Mek-125 Gilead Graduation

Olketa Missionary Mas Olsem Jeremiah

GEOFFREY JACKSON long Governing Body tok olsem: “Wanfala important samting long history bilong Gilead Skul hem happen long disfala class.” Hem story kam long 6,156 wea kam long graduation bilong mek-125 class bilong Wastaoa Bible Skul bilong Gilead wea kamap long September 13, 2008. Disfala Gilead Skul sendem winim 8,000 missionary go finis long “evri farawe ples long earth”! Olketa 56 student long disfala class tu insaed disfala namba hia.​—⁠Acts 1:⁠8.

Brata Jackson, wea hem chairman long graduation program, hem askem kwestin hia: “Sapos pipol bilivim and trustim iu, waswe, bae datwan helpem ministry bilong iu?” Then hem talem fofala samting wea savve mekem pipol bilivim and trustim man. First wan, tingim gudfala saed bilong samting. Mek-tu, showimaot gudfala wei. Mek-thri, teachim nomoa wanem Bible talem. And mek-foa, evritaem talemaot nem bilong God, Jehovah.

David Schafer, wea hem wanfala long Teaching Komiti, hem storyim theme, “Waswe, Bae Iu Minim Evri Samting?” Hem talem olketa Gilead student hao maet olketa no “minim evri samting” abaotem niu languis wea olketa lanem and wei bilong pipol long kantri wea olketa go long hem. Bat hem sei sapos olketa gohed duim wanem Jehovah laekem and luksavve long “datfala wakaman wea faithful and wise,” diswan nao bae helpem olketa for kamap olketa gudfala missionary.​—⁠Prov. 28:5; Matt. 24:⁠45.

Then John Barr long Governing Body givim tok, “No Duim Eni Samting wea Bae Spoelem Wei wea God Lovem Iu.” Kaonsel wea Brata Barr givim hem strongim olketa student witim dadi and mami bilong olketa, and helpem olketa for no wari abaotem olketa samting wea maet kasem olketa niu missionary long assignment bilong olketa. Hem storyim hao “taem God lovem iumi, datwan nao mekem iumi hapi and stap gud.” No eni samting savve spoelem wei wea God lovem olketa missionary, bat olketa seleva nomoa savve spoelem datwan.

Sam Roberson, wea hem mek-tu overseer long Theocratic Skul Department long Patterson Bethel, encouragem evriwan for werem tokpiksa “nambawan kaleko bilong olketa.” Taem olketa student studyim wanem Jesus duim and followim datwan, olketa savve werem olsem kaleko “wei bilong Lord Jesus Christ.” (Rom. 13:14) William Samuelson, wea hem overseer long datfala Theocratic Skul Department, hem mekhae long wanem nao mekem man hem gudfala man. Wei wea God ting long man nao showimaot sapos hem gudfala man, and no wei wea pipol ting long datfala man.

Michael Burnett, wea hem wanfala teacher long datfala skul, hem interviewim olketa student abaotem taem wea olketa go preach. Taem olketa student skul long Gilead Skul long Patterson, New York, staka long olketa go preach long territory wea olketa nara brata and sista duim staka taem finis. Nomata olsem, olketa meetim pipol wea interest. Gerald Grizzle long Convention Office interviewim thrifala brata wea go long Skul for Olketa Branch Komiti Member. Wanem thrifala brata hia storyim helpem olketa student for tingim samting wea bae kamap long assignment bilong olketa.

David Splane wea go long mek-42 class bilong Gilead and wea member long Governing Body givim tok, “Iufala Mas Olsem Jeremiah.” Nomata Jeremiah fraet lelebet for duim waka wea Jehovah askem hem for duim, Jehovah strongim hem. (Jer. 1:​7, 8) God bae duim sem samting tu for olketa niu missionary. Brata Splane tok olsem: “Sapos iu no fren gud witim wanfala man, raetem tenfala wei bilong man hia wea iu barava tinghae long hem. And sapos iu no savve kasem ten, hem minim iu no savve gud nomoa long datfala man and iu mas trae hard for savve gud long hem.”

Jeremiah no tingim hemseleva nomoa. Taem hem laek stop nao for duim waka bilong hem, hem prea long Jehovah, and Jehovah helpem hem. (Jer. 20:11) Brata Splane sei: “Taem iu feel wikdaon, storyim diswan long Jehovah. Hem bae helpem iu long wei wea maet iu nating tingim nomoa.”

Long end bilong graduation program, chairman talem audience hao olketa student lanem staka samting wea olketa savve duim for mekem pipol bilivim and trustim olketa. Taem pipol trustim olketa missionary, datwan bae mekem pipol tinghae long message wea olketa talemaot.​—⁠Isa. 43:​8-​12.

[Box long page 22]

OLKETA LONG CLASS

Haomas kantri olketa kam from: 6

Haomas kantri olketa bae go long hem: 21

Haomas student: 56

Average age: 32.9

Average year long truth: 17.4

Average year long full-taem ministry: 13

[Piksa long page 23]

Mek-125 Class Bilong Wastaoa Bible Skul bilong Gilead

List long daon start long front and go bihaen, and olketa nem start long left saed go long raet saed bilong each laen.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.