Hem Gohed Faithful Nomata Hem Sorre Tumas

JESUS hem just dae. Taem Mary lukim wind bilong hem aot nomoa hem nildaon and krae fogud. Hem tingim wei wea Jesus safa for staka hour and hem barava singaot big bifor hem dae. Nomata hem midolday, hem dark finis. Long semtaem wea Jesus dae graon hem seksek. (Matthew 27:45, 51) Maet long tingting bilong Mary hem luk olsem Jehovah duim olketa samting hia for showimaot hem barava feel nogud long dae bilong Jesus Christ.

Taem laet hem isisi for kam bak, Mary hem stap yet long datfala ples Golgotha, wea minim Bon bilong Hed. (John 19:17, 25) Mary gohed for tingim son bilong hem. Maet hem tingim samting wea happen 33 year go finis. Taem hem and Joseph tekem baby Jesus go long temple long Jerusalem for showim hem long Jehovah, wanfala olo man wea nem bilong hem Simeon talem wanfala profesi. Hem sei Jesus bae duim olketa important samting, bat hem talem tu hao Mary bae barava sorre and feel nogud tumas from samting wea bae happen long Jesus. (Luke 2:25-35) So taem Jesus hem dae nao, Mary hem barava minim wanem Simeon hem talem.

Olketa sei taem wanfala pikinini hem dae, dadi and mami savve sorre tumas. Dae hem wanfala enemy and hem nogud samting wea iumi evriwan mas deal witim samfala taem. (Rome 5:12; 1 Corinth 15:26) Nomata olsem, waswe, iumi savve gohed faithful taem samwan iumi lovem hem dae? Bae iumi storyim laef bilong Mary start long taem wea Jesus duim ministry bilong hem go kasem taem Jesus dae. Datwan bae helpem iumi for lanem hao faith bilong Mary helpem hem, nomata long taem hem sorre tumas.

‘ENI SAMTING HEM TALEM, IUFALA DUIM NAO’

Luk olsem thri and haf year bifor Jesus dae, Mary luksavve olketa samting bae change. Nomata Nazareth hem wanfala smol taon, pipol story abaotem John Baptaesa and wei wea hem talem pipol for mas repent. Mary hem lukim hao datwan mekem Jesus luksavve hem taem for startim ministry bilong hem. (Matthew 3:1, 13) From Jesus bae go from famili bilong hem, bae hem barava no isi for Mary. Why nao olsem?

Luk olsem hasband bilong Mary, Joseph, hem dae finis. Sapos olsem, Mary hem experiencem finis datfala feeling for sorre from hem lusim samwan wea hem lovem.a Bihaen Joseph hem dae, olketa kolem Jesus “son bilong datfala carpenter,” and hem kamap “datfala carpenter” tu. Luk olsem Jesus ranem bisnis bilong dadi bilong hem and lukaftarem mami and samting olsem sixfala brata and sista bilong hem. (Matthew 13:55, 56; Mark 6:3) Maet Jesus trainim James, wea luk olsem hem second born long famili, for lukaftarem bisnis bilong olketa. Bat nomata olsem, taem hem lusim olketa bae hem no isi for famili bilong hem. Waswe, olketa samting hia mekem Mary wari tumas? Iumi no savve. Bat iumi laek for savve: Hao nao tingting bilong Mary taem Jesus wea kam from Nazareth nomoa hem kamap Jesus Christ, datfala Messiah wea pipol weitim for longtaem finis? Bible buk bilong John hem storyim diswan.—John 2:1-12.

Bihaen John baptaesim Jesus, Jesus kamap Messiah, wea minim man wea God chusim. (Luke 3:21, 22) Bihaen datwan, hem start for lukaotem olketa wea bae kamap disaepol bilong hem. Nomata waka bilong hem important, samfala taem hem enjoyim hapitaem witim famili and olketa fren bilong hem. Wantaem hem go witim mami, olketa disaepol, and olketa brata bilong hem long wanfala marit long Cana, wanfala taon wea hem samting olsem 13 kilometer from Nazareth. Long taem bilong datfala marit feast, Mary lukim samfala long famili luk wari and story smol long each other. Wine bilong olketa hem finis nao! Long kastom bilong olketa, sapos olketa no garem inaf wine long marit feast hem olsem olketa no tinghae long olketa guest. Mary sorre long famili hia and hem askem Jesus for duim samting.

Mary sei long Jesus: “Olketa no garem eni wine nao ia.” Wanem nao Mary laekem Jesus for duim? From hem savve Jesus hem wanfala spesol man, maet hem tingse Jesus savve duim wanfala mirakol. Hem olsem hem sei long son bilong hem, “Plis duim samting for helpem olketa!” Mary mas seke long wanem Jesus talem. Hem sei: “Datwan hem no wari bilong iumi ia!” Samfala sei Jesus no showimaot respect long mami bilong hem, bat datwan hem no tru. Toktok bilong hem showimaot nomoa hem no fitim for Mary talem hem hao for duim waka bilong hem. Dadi bilong hem Jehovah nomoa fit for duim datwan.

