Olketa Nogud Fren Mekem Jehoash for Lusim Jehovah

HEM wanfala barava nogud taem long Jerusalem, datfala ples wea temple bilong God hem stap. Olketa just killim dae King Ahaziah. And then Athaliah, mami bilong Ahaziah, duim wanfala barava nogud samting. Hem talem olketa for killim dae olketa boy bilong Ahaziah, olketa granson bilong hem! Iu savve why nao hem duim datwan?​—⁠a Mekem hem nao rulim pipol and no eniwan long olketa.

Bat olketa sevem Jehoash wea baby nomoa, wanfala granson bilong Athaliah. Grani bilong hem nating savve abaotem diswan. Iu laek for savve hao nao olketa duim datwan?​—⁠ Jehosheba, aunty bilong Jehoash haedem hem long temple bilong God. Hem savve duim datwan bikos hasband bilong hem Jehoiada, hem wanfala Hae Priest. So tufala evriwan nao keepim Jehoash for stap sef.

Olketa haedem Jehoash long temple for sixfala year. And olketa lanem hem abaotem Jehovah God and olketa law bilong hem. Gogo, taem Jehoash hem seven year, Jehoiada tekem Jehoash for kamap king. Waswe, iu laek for savve hao nao Jehoiada duim diswan and wanem nao happen long rabis grani bilong Jehoash, Queen Athaliah?​—⁠

Jehoiada hipimap evri spesol gard wea olketa king long Jerusalem garem long datfala taem. Hem talem olketa hao hem and waef bilong hem sevem nao baby boy bilong King Ahaziah. Then Jehoiada showim Jehoash long olketa gard and olketa luksavve hao hem nao fit for rulim pipol. Olketa redyim wanfala plan.

Jehoiada tekem kam Jehoash and putim crown bilong king long hem. And olketa pipol “klapem hand bilong olketa and sei: ‘Iu nao king for olowe!’” Olketa gard stap raonem Jehoash for protectim hem. Taem Athaliah herem olketa singaot, hem ran kamaot and trae for stopem. Bat Jehoiada talem olketa gard for killim dae Athaliah.​—⁠2 Kings 11:​1-​16.

Waswe, iu tingse Jehoash gohed followim toktok bilong Jehoiada and duim stret samting?​—⁠ Ia, hem duim olsem taem Jehoiada laef. Dadi bilong Jehoash, Ahaziah, and grani bilong hem Jehoram no lukaftarem gud temple bilong God, bat Jehoash talem pipol for givim selen for wakem bak. Bat wanem nao happen taem Hae Priest Jehoiada hem dae?​—⁠2 Kings 12:​1-​16.

Jehoash hem samting olsem 40 year long datfala taem. Winim wei for gohed fren witim olketa wea worshipim Jehovah, Jehoash start for garem olketa fren wea worshipim olketa giaman god. Zechariah, son bilong Jehoiada hem priest bilong Jehovah long datfala taem. Iu tingse Zechariah duim wanem, taem hem savve Jehoash hem duim olketa rabis samting?​—⁠

Zechariah talem Jehoash olsem: ‘Bikos iu lusim Jehovah, hem tu bae lusim iu.’ Olketa toktok hia mekem Jehoash barava kros and hem talem olketa for sutim dae Zechariah long ston. Tingim nomoa, Jehoash sev from samwan wea laek for killim hem dae, bat distaem, hemseleva kamap man wea killim dae Zechariah!​—⁠2 Chronicles 24:​1-3, 15-​22.

Wanem nao iumi savve lanem from disfala story?​—⁠ Iumi no laek for olsem Athaliah wea heitim and spoelem pipol. Bat iumi mas lovem olketa wea worshipim God and olketa wea heitim iumi tu, olsem Jesus talem iumi for duim. (Matthew 5:​44; John 13:​34, 35) And tingim hao for gohed duim gudfala samting olsem Jehoash duim firstaem, iumi mas gohed for garem olketa fren wea lovem Jehovah and wea bae strongim iumi for worshipim hem.