Jehoiada Hem No Fraet

Jezebel garem wanfala dota wea nem blo hem Athaliah, wea hem wicked tu olsem mami blo hem. Athaliah hem maritim wanfala king blo Judah. Taem hasband blo hem dae, son blo hem nao rul. Bat taem son blo hem dae, Athaliah mekem hemseleva for queen blo Judah. Then hem trae for spoelem evriwan lo laen blo king, hem killim dae eniwan wea bae rul for changem hem, even olketa granson blo hem. Evriwan fraetem hem.

Hae Priest Jehoiada and waef blo hem, Jehosheba, savve wat Athaliah duim hem nogud tumas. Tufala riskim laef blo tufala for haedem wanfala lo olketa granson blo Athaliah, wanfala baby wea nem blo hem Jehoash. Tufala tekem hem and lukaftarem hem lo temple.

Taem Jehoash seven years old, Jehoiada sendem toktok go lo olketa leader and olketa Levite and talem olketa olsem: ‘Gaedem olketa door lo temple, and no letem eniwan kam insaed.’ Then Jehoiada mekem Jehoash for hem king blo Judah and putim wanfala kraon lo hed blo hem. Pipol lo Judah singaot olsem: “King, iu laef for longtaem!”

Taem Queen Athaliah herem noes blo olketa pipol hia, hem ran go lo datfala temple. Taem hem lukim datfala niu king, hem singaot olsem: “Olketa againstim queen! Olketa againstim queen!” Olketa leader grabim datfala wicked queen, tekem hem go aot, and killim hem dae. Bat wat nao happen lo olketa nogud samting wea Athaliah bin duim wea affectim datfala nation?

Jehoiada helpem datfala nation for mekem wanfala covenant witim Jehovah wea olketa promis for worshipim Hem nomoa. Jehoiada talem olketa for brekem daon datfala temple blo Baal and smasem olketa idol blo hem. Hem appointim olketa priest and olketa Levite for waka lo temple mekem olketa pipol savve worshipim Jehovah lo there moa. Hem assignim olketa narawan for security lo gate blo temple, mekem eniwan wea no klin no savve kam insaed. Then Jehoiada and olketa leader tekem Jehoash go lo palace and mekem hem sidaon lo throne. Olketa pipol lo Judah hapi tumas. Olketa savve worshipim Jehovah, and free nao from wicked Queen Athaliah and from Baal worship. Hao, iu lukim from Jehoiada no fraet hem helpem staka pipol?