketa rabis pipol and for finisim olketa. (John 1:1) Dastawe Bible hem sei Jesus bae finisim man wea brekem law long “toktok bilong hem.”
2:13, 14—Long wanem wei nao God chusim olketa anointed Christian for sev? Taem Jehovah planim hao seed bilong woman bae killim hed bilong Satan, long datfala taem nao Jehovah chusim olketa anointed Christian for sev. (Gen. 3:15) Jehovah talem tu wanem nao olketa mas duim, waka bilong olketa, and olketa samting wea bae testim olketa. Dastawe hem chusim olketa.
Wanem Nao Iumi Lanem?
1:6-9. Jehovah hem judgem nomoa man wea duim nogud samting.
3:8-12. From iumi savve day bilong Jehovah hem klosap, iumi mas no lesy bat iumi mas waka hard for kasem wanem iumi needim. Sapos nomoa, maet iumi “poke nose long samting wea nara pipol duim.”—1 Pet. 4:15.
“LUKAFTAREM GUD SAMTING WEA IU KASEM”
Paul talem Timothy for “gohed strong long datfala faet; for biliv strong and garem gudfala tingting.” Aposol Paul storyim olketa mark wea olketa elder and ministerial servant mas kasem. Hem talem Timothy tu for “no herem olketa laea story wea againstim samting wea holy.”—1 Tim. 1:18, 19; 3:1-10, 12, 13; 4:7.
Paul hem sei: “No tok daonem wanfala olo man.” Hem talem Timothy: “Lukaftarem gud samting wea iu kasem, no herem olketa iusles toktok wea againstim samting wea holy and no herem olketa toktok wea olketa laea and sei hem nao gudfala ‘savve.’”—1 Tim. 5:1; 6:20.
Ansa for Olketa Bible Kwestin:
1:18; 4:14—Wanem nao “olketa profesi” wea olketa nara man talem abaotem Timothy? Maet holy spirit nao mekem olketa man hia for talem olketa profesi abaotem waka wea Timothy bae duim long Christian kongregeson. Diswan happen taem Paul kasem Lystra long mek-tu missionary gogo bilong hem. (Acts 16:1, 2) Olketa elder long kongregeson followim “olketa profesi” hia and “putim hand bilong olketa antap” long Timothy for markem hem for waka wea hem bae duim.
2:15—Taem woman hem “garem pikinini,” long wanem wei nao datwan “protectim hem”? Taem woman garem pikinini and busy for lukaftarem olketa, datwan “protectim hem” for no ‘story nogud abaotem nara pipol and poke nose long samting wea olketa duim.’—1 Tim. 5:11-15.
3:16—Wanem nao datfala holy secret abaotem wei for faithful long God? For longfala taem pipol no savve sapos man hem fit for faithful evribit long Jehovah or nomoa. Jesus nao showimaot man fit for duim diswan from hem faithful long God go kasem taem hem dae.
6:15, 16—Waswe, olketa toktok hia hem abaotem Jehovah God or Jesus Christ? Olketa toktok hia hem abaotem man wea showaot, wea hem nao Jesus Christ. (1 Tim. 6:14) Jesus no olsem olketa man long earth wea king and lord, bat hem nomoa “King wea garem evri paoa,” and hem no savve dae. (Dan. 7:14; Rom. 6:9) From distaem hem stap long heven, no eni man long earth “savve lukim” hem.
Wanem Nao Iumi Lanem?
4:15. Nomata iumi baptaes no longtaem go nomoa or iumi baptaes for longfala taem finis, iumi mas kamap wanfala strong Christian and fren gud go moa witim Jehovah.
6:2. Sapos iumi waka for wanfala Witness, iumi no mekius long hem bat iumi mas hapi for waka gud for hem.
“GOHED STRONG FOR TALEMAOT TOKTOK BILONG GOD”
Paul luksavve Timothy bae kasem olketa hard taem, dastawe hem talem hem: “God no mekem iumi garem fasin for fraet, bat hem mekem iumi strong, hem mekem iumi lovem pipol, and hem mekem iumi garem gudfala tingting.” Hem talem Timothy: “Wakman bilong Lord mas no faet, bat hem mas kaen long pipol. Hem mas savve gud hao for teach.”—2 Tim. 1:7; 2:24.
Paul talem Timothy: “Gohed duim olketa samting wea iu lanem finis and wea iu barava biliv long hem nao.” From staka apostate stap, hem talem Timothy: “Gohed strong for talemaot toktok bilong God . . . , stretem wei bilong pipol, helpem olketa for gohed strong moa, strongim olketa.”—2 Tim. 3:14; 4:2.
Ansa for Olketa Bible Kwestin:
1:13—Wanem nao “wei bilong olketa gudfala toktok”? “Olketa gudfala toktok” hia hem “olketa toktok bilong Lord bilong iumi Jesus Christ.” Hem nao olketa trufala samting wea hem teachim. (1 Tim. 6:3) Evri samting wea Jesus teachim and duim hem followim Bible. Dastawe “olketa gudfala toktok” savve minim tu evri teaching long Bible. Olketa teaching hia savve helpem iumi for luksavve long olketa samting wea Jehovah laekem iumi for duim. Iumi gohed for followim wei bilong olketa gudfala toktok hia taem iumi duim wanem iumi lanem long Bible.
4:13—Wanem nao “olketa buk wea olketa wakem long skin bilong animal”? Samfala Hebrew scripture olketa raetem long buk wea olketa wakem long skin bilong animal. So maet Paul hem askem for olketa tekem kam samfala long olketa buk hia mekem hem savve studyim taem hem stap long prison long Rome.
Wanem Nao Iumi Lanem?
1:5; 3:15. Timothy lanem olketa holy raeting from taem hem pikinini yet. Dastawe hem biliv strong long Jesus Christ. Olketa dadi and mami distaem mas duim waka wea God givim long olketa. Olketa mas lanem pikinini bilong olketa!
1:16-18. Taem olketa brata and sista bilong iumi kasem hard taem, or stap long prison, iumi mas prea for olketa and helpem olketa.—Prov. 3:27; 1 Thess. 5:25.
2:22. Olketa Christian and olketa young wan tu mas no busy tumas long sports, music, hapitaem, and story nating nomoa, nogud olketa no garem taem nao for duim olketa samting wea God laekem.
[Piksa long page 31]
Wanem nao lastfala leta wea aposol Paul raetem long Bible?