Samting wea Iumi Lanem From Jesus

Abaotem Hope for Olketa wea Dae

Iumi savve Jesus mekem thrifala man laef bak. Diswan showimaot olketa wea dae finis garem hope. (Luke 7:​11-​17; 8:​49-​56; John 11:​1-​45) For minim datfala hope, firstaem iumi mas savve wanem nao mekem man dae and hao nao dae hem start.

Why Nao Iumi Sik and Dae?

Taem Jesus forgivim sin bilong pipol, olketa kamap gud nao. Tingim diswan. Taem olketa tekem go paralaes man long Jesus, hem sei olsem: “‘Eniwan nomoa savve sei, Iu kasem forgiveness for sin bilong iu.’ Bat waswe for sei, ‘Getap, and wakabaot go’? Bat mi bae pruvim long iufala Son bilong man garem paoa for forgivim sin bilong pipol.” Then hem sei long datfala man wea paralaes: ‘Getap, tekem bed bilong iu, and go bak long haos.’” (Matthew 9:​2-6) Sin nao mekem sik and dae kamap. Wei wea iumi sin hem start kam witim firstfala man, Adam.​—Luke 3:​38; Romans 5:​12.

Why Nao Jesus Dae?

Jesus nating sin nomoa. Dastawe, hem no fit for dae. Bikos Jesus dae for iumi, hem peim iumi from sin bilong iumi. Hem sei hao hem “mas pourimaot” blood bilong hem “mekem plande pipol kasem forgiveness for sin.”​—Matthew 26:28.

Jesus sei olsem tu: “Son bilong man tu bat no kam for olketa narawan mas waka for helpem hem. Hem kam for hem savve waka for helpem olketa, and for givim laef bilong hem, wea datwan hem price for sevem pipol.” (Matthew 20:28) Jesus talem hao hem peim “price” bikos datwan peim aot iumi from dae. Jesus sei olsem tu: “Mi kam mekem olketa savve kasem laef and kasem for longfala taem.” (John 10:10) For barava minim gud datfala hope abaotem olketa wea dae, iumi mas savve tu long wanem nao happen taem man dae.

Wanem Nao Happen Taem Man Dae?

Taem fren bilong Jesus Lazarus hem dae, Jesus storyim wanem nao happen taem man dae. Hem talem olketa disaepol bilong hem olsem: “‘Fren bilong iumi Lazarus hem go for rest, bat mi go [long Bethany] for wekapem hem from sleep.’ . . . Olketa tingse hem tok abaotem wei for rest taem mansleep. So long datfala taem, Jesus tok stret long olketa: ‘Lazarus hem dae finis.’” Taem Jesus story olsem, hem talem stret hao olketa wea dae sleep nomoa and no savve long eni samting.​—John 11:​1-​14.

Lazarus dae for fofala day finis taem Jesus mekem hem laef bak. Bat Bible no storyim hao Lazarus lukim or duim eni samting taem hem dae. Taem Lazarus dae, hem no savve long eni samting.​—Ecclesiastes 9:​5, 10; John 11:17-​44.

Wanem Nao Hope for Olketa wea Dae?

Olketa wea dae bae laef bak and bae garem hope for laef olowe. Jesus sei: “Taem bae kam wea evriwan wea God rememberim wea stap long grev bae herem voice bilong [Jesus] and kamaot.”​—John 5:​28, 29.

Disfala hope hem showimaot love bilong God. Jesus sei: “God lovem pipol long world tumas dastawe hem givim kam spesol Son bilong hem, mekem evriwan wea showimaot faith long hem bae no dae bat bae kasem laef olowe.”​—John 3:​16; Revelation 21:​4, 5.

Sapos iu laek savve long samfala samting moa, lukim chapter 6 long buk Wanem Nao Really Samting wea Bible Teachim?*

[Footnote]

Olketa Jehovah’s Witness pablisim.