Taem Samwan Mekem Iu Feel Nogud
PLANDE pipol tingse hem gud nomoa for pei bak. Hem wei bilong man for feel nogud taem samwan mekem hem kros or duim nogud samting long hem. Iumi man born witim wei for barava laek stretem samting wea no stret. Hao nao olsem?
Staka samting nao mekem pipol laek for pei bak, olsem taem man slapem man, pushim, tok spoelem, tok raf, attakim, stealim, and samfala samting moa. Hao nao iu feel taem samwan duim kaen samting olsem long iu? Plande pipol distaem tingting olsem, ‘mi mas pei bak nao ia!’
Long America, samfala hae skul student talem laea toktok againstim olketa teacher wea panisim olketa. Brenda Mitchell, wea hem president bilong Teacher’s Union long New Orleans, hem sei: “Sapos olketa student laea againstim teacher, nem bilong datfala teacher hem nogud nao.” Nomata sapos olketa pruvim olketa student laea nomoa, bae pipol ting daonem yet datfala teacher from nogud toktok wea olketa student talem.
Long olketa waka ples, plande wakaman wea no hapi duim samting for againstim and spoelem boss bilong olketa long wei for spoelem or aotem olketa important information from olketa computer bilong company. Samfala wakaman stealim olketa secret information bilong company and salem or givim free long olketa narawan. The New York Times reportim tu hao wei “for stealim olketa nara samting bilong company,” hem wanfala wei for pei bak. For stopem kaen wei olsem, taem company sakem wanfala wakaman, plande taem olketa markem wanfala security for stap witim hem, mekem hem no tekem eni samting taem hem kolektem olketa samting bilong hemseleva go kasem taem hem go aot.
Main wan for pei bak nao hem olketa wea iumi savve gud, olsem olketa fren and olketa insaed famili. Hem isi tumas for pei bak taem samwan mekem iumi feel nogud long toktok and samting wea olketa duim. Sapos wanfala fren tok raf long iu, waswe, bae iu kwiktaem talem nogud toktok long hem? Sapos eniwan insaed famili mekem iu feel nogud, waswe, iu plan for pei bak? Hem isi tumas for duim olsem taem samwan wea iumi fren gud witim mekem iumi feel nogud!
Hem Krangge for Pei Bak
Staka taem, olketa wea laek for pei bak duim olsem bikos olketa laek for feel gud bak moa. Tingim story from Bible, taem olketa son bilong datfala Hebrew man Jacob herem Shechem from Canaan spoelem Dinah sista bilong olketa, olketa “barava feel nogud and gogo olketa kros tumas.” (Genesis 34:1-7) Tufala son bilong Jacob plan for pei bak long Shechem and famili bilong hem for nogud samting wea hem duim long Dinah. Simeon and Levi laea long olketa and killim dae Shechem and evri man long datfala taon long Canaan.—Genesis 34:13-27.
Waswe, wei for killim dae staka pipol olsem stretem datfala problem? Taem Jacob herem samting wea olketa son bilong hem duim, hem tok strong long olketa and sei: “Iufala mekem mi shame taem iufala mekem mi olsem samting wea smel nogud long pipol long datfala ples, . . . and bae olketa hipap for againstim and attakim mi and mi bae barava finis nao, mi and haos bilong mi.” (Genesis 34:30) Tru nao, winim wei for stretem datfala problem, difren samting nao kamaot from wanem olketa duim. Famili bilong Jacob mas lukaot, nogud olketa neiba wea kros attakim olketa. For stopem famili bilong Jacob for no kasem eni trabol olsem, Jehovah talem Jacob for tekem famili bilong hem and muv go long Bethel.—Genesis 35:1, 5.
Samting wea kamaot from wei wea Shechem rapem Dinah teachim iumi wanfala important leson. Wei for pei bak savve mekem narawan for duim sem samting, and kaen wei olsem no savve finis.
Wei for Pei Bak wea No Savve Finis
For tingim olowe wei for pei bak long man wea duim nogud samting long iumi savve spoelem iumi. Disfala buk Forgiveness—How to Make Peace With Your Past and Get On With Your Life story olsem: “Wei for kros savve kontrolem iu. Taem iu tingim olowe nogud samting wea kasem iu bifor, datwan kontrolem taem and strong bilong iu bikos iu tingim nomoa wanem for talem and planim wei for pei bak.” Bible talem klia hao “wei for jealous savve mekem olketa bon rotten.”—Proverbs 14:30.
Hard for man hapi sapos hem heitim narawan or gohed for feel nogud olsem. Wanfala man talem olsem: “Sapos iu tingse hem gud nomoa for pei bak lukim feis bilong olketa wea garem kaen tingting olsem for staka year.”
Tingim samting wea happen long samfala ples wea ethnic tension and olketa raoa abaotem religion spoelem feeling bilong pipol. Plande taem wei for killkill just mekem wei for heit and killim dae narawan kamap moa big. Tingim disfala example, taem wanfala bomb killim dae 18-fala young pipol long wanfala terrorist attak, wanfala woman wea sorre singaot olsem, “Iumi shud pei bak wan thousand taem!” Long wei olsem, wei for raf kamap big go moa, and plande pipol moa join insaed long raoa.