Mary acceptim wanem son bilong hem talem bikos hem woman wea hambol and garem wei for luksavve long samting. Mary sei long olketa wea waka long datfala marit: “Eni samting wea hem talem, iufala duim nao.” Mary luksavve nao hem no waka bilong hem for talem son bilong hem wanem for duim, bat hem and olketa narawan shud followim wanem Jesus talem. Luk olsem Jesus tingim tufala wea just marit, olsem mami bilong hem. Hem duim firstfala mirakol bilong hem for changem wata for kamap gudfala wine. Diswan showimaot paoa wea Jesus garem and datwan mekem olketa disaepol and Mary tu biliv long Jesus. Nomata Jesus hem son bilong Mary, hem ting long Jesus olsem Lord and man wea bae sevem hem.

Example bilong Mary savve helpem olketa mami and dadi. Hem tru, no eniwan garem pikinini wea perfect olsem Jesus. Bat taem pikinini kamap big, mami and dadi mas lane for deal witim diswan long gudfala wei. Dadi or mami maet duim olketa samting wea showimaot tufala ting long hem olsem smol pikinini yet, bat maet datwan no fitim. (1 Corinth 13:11) Wanem nao tufala savve duim for helpem olketa big pikinini bilong tufala? Iu savve talem son or dota bilong iu, iu savve hem bae gohed followim wanem Bible talem and Jehovah bae blessim hem for datwan. Taem iu duim olsem, datwan bae encouragem pikinini bilong iu for duim gud samting. Masbi Jesus tinghae long wei wea Mary sapotim hem taem hem duim ministry bilong hem.

‘OLKETA BRATA BILONG JESUS NO BILIVIM GOD NAO SENDEM HEM KAM’

Long thri and haf year wea Jesus duim ministry bilong hem, Bible no storyim staka samting abaotem Mary. Luk olsem long datfala taem hem widow wea garem olketa smol pikinini for lukaftarem. So hem no savve gogo witim Jesus taem hem preach long Israel. (1 Timothy 5:8) Bat hem gohed for ting raonem olketa samting hem lanem abaotem datfala Messiah and hem go long olketa meeting long sinagog, olsem famili bilong hem savve duim olowe.—Luke 2:19, 51; 4:16.

Maet Mary hem long sinagog taem Jesus story long evriwan wea hipap long there. Masbi hem barava hapi taem hem herem Jesus talem olketa hem nao datfala Messiah wea olketa profet profesi abaotem! Bat masbi hem feel nogud taem hem lukim olketa narawan long Nazareth no bilivim datwan, and olketa trae for killim dae son bilong hem!—Luke 4:17-30.

Hem mas sorre tu for lukim olketa nara son bilong hem no biliv long Jesus. John 7:5 showimaot fofala brata bilong Jesus no olsem mami bilong olketa wea biliv long Jesus. Datfala scripture sei: “Olketa no bilivim God nao sendem kam Jesus.” Bible no storyim tingting bilong olketa sista bilong Jesus abaotem hem.b Nomata olsem, Mary hem experiencem wei wea hem no isi for stap witim olketa long famili wea no evriwan biliv long Jesus. Hem mas gohed for duim wanem Jehovah laekem and long semtaem trae for helpem olketa narawan long famili for biliv long Jesus, bat hem no forcem olketa.

Wanfala taem, luk olsem olketa brata bilong Jesus and samfala nara relative disaed for go “tekem” Jesus bikos olketa sei: “Man hia mas krangge nao ia.” (Mark 3:21, 31) Mary hem savve Jesus hem no krangge, bat maet hem go witim olketa boy bilong hem bikos hem hope olketa maet lanem samting wea bae helpem olketa for biliv long Jesus. Waswe, olketa changem tingting bilong olketa? Nomata Jesus duim staka mirakol and teachim olketa nambawan samting, olketa boy hia no savve biliv long hem. Waswe, Mary hem tingse olketa no savve change and hem laek for givap?

Waswe, samfala long famili bilong iu no worshipim Jehovah? Example bilong Mary savve helpem iu. Hem no givap for helpem olketa narawan long famili bilong hem wea no biliv. Bat hem trae for duim samting wea showimaot wanem hem bilivim mekem hem hapi and no wari tumas. And tu, hem gohed for sapotim Jesus. Waswe, samfala taem Mary tingim hem bae naes sapos Jesus hem stap witim olketa? Sapos hem ting olsem, hem no storyim datwan. Hem luksavve hem wanfala privilege for sapotim and encouragem Jesus. Waswe, iu savve followim example bilong Mary and helpem olketa pikinini for mekem olketa spiritual samting nao first samting long laef bilong olketa?

