Gohed Mekem God Hapi Nomata Eni Change Kamap
WASWE, eni samting kamap wea mekem laef bilong iu for change? Waswe, hem hard for iu acceptim datwan? Diskaen samting savve kasem evriwan. Samfala example from bifor savve helpem iumi for luksavve long olketa wei wea iumi mas garem.
Tingim staka change wea kamap long laef bilong David. Hem wanfala young shepherd boy nomoa taem Samuel markem hem for kamap king. Taem hem young yet, hem willing for faet witim Goliath, datfala giant long Philistine. (1 Sam. 17:26-32, 42) David kasem invitation taem hem young for stap long haos bilong King Saul and hem markem David tu for kamap komanda bilong army. David nating expectim olketa change olsem bae kamap long laef bilong hem, and nara samting wea bae happen.
Saul start for kros long David and hem no trustim hem nao. (1 Sam. 18:8, 9; 19:9, 10) David mas ranawe for laef bilong hem and stap haed for samfala year. Taem David king long Israel, laef bilong hem barava change bihaen hem duim adultery, and hem killim man dae for haedem datfala sin. Gogo, famili bilong hem kasem staka problem from sin wea hem duim. Wanfala problem nao, Absalom son bilong David, hem bighed againstim hem. (2 Sam. 12:10-12; 15:1-14) Nomata olsem, Jehovah forgivim sin bilong David bihaen hem barava sorre long wanem hem duim, and God hem hapi moa long hem.
Maet samfala samting kamap wea mekem laef bilong iu tu for change. Problem saed long health, selen, or famili, and tu samting wea iuseleva duim nao savve mekem olketa change kamap long laef bilong iu. Wanem nao samfala wei wea iumi savve followim for helpem iumi taem olketa change olsem kamap?
Wei for Hambol Savve Helpem Iumi
Wei for hambol, hem minim wei for willing for stap anda. Trufala wei for hambol hem mekem iumi for minim gud, wei bilong iumiseleva and olketa narawan. Taem iumi no ting daonem wei bilong narawan, diswan helpem iumi for tinghae long olketa and wanem olketa duim. Long sem wei tu, wei for hambol savve helpem iumi for minim gud why samting kasem iumi and wanem for duim.
Jonathan son bilong Saul, hem gudfala example saed long diswan. Olketa bigfala change kamap long laef bilong hem wea hem no savve kontrolem datwan. Taem Samuel talem Saul hao Jehovah bae finisim hem olsem king, hem no sei Jonathan bae kamap nextfala king. (1 Sam. 15:28; 16:1, 12, 13) God chusim David nao for kamap king long Israel. From Saul no obey, datwan spoelem nao Jonathan. Nomata Jonathan no guilty long datwan, hem no savve changem dadi bilong hem. (1 Sam. 20:30, 31) Wanem nao Jonathan duim abaotem datwan? Waswe, hem kros or jealous long David? Nomoa nao. Nomata hem mature and maet savve long staka samting winim David, Jonathan barava sapotim hem. (1 Sam. 23:16-18) Wei for hambol helpem hem for luksavve hu nao God markem for kamap king, and hem ‘no tinghae tumas long hemseleva.’ (Rom. 12:3) Jonathan luksavve long wanem Jehovah laekem hem for duim and hem acceptim datfala change.
Hem tru, staka change mekem samfala hard samting for kamap. Jonathan hem fren gud witim David wea Jehovah nao markem hem for kamap king. Long semtaem dadi bilong hem Saul, gohed for king nomata Jehovah les long hem. Diswan mas mekem Jonathan wari tumas taem hem trae for duim samting wea Jehovah hapi long hem. Olketa change wea affectim iumi savve mekem iumi wari or fraet. Bat sapos iumi trae for minim tingting bilong Jehovah abaotem datwan, iumi bae fit for gohed faithful for servem hem taem eni change kamap.
No Tinghae Tumas Long Seleva
Wei for no tinghae tumas long seleva, hem minim for luksavve long wanem iumiseleva fit for duim. Wei for hambol and wei for no tinghae tumas long seleva, tufala difren lelebet. Nomata wanfala man hem hambol, maet hem no savve wanem hemseleva no fit for duim.
David savve wanem hemseleva fit for duim. Nomata Jehovah chusim David for kamap king, hem no start for rul stretawe. Bible no talem sapos Jehovah talem eni samting long David abaotem why hem mas weit. Diswan fit for mekem hem feel nogud, bat hem nating warim datwan. Hem luksavve long wanem hemseleva fit for duim, and hem savve hao Jehovah bae duim samting long taem wea hem markem. So nomata laef bilong David stap long danger, hem no willing for killim dae Saul and hem stopem Abishai for no duim datwan.—1 Sam. 26:6-9.
Samfala taem, samting savve kamap long kongregeson bilong iumi wea iumi no minim, and long tingting bilong iumi olketa no stretem gud datwan. Waswe, bae iumi luksavve long wanem iumi fit for duim and luksavve tu hao Jesus nao Hed bilong kongregeson wea hem iusim olketa elder for lukaftarem datwan? Waswe, bae iumi luksavve long wanem iumi fit for duim wea Jehovah hapi long hem and weitim Jesus Christ for duim samting abaotem datwan? Waswe, bae iumi luksavve long wanem iumi fit for duim and weit, nomata diswan no isi?—Prov. 11:2.