“Sapos Man Spoelem Eye Bilong Narawan, Olketa Mas Spoelem Eye Bilong Hem”
Samfala tingse Bible hem sapotim wei for pei bak. Olketa sei, “Waswe, Bible no talem ‘sapos man spoelem eye bilong narawan, olketa mas spoelem eye bilong hem, and sapos hem brekem teeth bilong narawan olketa mas brekem teeth bilong hem tu’?” (Leviticus 24:20) Maet luk olsem law wea sei “sapos man spoelem eye bilong narawan, olketa mas spoelem eye bilong hem” mekhae long wei for pei bak. Bat for tok stret, datfala law stopem wei for pei bak. Long wanem wei?
Sapos wanfala Israelite attakim narawan and aotem eye bilong hem, datfala Law mekwe for datfala man kasem panis wea stret. Nomata olsem, hem no fitim man wea no guilty for duim samting againstim datfala man or famili bilong hem. Law hia talem for datfala man mas go long olketa wea garem paoa for judge, for disaedem datwan. Bikos olketa Israelite savve hao criminal or man wea duim nogud samting bae kasem panis, datwan helpem olketa for no duim eni nogud samting. Bat samfala samting moa insaed datwan.
Bifor Jehovah givim datfala law for pei bak, hem talem Moses for talem olketa Israelite olsem: “Iu mas no heitim brata bilong iu insaed heart bilong iu. . . . Iu mas no pei bak or kros olowe long pipol bilong iu.” (Leviticus 19:17, 18) Hem tru, law hem sei “sapos man spoelem eye bilong narawan, olketa mas spoelem eye bilong hem, and sapos hem brekem teeth bilong narawan olketa mas brekem teeth bilong hem tu,” bat datwan mas fitim mining bilong Law covenant. Jesus storyim hao tufala main samting nao hem for, “Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu” and “Iu mas lovem narawan long sem wei wea iu lovem iuseleva.” (Matthew 22:37-40) Wanem nao olketa tru Christian mas duim sapos nogud samting kasem olketa?
Duim Samting for Garem Peace
Bible storyim Jehovah olsem “God bilong peace” and hem talem olketa wea worshipim hem for “lukaotem peace and aftarem.” (Hebrews 13:20; 1 Peter 3:11) Bat waswe, datwan stretem problem?
Taem Jesus duim preaching waka, samfala spit long hem, whipim hem, againstim hem, Judas givim Jesus go long enemy, and olketa wea followim hem lusim hem. (Matthew 26:48-50; 27:27-31) Wanem nao Jesus duim? Aposol Peter sei olsem: “Taem pipol tok spoelem hem, hem no tok spoelem olketa. Taem hem safa, hem no trae for changem bak, bat hem gohed for trustim datwan wea judge long raeteous wei.”—1 Peter 2:23.
Peter talem tu: “Christ hem safa for iufala. Hem showim example bilong hem mekem iufala followim gud.” (1 Peter 2:21) Hem tru, Bible talem olketa Christian for followim Jesus, so datwan minim for followim wanem hem duim taem hem safa. Jesus story abaotem diswan taem hem sei: “Gohed lovem olketa enemy bilong iufala and for prea for olketa wea spoelem iufala. Diswan bae showimaot iufala nao olketa son bilong Dadi bilong iufala long heven.”—Matthew 5:44, 45.
Wanem nao olketa wea showimaot semkaen love wea Christ showimaot duim taem pipol spoelem olketa or maet olketa tingse samwan duim rong samting long olketa? Proverbs 19:11 hem sei: “Wei for luksavve barava daonem kros, and for forgetim rong samting hem naes tumas.” Olketa followim disfala toktok: “No letem olketa rabis wei for winim iufala, bat iufala mas gohed strong long gudfala wei mekem iufala winim evri rabis wei.” (Romans 12:21) Hem barava difren from wei bilong world for pei bak evritaem! Trufala Christian love savve helpem iumi for winim wei for laek pei bak and “forgetim rong samting” bikos love “no tingim olowe rong samting wea samwan duim.”—1 Corinthians 13:5.
Waswe, diswan minim sapos iumi kasem nogud samting or samwan laek spoelem iumi, iumi shud acceptim nomoa? Barava nomoa nao! Taem Paul sei for “Gohed strong long gudfala wei mekem iufala winim evri rabis wei,” datwan no minim wanfala Christian shud no duim eni samting nomoa and laek dae. Bat for tok stret, taem samwan laek for attakim iumi, iumi fit for protectim iumiseleva. Sapos samwan spoelem iu or olketa samting wea iu ownim, iu savve askem olketa police for helpem iu. Sapos samwan wea iu waka witim or long skul garem problem witim iu, iu savve askem samfala man wea garem paoa for helpem iu.—Romans 13:3, 4.
Nomata olsem, hem gud for tingim hao wei for barava stretem problem distaem hem no isi plande taem. For tok stret, plande wea trae hard for stretem problem savve iusim staka taem, bat olketa barava feel nogud taem problem no savve finis.
Satan iusim wei for laek pei bak and heitim narawan for separatem pipol. (1 John 3:7, 8) Hem barava important for tingim wanem Bible talem: “Olketa fren bilong mi, iufala no pei bak, bat letem God nao showimaot kros bilong hem bikos olketa raetem finis: ‘Mi nao bae pei bak, Jehovah hem talem.’” (Romans 12:19) Taem iu letem Jehovah nao for duim part bilong hem, iumi free nao from bigfala sorre, kros, and raf wei.—Proverbs 3:3-6.
[Piksa long page 30]
“Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu” and “Iu mas lovem narawan long sem wei wea iu lovem iuseleva”
[Piksa long page 31]
Love “hem no tingim olowe rong samting wea samwan duim.”—1 Corinthians 13:5