“IU BAE BARAVA SORRE AND FEEL NOGUD TUMAS”

Waswe, Mary kasem gud samting from hem biliv long Jesus? Jehovah blessim olketa wea showimaot faith and hem blessim Mary tu. (Hebrew 11:6) Masbi Mary hapi taem hem herem Jesus preach and teach, or taem hem herem olketa narawan tok abaotem olketa samting wea Jesus storyim long olketa.

Taem Mary lisin long olketa tokpiksa bilong Jesus, maet hem herem Jesus storyim samfala samting wea hem lukim taem hem growap long Nazareth. Long olketa tokpiksa hia, Jesus story abaotem wanfala woman wea brumim full haos bilong hem for lukaotem coin wea hem lusim, olketa woman wea hammerim wheat for wakem bred, and man wea laetem laet and putim long ples wea olketa man savve lukim. Maet datwan mekem Mary tingim taem Jesus hem smol and hem savve followim Mary taem hem duim olketa samting hia. (Luke 11:33; 15:8, 9; 17:35) Taem Jesus sei bae hem no hard for man karem samting wea hem askem hem for karem, maet Mary tingim wanfala taem wea Joseph teachim Jesus hao for wakem and sheipim wanfala yoke mekem hem isi for wanfala animal karem samting. (Matthew 11:30) Masbi Mary barava tinghae long privilege wea Jehovah givim long hem for lukaftarem and trainim pikinini wea bae kamap datfala Messiah. Hem mas barava hapi for lukim wei wea Jesus savve tumas hao for helpem pipol for lanem olketa important samting taem hem storyim olketa samting wea pipol savve long hem and wea olketa duim evriday!

Nomata Mary feel olsem abaotem Jesus, hem no praod. Son bilong hem no sei hem spesol winim olketa nara woman, and hem no talem pipol for worshipim mami bilong hem. Wantaem wanfala woman sei long Jesus: “Woman wea bornem iu and susum iu nao hem hapi.” Bat Jesus hem sei: “Nomoa ia, Olketa wea herem toktok bilong God and obeyim datwan nao olketa hapi!” (Luke 11:27, 28) Taem samfala talem Jesus mami and olketa brata bilong hem stap aotsaed, hem sei olketa wea duim wanem God hem laekem, olketa nao mami and brata bilong hem. Luk olsem disfala toktok no mekem Mary feel nogud, bat hem luksavve hem important for stap witim pipol wea tinghae long olketa spiritual samting.—Mark 3:32-35.

Nomata olsem, Mary hem barava sorre tumas taem hem lukim son bilong hem safa and dae long wanfala post. Aposol John, wea lukim olketa samting wea happen taem Jesus dae, sei hem lukim Mary “standap klosap long post wea olketa nilam Jesus long hem.” From Mary barava lovem son bilong hem, hem stap witim hem go kasem taem hem dae. Jesus lukim Mary standap long there and from hem tingim hem, nomata body bilong hem pain tumas taem hem story, hem talem fren bilong hem aposol John, for lukaftarem mami bilong hem. From olketa haf brata bilong Jesus no biliv long hem yet, Jesus talem man wea biliv long hem for lukaftarem mami bilong hem. Samting wea Jesus duim showimaot hem important for man wea worshipim Jehovah for lukaftarem famili bilong hem, especially saed long olketa spiritual samting.—John 19:25-27.

Olsem Simeon profesi abaotem, taem Jesus hem dae Mary barava sorre and feel nogud tumas. Bat thrifala day bihaen datwan, Mary herem Jesus hem laef bak. Diswan hem wanfala mirakol wea winim eni narawan. Tingim, masbi Mary hem hapi tumas! And tu, Mary mas hapi narawe taem hem herem, Jesus kam story seleva long haf brata bilong hem James. (1 Corinth 15:7) Luk olsem datwan helpem James and olketa nara haf brata bilong Jesus for biliv long hem. Olketa start for “prea tugeta evritaem” long olketa Christian meeting. (Acts 1:14) Gogo James raetem wanfala buk long Bible and Jude, nara haf brata bilong Jesus, raetem wanfala buk tu.

Lastfala taem wea Bible storyim Mary, hem duim samting wea showimaot gudfala wei bilong hem. Mary hem stap witim olketa son bilong hem long meeting, and olketa prea tugeta. Hem showimaot gudfala example for iumi! Mary hem gohed faithful nomata hem sorre tumas taem Jesus hem dae, and hem kasem nambawan reward for datwan. Sapos iumi followim faith bilong hem, iumi tu savve gohed faithful nomata iumi kasem eni hard taem and Jehovah bae barava blessim iumi.