Born Insaed World wea No Garem Feeling!

WANFALA baby hem born insaed world wea no garem feeling, world wea fulap witim hevi. Nomata baby kanduit really talemaot feeling bilong hem, samfala scientist biliv dat bifor hem born, baby savve wanem nao go ahed for happen.

Wanfala buk The Secret Life of the Unborn Child hem sei: “Distaem iumi savve hao baby wea no born yet hem wanfala person wea start from taem hem six month insaed bele (and maet bifor datwan) hem feelim evri samting.” Samfala scientist tingse nomata baby maet no remember, hevi wea baby hia kasem taem hem born bae affectim hem taem hem growap.

Bihaen hem born, hem go ahed for kasem hevi. Taem hem aotsaed long bele bilong mami, baby hem mas kasem kaikai long difren wei. Datfala cord wea givim hem air and kaikai hem nomoa nao. For laef, hem mas start for brith and kaikai seleva. Hem needim samwan for feedim hem and givim olketa nara samting wea hem needim.

Datfala baby wea just born mas grow long tingting, feeling, and spiritual wei. So samwan nao mas bringimap datfala baby. Hu nao barava fit for duim datwan? Wanem nao datfala baby needim from parents bilong hem? Wanem nao best wei for provaedem olketa need bilong hem? Tufala next article bae help for ansarem olketa kwestin hia.