Hem Gud for No Kros Kwiktaem
For hambol, hem minim iumi no kros kwiktaem. Wei for no kros kwiktaem helpem iumi for patient and gohed strong nomata eni samting spoelem iumi. Datwan helpem iumi tu for no keepim kros olowe and for no pei bak. Hem no isi for no kros kwiktaem. Word wea Bible iusim for no kros kwiktaem, hem minim wei for hambol and wei for no tingim seleva, and tu for showimaot gudfala wei and no raf. Bible hem sei: “Iufala wea hambol lukaotem hambol wei.” (Zeph. 2:3) Man wea no kros kwiktaem savve kamap gud long spiritual wei taem hem willing for lane from Jehovah and change.
Hao nao wei for no kros kwiktaem savve helpem iumi taem eni change kamap? Staka pipol tingse olketa change wea kamap long laef hem nogud samting. Bat tru samting nao, taem eni change kamap olsem hem chance wea Jehovah savve lanem iumi. Wanfala example long diswan nao samting wea kamap long laef bilong Moses.
Taem Moses hem 40 year, hem showimaot finis samfala nambawan wei. Hem showimaot hem tingim need bilong pipol bilong God and hem no tingim hemseleva. (Heb. 11:24-26) Bat bifor Jehovah assignim Moses for leadim olketa Israelite from Egypt, samfala change kamap long laef bilong Moses wea lanem hem for no kros kwiktaem. Hem mas ranawe from Egypt and go stap long Midian for 40 year. Hem lusim hae position bilong hem and hem waka olsem man for lukaftarem sheepsheep. Wanem nao kamaot from datwan? Disfala change helpem hem for lanem samfala niu wei. (Num. 12:3) Hem lane for tingim olketa spiritual samting firstaem winim wanem hemseleva laekem.
Tingim wei bilong Moses for no kros kwiktaem. Jehovah talem Moses hem bae lusim olketa Israelite from olketa no obey, and mekem laen bilong Moses for kamap bigfala nation. (Num. 14:11-20) Long datfala taem Moses askem Jehovah for no duim datwan. Samting wea Moses hem tingim nao hem nem bilong God and olketa brata bilong hem, and no wanem hemseleva laekem. Man wea leadim olketa Israelite and helpem olketa fren witim God, mas olsem Moses wea no kros kwiktaem. Miriam and Aaron komplen againstim Moses, nomata olsem Bible sei, Moses “hambol winim evri nara man wea stap long earth.” (Num. 12:1-3, 9-15) Luk olsem Moses no kros kwiktaem nomata olketa tok spoelem hem. Sapos Moses hem kros kwiktaem, hard for hem stretem datfala problem long gudfala wei.
Long narataem, spirit bilong Jehovah hem kasem samfala man and hem mekem olketa for talem profesi. Joshua wea hem wakaman bilong Moses, tingse olketa Israelite hia ova tumas. Bat Moses hem no kros kwiktaem bikos hem garem tingting bilong Jehovah and hem no warim position bilong hem. (Num. 11:26-29) Sapos Moses hem kros kwiktaem, hard tumas for hem acceptim datfala change insaed arrangement bilong Jehovah.
From Moses no kros kwiktaem, hem fit for duim gud disfala important waka wea God givim hem. Jehovah askem Moses for go ap long Maunt Horeb. Then Moses stand ap front long olketa pipol and God iusim wanfala angel for story long Moses and markem hem olsem man wea mekem agreement kamap midolwan long God and olketa lsraelite. Wei wea Moses no kros kwiktaem mekem hem for acceptim disfala big change long position bilong hem and gohed for mekem God hapi long hem.
Waswe long iumi? Wei for no kros kwiktaem hem important tumas for helpem iumi gohed gud. Evriwan wea kasem privilege and responsibility insaed organization bilong God, mas no kros kwiktaem. Diswan savve mekem iumi no praod taem eni change kamap and helpem iumi garem gudfala tingting. Samting wea iumi duim nao hem important. Waswe, bae iumi acceptim eni change? Waswe, bae iumi tingim diswan olsem chance for kamap gud go moa? Nomata eni change kamap, iumi shud ting long datwan olsem gudfala taem for lane for no kros kwiktaem!
Evritaem laef hem savve change. Samfala taem hem no isi for minim why nao samting olsem happen. Olketa samting wea affectim iumi and feeling for wari savve mekem hem hard for iumi gohed for garem tingting bilong God. Nomata olsem, wei for hambol, no tinghae tumas long seleva, and wei for no kros kwiktaem, bae helpem iumi acceptim olketa change wea kamap and gohed for duim samting wea God hem hapi long hem.
[Box long page 4]
Trufala wei for hambol hem mekem iumi for minim gud, wei bilong iumiseleva
[Box long page 5]
Wei for no kros kwiktaem hem important tumas for helpem iumi gohed gud
[Piksa long page 5]
Samfala hard samting kamap long laef bilong Moses wea lanem hem for no kros kwiktaem